पुराणे विश्वासटिप्पन्यः

विश्वास-प्रस्तुतिः - १

अथ त्रयोदशः सर्गः ।
सम्प्राप्येत्थं पाण्ड्यराज्याभिषेकं साधं देव्या सुन्दरः पाण्ड्यदेवः ।
आसीमाद्रेर्निहृतारातिशल्यां पृथ्वीं रेमे बिभ्रदेकातपत्राम् ॥ १॥

मूलम् - १

विश्वास-प्रस्तुतिः - २

साब्धिद्वीपा साटवीदुर्गशैला सर्वाप्युर्वी यत्तुलाकोटिमूर्ध्नि ।
लग्ना दृष्टा रत्नवद् बाहुना तां तस्येदानीं बिभ्रतः कः प्रयासः ॥ २॥

मूलम् - २

विश्वास-प्रस्तुतिः - ३

या भूयोभिः पाण्डरैरातपत्रैः सञ्छन्ना भूराप सन्तापमन्तः ।
सैवाहृष्यच्छाद्यमाना तदानीमेकच्छत्रच्छायया तस्य राज्ञः ॥ ३॥

मूलम् - ३

विश्वास-प्रस्तुतिः - ४

नायष्टारो नाकृतब्रह्माविद्या नादातारो नाप्यधर्मे प्रसक्ताः ।
विप्राः किन्तु त्यक्तपाण्डित्ययोगाः स्थातुं बाल्ये तस्य राष्ट्रे चकाङ्क्षुः ॥ ४॥

मूलम् - ४

विश्वास-प्रस्तुतिः - ५

चातुर्वर्ण्यं चातुराश्रम्यरम्यं चातुर्वैद्यं तच्चतुर्वर्गयोगम् ।
दृष्ट्वा तेन स्थापितं निर्विशङ्कं तस्थौ धर्मस्तत्र पादैश्चतुर्भिः ॥ ५॥

मूलम् - ५

विश्वास-प्रस्तुतिः - ६

गावो धान्यं भूषणान्यम्बराणि स्वर्णं रूप्यं यानि चैवंविधानि ।
स्वामिन्यादौ विप्रलब्धे तदीयं सर्वं जज्ञे विप्रलब्धं तदानीम् ॥ ६॥

मूलम् - ६

विश्वास-प्रस्तुतिः - ७

कैलासाद्रिं शासतः कल्पकोटीः पूर्णः कोशो यस्य भिक्षाकपालैः ।
प्राप्तेनेत्थं पाण्ड्यराज्याधिपत्यं लब्धा सद्यस्तेन लक्ष्मीरपारा ॥ ७॥

मूलम् - ७

विश्वास-प्रस्तुतिः - ८

शैवाः शाक्ता वैष्णवाः साङ्ख्यनिष्ठा योगाचार्या ब्रह्मविद्याविदोऽपि ।
गत्वा गत्वा तं यथैकं प्रपन्नास्तद्वत् तास्ताः कीर्तयोऽपि त्रिलोक्याम् ॥ ८॥

मूलम् - ८

विश्वास-प्रस्तुतिः - ९

येऽस्मिन्नम्रास्तेजसा तं प्रपन्ना ये तु द्विष्टास्ते हताः सङ्गरेषु ।
भित्त्वा भानोर्बिम्बमूर्ध्वं पतन्तः पर्यावृत्य प्रापुरन्ते तमेव ॥ ९॥

मूलम् - ९

विश्वास-प्रस्तुतिः - १०

वक्राम्भोजान्निस्सृतं वाक्यमानं पश्यन् देवो वेदवादायमानम् ।
सङ्ख्याधिक्याद्वेदशाखासु भीतः स्तोकस्तोकं व्याजहाराप्रमत्तः ॥ १०॥

मूलम् - १०

विश्वास-प्रस्तुतिः - ११

सीमन्यम्भोविप्लवे सेतुबन्धे गोसञ्चारे सार्थसम्मेलने वा ।
या मीनाक्ष्या स्थापिता प्राक् प्रजानां तां मर्यादां स प्रमाणीचकार ॥ ११॥

