25 मध्वधिकरणम्

मध्वादिष्वसम्भवादनधिकारं जैमिनिः ।

मध्वादिषु वसूनां चानधिकारं तु जैमिनिः । प्राप्तत्वाच्च वसुत्वस्याऽनर्थित्वान्मनुते मुनिः ॥ [95]

ज्योतिषि भावाच्च ।

ज्योतिर्होपासते देवाः इत्येवं ब्रह्मचिन्तने । अधिकारप्रतीत्यैषामन्यत्रानधिकारिता ॥ [96]

भावं तु बादरायणोऽस्ति हि ।

जन्मान्तरे वसुत्वस्य प्राप्त्यर्थं स्वतनोर्भवेत् । परस्योपासनं तेषां बादरायण आह हि ॥ [97]