लोकानार्थाय गुरवे कृष्णपादस्य सूनवे । संसारभोगिसन्दष्ट-जीववीवतवे नमः ॥
श्रीमन् कृपाजलनिधे जगदेकबन्धो
ब्रह्मादिदेवपरिपूजित-पादपद्म ।
हेमापगापुलिनमध्य-निवासशील
रङ्गेश सिन्धुतनयाप्रिय मङ्गलं ते ॥ {१}
भोगीन्द्रभोगशयने शरदभ्रशुभ्रे
देदीप्यमान फण रत्नमयूखचित्रे ।
स्वामिन् शयान नत रक्षण जागरूक
रङ्गेश सिन्धुतनयाप्रिय मङ्गलं ते ॥ {२}
नीलाम्बुवाह निभ मङ्गलदिव्यमूर्ते
शीलालकानीय चरणाम्बुज देवदेव
सौन्दर्य मुग्धजलधे सुगुणभिराम
रङ्गेश सिन्धुतनयाप्रिय मङ्गलं ते ॥ {३}
मार्ताण्डकोटि सदृशोज्ज्वल कोकहृद्य
माणिक्य दिव्यमकुटी लसितोत्तमाङ्ग ।
राकेशमण्डल-निभानन दीनबन्धो -
रङ्गेश सिन्धुतनयाप्रिय मङ्गलं ते ॥ {४}
कस्तूरिका तिलक लाञ्छन शोभमान -
बालेन्दुगर्वहर सुन्दर फालभाग ।
लोलम्ब नील कुटिलालक पङ्क्तिरम्य
रङ्गेश सिन्धुतनयाप्रिय मङ्गलं ते ॥ {५}
कन्दर्प-चाप सदृशायत सुन्दर भ्रूः
कर्णान्तलोल कमलोज्ज्वल चारु नेत्र ।
नासाग्रलम्बि-पृथुकादद्भुत मौक्तिकाढ्य
रङ्गेश सिन्धुतनयाप्रिय मङ्गलं ते ॥ {६}
बिम्बाधरोष्ठ-रुचिर-स्मित-कुन्ददन्त
भास्वत्कपोल मणिदर्पण शेचमान ।
माणिक्य कुण्डल विराजित कर्णयुग्म
रङ्गेश सिन्धुतनयाप्रिय मङ्गलं ते ॥ {७}
ग्रैवेयकादि परि भूषित कम्बु कण्ठ
श्रीवत्सकौस्तुभ सुहृद्य भुजान्तराल ।
मुक्तावली निचय भूषित पीनशंस
रङ्गेश सिन्धुतनयाप्रिय मङ्गलं ते ॥ {८}
सोवर्ण रत्न खचिताङ्गद राजमान
भोगीन्द्रभोग सदृसायत बाहुदण्ड ।
सम्फुल्ल दिव्यसरसीरुड मञ्जुहस्त
रङ्गेश सिन्धुतनयाप्रिय मङ्गलं ते ॥ {९}
वैडूर्य वज्रमणि कल्पित हस्तभूष
रत्नोर्मिका विकसिताङ्गुलि पल्लवाढ्य ।
राजन्तखांशु परिनिर्जित तिग्मभानो
रङ्गेश सिन्धुतनयाप्रिय मङ्गलं ते ॥ {१०}
जाती सरोज तुलसी नव वैजयन्ती
मालाभिराम नत भूसुर पारिजात ।
हेमोपवीत लसमान शुभोत्तरीय
रङ्गेश सिन्धुतनयाप्रिय मङ्गलं ते ॥ {११}
भास्वद्वलित्रय शुभोदर निम्ननाभे
काञ्ची गुणाञ्चित कटीतट सत्यकाम ।
बालार्क वर्ण कनकाम्बर रञ्जिताङ्ग
रङ्गेश सिन्धुतनयाप्रिय मङ्गलं ते ॥ {१२}
रम्भासमोरुयुग सुन्दरमीनकेतु
तूणीर गर्व परिचर्वण शौण्डजङ्घ ।
भ्राजन्मणी रुचिर किङ्किणि नूपुराढ्य
रङ्गेश सिन्धुतनयाप्रिय मङ्गलं ते ॥ {१३}
बृन्दारकेन्द्र मकुटी मणि रत्नदीपैः
नीराजिताङ्घ्रिकमलाद्भुत दिव्यरूप ।
कन्दर्प कोटिसदृशानघ पद्मनाभ
रङ्गेश सिन्धुतनयाप्रिय मङ्गलं ते ॥ {१४}
वाणीप्रियस्य कुलदैवत राघवेन्द्र
संसेविताश्रित सुरद्रुम दिव्यशक्ते
रक्षोधिपस्य हृदयोत्पल पूर्णचन्द्र
रङ्गेश सिन्धुतनयाप्रिय मङ्गलं ते ॥ {१५}
श्रीमत्पराङ्कुशमुखैर्दशभिः प्रगीत
माहात्म्य चन्द्र सरसीतटवास कील ।
मान्धातृ मुरव्य धरणीश्वर सेविताङ्घ्रे
रङ्गेश सिन्धुतनयाप्रिय मङ्गलं ते ॥ {१६}
स्वामिन् प्रपन्नजन जनरक्षण लब्धवर्ण
वेदान्तवेद्य महनीय गुणम्बुराशे ।
औदार्यजन्मनिलयाद्भुत शौर्य धैर्य
रङ्गेश सिन्धुतनयाप्रिय मङ्गलं ते ॥ {१७}
श्रीविष्णुचित्ततनया नयनाब्जमित्र
तद्भुक्त माल्य वहनोत्सुकचित्तवृत्ते ।
रामानुजाख्य यतिवलभ भागधेय
रङ्गेश सिन्धुतनयाप्रिय मङ्गलं ते ॥ {१८}
हेमापगातरल तुङ्गतरङ्गलोल
पाथोजधूलि वहनालसमारुतेन ।
संवीज्यमान सुरचारण गीतकीर्ते
रङ्गेश सिन्धुतनयाप्रिय मङ्गलं ते ॥ {१९}
हे देवदेव पुरुषोत्तम लोकबन्धो
मादृङ् मुमुक्षुजन रक्षण जागरूक ।
श्रीवासुदेव नत बृन्द मुदावहाय
रङ्गेश सिन्धुतनयाप्रिय मङ्गलं ते ॥ {२०}
इति श्रीरङ्गेशविंशतिः समाप्ता
प्राणतार्तिहरांशाय प्रकृष्टगुणशालिने ।
लीलयोद्धृतलोकाय लोकार्यगुरवे नमः ॥