मूलम् - ११

विश्वास-प्रस्तुतिः - १२

कोशान् पञ्चैवाहुरन्नादिरूपान् यस्याशेषं शासतोऽमुं प्रपञ्चम् ।
सङ्ख्यातीता हेमरत्नादिरूपास्तस्येदानीं तेऽभवन् पाण्ड्यभर्त्तुः ॥ १२॥

मूलम् - १२

विश्वास-प्रस्तुतिः - १३

पाण्ड्याध्यक्षः पाण्ड्यजामातृदेवः प्रेयान् राज्ञ्याः पालको द्रामिडानाम् ।
इत्याख्याभिः प्रीतिरस्याधिकासीदात्मब्रह्मज्योतिरादिश्रुतिभ्यः ॥ १३॥

मूलम् - १३

विश्वास-प्रस्तुतिः - १४

या मीनाक्ष्यास्तावती राज्य शक्तिः सा सङ्क्रान्ता तत्र भूयश्चकाशे ।
प्राप्तोत्कर्षा सानुनि स्फाटिकाद्रेः पत्युर्भासां भास्वरेवांशुरेखा ॥ १४॥

मूलम् - १४

विश्वास-प्रस्तुतिः - १५

स्वे स्वे धर्मे स्थापिताः सर्व एव क्ष्मापालत्वं बिभ्रता तेन लोकाः ।
कालस्त्वेकश्च्यावितः स्वाधिकाराद् धर्मैकान्त्यं तन्वता मानवेषु ॥ १५॥

मूलम् - १५

विश्वास-प्रस्तुतिः - १६

इत्थं राज्यं बिभ्रता तेन राज्ञा देवी जातु स्फारचिन्तानिमग्ना ।
भूयो भूयो हेतुमत्रानुयुक्ता प्राह स्मेदं प्राणनाथं मृगाक्षी ॥ १६॥

मूलम् - १६

विश्वास-प्रस्तुतिः - १७

सञ्चिन्वाना तावकीनात् प्रसादाद् धर्मं तं तं नाथ! माता मदीया ।
जातौत्सुक्या तीर्थयात्राविधाने स्नातुं सिन्धौ श्वः प्रतिष्ठासते सा ॥ १७॥

मूलम् - १७

विश्वास-प्रस्तुतिः - १८

इत्याकर्ण्य प्रेयसीखेदमूलं तत्रानेष्यन् सागरान् सप्त देवः ।
सस्माराग्रे सद्य एवास्य तेऽपि प्रादुर्भूता मूर्तिमन्तः प्रणेमुः ॥ १८॥

मूलम् - १८

विश्वास-प्रस्तुतिः - १९

प्राचि स्थाने सोमसौन्दर्यनेतुः प्रागेवास्ते कश्चिदेकस्तटाकः ।
सर्वे तस्मिन् सन्निधत्तेति देवो नामादेशं सागरानादिदेश ॥ १९॥

मूलम् - १९

विश्वास-प्रस्तुतिः - २०

पश्यन्तीनामग्रतस्ते प्रजानां त्यक्त्वा रूपं पौरुषं सिन्धुराजाः ।
दृश्यन्ते स्म व्याम्नि दूरे तरङ्गैराजिघ्रन्तो दिक्तटानुत्तरङ्गैः ॥ २०॥

मूलम् - २०

विश्वास-प्रस्तुतिः - २१

स्वं स्वं रूपं सङ्क्षिपन्तोऽपि ते ते कासारान्तस्सम्भवाह समुद्राः ।
आलक्ष्यन्त स्पष्टमत्यद्भुताभिर्वल्गन्तीभिः पङ्क्तिभिर्वीचिकानाम् ॥ २१॥

मूलम् - २१

विश्वास-प्रस्तुतिः - २२

आक्रामद्भिर्योमकक्ष्यामकाण्डे स्रोतोभिस्तैः स्वीकृताः सागराणाम् ।
जग्मुर्मेधास्तत्र शैवालभावं विद्युल्लेखा विद्रुमत्वं च तेषाम् ॥ २२॥

