००९ गोत्रप्रवरगोत्रदेवीकथनम्

॥ व्यास उवाच ॥ ॥
श्रूयतां राजशार्दूल पुण्यमाख्यानमुत्तमम् ॥
स्तूयमानो
जगन्नाथ इदं वचनमब्रवीत् ॥ १ ॥
॥ विष्णुरुवाच ॥ ॥
किमर्थमागताः सर्वे ब्रह्माद्याः सुरसत्तमाः॥
पृथिव्यां कुशलं कच्चित्कुतो वो भयमागतम् ॥२॥
ततः प्रोवाच वै हृष्टो ब्रह्मा तं केशवं वचः ॥
न भयं विद्यतेऽस्माकं त्रैलोक्ये सचराचरे ॥३॥
एकविज्ञापनार्थाय आगतोऽहं तवान्तिके॥
तदहं सम्प्रवक्ष्यामि तदेतच्छृणु मे वचः॥४॥
परं तु पूर्वं धर्मेण स्थापितं तीर्थमुत्तमम्॥
तद्द्रष्टुकामोऽहं देव त्वत्प्रसादाज्जनार्दन ॥ ५ ॥
तत्र त्वं देवदेवेश गमने कुरु मानसम् ॥
यथा सत्तीर्थतां याति धर्मारण्यमनुत्तमम् ॥ ६ ॥
विष्णुरुवाच ॥
साधुसाधु महाभाग त्वर्यतां तत्र मा चिरम् ॥
ममापि चित्तं तत्रैव तद्दर्शनेस्ति लालसम् ॥ ७ ॥
॥ व्यास उवाच ॥ ॥
तार्क्ष्यमारुह्य गोविन्द स्तत्रागाच्छीघ्रमेव हि ॥
ततो धर्मेण ते देवाः सेन्द्राः सर्षिगणास्तथा ॥ ८ ॥
ब्रह्मविष्णुमहेशाद्या दृष्टा दूरान्मुमोद च ॥
धर्मराजोपि तान्दृष्ट्वा देवा न्विष्णुपुरोगमान् ॥ ९ ॥
आगतः स्वाश्रमात्तत्र पूजां प्रगृह्य तत्पुरः ॥
आसनादुत्थितः शीघ्रं सपर्याद्यं प्रगृह्य च ॥
एकैकस्य चकाराथ पूजां चैव पृथक्पृथक् ॥ 3.2.9.१० ॥
चकार पूजां विधिवत्तेषां तत्रार्कनन्दनः ॥
आसनेषूपवेश्याथ पूजां कृत्वा गरीयसीम् ॥ ११ ॥
॥ यम उवाच ॥ ॥
तीर्थरूपमिदं क्षेत्रं प्रसादाद्देवकीसुत ॥
त्वत्तोषविधिना चाद्य कृपया च शिवस्य च ॥ १२ ॥
अद्य मे सफलं जन्म अद्य मे सफलं तपः ॥
अद्य मे सफलं स्थानं काजेशानां समागमात् ॥ १३ ॥
॥ व्यास उवाच ॥ ॥
एवं स्तुतस्तदा विष्णुः प्रोवाच मधुरं वचः ॥
तुष्टोऽस्मि धर्म राजेन्द्र अहं स्तोत्रेण ते विभो ॥ १४ ॥
किञ्चित्प्रार्थय मत्तोऽहं करोमि तव वाञ्छितम् ॥
यत्तेऽस्त्यभीप्सितं तुभ्यं तद्ददामि न संशयः ॥ १५ ॥
यम उवाच ॥ ॥
यदि तुष्टोऽसि देवेश वाञ्छितं कुरुषे यदि ॥
धर्मारण्ये महापुण्ये ऋषीणामाश्रमान्कुरु ॥ १६ ॥
वसन्ति वाडवा यत्र यजन्ति चैव याज्ञिकाः ॥
वेदनिर्घोषसंयुक्तं भाति तत्तीर्थमुत्तमम् ॥ १७ ॥
अब्राह्मणमिदं तीर्थं पीडयिष्यन्ति जन्तवः ॥
तस्मात्त्वं वाडवाञ्छौरे समानय ऋषी न्बहून् ॥
धर्मारण्यं यथा भाति त्रैलोक्ये सचराचरे ॥ १८ ॥
ततो विष्णुः सहस्राक्षः सहस्रशीर्षः सहस्रपात् ॥
सहस्रशस्तदा रूपं कृतवान्धर्मवत्सलः ॥
