14 अन्तराधिकरणम्

अन्तर उपपत्तेः।

अक्ष्यन्तर्वर्तिपुरुषो जीवबिम्बसुरात्परः । अमृतत्वाभयत्वादिगुणानामुपपत्तितः ॥ [45]

स्थानादिव्यपदेशाच्च।

यश्चक्षुषीति श्रुत्या च स्थानादिव्यपदेशतः । नित्यन्तृत्वामृतत्वादिगुणेभ्यश्च परः पुमान् ॥ [46]

सुखविशिष्टाभिधानादेव च।

कं ब्रह्मेति सुखाढ्यस्य ध्यानार्थमिह चाक्षणि । अभिधानात्स्थितेरत्र ह्यक्ष्यन्तःस्थः परः पुमान् ॥ [47]

अत एव च स ब्रह्म।

तस्मात् कं ब्रह्म खं ब्रह्मेत्यत्राकाशस्य कीर्तनात् । अक्ष्याधारतया तस्य त्वाकाशो हि परः पुमान् ॥ [48]

श्रुतोपनिषत्कगत्यभिधानाच्च।

श्रुतोपनिषदां या च गतिरुक्ताऽर्चिरादिका । सैवात्रोपासकस्योक्तेत्यतोऽपि स परः पुमान् ॥ [49]

अनवस्थितेरसंभवाच्च नेतरः।

नियमेनाक्षण्यवृत्तेर्न जीवोऽक्षिगतस्त्विह । नियन्तृत्वामृतत्वादिपूर्वोक्तासंभवाच्च हि ॥ [50]