मूलम् - २२

विश्वास-प्रस्तुतिः - २३

आसप्तर्षिस्थानमाक्रान्तिहेतोः संवर्तेषु द्यामिव द्रष्टुकामैः ।
आरूढे व्योम्न्यर्णवैरभ्रसिन्धोः सव्यं चक्षुः शश्वदस्पन्दतोच्चैः ॥ २३॥

मूलम् - २३

विश्वास-प्रस्तुतिः - २४

भागीरथ्या जातु लेभेऽभिषेकं पर्याप्तं यः प्राग्युगे व्योमकेशः ।
द्रव्यैस्तैस्तैर्दुग्धदध्याज्यमुख्यैर्द्वैतीयीकः सोऽस्य जज्ञेऽभिषेकः ॥ २४॥

मूलम् - २४

विश्वास-प्रस्तुतिः - २५

पश्यत्यग्रे पाण्ड्यदेवे ततस्ते पारावाराः पल्वले तत्र पेतुः ।
पार्श्वस्थास्नोरृत्विजः कुम्भयोनेः प्रायस्तालुन्यार्द्रतामावहन्तः ॥ २५॥

मूलम् - २५

विश्वास-प्रस्तुतिः - २६

क्षीरं सर्पिर्वारुणीमिक्षुसारं दध्यप्यभ्रे दुर्लभं पातुकामाः ।
विष्वग् देवाः सम्पतन्तो विमानैः स्रोतस्येषां कीटमज्जं ममज्जुः ॥ २६॥

मूलम् - २६

विश्वास-प्रस्तुतिः - २७

क्षारं वारि क्षीरमुख्यानि वस्तून्येकं सर्वाण्येकदैवाजधान ।
मौढ्यं ह्येकं हन्ति राशिं गुणानां शौर्यौदार्यस्थैर्यगाम्भीर्यमुख्यम् ॥ २७॥

मूलम् - २७

विश्वास-प्रस्तुतिः - २८

शब्दस्पर्शौ रूपगन्धौ रसश्च प्राप्तास्तीर्थे चित्रतां तत्र सद्यः ।
आस्तामेतन्मज्जतामत्र नॄणां स्वर्गेऽप्यासीच्चित्रता यद्विचित्रा ॥ २८॥

मूलम् - २८

विश्वास-प्रस्तुतिः - २९

सर्वे गन्धा यत्र सर्वे रसाश्च प्रादुर्भूतास्तीर्थराजे हि तस्मिन् ।
स्नानाल्लभ्ये तादृशि ब्रह्मभावे न्यायज्ञानां नागमाः पर्युपास्याः ॥ २९॥

मूलम् - २९

विश्वास-प्रस्तुतिः - ३०

नीरक्षीरे द्वे विवेक्तुं प्रगल्भा हंसास्तस्मिन् सर्वसङ्घातरूपे ।
भमोत्साहा मत्स्यमण्डूककूर्मैः प्राप्ताः साम्यं न प्रचेलुर्विलज्जाः ॥ ३०॥

मूलम् - ३०

विश्वास-प्रस्तुतिः - ३१

पत्या सार्धं योपितोऽधिक्रियन्ते तीर्थे स्नातुं पुत्रवत्योऽथवेति ।
श्रुत्वा शास्त्रं चिन्तया दूयमानां श्वश्रूमन्तस्तत्र शुश्राव देवः ॥ ३१॥

मूलम् - ३१

विश्वास-प्रस्तुतिः - ३२

आवर्तार्हं स्थानमुल्लङ्घ्य सर्वं सम्प्राप्तस्तच्छाश्वतं धाम शम्भोः ।
प्रत्यानेयो वल्लभोऽस्याः कथं वेत्यन्तश्चिन्तामाप देवस्ततोऽपि ॥ ३२॥

मूलम् - ३२

विश्वास-प्रस्तुतिः - ३३

पत्युश्छायां पाण्ड्यदेव्याः स कामप्यानीयाग्रे दर्शयन् प्रेयसी स्वाम् ।
तद्वृत्तान्तस्मेरदृष्ट्यानया तां वृत्तान्तं तं वेदयामास देवः ॥ ३३॥

