०६७

Skandapurāṇa Adhyāya 67

E-text generated on February 22, 2017 from the original TeX files of: Yokochi, Yuko, ed. The Skandapurāṇa. Vol.III. Adhyāyas 34.1-61, 53-69. The Vindhyavāsinī Cycle. Critical Edition with an Introduction & Annotated English Synopsis. Leiden/Groningen: Brill & Egbert Forsten, 2013.

SP0670010: सनत्कुमार उवाच।
SP0670011: आजग्मुः कौशिकीं द्रष्टुमथ विन्ध्यं दिवौकसः।
SP0670012: आदित्या वसवो रुद्रा मरुत्वान्मरुतो ऽश्विनौ॥ १॥ SP0670021: धर्माङ्गिरोशनोदक्षवसिष्ठभृगुकश्यपाः।
SP0670022: पुलस्त्यपुलहागस्त्यसनकात्रिसनन्दनाः॥ २॥ SP0670031: अप्सरोयक्षगन्धर्वाः सिद्धा नागमहोरगाः।
SP0670032: उपवेदाश्च यज्ञाश्च वेदा विद्याः सरस्वती॥ ३॥ SP0670041: समुद्राः सरितः शैलास्तीर्थानि विविधानि च।
SP0670042: मातरो लोकपालाश्च नक्षत्राणि ध्रुवो ग्रहाः॥ ४॥ SP0670051: अथोचुर्देवता देवीं द्युतिमत्यो महाद्युतिम्।
SP0670052: प्रहृष्टा हृष्टमनसामासीनामसुरद्विषः॥ ५॥ SP0670061: दानवेन्द्रौ महासत्त्वौ त्वया त्रैलोक्यकण्टकौ।
SP0670062: निघ्नत्या देवि लोकानां दुःखशल्यमपाकृतम्॥ ६॥ SP0670071: ऋषयः पावनं देवि हविर्जुह्वन्ति साम्प्रतम्।
SP0670072: छन्दांस्यधीयते चोच्चैराचरन्ति व्रतानि च॥ ७॥ SP0670081: यज्ञो ऽयमधुना विप्रैरीज्यते बहुदक्षिणः।
SP0670082: उटजेषु च विश्वस्ता मुनयः शेरते सुखम्॥ ८॥ SP0670091: आसते निर्भया देवि सन्तः सन्मार्गमाश्रिताः।
SP0670092: आविर्भूतः पुनर्लोके विच्छिन्नः सत्क्रियापथः॥ ९॥ SP0670101: लोकपालाः शिरांस्युच्चैस्त्वत्प्रसादाच्च बिभ्रति।
SP0670102: पृक्तः पुष्परजोभिश्च सुखो वाति समीरणः॥ १०॥ SP0670111: जलानि देवि सरितः स्वच्छानि शिशिराणि च।
SP0670112: त्वत्प्रसादान्महायोगे वहन्ति विगतक्लमाः॥ ११॥ SP0670121: इदानीं च पुनर्जाता गिरयो गिरिजात्मजे।
SP0670122: विज्वराः शिशिरस्वादुनिर्झरोदकवाहिनः॥ १२॥ SP0670131: फणान्स्वस्तिकचक्राङ्कानुच्चैर्दधति भोगिनः।
SP0670132: उदन्वन्तश्च विश्वासादिदानीं सुखमासते॥ १३॥ SP0670141: भ्रमन्त्यप्सरसो देवि त्वत्प्रसादाच्च साम्प्रतम्।
SP0670142: सचेतो विमले व्योम्नि विलासालसलोचनाः॥ १४॥ SP0670151: सिद्धाङ्गनाश्च सेवन्ते विश्वस्ता देवि साम्प्रतम्।
SP0670152: शिखरेषु महीध्राणामुत्फुल्लांश्चन्दनद्रुमान्॥ १५॥ SP0670161: स्वभावान्मधुपानाच्च रक्तलोलविलोचनाः।
