संस्कृते विश्वासटिप्पन्यः

अस्

{विन्यस्}
अस् (असु क्षेपे)।
‘गुणांश्च सूपशाकाद्यान्पयो दधि घृतं मधु। विन्यसेत् प्रयतः पूर्वं भूमावेव…’ (मनु० ३।२२६)॥ विन्यसेत्=विन्यस्येत् विभज्य न्यस्येत् निदध्यात्।
‘त्वदर्थमिव विन्यस्ता… शिला’ (रा० २।९६।६)। विन्यस्ता निहिता।
‘सुतविन्यस्तपत्नीकः’ (याज्ञ० ३।४५)। पुत्रार्पितपत्नीक इत्यर्थः।
‘व्यूढौ विन्यस्तसंहतौ’ (अमरः)।

कृ

{विनिकृ}
कृ (डुकृञ् करणे)।
‘यो ज्येष्ठो विनिकुर्वीत लोभाद् भ्रातॄन्यवीयसः’ (मनु० ९।२१३)। विनिकुर्वीत वञ्चयेतेति कुल्लूकः। अपकुर्यात्, अपराध्नुयात्, तदर्थं हन्याद् इत्यन्ये।
‘तत्त्वया चरता लोके धर्मो विनिकृतो महान्’ (रा० ६।११।१८)। विनिकृतो लङ्घितः।
‘विश्वामित्रो विनिकृतो विनिःश्वस्येदमब्रवीत्’ (रा० १।५६।२२)। विनिकृतस्तिरस्कृत इति कतकः। निरस्तसर्वशक्तिरिति तिलककारो रामः।
‘वीरो विनिकृतो भ्रात्रा जगद् भ्रमति दुःखितः’ (रा० ४।३।२०)। विनिकृतो निरस्तः।
‘राज्याद् विनिकृतोस्माभिः कथं सोस्मासु विश्वसेत्’ (भा० शल्य० ५।७)। विनिकृतो विनाकृतः।
‘शरण्यं सर्वभूतानां (मुनिं) पित्रा विनिकृतं तव’ (भा० आदि० ५०।७)। विनिकृतमपकृतं तिरस्कृतम्।
‘नामित्रो विनिकर्तव्यः’ (भा० शां० ९६।१५)। निकृत्या वञ्चयितव्य इत्यर्थः।
‘अथ यो विनिकुर्वीत ज्येष्ठो भ्राता यवीयसः’ (भा० अनु० १०५।७)। विनिकुर्वीत शाठ्यमाचरेत्।

कृत्

{विनिकृत्}
कृत् (कृती छेदने)।
‘विनिकृत्तानि दृश्यन्ते शरीराणि शिरांसि च’ (भा० वन० १६०।५३)। विनिकृत्तानि खण्डितानि शकलीकृतानि।

कॄ

{विनिकॄ}
कॄ (कॄ विक्षेपे)।
‘विनिकीर्णानि योधानां वदनानि चकाशिरे’ (भा० द्रोण० ८९।८)। इतस्ततो विक्षिप्तानीत्यर्थः।
‘विनिकीर्णधनुर्बाणं दृष्ट्वा निहतमर्जुनम्’ (भा० वन० ३१३।२)। उक्तोऽर्थः।
‘विनिकीर्णः… भीमबलाद् हतः’ (राक्षस:) (भा० वन० ११।७३)। व्यायताङ्गः पतित इत्यर्थः।
‘सिद्धचारणसङ्घैश्च विनिकीर्णः…’ (महाशैलः) (रा० ४।४१।३३)। विनिकीर्ण आकीर्णः।
‘क्व नु मां त्वदधीनजीवितां विनिकीर्य क्षणभिन्नसौहृदः। …असि विद्रुतः’ (कु० ४।६)॥ विनिकीर्य सावहेलं परित्यज्य।

क्षिप्

{विनिक्षिप्}
क्षिप् (क्षिप प्रेरणे)।
‘रक्षांसि रक्षांसि विनिक्षिपन्ति’ (रा० ५।११।१२)। अधः पातयन्ति।
‘या दिव्या इति मन्त्रेण हस्तेष्वर्घ्यं विनिक्षिपेत्’ (याज्ञ० १।१।२३०)। विनिक्षिपेत्। निदध्यात्, दद्यात्।
‘कृत्स्नमेते विनिक्षिप्ताः प्रतिरूपेषु कर्मसु’ (भा० शां ८०।३०)। विनिक्षिप्ता अधिकृताः। प्रतिरूपेष्वनुरूपेषु।