मूलम् - ३३

विश्वास-प्रस्तुतिः - ३४

सा संहृष्टा तां निशम्य प्रवृत्तिं पश्यन्ती च प्राणनाथं विमाने ।
आलिङ्गन्ती निभरं मीननेत्रां भूयो भूयो मूर्ध्नि चैनामजिघ्रत् ॥ ३४॥

मूलम् - ३४

विश्वास-प्रस्तुतिः - ३५

त्वन्मातृत्वात् सिद्धमेवापवर्गं मन्वानाहं तेन हृष्टा न तावत् ।
यावत् तातं वीक्षमाणा तवेति स्तावंस्तावं सा बभाष कुमारीम् ॥ ३५॥

मूलम् - ३५

विश्वास-प्रस्तुतिः - ३६

लब्ध्वा योगं लज्जमाना विमानादाप्लुत्यारादागतेन प्रियेण ।
दत्तानुज्ञा देवपाण्ड्येन देवी सस्नौ तीर्थे सप्तरत्नाकरे सा ॥ ३६॥

मूलम् - ३६

विश्वास-प्रस्तुतिः - ३७

दीनं रूपं प्रेयसा विप्रयोगाद् देव्याः स्नान्त्यास्तत्र दृष्टं जनैर्यत् ।
उन्मजन्त्यास्तत् ततः पर्यणंसीच्चन्द्रापीडं चारुहासं त्रिणेत्रम् ॥ ३७॥

मूलम् - ३७

विश्वास-प्रस्तुतिः - ३८

सा गच्छन्ती शाश्वतं धाम शम्भोः सार्धं पत्या सर्वसौभाग्यधाम ।
क्लेशं कन्याविप्रयोगप्रसक्तं किञ्चिञ्चिते धारयन्तीदमूचे ॥ ३८॥

मूलम् - ३८

विश्वास-प्रस्तुतिः - ३९

अद्य ज्ञातं ब्रह्म पूर्णं युवामित्यद्योत्सन्नः पाशवर्गोऽखिलो मे ।
दूयेऽथापि त्वर्धविच्छिन्नमासीत् त्वत्सौभाग्यालोकभाग्यं किलेति ॥ ३९॥

मूलम् - ३९

विश्वास-प्रस्तुतिः - ४०

शुश्रूषस्व प्रेयसः पादपद्मं क्षान्त्या धृत्या प्रेमवत्या च भक्त्या ।
लब्ध्वा पुत्रं राज्यभारेऽभिषिच्य द्रष्टास्मि त्वां स्वं पदं प्रत्युपेताम् ॥ ४०॥

मूलम् - ४०

विश्वास-प्रस्तुतिः - ४१

इत्यादिश्य प्रस्थितायां जनन्यां सर्वोत्तीर्णं शाङ्करं धाम दिव्यम् ।
आनन्दोत्थैः शोकजैश्चाश्रुपूरैर्वक्रं देव्या दूषितं भूषितं च ॥ ४१॥

मूलम् - ४१

विश्वास-प्रस्तुतिः - ४२

ताभिस्ताभिस्तत्प्रसङ्गोचिताभिर्मार्जन् वाग्भिर्मानसं क्लेशमस्याः ।
वारिक्रीडां वारिजाक्ष्यानयासावानन्दाब्धावाचचार प्रवीरः ॥ ४२॥

मूलम् - ४२

विश्वास-प्रस्तुतिः - ४३

दीनान् दानैर्देवता यज्ञभागैरार्त्तानार्तिच्छेदनैस्तत्तदर्हैः ।
जिज्ञासूनप्यात्मविज्ञानदानैर्देवो रक्षन् पालयामास पृथ्वीम् ॥ ४३॥

मूलम् - ४३

विश्वास-प्रस्तुतिः - ४४

अन्तर्वत्नीं जातु कालेन पत्नीं दर्शं दर्शं पिप्रिये देवपाण्ड्यः ।
केकीवाम्भस्सम्भृतां मेघमालां माध्वीगर्भां पद्मिनीमप्यळीव ॥ ४४॥