यस्मिन्स्थाने च ये विप्राः सदाचाराः शुभव्रताः ॥ १९ ॥
अशेषधर्मकुशलाः सर्वशास्त्रविशारदाः ॥
तपोज्ञाने महाख्याता ब्रह्मयज्ञपरायणाः ॥
स्थापिता ऋषयः सर्वे सहस्राण्यष्टादशैव तु ॥ 3.2.9.२० ॥
नानादेशात्समानीय स्थापितास्तत्र तैः सुरैः ॥
आश्रमांश्च बहूंस्तत्र काजेशैरपि निर्मितान् ॥ २१ ॥
धर्मोपदेशात्कृष्णेन ब्रह्मणा च शिवेन च ॥
स्वेस्वे स्थाने यथायोग्ये स्थापयामास केशवः ॥ २२ ॥
युधिष्ठिर उवाच ॥ ॥
कस्मिन्वंशे समुत्पन्ना ब्राह्मणा वेदपारगाः ॥
स्थापिताः सपरीवाराः पुत्रपौत्रसमावृताः ॥
शिष्यैश्च बहुभिर्युक्ता अग्निहोत्रपरायणाः ॥
तेषां स्थानानि नामानि यथावच्च वदस्व मे ॥ २३ ॥ ॥
व्यास उवाच ॥ ॥
श्रूयतां नृपशार्दूल धर्म्मारण्यनिवासिनाम् ॥ २४ ॥
महात्मनां ब्राह्मणानामृषीणामूर्ध्वरेतसाम् ॥
तेषां वै पुत्रपौत्राणां नामानि च वदाम्यहम् ॥ २५ ॥
चतुर्विशतिगोत्राणि द्विजानां पाण्डवर्षभ ॥
तेषां शाखाः प्रशाखाश्च पुत्रपौत्रादयस्तथा ॥ २६ ॥
जज्ञिरे बहवः पुत्राः शतशोऽथ सहस्रशः ॥
चतुर्विशतिमुख्यानां नामानि प्रवदामि ते ॥
द्विजानामृषयः प्रोक्ताः प्रवराणि तथा शृणु ॥ २७ ॥
भारद्वाजस्तथा वत्सः कौशिकः कुश एव च ॥
शाण्डिल्यः काश्यपश्चैव गौतमश्छान्धनस्तथा ॥ २८ ॥
जातूकर्ण्यस्तथा वत्सो वसिष्ठो धारणस्तथा ॥
आत्रेयो भाण्डिलश्चैव लौकिकाश्च इतः परम् ॥ २९ ॥
कृष्णायनोपमन्युश्च गार्ग्यमुद्गलमौषकाः ॥
पुण्यासनः पराशरः कौण्डिन्यश्च ततः परम् ॥ ॥ 3.2.9.३० ॥
तथा गान्यासनश्चैव प्रवराणि चतुर्विंशतिः ॥
जामदग्न्यस्य गोत्रस्य प्रवराः पञ्च एव हि ॥ ३१ ॥
भार्गवश्च्यवनाप्नुवानौर्वश्च जमदग्निकः ॥
पञ्चैते प्रवरा राजन्विख्याता लोकविश्रुताः ॥३२ ॥
एवं गोत्रसमुत्पन्ना वाडवा वेदपारगाः ॥
द्विजपूजाक्रियायुक्ता नानाक्रतुक्रियापराः ॥ ३३ ॥
गुणेन संहिता आसन् षट्कर्मनिरताश्च ये ॥
एवंविधा महाभागा नानादेशभवा द्विजाः ॥ ३४ ॥
भामेवसं तृतीयं च प्रवराः पञ्च एव हि ॥
भार्गवच्यावनाप्नुवानौर्वजामदग्न्यसंयुताः ॥
आत्रेयोऽर्चनानसश्च श्यावास्येति तृतीयकः ॥ ३५ ॥
अस्मिन्गोत्रे भवा विप्रा दुष्टाः कुटिलगामिनः ॥
धनिनो धर्मनिष्ठाश्च वेदवेदाङ्गपारगाः ॥३६॥
दानभोगरताः सर्वे श्रौतस्मार्तेषु सम्मताः ॥
माण्डव्यगोत्रे विज्ञेयाः प्रवरैः पञ्चभिर्युताः ॥३७॥
भार्गवश्च्यावनो ऽत्रिश्चाप्नुवानौर्वस्तथैव च ॥
अस्मिन्गोत्रे भवा विप्राः श्रुतिस्मृतिपरायणाः ॥ ३८ ॥
