०५ आधार-शक्त्य्-आदि-परिकल्पनम्

आसनं कल्पयेद् एवम्
आधारादि यथाक्रमम् ।
आधारशक्तिं प्रकृतिं
कूर्मं शेषं धराधरम् ॥ 181

आसनं कल्पयेदेवम् आधारादि यथाक्रमम् ।
आधारशक्तिं प्रकृतिं कूर्मं शेषं धराधरम् ॥ 181

पृथिवीं चोपर्य् उपरि
न्यस्य मन्त्रैः प्रणम्य च ।
तत्र क्षीरार्णवं श्वेत-
द्वीपं श्रीरङ्गम् एव च ॥ 182

पृथिवीं चोपर्युपरि न्यस्य मन्त्रैः प्रणम्य च ।
तत्र क्षीरार्णवं श्वेतद्वीपं श्रीरङ्गमेव च ॥ 182

परम-व्योम वैकुण्ठं
वैष्णवं धाम शाश्वतम् ।
एतेष्व् अन्यतमं देशं
ध्यात्वा देवगृहं स्वकम् ॥ 183

परमव्योम वैकुण्ठं वैष्णवं धाम शाश्वतम् ।
एतेष्वन्यतमं देशं ध्यात्वा देवगृहं स्वकम् ॥ 183

तेन तेन च मन्त्रेण
स्मृत्वा ऽभ्यर्च्य प्रणम्य च ।
तत्रानन्तात्मकं दिव्यम्
आस्तीर्यास्तरणं शुभम् ॥ 184

तेन तेन च मन्त्रेण स्मृत्वाऽभ्यर्च्य प्रणम्य च ।
तत्रानन्तात्मकं दिव्यम् आस्तीर्यास्तरणं शुभम् ॥ 184

तत्र वह्न्यादिकोणेषु
योगपीठस्य पादकान् ।
धर्मं ज्ञानं च वैराग्यम्
ऐश्वर्यं च यथाक्रमम्॥ 185

तत्र वह्न्यादिकोणेषु योगपीठस्य पादकान् ।
धर्मं ज्ञानं च वैराग्यम् ऐश्वर्यं च यथाक्रमम्॥ 185

विन्यस्य मन्त्रैस् तद्-अनु
दिक्षु पूर्वादिषु क्रमात्।
ऋगादीन् चतुरो वेदान्
हय-वक्त्रान् स्व-मौलिभिः।186

विन्यस्य मन्त्रैः तदनु दिक्षु पूर्वादिषु क्रमात्।
ऋगादीन् चतुरो वेदान् हयवक्त्रान् स्वमौलिभिः।186

दधतो योगपीठं तम्
उत्क्षिप्तैः स्वभुजैर् अपि।
कृतादींश् च युगांस् तद्वत्
वृष-वक्त्रान् अवस्थितान्॥187

दधतो योगपीठं तम् उत्क्षिप्तैः स्वभुजैरपि।
कृतादींश्च युगांस्तद्वत् वृषवक्त्रानवस्थितान्॥187

ततो गात्राणि पीठस्य
प्रागादिषु निवेशयेत्।
अधर्माज्ञानावैराग्यानैश्वर्याह्वान-देवताः।188

ततो गात्राणि पीठस्य प्रागादिषु निवेशयेत्।
अधर्माज्ञानावैराग्यानैश्वर्याह्वानदेवताः।188

प्रणम्याभ्यर्च्य तन्-मन्त्रैस्,,
ततस् सत्त्वं, रजस्, तमः।
तन्-मध्ये फलकाः कुर्यात्
मन्त्रैः स्वैः प्राग्-उपक्रमात्॥189
+++(कीदृशम् इदं कल्पनीयम्??)+++

वणङ्गि
नम:पदम् सेर्न्द अददन् मन्द्रङ्गळाल् अर्च्चित्तु
सत्तुव रजस् तमो गुणङ्गळागिऱ मूण्ड्रु पलगैगळैक्किऴक्किनिण्ड्रु तॊडङ्गिच् चेर्त्तु-

प्रणम्याभ्यर्च्य तन्मन्त्रैः ततस्सत्त्वं रजस्तमः।
तन्मध्ये फलकाः कुर्यात् मन्त्रैः स्वैः प्रागुपक्रमात्॥189

एवं सद्-आत्मकं पीठम्
अनन्तात्मकम् उज्ज्वलम्।
सर्व-कार्योन्मुखं स्मृत्वा
तन्-मन्त्रेणाभि-पूज्य च॥190

एवं सदात्मकं पीठमनन्तात्मकमुज्ज्वलम्।
सर्वकार्योन्मुखं स्मृत्वा तन्मन्त्रेणाभिपूज्य च॥190

तस्योपरि महा-पद्मं
सहस्र-दल-संवृतम्।
उद्यद्-भास्कर-बिम्बाभं
शु(क्ल)भ-केसर-कर्णिकम्॥191
तन्-मन्त्रेणैव विन्यस्य
समभ्यर्च्य प्रणम्य च।

तस्योपरि महापद्मं सहस्रदलसंवृतम्।
उद्यद्भास्करबिम्बाभं शु(क्ल)भकेसरकर्णिकम्॥191
तन्मन्त्रेणैव विन्यस्य समभ्यर्च्य प्रणम्य च।

दलेषु मण्डलं वह्नेः
केसरेष्व् इन्दु-मण्डलम्॥192
कर्णिकायां रवेर् बिम्बं
स्व-मन्त्रेणैव योजयेत् ।

दलेषु मण्डलं वह्नेः केसरेष्विन्दुमण्डलम्॥192
कर्णिकायां रवेर्बिम्बं स्वमन्त्रेणैव योजयेत् ।

