०२०

केवलीन्द्राय दुदुहे हि गृष्टिर्
वशं पीयूषं प्रथमं दुहाना ।
अथातर्पयच् चतुरश् चतुर्धा
देवान् मनुष्याꣳ असुरान् उतर्षीन् ॥

अष्टेन्द्रस्य षड् यमस्य
ऋषीणां सप्त सप्तधा ।
अपो मनुष्यान् ओषधीस्
तान् उ पञ्चानु सेचिरे ॥

को नु गौः क एकर्षिः
किम् उ साम का आशिषः ।
यक्ष्मं पृथिव्याम् एकवृद्
एकर्तुः कतमो नु सः ॥

एको गौर् एक एकर्षिर्
एकं सामैकधाशिषः ।
यक्ष्मं पृथिव्याम् एकवृद्
एकर्तुर् नाति रिच्यते ॥