रोगिणो लोभिनो दुष्टा यजने याजने रताः ॥
ब्रह्मक्रिया पराः सर्वे माण्डव्याः कुरुसत्तम ॥ ३९ ॥
गार्ग्यस्य गोत्रे ये जातास्तेषां तु प्रवरास्त्रयः ॥
अङ्गिराश्चाम्बरीषश्च यौवनाश्वस्तृतीयकः ॥ 3.2.9.४० ॥
अस्मिन्गोत्रे समुत्पन्नाः सद्वृत्ताः सत्यभाषिणः ॥
शान्ताश्च भिन्नवर्णाश्च निर्द्धनाश्च कुचैलिनः ॥ ४१ ॥
सङ्गवात्सल्ययुक्ताश्च वेदशास्त्रेषु निश्चलाः ॥
वत्सगोत्रे द्विजा भूप प्रवराः पञ्च एव हि ॥ ४२ ॥
भार्गवश्च्यवनाप्नुवानौर्वश्च जमदग्निकः ॥
एभिस्तु पञ्च विख्याता द्विजा ब्रह्मस्वरूपिणः ॥ ४३ ॥
शान्ता दान्ताः सुशीलाश्च धर्मपुत्रैः सुसंयुता ॥
वेदाध्ययनहीनाश्च कुशलाः सर्वकर्मसु ॥ ४४ ॥
सुरूपाश्च सदाचाराः सर्वधर्मेषु निष्ठिताः॥
दानधर्म रताः सर्वे अन्नदा जलदा द्विजाः ॥ ४५ ॥
दयालवः सुशीलाश्च सर्वभूतहिते रताः ॥
काश्यपा ब्राह्मणा राजन्प्रवरत्रयसंयुताः ॥ ४६ ॥
काश्यपश्चापवत्सारो नैध्रुवश्च तृतीयकः ॥
वेदज्ञा गौरवर्णाश्च नैष्ठिका यज्ञकारकाः ॥ ४७ ॥
प्रियवासा महादक्षा गुरुभक्तिरताः सदा ॥
प्रतिष्ठामानव न्तश्च सर्वभूतहिते रताः ॥ ४८ ॥
यजन्ते च महायज्ञान्काश्यपेया द्विजातयः॥
धारीणसगोत्रजाश्च प्रवरैस्त्रिभिरन्विताः ॥ ४९ ॥
अगस्तिदर्विश्वेताश्व दध्यवाहनसञ्ज्ञकाः ॥
अस्मिन्गोत्रे च ये जाता धर्मकर्मसमाश्रिताः ॥ 3.2.9.५० ॥
कर्मक्रूराश्च ते सर्वे तथैवोदरिणस्तु ते ॥
लम्बकर्णा महादंष्ट्रा द्विजा धनपरायणाः ॥ ५१ ॥
क्रोधिनो द्वेषिणश्चैव सर्वसत्त्वभयङ्कराः ॥
लौगाक्षसोद्भवा ये वै वाडवाः सत्यसंश्रिताः ॥ ५२ ॥
प्रवराश्च त्रयस्तेषां तत्त्वज्ञानस्वरूपकाः ॥
कश्यपश्चैव वत्सश्च वसिष्ठश्च तृतीयकः ॥ ५३ ॥
सदाचारास्तु विख्याता वैष्णवा बहुवृ त्तयः ॥
रोमभिर्बहुभिर्व्याप्ताः कृष्णवर्णास्तु वाडवाः ॥ ५४ ॥
शान्ता दाताः सुशीलाश्च स्वदारनिरताः सदा ॥
कुशिकसगोत्रे ये जाताः प्रवरैस्त्रिभिरन्विताः ॥ ५५ ॥
विश्वामित्रो देवरात औदलश्च त्रयश्च ये ॥
अस्मिन्गोत्रे तु ये जाता दुर्बला दीनमानसाः ॥ ५६ ॥
असत्यभाषिणो विप्राः सुरूपा नृपसत्तमाः ॥
सर्व्वविद्याकुशलिनो ब्राह्मणा ब्रह्मसत्तमाः ॥ ५७ ॥
उपमन्युसगोत्रेयाः प्रवरत्रयसंयुताः ॥
वसिष्ठश्च भरद्वाजस्त्विन्द्रप्रमद एव वा ॥ ५८ ॥
अस्मिन्गोत्रे तु ये विप्राः क्रूराः कुटिलगामिनः ॥
दूषणा द्वेषिणस्तुच्छाः सर्वसङ्ग्रहतत्पराः ॥ ५९ ॥
