०१०

दशवृक्ष मुञ्चेमम्
अंहसो ग्राह्याश् च ।
अथो एनं वनस्पते
जीवानां लोकम् उन् नय ॥

यश् चकार स निष् करत्
स एव सुभिषक्तमः ।
स एव तुभ्यं भेषजं
चकार भिषजाति च ॥

चीतिं ते देवा अविदन्
ब्रह्माण उत वीरुधः ।
चीतिं ते ऽद्योत्तमाम्
अविदन् भूम्याम् अधि ॥

आगाद् उद् अगाद् अयं
जीवानां व्रातम् अप्य् अगात् ।
अभूद् उ पुत्राणां पिता
नृणां च भगवत्तमः ॥

अधीतिम् अध्य् अगाद् अयम्
अधि जीवपुरा अगात् ।
शतं च यस्य वीरुधः
सहस्रम् उत भेषजा ॥