विश्वास-प्रस्तुतिः
भजामः पादुके ! याभ्यां भरतस्याग्रजस्तदा ।
प्रायः प्रतिप्रयाणाय प्रास्थानिकमकल्पयत्॥ 4.1
मूलम्
भजामः पादुके ! याभ्यां भरतस्याग्रजस्तदा ।
प्रायः प्रतिप्रयाणाय प्रास्थानिकमकल्पयत्॥ 4.1
विश्वास-प्रस्तुतिः
राज्यं विहाय रघुवंशमहीपतीनां
पौरांश्च पादरसिकान् पृथिवीं च रक्ताम् ।
त्वामेव हन्त चरणावनि ! सम्प्रयास्यन्
आलम्बत प्रथममुत्तरकोसलेन्द्रः॥ 4.2
मूलम्
राज्यं विहाय रघुवंशमहीपतीनां
पौरांश्च पादरसिकान् पृथिवीं च रक्ताम् ।
त्वामेव हन्त चरणावनि ! सम्प्रयास्यन्
आलम्बत प्रथममुत्तरकोसलेन्द्रः॥ 4.2
विश्वास-प्रस्तुतिः
प्राप्ते प्रयाणसमये मणिपादरक्षे !
पौरानवेक्ष्य भवती करुणप्रलापान् ।
मञ्जुप्रणादमुखरा विनिवर्तनार्थं
रामं पदग्रहणपूर्वमयाचतेव॥ 4.3
मूलम्
प्राप्ते प्रयाणसमये मणिपादरक्षे !
पौरानवेक्ष्य भवती करुणप्रलापान् ।
मञ्जुप्रणादमुखरा विनिवर्तनार्थं
रामं पदग्रहणपूर्वमयाचतेव॥ 4.3
विश्वास-प्रस्तुतिः
मत्वा तृणाय भरतो मणिपादरक्षे !
रामेण तां विरहितां रघुराजधानीम् ।
त्वामेव सप्रणयमुज्जयिनीमवन्तीम्
मेने महोदयमयीं मधुरामयोध्याम्॥ 4.4
मूलम्
मत्वा तृणाय भरतो मणिपादरक्षे !
रामेण तां विरहितां रघुराजधानीम् ।
त्वामेव सप्रणयमुज्जयिनीमवन्तीम्
मेने महोदयमयीं मधुरामयोध्याम्॥ 4.4
विश्वास-प्रस्तुतिः
रामात्मनः प्रतिपदं मणिपादरक्षे !
विश्वम्भरस्य वहनेन परीक्षितां त्वाम् ।
विश्वस्य देवि वहने विनिवेशयिष्यन्
विस्रब्ध एव भरतो भवतीम् ययाचे॥ 4.5
मूलम्
रामात्मनः प्रतिपदं मणिपादरक्षे !
विश्वम्भरस्य वहनेन परीक्षितां त्वाम् ।
विश्वस्य देवि वहने विनिवेशयिष्यन्
विस्रब्ध एव भरतो भवतीम् ययाचे॥ 4.5
विश्वास-प्रस्तुतिः
भक्त्या परं भवतु तद् भरतस्य साधोः
त्वत्प्रार्थनं रघुपतौ मणिपादरक्षे ! ।
केनाशयेन स मुनिः परमार्थदर्शी
भद्राय देवि ! जगतां भवतीमवादीत्॥ 4.6
मूलम्
भक्त्या परं भवतु तद् भरतस्य साधोः
त्वत्प्रार्थनं रघुपतौ मणिपादरक्षे ! ।
केनाशयेन स मुनिः परमार्थदर्शी
भद्राय देवि ! जगतां भवतीमवादीत्॥ 4.6
विश्वास-प्रस्तुतिः
रामे वनं व्रजति पङ्क्तिरथे प्रसुप्ते
राज्यापवादचकिते भरते तदानीम् ।
आश्वासयेत् क इव कोसलवासिनस्तान्
सीतेव चेत् त्वमपि साहसवृत्तिरासीः॥ 4.7
मूलम्
रामे वनं व्रजति पङ्क्तिरथे प्रसुप्ते
राज्यापवादचकिते भरते तदानीम् ।
आश्वासयेत् क इव कोसलवासिनस्तान्
सीतेव चेत् त्वमपि साहसवृत्तिरासीः॥ 4.7
विश्वास-प्रस्तुतिः
पादावनि ! प्रभवतो जगतां त्रयाणां
रामादपि त्वमधिका नियतं प्रभावात् ।
नो चेत् कथन्नु भरतस्य तमेव लिप्सोः
प्रत्यायनं परिपणं भवती भवित्री॥ 4.8
मूलम्
पादावनि ! प्रभवतो जगतां त्रयाणां
रामादपि त्वमधिका नियतं प्रभावात् ।
नो चेत् कथन्नु भरतस्य तमेव लिप्सोः
प्रत्यायनं परिपणं भवती भवित्री॥ 4.8
विश्वास-प्रस्तुतिः
मन्ये नियुज्य भवतीं मणिपादरक्षे !