कलहोत्पादने दक्षा धनिनो मानिनस्तथा ॥
सर्वदैव प्रदुष्टाश्च दुष्टसङ्गरतास्तथा ॥ 3.2.9.६० ॥
रोगिणो दुर्बलाश्चैव वृत्त्युपकल्पवर्जिताः ॥
वात्स्यगोत्रे भवा विप्राः प्रवरैः पञ्चभिर्युताः ॥ ६१ ॥
भार्गवच्यावनाप्नुवानौर्वश्च जमदग्निकः ॥
अस्मिन्गोत्रे भवा विप्राः स्थूलाश्च बहुबुद्धयः॥६२॥
सर्वकर्मरता श्चैव सर्वधर्मेषु निश्चलाः ॥
वेदशास्त्रार्थनिपुणा यजने याजने रताः ॥ ६३ ॥
सदाचाराः सुरूपाश्च बुद्धितो दीर्घदर्शिनः ॥
वात्स्यायनसगोत्रेयाः प्रवरैः पञ्चभिर्युताः ॥ ६४ ॥
भार्गवच्यावनाप्नुवानौर्वश्च जमदग्निकः ॥
पूर्वोक्ताः प्रवराश्चास्य कथितास्तव भारत ॥ ६५ ॥
अस्मिन्गोत्रे तु ये जाता पाकयज्ञरताः सदा ॥
लोभिनः क्रोधिनश्चैव प्रजायन्ते बहुप्रजाः ॥ ६६ ॥
स्नानदानादिनिरताः सर्वदाश्च जितेन्द्रियाः ॥
वापीकूपतडागानां कर्तारश्च सहस्रशः ॥
व्रतशीला गुणज्ञाश्च मूर्खा वेदविवर्जिताः ॥ ६७ ॥
कौशिकवंशे ये जाताः प्रवरत्रयसंयुताः ॥
विश्वामित्रोऽघर्मषी च कौशिकश्च तृतीयकः ॥ ६८ ॥
अस्मिन्गोत्रे च ये जाता ब्राह्मणा ब्रह्मवेदिनः॥
शान्ता दान्ताः सुशीलाश्च सर्वधर्मपरायणाः ॥ ६९ ॥
अपुत्रिण स्तथा रूक्षास्तेजोहीना द्विजोत्तमाः ॥
भारद्वाजसगोत्रेयाः प्रवरैः पञ्चभिर्युताः ॥ 3.2.9.७० ॥
अङ्गिरसो बार्हस्पत्यो भारद्वाजस्तु सैन्यसः ॥
गार्ग्यश्चै वेति विज्ञेयाः प्रवराः पञ्च एव च ॥ ७१ ॥
अस्मिन्गोत्रे च ये जाता वाडवा धनिनः शुभाः ॥
वस्त्रालङ्करणोपेता द्विजभक्तिपरायणाः ॥ ७२ ॥
ब्रह्मभोज्यपराः सर्वे सर्वधर्मपरायणाः ॥
काश्यपगोत्रे यै जाताः प्रवरत्रयसंयुताः ॥ ७३ ॥
काश्यपश्चापवत्सारो रैभ्येति विश्रुतास्त्रयः ॥
अस्मिन्गोत्रे भवा विप्रा रक्ताक्षाः क्रूरदृष्टयः ॥ ७४ ॥
जिह्वालौल्यरताः सर्वे सर्वे ते पारमार्थिनः ॥
निर्धना रोगिणश्चैते तस्करानृतभाषिणः ॥ ७५ ॥
शास्त्रार्थावेदिनः सर्वे वेदस्मृतिविवर्जिताः ॥
शुनकेषु च ये जाता विप्रा ध्यानपरायणाः ॥ ७६ ॥
तपस्विनो योगिनश्च वेदवेदाङ्गपारगाः ॥
साधवश्च सदाचारा विष्णुभक्तिपरायणाः ॥ ७७ ॥
ह्रस्वकाया भिन्नवर्णा बहुरामा द्विजोत्तमाः ॥
दयालाः सरलाः शान्ता ब्रह्मभोज्यपरायणाः ॥ ॥ ७८ ॥
शौनकसेषु ये जाताः प्रवरत्रयसंयुताः ॥
भार्गवशौनहोत्रेति गार्त्स्यप्रमद इति त्रयः ॥ ७९ ॥
अस्मिन्देशे समुत्पन्ना वाडवा दुःसहा नृप ॥
महोत्कटा महाकायाः प्रलम्बाश्च मदोद्धताः ॥ 3.2.9.८० ॥