दलेष्वष्टसु तस्याथ
पूर्वाद्येषु यथाक्रमम् ॥ 193
विमलोत्कर्षिणी ज्ञाना-
क्रिया-योगाः पृथक् पृथक् ।
प्रभ्वीं च सत्याम् ईशानां
ध्यात्वा मन्त्रैर् यथा-क्रमम् ॥ 194

विमलोत्कर्षिणी ज्ञाना क्रियायोगाः पृथक् पृथक् ।
प्रभ्वीं च सत्याम् ईशानां ध्यात्वा मन्त्रैर्यथाक्रमम् ॥ 194

स्मरेद् अग्रे स्वमन्त्रेण
कर्णिकायाम् अनुग्रहाम् ।
शक्तीर् नवैताः परितो
वीक्षमाणा हरेर् मुखम् ॥ 195

स्मरेदग्रे स्वमन्त्रेण कर्णिकायामनुग्रहाम् ।
शक्तीर्नवैताः परितो वीक्षमाणा हरेर्मुखम् ॥ 195

करेणैकेन दधतीश्
चामराणि स्व्-अलङ्कृताः ।
अन्येन च नमस्यन्तीः
स्व-शिरो-निहितेन च ॥ 196

करेणैकेन दधतीः चामराणि स्वलङ्कृताः ।
अन्येन च नमस्यन्तीः स्वशिरोनिहितेन च ॥ 196

चिन्तयित्वैवम् एताश् च
गन्धाद्यैर् अभिपूज्य च ।
योग-पीठम् इदं सर्वं
जगत्-प्रकृति-निर्मितम्॥ 197

चिन्तयित्वैवमेताश्च गन्धाद्यैरभिपूज्य च ।
योगपीठमिदं सर्वं जगत्प्रकृतिनिर्मितम्॥ 197

आधार-शक्त्याद्य्-अखिलं
देवतामयम् अद्भुतम् ।
प्रणम्याभ्यर्च्य गन्धाद्यैः
स्व-मन्त्रेण ततः परम् ॥ 198

आधारशक्त्याद्यखिलं देवतामयमद्भुतम् ।
प्रणम्याभ्यर्च्य गन्धाद्यैः स्वमन्त्रेण ततः परम् ॥ 198

तत्-पद्म-कर्णिका-मध्ये
कुण्डली-कृत-विग्रहम्।
राजताद्रि-प्रतीकाशं
सहस्रेन्दु-समप्रभम्॥199

तत्पद्मकर्णिकामध्ये कुण्डलीकृतविग्रहम्।
राजताद्रिप्रतीकाशं सहस्रेन्दुसमप्रभम्॥199

कुन्द-मालाङ्गम् उन्निद्र-
पद्म-पत्रारुणेक्षणम्।
शैत्य-सौरभ्य-सौगन्ध्य-
मार्दवादि-गुणाकरम्॥200

कुन्दमालाङ्गमुन्निद्रपद्मपत्रारुणेक्षणम्।
शैत्यसौरभ्यसौगन्ध्यमार्दवादिगुणाकरम्॥200

फणा-मणि-सहस्रांशु-
निचयेन विसर्पता।
रञ्जितं चन्दनेनैव
रक्तेनातिसुगन्धिना॥201

फणामणिसहस्रांशुनिचयेन विसर्पता।
रञ्जितं चन्दनेनैव रक्तेनातिसुगन्धिना॥201

नारायणाङ्ग-सौगन्ध्य–
चर्चित-स्वाङ्ग-सौरभम्।
फणा-सहस्रं वियति
वितानम् इव सर्वतः॥202

नारायणाङ्गसौगन्ध्य चर्चि(वर्धि)तस्वाङ्गसौरभम्।
फणासहस्रं वियति वितानमिव सर्वतः॥202

वितत्यासीनम् आनन्द-
निर्भरोद्भ्रान्त-लोचनम्।
अचिन्त्यानन्त-विज्ञान-
बलैक-निलयं विभुम्॥203

वितत्यासीनमानन्दनिर्भरोद्भ्रान्तलोचनम्।
अचिन्त्यानन्तविज्ञानबलैकनिलयं विभुम्॥203

राजाधिराजं नागानाम्
अनन्तं कान्त-विग्रहम्।
ध्यात्वा प्रणम्य चाभ्यर्च्य
गन्ध-पुष्पादिभिः शुभैः॥204

राजाधिराजं नागानामनन्तं कान्तविग्रहम्।
ध्यात्वा प्रणम्य चाभ्यर्च्य गन्धपुष्पादिभिः शुभैः॥204

ततः प्राग्-उत्तरे देशे
योग-पीठस्य पार्श्वतः।
न्यसेद् रत्नमयं पीठं
रुचिरं शेष-भोजिनः॥205

ततः प्रागुत्तरे देशे योगपीठस्य पार्श्वतः।
न्यसेत् रत्नमयं पीठं रुचिरं शेषभोजिनः॥205

पश्चिमायाम् अपि दिशि
पीठं शेषाय निक्षिपेत्।
पुरतो वैनतेयस्य निदध्यात्
पीठम् आसनम्॥206

पश्चिमायामपि दिशि पीठं शेषाय निक्षिपेत्।
पुरतो वैनतेयस्य निदध्यात् पीठमासनम्॥206

पुरतः पार्श्वतः पश्चाद्
अपि पद्मानि सर्वतः।
अन्येषां परिवाराणाम्
आसनानि प्रकल्प्य च॥207

पुरतः पार्श्वतः पश्चादपि पद्मानि सर्वतः।
अन्येषां परिवाराणाम् आसनानि प्रकल्प्य च॥207