०९०

उपश्वसे द्रुवये सीदता यूयं +++(Bhatt. druvaye)+++
वि विच्यध्वं यज्ञियासस् तुषैः ।
श्रिया समानान् अति सर्वान्त् स्याम- +++(Bhatt. sarvāṃ)+++
-अधस्पदं द्विषतस् पादयेम ॥

इयं ते धीतिर् इदम् उ ते जनित्रं
गृह्णातु त्वाम् अदितिः शूरपुत्रा ।
परा पुनीहि य इमां पृतन्यवो
अस्मै रयिं सर्ववीरं नि यच्छ ॥

परेहि नारि पुनर् एहि क्षिप्रम्
अपां त्वा गोष्ठो अध्य् अरुक्षद् भराय ।
तासां गृह्णीताद् यतमा यज्ञिया
असन् विभाज्य धीरीतरा जिहीतात् ॥

एमा अगुर् योषितः शुम्भमाना
उत् तिष्ठ नारि तवसं रभस्व । +++(Bhatt. tapataṃ)+++
सुपत्नी पत्या प्रजावत्या त्वा- +++(Bhatt. prajāvatyā)+++
-अगन् यज्ञः प्रति कुम्भं गृभाय ॥ +++(Bhatt. tvākaṃ)+++

ऊर्जो भागो निहितो यः पुरा व +++(Bhatt. vo)+++
ऋषिप्रशिष्टाप आ हरैताः ।
अयं यज्ञो नाथविद् गातुवित् प्रजाविद्
उग्रः पशुमद् वीरविद् वो अस्तु ॥ +++(Bhatt. paśuvad)+++

अग्ने चरुर् यज्ञियस् त्वाध्य् अरुक्षच्
छुचिस् तपिष्ठस् तपसा तपैनम् ।
आर्षेया दैवा अभिसंगत्य भागम्
इमं तपिष्ठा ऋतुभिस् तपन्तु ॥

शुद्धा आपो योषितो यज्ञिया इमा +++(Bhatt. yakṣiyā, misprint?)+++
आपश् चरुम् इव सर्पन्तु शुभ्राः ।
ददत् प्रजा बहुलान् पशून् मे
पक्तौदनस्य सुकृताम् एतु लोकम् ॥

ब्रह्मणा शुद्धा उत पूता घृतेन
सोमस्यांशवस् तण्डुला यज्ञिया इमे ।
अपः प्र विशतु प्रति गृह्णातु वश्
चरुर् इमं पक्त्वा सुकृताम् एतु लोकम् ॥ +++(Bhatt. paktā)+++

अभ्यावर्तस्व प्रजया सहैनां
प्रत्यङ् एनं देवताभिः सहैधि ।
स्वर्गं लोकम् अभि सं वहैनम्
आदित्यो देवः परमं व्योम ॥

उरुः प्रथस्व महता महिम्ना
सहस्रपृष्ठः सुकृतस्य लोके ।
पितामहाः पितरः प्रजोपज-
-अहं पक्त्वा पञ्चदशस् ते अस्मि ॥