क्लेशरूपाः कृष्णवर्णाः सर्वशास्त्रविशारदाः ॥
बहुभुजो मानिनो दक्षा राग द्वेषोपवर्जिताः ॥ ८१ ॥
सुवस्त्रभूषारूपा वै ब्राह्मणा ब्रह्मवादिनः ॥
वसिष्ठगोत्रे ये जाताः प्रवरत्रयसंयुताः ॥ ८२ ॥
वसिष्ठो भारद्वाजश्च इन्द्रप्रमद एव च ॥
अस्मिन्गोत्रे भवा विप्रा वेदवेदाङ्गपारगाः ॥ ८३ ॥
याज्ञिका यज्ञशीलाश्च सुस्वराः सुखिनस्तथा ॥
द्वेषिणो धनवन्तश्च पुत्रिणो गुणिनस्तथा ॥ ८४ ॥
विशालहृदया राजञ्छूराः शत्रुनिबर्हणाः ॥
गौतमसगोत्रे ये जाताः प्रवराः पञ्च एव हि ॥ ८५ ॥
कौत्सगार्ग्योमवाहाश्च असितो देवलस्तथा ॥
अस्मिन्गोत्रे च ये जाता विप्राः परमपावनाः ॥ ८६ ॥
परोपकारिणः सर्वे श्रुतिस्मृति परायणाः ॥
बकासनाश्च कुटिलाश्छद्मवृत्तिपरास्तथा ॥ ८७ ॥
नानाशास्त्रार्थनिपुणा नानाभरणभूषिताः ॥
वृक्षादिकर्मकुशला दीर्घरोषाश्च रोगिणः ॥ ८८ ॥
आङ्गिरसगोत्रे ये जाताः प्रवरत्रयसंयुताः ॥
आङ्गिरसोम्बरीषश्च यौवनाश्वस्तृतीयकः ॥ ८९ ॥
अस्मिन्गोत्रे च ये जाताः सत्य सम्भाषिणस्तथा ॥
जितेन्द्रियाः सुरूपाश्च अल्पाहाराः शुभाननाः ॥ 3.2.9.९० ॥
महाव्रताः पुराणज्ञा महादानपरायणाः ॥
निर्द्वेषिणो लोभयुता वेदाध्य यनतत्पराः ॥ ९१ ॥
दीर्घदर्शिमहातेजो महामायाविमोहिताः ॥
शाण्डिलसगोत्रेये प्रवरत्रयसंयुताः ॥ ९२ ॥
असितो देवलश्चैव शाण्डिलस्तु तृतीयकः ॥
अस्मिन्गोत्रे महाभागाः कुब्जाश्च द्विजसत्तमाः ॥ ९३ ॥
नेत्ररोगी महादुष्टा महात्यागा अनायुषः ॥
कलहोत्पादने दक्षाः सर्वसङ्ग्रह तत्पराः ॥९४॥
मलिना मानिनश्चैव ज्योतिःशास्त्रविशारदाः ॥
आत्रेयसगोत्रे ये जाताः पञ्चप्रवरसंयुताः ॥ ९५ ॥
आत्रेयोऽर्चनानसश्यावाश्वोङ्गिर सोऽत्रिश्च ॥
अस्मिन्वंशे च ये जाता द्विजास्ते सूर्यवर्चसः ॥ ९६ ॥
चन्द्रवच्छीतलाः सर्वे धर्मारण्ये व्यवस्थिताः ॥
सदाचारा महादक्षाः श्रुतिशास्त्र परायणाः ॥ ९७ ॥
याज्ञिकाश्च शुभाचाराः सत्यशौचपरायणाः ॥
धर्मज्ञा दानशीलाश्च निर्मलाश्च महोत्सुकाः ॥ ९८ ॥
तपःस्वाध्यायनिरता न्यायधर्मपरायणाः ॥ ९९ ॥ ॥
युधिष्ठिर उवाच ॥ ॥
कथयस्व महाबाहो धर्मारण्यकथामृतम् ॥
यच्छ्रुत्वा मुच्यते पापाद्घोराद्ब्रह्मवधादपि ॥ ॥ 3.2.9.१०० ॥
॥ व्यास उवाच ॥ ॥
शृणु राजन्प्रवक्ष्यामि कथामेतां सुदुर्लभाम् ॥ १ ॥
यक्षरक्षःपिशाचाद्या उद्वेजयन्ति वाडवान् ॥
जृम्भकोनाम यक्षोऽभूद्धर्म्मारण्यसमीपतः ॥ २ ॥
