26 अपशूद्राधिकरणम्

शुगस्य तदनादरश्रवणात्तदाद्रवणात्सूच्यते हि ।

हंसेनानादरश्रुत्या तदैवाद्रवणाद्गुरौ । शूद्रेत्यामन्त्रणं शोकात् न शूद्रस्त्वागतः स हि ॥ [98]

क्षत्रियत्वगतेश्च ।

जानश्रुतेस्तु तत्रैव बहुदायित्वदर्शनात् । क्षत्रियत्वं गम्यतेऽतो न शूद्रस्याधिकारिता ॥ [99]

उत्तरत्र चैत्ररथेन लिङ्गात् ।

उपरिष्टाच्च विद्यायां क्षत्रियत्वं तु गम्यते । अयाजयंश्चैत्ररथं कापेया इति लिङ्गतः ॥ [100]

संस्कारपरामर्शात् तदभावाभिलापाच्च ।

ब्रह्मविद्याप्रकरणे संस्कारपरिमर्शनात् । संस्काराभाववचनान्न शूद्रस्याधिकारिता ॥ [101]

तदभावनिर्धारणे च प्रवृत्तेः ।

जाबालस्य तु शुश्रूषोः शूद्रत्वाभावनिश्चये । उपदेशप्रवृत्तेश्च न शूद्रस्याधिकारिता ॥ [102]

श्रवणाध्ययनार्थप्रतिषेधात् ।

आम्नायश्रवणाध्याययागादिप्रतिषेधतः । उपासनेऽप्यधीकारो न शूद्रस्येति निश्चितम् ॥ [103]

स्मृतेश्च ।

न चास्योपदिशेद्धर्ममित्यादिस्मृतितस्तथा । उपासने नाधिकारः शूद्रस्येति च गम्यते ॥ [104]