गम्

{विनिगम्}
गम् (गम्लृ गतौ)।
‘तत्रान्यतरार्थं क्रियेत यदि विनिगमनायां हेतुर्भवेत्’ (मी० शा० भा० ४।१।२२)।

ग्रह्

{विनिग्रह्}
ग्रह् (ग्रह उपादाने)।
‘द्विपा वा बलिनो राजन् वृषभा वा महाबलाः॥ विनिग्राह्या यदि मया निग्रहीष्यामि तानपि’ (भा० वि० ४।३३)। विनिग्राह्या वशे करणीयाः, दमनीयाः।
‘न हि दण्डादृते शक्यः कर्तुं पापविनिग्रहः’ (मनु० ९।२६३)। पापनिरोधः। पापाद् वारणम्।
‘न्यवेति विनिग्रहार्थीयौ’ (नि० १।३।१३)। नीचैर्निधानार्थकावित्यर्थः।
‘अह इति च ह इति च विनिग्रहार्थीयौ’ (नि० १।५।२-३)। अवधारणार्थकावित्यर्थः। विनिग्रहो नाम विभागेनावस्थितयोर्देवदत्तयज्ञदत्तयोरेकतरस्मिन्यज्ञदत्तेऽभिमते गोपायनस्य नियमेन ग्रहणमिति दुर्गः।
‘शिरःसु विनिगृह्यैतान् योधयामास पाण्डवैः’ (भा० आदि० १२८।१७)। विनिगृह्य दृढं गृहीत्वेत्यर्थः।
‘कर्णस्तु वेदनां धैर्यादसह्यां विनिगृह्य तां’ (भा० शां० ३।९)। विनिगृह्य विनियम्य

धा

{विनिधा}
धा (डुधाञ् धारणपोषणयोः)।
‘त्रेधात्मानं विन्यधत्त पृथिव्यां तृतीयम्’ (तै० सं० २।४।१२।३)।
‘तत्त्रेधा विन्यधत्त पशुषु तृतीयम्’ (तै० ब्रा० १।१।६।१)। विभज्य न्यधादित्यर्थ:।
‘तदासां पाप्मनो विनिदध्यात्’ (श० ब्रा० १४।४।१।११)। उक्तोऽर्थः।
‘विनिधाय ततो भारं संनिधाय फलानि च’ (भा० आदि० ७३।३१)। विनिधाय स्कन्धादवतार्य, व्यपरोप्य।
‘स्तनविनिहितमपि हारम्’ (गीत० ११)। विनिहितो निहितः। विशब्दो न विशेषकृत्।
‘मधुगन्धघृतफणितानि विनिधाय द्विगुणा द्वितीयमासे लब्धिः’ (बृ० सं० ४१।५)। विनिधाय संचित्य संगृह्य एकीकृत्य।
‘तस्य वैते वयं घोरास्तनू र्विनिधास्यामः’ (शां० ब्रा० १।१)। विनिधास्यामः पृथङ् निधास्यामः।

ध्वंस्

{विनिध्वंस्}
ध्वंस् (ध्वंसु अवस्रंसने गतौ च)।
‘भूमौ बाणैर्विनिध्वस्तां पतितां ज्यामिवायुधात्’ (गोरेसियो सं० रा० २।१२५।१३)। विनिध्वस्ताम् अवस्रस्ताम्, व्यायतपातं पतिताम्।