SP0670162: विचरन्त्यधुना यक्षा गन्धमादनसानुषु॥ १६॥ SP0670171: सुखं बिभर्ति वसुधामिदानीं विगतक्लमः।
SP0670172: शेषः फणैः स्वरत्नांशुवितानपरिवेषिभिः॥ १७॥ SP0670181: माता त्वमसि लोकानां भीतानामभयप्रदा।
SP0670182: वृणु देवि वरानिष्टानभिषिच्यस्व चाच्युते॥ १८॥ SP0670191: एवमुक्ता सुरैर्देवी प्राह किंचित्स्मयन्निव।
SP0670192: इच्छामि पितरं द्रष्टुमसमग्रेन्दुमौलिनम्॥ १९॥ SP0670201: सुप्रसन्नं प्रसन्नां च जननीं शैलनन्दनाम्।
SP0670202: पितृभ्यां चाभ्यनुज्ञातामभिषेक्ष्यथ मां ततः॥ २०॥ SP0670211: एवमुक्ताः सुरा दध्युरव्यग्रमनसा तदा।
SP0670212: सपत्नीकं महादेवममितद्युतिपौरुषम्॥ २१॥ SP0670221: अथ ते ददृशुर्देवा देवदेवमुमापतिम्।
SP0670222: तेजसामिव सर्वेषां संघातं पुरतः स्थितम्॥ २२॥ SP0670231: जटानां प्रान्तबभ्रूणां शिरसा भारमुन्नतम्।
SP0670232: बिभ्राणं ज्वलितं वह्निं दीप्तानामर्चिषामिव॥ २३॥ SP0670241: कर्पूरभङ्गगौरेण स्नातं पुण्येन भस्मना।
SP0670242: प्रान्तहेमलताजालं रौप्यं गिरिमिवोच्छ्रितम्॥ २४॥ SP0670251: तेजसा स्वेन तेजांसि तिरस्कुर्वन्दिवौकसाम्।
SP0670252: मध्यंदिने प्रदीपानामर्चींसीव दिवाकरः॥ २५॥ SP0670261: सुधाम्बुस्यन्दिनीं तन्वीमेकतः परिवेषिणीम्।
SP0670262: दधानं मौलिना किञ्चित्कुटिलामैन्दवीं कलाम्॥ २६॥ SP0670271: विजिह्मनखरां गुर्वीं धूसरां भस्मरेणुना।
SP0670272: सैंहीं वसानमालम्बामीषद्भङ्गवतीं त्वचम्॥ २७॥ SP0670281: छुरितोपान्तकायेन फणरत्नमरीचिभिः।
SP0670282: महता भोगपतिना वक्षःस्थलविसर्पिणा॥ २८॥ SP0670291: भवानीं चास्य पार्श्वस्थां दीप्यमानां स्वतेजसा।
SP0670292: वसानामंशुकं रक्तं कल्पपादपसम्भवम्॥ २९॥ SP0670301: मन्दारमालामुत्फुल्लां मत्तालिकुलसेविताम्।
SP0670302: दधानामुत्तमाङ्गेन स्वरेणूत्करपिञ्जराम्॥ ३०॥ SP0670311: स्वःशिल्पिघटितैश्चित्रै रत्नांशुपरिवेषिभिः।
SP0670312: शातकुम्भमयैः श्लाघ्यैर्भूषितां भूषणोत्तमैः॥ ३१॥ SP0670321: बिभ्रतीं रुचिरां शुद्धां शरच्चन्द्रांशुनिर्मलाम्।
SP0670322: शिरोधरण्या महतीमेकावलिमनुत्तमाम्॥ ३२॥ SP0670331: अथोत्थाय सुराः सर्वे कौशिकी चानतानना।
SP0670332: तयोश्चरणपद्मेषु निपेतुस्तुष्टमानसाः॥ ३३॥ SP0670341: अथोद्वीक्ष्य महादेवः कौशिकीमिदमब्रवीत्।
SP0670342: अजेया सर्वभूतानां महायोगा महाद्युतिः।
SP0670343: विचरिष्यसि लोकांस्त्वं सर्वत्राप्रतिघातिनी॥ ३४॥ SP0670351: इमाश्च देवताः सर्वास्त्वत्प्रसादादनिन्दिते।
