०१७

प्रति त्यं चारुम् अध्वरं
गोपीथाय प्र हूयसे ।
मरुद्भिर् अग्न आ गहि ॥

नहि देवो न मर्त्यो
महस् तव क्रतुं परः (…) ॥

ये महो रजसो विदुर्
विश्वे देवासो अद्रुहः (…) ॥

ये शुभ्रा घोरवर्पसः
सुक्षत्रासो रिशादसः (…) ॥

य उग्रा अर्कम् आनृचुर्
अनाधृष्टास ओजसा (…) ॥

ये नाकस्याधि रोचने
दिवि देवास आसते (…) ॥

य ईङ्खयन्ति पर्वतान्
तिरः समुद्रम् ओजसा (…) ॥

आ ये तन्वन्ति रश्मिभिस्
तिरः समुद्रम् अर्णवम् (…) ॥

अभि त्वा पूर्वपीतये
सृजामि सोम्यं मधु (…) ॥

आ यन्तु मरुतो गणै
स्तुता दधतु नो रयिम् (…) ॥

आ त्वा कण्वा अहूषत
गृणन्ति विप्र ते धियः ।
मरुद्भिर् अग्न आ गहि ॥