पत्

{विनिपत्}
पत् (पत्लृ गतौ)।
‘एतं कदम्बमारुह्य तदेव शिशुलीलया। विनिपत्य ह्रदे घोरे दमयिष्यामि कालियम्’ (हरि० २।११।५९)॥ विनिपत्य=अवप्लुत्य।
‘तस्करा विनिपत्य ??म्। हृतस्वामनयन् बद्ध्वा स्वपल्लीम्…’ (कथा० २२।६२)॥ विनिपत्य उपद्रुत्य, आक्रम्य।
‘त्वदर्थमेतद् विनिपात्यमानं देहं त्वयैव प्रतिमोचितं मे’ (मार्क० पु० १७२।१५)। विनिपात्यमानं हन्यमानम्।
‘भर्तारं नानुमन्यन्ते विनिपातगतं स्त्रियः’ (रा० २।३९।२०)। विनिपातगतं कृच्छ्रमुपेतम्।
‘विवेकभ्रष्टानां भवति विनिपातः शतमुखः’ (भर्तृ० २।१०)। विनिपातः पातः, विपच्च।
‘विधिहेतुरहेतुरागसां विनिपातोपि समः समुन्नतेः’ (कि० २।३४)। विनिपातो भ्रंशः।
‘जपतां जुह्वतां चैव विनिपातो न विद्यते’ (मनु० ४।१४६)। विनिपातो दैवमानुषोपद्रवः।
‘विवादे विद्याभिजनसम्पन्ना वृद्धा मेधाविनो धर्मेष्वविनिपातिनः’ (आप० ध० २।११।२९।५)। विनिपातः प्रमादः। अविनिपातिनोऽप्रमादिनः।
‘विनिपतिततुषारः क्रौञ्चनादोपगीतः’ (ऋतु० ४।८१)। विनिपतितः पतितः। नार्थो विनिभ्याम्।
‘कटेन पातितो यामि’ (मृच्छ० २।८)।

पद्

{विनिपद्}
पद् (पद गतौ)।
‘एते चान्ये च बहवो बलवन्तो दुरासदाः। विनिपन्ना मया दृष्टाः’ (रा० ७।२२।२८)। विनिपन्ना परासवो भूशायिनः। निपद्यतिः शयने रूढः।

मे

{विनिमे}
मे (मेङ् प्रणिदाने)।
‘वर्णयाकर्णितं मह्यमेह्यालि विनिमीयताम्’ (नै० २०।११३)। विनिमीयतां परिवृत्तिः क्रियताम्।
‘सम्पद्विनिमयेनोभौ दधतुर्भुवन ??म्’ (रघु० १।२६)। विनिमयः परस्परं प्रणिदानम्।
‘तेजोवारिमृदां यथा विनिमयः’ (भा० पु० १।१।१)। इत्यत्र विनिमयो व्यत्ययोऽन्यस्मिन्नानावभास इति श्रीधरः। कवेरभिमतोऽयमर्थः कल्पितोऽन्यत्र दुर्लभः।

यम्

{विनियम्}
यम् (यम उपरमे)।
‘यथा कूर्म इहाङ्गानि प्रसार्य विनियच्छति। एवमेवेन्द्रियग्रामं बुद्धिः सृष्ट्वा नियच्छति’ (भा० शां० २४७।१४)॥ विनियच्छति संहरति प्रतिसंहरति संकोचयति।
‘प्रमोहं विनियच्छति’ (भा० अनु० १४।४१७)। वारयति, विधेयीकरोतीति वाऽर्थः।
‘विनियताहारः’ (रा० ३।६।७)। मिताहार इत्यर्थः।