पार्ष्णिग्रहस्य भरतस्य निवारणार्थम् ।
रत्नाकरं सपदि गोष्पदयन् विजिग्ये
रामः क्षणेन रजनीचरराजधानीम्॥ 4.9
मूलम्
मन्ये नियुज्य भवतीं मणिपादरक्षे !
पार्ष्णिग्रहस्य भरतस्य निवारणार्थम् ।
रत्नाकरं सपदि गोष्पदयन् विजिग्ये
रामः क्षणेन रजनीचरराजधानीम्॥ 4.9
विश्वास-प्रस्तुतिः
पादावनि ! प्रभुतरानपराधवर्गान्
सोढुम् क्षमा त्वमसि मूर्तिमती क्षमैव ।
यत् त्वां विहाय निहताः परिपन्थिनस्ते
देवेन दाशरथिना दशकण्ठमुख्याः॥ 4.10
मूलम्
पादावनि ! प्रभुतरानपराधवर्गान्
सोढुम् क्षमा त्वमसि मूर्तिमती क्षमैव ।
यत् त्वां विहाय निहताः परिपन्थिनस्ते
देवेन दाशरथिना दशकण्ठमुख्याः॥ 4.10
विश्वास-प्रस्तुतिः
वाक्ये गरीयसि पितुर्विहितेऽप्यतृप्त्या
मातुर्मनोरथमशेषमवन्ध्ययिष्यन् ।
मन्ये तदा रघुपतिः भरतस्य तेने
मातस्त्वयैव मणिमौलिनिवेशलक्ष्मीम्॥ 4.11
मूलम्
वाक्ये गरीयसि पितुर्विहितेऽप्यतृप्त्या
मातुर्मनोरथमशेषमवन्ध्ययिष्यन् ।
मन्ये तदा रघुपतिः भरतस्य तेने
मातस्त्वयैव मणिमौलिनिवेशलक्ष्मीम्॥ 4.11
विश्वास-प्रस्तुतिः
पादाम्बुजाद्विगळितां परमस्य पुंसः
त्वामादरेण विनिवेश्य जटाकलापे ।
अङ्गीचकार भरतो मणिपादरक्षे !
गङ्गाधिरूढशिरसो गिरिशस्य कान्तिम्॥ 4.12
मूलम्
पादाम्बुजाद्विगळितां परमस्य पुंसः
त्वामादरेण विनिवेश्य जटाकलापे ।
अङ्गीचकार भरतो मणिपादरक्षे !
गङ्गाधिरूढशिरसो गिरिशस्य कान्तिम्॥ 4.12
विश्वास-प्रस्तुतिः
अविकलमधिकर्तुं रक्षणे सप्तलोक्याः
रघुपतिचरणेन न्यस्तदिव्यानुभावाम् ।
अभजत भरतस्त्वामञ्जसा पादरक्षे !
मणिमकुटनिवेशत्यागधन्येन मूर्ध्ना॥ 4.13
मूलम्
अविकलमधिकर्तुं रक्षणे सप्तलोक्याः
रघुपतिचरणेन न्यस्तदिव्यानुभावाम् ।
अभजत भरतस्त्वामञ्जसा पादरक्षे !
