००७

दर्भो अग्र ओषधीनां
शतकाण्डो अजायत ।
स सहस्रवीर्यः
परि णः पातु विश्वतः ॥

यथा दर्भो जायमानस्
त्वचं भिनत्ति भूम्याः ।
एवा स भिद्यतां जनो
यो नः पापं चिकित्सति ॥

अप नाडम् अप कृत्याम्
अप रक्षः सदान्वाः ।
अमीवाश् चातयामसि
सर्वाश् च यातुधान्यः ॥

अस्ति वै निवत उद्वनं
न वै सर्वम् अनुप्लवम् ।
असि त्वं तस्य दूषणो
यो नः पापं चिकित्सति ॥

परि सायं परि प्रातः
परि मध्यंदिनं परि ।
दर्भो हिरण्यहस्तघ्नः
परि णः पातु विश्वतः ॥

गिरौ जातः स्वर् अहासि
साकं सोमेन बभ्रुणा ।
मा पापकृत्वनः शिषो
मा पाकः पुरुषो रिषत् ॥

दिवो मूलम् अवततं
पृथिव्याम् ओत आहितः ।
दर्भः सहस्रवीर्यः
परि णः पातु विश्वतः ॥

सहस्रकाण्डस् तविषस्
तीक्ष्णवल्शो विषासहिः ।
दर्भेण सर्वा रक्षांस्य्
अमीवाश् चाप दहामसि ॥

अपदग्धं दुष्वप्न्यम्
अपदग्धा अरातयः ।
सर्वाश् च यातुधान्यः ॥

मा त्वा दभन् यातुधाना
मा ब्रध्नः शकुनिः पतन् ।
दर्भो राजा समुद्रियः
परि णः पातु विश्वतः ॥