उद्वेजयति नित्यं स धर्मारण्यनिवासिनः ॥
ततस्तैश्च द्विजाग्र्यैस्तु देवेभ्यो विनिवेदितम् ॥ ३ ॥
यक्षरक्षादिना चैव परिभूता वयं सुराः ॥
त्यक्ष्यामोऽद्य वरं स्थानं तद्भयान्नात्र संशयः ॥ ४ ॥
ततो देवैः सङ्गधर्वैः स्थापितास्तत्र भूमिषु ॥
सिद्धाश्च वरयोगिन्यः श्रीमातृप्रभृतयस्तथा ॥ ५ ॥
रक्षणार्थं हि विप्राणां लोकानां हितकाम्यया ॥
गोत्रान्प्रति तथैकैका स्थापिता योगिनी तदा ॥ ६ ॥
यस्य गोत्रस्य या शक्ती रक्षणे पालने क्षमा ॥
सा तस्य कुलदेवीति साक्षात्तत्र बभूव ह ॥ ७ ॥
श्रीमाता तारणी देवी आशापूरी च गोत्रपा ॥
इच्छाऽऽर्तिनाशिनी चैव पिप्पली विकारवशा ॥८॥
जगन्माता महामाता सिद्धा भट्टारिका तथा ॥
कदम्बा विकरा मीठा सुपर्णा वसुजा तथा ॥९॥
मातङ्गी च महादेवी वाणी च मुकुटेश्वरी ॥
भद्री चैव महाशक्तिः संहारी च महाबला॥3.2.9.११०॥
चामुण्डा च महादेवी इत्येता गोत्रमातरः ॥
ब्रह्मविष्णुमहेशाद्यैः स्थापितास्तत्र रक्षणे ॥११॥
ताः पूजयन्ति विप्रेन्द्राः स्वधर्मनिरताः सदा ॥
ततः प्रभृति योगिन्यः स्वेस्वे काले सुरक्षिताः ॥१२॥
वाडवाः स्वस्थतां जग्मुः पुत्रपौत्रैः समावृताः ॥
ततो देवाः सगन्धर्वा हर्षनिर्भरमानसाः ॥
विमानवरमारूढा जग्मुर्नाकेऽमृताशनाः ॥ १३ ॥
गते वर्षशते राजन्ब्रह्मविष्णुमहेश्वराः ॥
स्मृत्वा तु धर्मारण्यस्य प्रेक्षणार्थं कुतूहलात् ॥१४॥
समाजग्मुस्तदा राजन्प्रभाते उदिते रवौ ॥
विमानवरमारुह्य अप्सरोगणसेविताः ॥१५॥
गन्धर्वैर् गीयमानास्ते स्तूयमानाः प्रबोधकैः ॥
तत्र स्थाने द्विजा राजन्समित्पुष्पकुशान्बहून् ॥१६॥
आश्रमांस्तान्परित्यज्य गताः सर्वे दिशो दश ॥
तमाश्रमपदं दृष्ट्वा शून्यं चैव महेश्वरः॥१७॥
उवाच वाक्यं धर्मज्ञो वाडवान्क्लिशते विभो ॥
शुशूषार्थं हि शुश्रूषन्कल्पयेदिति मे मतिः ॥१८॥
श्रुत्वा तु वचनं शम्भोर्देवदेवो जनार्दनः ॥
सत्यंसत्यमिति प्रोच्य ब्रह्माणमिदमब्रवीत् ॥ १९ ॥
भोभो ब्रह्मन्द्विजातीनां शुश्रूषार्थं प्रकल्पय ॥
सृष्टिर्हि शाश्वतीवाद्य द्विजोघोपि सुखी भवेत् ॥
विष्णोर्वाक्यमभिश्रुत्य ब्रह्मा लोकपितामहः॥3.2.9.१२०॥
संस्मरन्कामधेनुं वै स्मरणेनैव तत्क्षणे॥
आगता तत्र सा धेनुर्धर्मारण्ये पवित्रके ॥ १२१ ॥
इति श्रीस्कान्दे महापुराण एकाशीतिसाहस्र्यां संहितायां तृतीये ब्रह्मखण्डे पूर्वार्धे धर्मारण्यमाहात्म्ये गोत्रप्रवरगोत्रदेवीकथनन्नाम नवमोऽध्यायः ॥९॥ ॥।छ॥ ॥