SP0670352: - - - - - - - - - - - - - - - -॥ ३५॥ SP0670361: भक्त्या बल्युपहारैश्च पूजयिष्यन्ति मानवाः।
SP0670362: वरदा चापि भक्तानां भविष्यसि सदानघे॥ ३६॥ SP0670371: अभिषिच्यस्व च क्षिप्रं सुरैरसुरसूदनि।
SP0670372: कृत्स्नं रक्ष च भूर्लोकं पूज्यमाना सदाव्यये॥ ३७॥ SP0670381: शर्वाणी च परिष्वज्य मूर्ध्नि चाघ्राय कौशिकीम्।
SP0670382: प्राह प्रीता महाभागा मत्प्रसादाद्भविष्यसि॥ ३८॥ SP0670391: अर्चयन्ति यथा मां च सुरा यक्षा महोरगाः।
SP0670392: गन्धर्वा मुनयः सिद्धास्तथा त्वामप्यनिन्दिते।
SP0670393: अर्चयिष्यन्ति सर्वत्र भक्ताः स्तोष्यन्ति चाव्यये॥ ३९॥ SP0670401: एवं तस्यै वरान्दत्त्वा गिरिजावृषभध्वजौ।
SP0670402: नमस्कृतौ तदा देवैरन्तर्दधतुरव्ययौ॥ ४०॥ SP0670411: अथेन्द्रो विश्वकर्माणमादिदेश तदा प्रभुः।
SP0670412: सुधर्मेव सभा दिव्या क्रियतामिह साम्प्रतम्॥ ४१॥ SP0670421: ऋतूंश्च सर्वांस्तत्रेत्थमादिदेश शतक्रतुः।
SP0670422: नानापुष्पोत्करैः क्षिप्रं भूमिः सम्यग्विभूष्यताम्॥ ४२॥ SP0670431: क्षुपगुल्मलतावृक्षपुष्परेणुसुगन्धयः।
SP0670432: आक्षिपन्तो मनांस्यत्र सुखा वान्तु समीरणाः॥ ४३॥ SP0670441: सिञ्चन्तु वारिभिः पुण्यैर्विन्ध्यप्रस्थं पयोमुचः।
SP0670442: तारं नदन्तु शिखिनः प्रहृष्टाः सर्वतोदिशः॥ ४४॥ SP0670451: नृत्यन्तु परितश्चित्रा दर्शयन्तः पृथग्विधान्।
SP0670452: रसान्भावान्विलासांश्च सर्वे चाप्सरसां गणाः॥ ४५॥ SP0670461: प्रतिसार्याशु वीणाश्च गन्धर्वा मधुरस्वराः।
SP0670462: लयतालसमं गेयं गायन्तु च समन्ततः॥ ४६॥ SP0670471: आहन्यन्तां समन्ताच्च देवदुन्दुभयो भृशम्।
SP0670472: पाणिभिः कठिनैस्तूर्णं चित्ररूपा महास्वनाः॥ ४७॥ SP0670481: मन्दानिलसमुद्धूता लीनालिकुलपङ्क्तयः।
SP0670482: पतन्त्वस्मिन्प्रदेशे च दिव्याः कुसुमवृष्टयः॥ ४८॥ SP0670491: उच्छ्रयन्तां समन्ताच्च पताकाश्चित्रमूर्तयः।
SP0670492: ध्वजाश्च विविधाकारा हेमदण्डाः सुसंस्कृताः॥ ४९॥ SP0670501: अथाशु निर्मिमे तत्र विश्वकर्मा महाद्युतिः।
SP0670502: नानारत्नोज्ज्वलस्तम्भां विचित्रमणिवेदिकाम्॥ ५०॥ SP0670511: वज्रस्फटिकनिर्यूहां जाम्बूनदमयीं शुभाम्।
SP0670512: इन्द्रनीलोरुसोपानां मुक्तादामावलम्बिनीम्॥ ५१॥ SP0670521: सध्वजां सपताकां च घण्टास्वननिनादिताम्।
SP0670522: तपोनियमयज्ञानां साक्षात्सिद्धिमिवोद्गताम्॥ ५२॥ SP0670531: भिन्नकालानि पुष्पानि ददृशुर्देवतास्तदा।