मणिमकुटनिवेशत्यागधन्येन मूर्ध्ना॥ 4.13
विश्वास-प्रस्तुतिः
इयमविकलयोगक्षेमसिद्ध्यै प्रजानाम्
अलमिति भरतेन प्रार्थितामादरेण ।
रघुपतिरधिरोहन् अभ्यषिञ्चत् स्वयं त्वां
चरणनखमणीनां चन्द्रिकानिर्झरेण॥ 4.14
मूलम्
इयमविकलयोगक्षेमसिद्ध्यै प्रजानाम्
अलमिति भरतेन प्रार्थितामादरेण ।
रघुपतिरधिरोहन् अभ्यषिञ्चत् स्वयं त्वां
चरणनखमणीनां चन्द्रिकानिर्झरेण॥ 4.14
विश्वास-प्रस्तुतिः
प्रणयिनि पदपद्मे गाढमाश्लिष्यति त्वां
विधिसुतकथितं तद्वैभवं ते विदन्तः ।
अनुदिनमृषयस्त्वामर्चयन्त्यग्न्यगारे
रघुपतिपदरक्षे ! रामगिर्याश्रमस्थाः॥ 4.15
मूलम्
प्रणयिनि पदपद्मे गाढमाश्लिष्यति त्वां
विधिसुतकथितं तद्वैभवं ते विदन्तः ।
अनुदिनमृषयस्त्वामर्चयन्त्यग्न्यगारे
रघुपतिपदरक्षे ! रामगिर्याश्रमस्थाः॥ 4.15
विश्वास-प्रस्तुतिः
नियतमधिरुरोह त्वामनाधेयशक्तिं
निजचरणसरोजे शक्तिमाधातुकामः ।
स कथमितरथा त्वां न्यस्य रामो विजह्रे
दृषदुपचितभूमौ दण्डकारण्यभागे॥ 4.16
मूलम्
नियतमधिरुरोह त्वामनाधेयशक्तिं
निजचरणसरोजे शक्तिमाधातुकामः ।
स कथमितरथा त्वां न्यस्य रामो विजह्रे
दृषदुपचितभूमौ दण्डकारण्यभागे॥ 4.16
विश्वास-प्रस्तुतिः
रघुपतिपदपद्माद्रत्नपीठे निवेष्टुम्
भरतशिरसि लग्नां प्रेक्ष्य पादावनि ! त्वाम् ।
परिणतपुरुषार्थः पौरवर्गः स्वयं ते
विधिमभजत सर्वो वन्दिवैताळिकानाम्॥ 4.17
मूलम्
रघुपतिपदपद्माद्रत्नपीठे निवेष्टुम्
भरतशिरसि लग्नां प्रेक्ष्य पादावनि ! त्वाम् ।
परिणतपुरुषार्थः पौरवर्गः स्वयं ते
विधिमभजत सर्वो वन्दिवैताळिकानाम्॥ 4.17
विश्वास-प्रस्तुतिः
अनन्यराजन्यनिदेशनिष्ठां
चकार पृथ्वीं चतुरर्णवान्ताम् ।
भ्रातुर्यियासोः भरतस्तदा त्वां
मूर्ध्ना वहन् मूर्तिमतीमिवाज्ञाम्॥ 4.18
मूलम्
अनन्यराजन्यनिदेशनिष्ठां
चकार पृथ्वीं चतुरर्णवान्ताम् ।
भ्रातुर्यियासोः भरतस्तदा त्वां
मूर्ध्ना वहन् मूर्तिमतीमिवाज्ञाम्॥ 4.18
विश्वास-प्रस्तुतिः
यद् भ्रात्रे भरताय रङ्गपतिना रामत्वमातस्थुषा
नित्योपास्यनिजाङ्घ्रिनिष्क्रयतया निश्चित्य विश्राणितम् ।
योगक्षेमवहं समस्तजगतां यद्गीयते योगिभिः
पादत्राणमिदं मितम्पचकथामह्नाय मे निह्नुताम्॥ 4.19
मूलम्
यद् भ्रात्रे भरताय रङ्गपतिना रामत्वमातस्थुषा
नित्योपास्यनिजाङ्घ्रिनिष्क्रयतया निश्चित्य विश्राणितम् ।
योगक्षेमवहं समस्तजगतां यद्गीयते योगिभिः
पादत्राणमिदं मितम्पचकथामह्नाय मे निह्नुताम्॥ 4.19
विश्वास-प्रस्तुतिः
भरतस्येव ममापि प्रशमित विश्वापवाददुर्जाता ।
शेषेव शिरसि नित्यं विहरतु रघुवीरपादुके ! भवती॥ 4.20
मूलम्
भरतस्येव ममापि प्रशमित विश्वापवाददुर्जाता ।
शेषेव शिरसि नित्यं विहरतु रघुवीरपादुके ! भवती॥ 4.20