युज्

{विनियुज्}
युज् (युजिर् योगे)।
‘विनियुञ्जीत राज्ये त्वां गोविन्दवचनेन च’ (भा० शल्य० ४।४७)। विनियुञ्जीत नियुञ्जीत निवेशयेत्। विशब्द इहार्थान्तरप्रतीतिकृन्न।
‘यथा सम्राडेवाधिकृतान् विनियुङ्क्ते’ (प्रश्नोप० ३।४)। उक्तोऽर्थः।
‘गृहाणीव हि मर्त्यानामाहुर्देहानि पण्डिताः। कालेन विनियुज्यन्ते…’ (भा० स्त्री० ३।८)॥ विनियुज्यन्ते विप्रयुक्तानि भवन्ति, सापगमानि भवन्तीत्यर्थः।
‘प्रत्येकं विनियुक्तात्मा कथं न ज्ञास्यसि प्रभो’ (कु० २।३१)। विनियुक्तः संनियुक्तः।
‘हयेषु विनियुक्तेषु विमुखोभवदाहवे’ (भा० आदि० १३८।५३)। विनियुक्ता रथेभ्यो वियुक्ता विमुक्ताः विषिता इत्यर्थः। अत्र विर्विरोधवचनः। धात्वर्थविपर्यासकृत्।
‘विनायकः कर्मविघ्नसिद्ध्यर्थं विनियोजितः’ (याज्ञ० १।२७१)। विनियोजितो व्यापारितः।
‘रक्षार्थं यज्ञवाटस्य पाण्डवान्विनियुज्य च’ (हरि० २।८४।४)। विनियुज्य व्यापार्य। यज्ञवाटरक्षाकर्म पाण्डवेषु निक्षिप्य समर्प्येत्याह।
‘अहेति विनियोगे च’ (पा० ८।१।६१)। नानाप्रयोजनो नियोगो विनियोगः।
‘आर्षं छन्दश्च दैवत्वं विनियोगस्तथैव च। अनेनेदं तु कर्तव्यं विनियोगः प्रकीर्तितः॥ बभूव विनियोगज्ञः साधनीयेषु वस्तुषु’ (रघु० १७।६७)। विनियोगः प्रयोग उपयोगः।
‘विनियोगप्रसादा हि किङ्कराः प्रभविष्णुषु’ (कु० ६।६२)। विनियोगः कृत्यनिर्वहणे व्यापारणा। कर्तव्यभारनिक्षेपः।
‘नानाप्रयोजनो नियोगो विनियोगः’ (पा० ८।१।६१ सूत्रे वृत्तौ)। त्वमह ग्रामं गच्छ। त्वमहारण्यं गच्छेत्युदाहरणम्। पुस्तक उदाहरणं नादायीति तदिह दीयते।

विश्

{विनिविश्}
विश् (विश प्रवेशने)।
‘जनपदविनिवेशः’ (कौ० अ० १)। विनिवेशः संनिवेश एकत्रावस्थितिः।
‘स्विन्नाङ्गुलिविनिवेशो रेखाप्रान्तेषु दृश्यते मलिनः’ (शा० ६।१५)। विनिवेशश्चिह्नं लक्ष्म।

वृ

{विनिवृ}
वृ (वृञ् आवरणे)।
‘वातोपि निश्चरंस्तत्र प्रवेशे विनिवार्यते’ (भा० आदि० ४२।३२)। विनिवार्यते प्रतिषिध्यते। अपार्थको विः। निस्तु निषेधस्य द्योतकः।
‘तत्कर्म कृत्वा विनिवार्य भूयः’ (श्वेता० उ० ६।३)। विनिवार्य प्रत्यवेक्षणं कृत्वेति शङ्करः।

वृत्

{विनिवृत्}
वृत् (वृतु वर्तने)।
‘विषया विनिवर्तन्ते निराहारस्य देहिनः’ (गीता २।५९)। पराङ्मुखा भवन्तीत्याह।
‘सपिण्डता तु पुरुषे सप्तमे विनिवर्तते’ (मनु० ५।६०)। विनिवर्तते निवर्तते नानुवर्तते विरमतीत्यर्थः।
‘इक्ष्वाकुवंशजो राजा विनिवृत्तः स्ववंशकृत्’ (हरि० २।२३।५)। विनिवृत्तो विनष्टः। निवृत्तसत्ताक इति तु पदार्थः।
‘यस्मादपत्यकामो वै भर्ता मे विनिवर्तितः’ (भा० अनु० ८४।७४)। विनिवर्तितः पराङ्मुखीकृतः।

स्था

{विनिष्ठा}
स्था (ष्ठा गतिनिवृत्तौ)।
‘एवं व्यादिश्य विप्रौ तु क्रियास्तत्र (नृपवेश्मनि) विनिष्ठितौ’ (रा० २।३।२०)। विनिष्ठितौ स्थितौ। नेहोपसर्गौ विनी अन्तरमर्थे कुरुतः।

हन्

{विनिहन्}
हन् (हन हिंसागत्योः)।
‘लोकाः स्वस्था भवन्त्यद्य तस्मिन्विनिहतेऽसुरे’ (हरि० १।११।३७)। विनिहते हते। अपार्थकौ विनी।

क्रम्

{विनिक्रम्}
क्रम् (क्रमु पादविक्षेपे)।
‘यथा प्रविश्यान्तरमन्तकस्य को वै मनुष्यो हि विनिष्क्रमेत’ (भा० वन० १२०।१५)। विनिष्क्रामेत्=निर्गच्छेत्। काले मनुष्यो न विनिष्क्रमेतेति पाठान्तरम्।