SP0670532: समं सुपुण्यगन्धानि विचित्राणि बहूनि च॥ ५३॥ SP0670541: पुष्पकिञ्जल्कगर्भाश्च सुखस्पर्शाः सुगन्धयः।
SP0670542: नादयन्तो मुहुर्घण्टा ववुस्तत्र समीरणाः॥ ५४॥ SP0670551: प्रगीताः सुरगन्धर्वा ननृतुश्चाप्सरोगणाः।
SP0670552: ऋषयस्तुष्टुवुर्गीर्भिः पुण्याभिः कौशिकीं तदा॥ ५५॥ SP0670561: सर्वरत्नौषधैर्गन्धैः पूर्णाः पुण्यैश्च वारिभिः।
SP0670562: आनीतास्तत्र कलशा हेमरत्नमयाः शुभाः॥ ५६॥ SP0670571: पद्मरागमयैः सिंहैश्चतुर्भिर्वज्रकेसरैः।
SP0670572: उच्छ्वसद्भिरिव श्रीमदुह्यमानं हिरण्मयम्॥ ५७॥ SP0670581: सर्वरत्नप्रभाजालखचितोपान्तमण्डलम्।
SP0670582: कल्पयामास देव्याश्च विश्वकर्मा वरासनम्॥ ५८॥ SP0670591: स्तुतिभिर्जयशब्दैश्च स्तूयमाना समन्ततः।
SP0670592: ऋषिभिर्देवताभिश्च देवदेवसुता ततः॥ ५९॥ SP0670601: तस्मिन्सिंहासने दिव्ये निषसादाथ कौशिकी।
SP0670602: कृतस्वस्त्ययना विप्रैः सुहुते जातवेदसि॥ ६०॥ SP0670611: वसाना वाससी शुक्ले कल्पद्रुमसमुद्भवे।
SP0670612: मुक्तादामावबद्धाङ्गी शुक्लस्रगनुलेपना॥ ६१॥ SP0670621: ततः सप्तर्षयो विष्णुर्धर्मो यज्ञः प्रजापतिः।
SP0670622: आदित्याः कश्यपो रुद्रा लोकपाला हुताशनाः॥ ६२॥ SP0670631: शैलेन्द्राः पृथिवी गङ्गा चन्द्रमा मरुतो ऽश्विनौ।
SP0670632: समुद्रा वसवो लक्ष्मी सन्ध्या कीर्तिः सरस्वती॥ ६३॥ SP0670641: नागेन्द्रा विहगेशाश्च विविधाश्च सरिद्वराः।
SP0670642: आदाय कलशान्सर्वानभ्यषिञ्चन्त कौशिकीम्॥ ६४॥ SP0670651: पूर्णेन्दुबिम्बप्रतिमं रत्नदण्डं महाद्युतिम्।
SP0670652: जग्राह च ततश्छत्त्रं स्वयमेव शतक्रतुः॥ ६५॥ SP0670661: चामरैर्हेमदण्डैश्च दीर्घैश्चन्द्रांशुनिर्मलैः।
SP0670662: वीजयामासुरायस्तैर्लोकपालास्तदाव्ययाम्॥ ६६॥ SP0670671: उवाच च ततः श्रीमान्कौशिकीं पाकशासनः।
SP0670672: पाहि कृत्स्नां भुवं देवि भगिनी त्वं ममाव्यये॥ ६७॥ SP0670681: भक्ताननुगृहाणेशे जहि चामरकण्टकान्।
SP0670682: विचरस्व समस्तांश्च लोकान्सिद्धगणार्चिता॥ ६८॥ SP0670691: इति वचनमथोक्त्वा कौशिकीं देवराजः SP0670692: त्रिदशगणसमेतः शुभ्रलोलोरुहारः।
SP0670693: उदपतदथ विन्ध्याद्विक्षिपन्व्योम्नि नीलान् SP0670694: सलिलभरविनम्रानम्बुवाहान्समन्तात्॥ ६९॥ SP0670701: य इमं शृणुयान्नित्यं पठेद्वा सत्समागमे।
SP0670702: इह लोके सुखं प्राप्य स याति परमां गतिम्॥ ७०॥ SP0679999: इति स्कन्दपुराणे सप्तषष्टो ऽध्यायः॥