मूलम् - ४४

विश्वास-प्रस्तुतिः - ४५

यत् कातर्यं यौवनेनाक्ष्णि दत्तं यच्चानीतं दौहृदेनाथ तस्याः ।
प्रागल्भ्याय प्राभवत् सर्वमेतत् तत्सम्भूतेरद्भुतं मीनकेतोः ॥ ४५॥

मूलम् - ४५

विश्वास-प्रस्तुतिः - ४६

पुष्टान्यङ्गान्यापुरस्याः कृशत्वं नित्यं कार्श्यं निर्जहौ मध्यदेशः ।
पर्यायेण ह्रासवृद्ध्योः प्रवृत्तिस्तत्राप्यासीदीदृशः कालभेदः ॥ ४६॥

मूलम् - ४६

विश्वास-प्रस्तुतिः - ४७

अन्योन्येन स्पर्धमानावुरोजावास्तामस्या यौवनोपक्रमं यौ
स्पर्धां मुख्यामद्य तावन्वभूतां सङ्घर्षेणान्योन्यमासादितेन ॥ ४७॥

मूलम् - ४७

विश्वास-प्रस्तुतिः - ४८

शक्तिः ख्याता यावती या च तस्याः सर्वाप्येषालम्भि गर्भेण नूनम् ।
नो चेदित्थं स्यात् कथङ्कारमस्याः स्नातुं पातुं स्पन्दितुं चाप्यशक्तिः ॥ ४८॥

मूलम् - ४८

विश्वास-प्रस्तुतिः - ४९

केन्द्रे चन्द्रे देशिके चामराणामृक्षे रौद्र रौद्रवृत्तिः परेषु ।
प्रादुर्भूतः पाण्ड्यवंशस्य भूत्यै तस्या गर्भात् तारकारिः कुमारः ॥ ४९॥

मूलम् - ४९

विश्वास-प्रस्तुतिः - ५०

आनेष्यन्ते यानि तेनात्मजेन स्वर्णान्यग्रे मेरुमूलादमीषाम् ।
चक्रे देवः कोशगेहेऽवकाशं भूदेवानां भूरिदानच्छलेन ॥ ५०॥

मूलम् - ५०

विश्वास-प्रस्तुतिः - ५१

राज्ञां पश्यन् राज्यतन्त्रस्थितानां बालो दोषान् बाहुमुख्यप्रयुक्तान् ।
साब्धिद्वीपां पालयिष्यन् धरित्रीं चक्रे देवः षण्मुखोऽप्यैकमुख्यम् ॥ ५१॥

मूलम् - ५१

विश्वास-प्रस्तुतिः - ५२

उग्रस्यर्क्षे जातमुग्रं प्रकृत्याप्युद्गन्तारं तेजसा च श्रिया च ।
जानन् बालं शासनात् कुम्भयानेश्चक्रे नाम्नाप्युग्र इत्येव देवः ॥ ५२॥

मूलम् - ५२

विश्वास-प्रस्तुतिः - ५३

मीमांसाङ्गन्यायधर्मेतिहासैः सार्धं वेदाः स्वम्वशाखासमेताः ।
प्राप्ते काले प्रत्यभुः पाण्ड्यसूनोद्वारं कृत्वा देशिकस्योपदेशम् ॥ ५३॥

मूलम् - ५३

विश्वास-प्रस्तुतिः - ५४

दैतेयारिर्येन खड्गे विनीतश्चापे शिष्यो जामदग्न्यो यदीयः ।
साक्षादासीन्मेरुधन्वा स देवः शस्त्रास्त्राणां शासिता तस्य यूनः ॥ ५४॥

मूलम् - ५४

विश्वास-प्रस्तुतिः - ५५

कन्या ख्याता कान्तिमत्याख्ययासीद् भास्वर्सेश्या सोमचूडम्य राज्ञः ।
पित्रा दत्तां तामुपानीय देवः पाणौ तेन ग्राहयामास यूना ॥ ५५॥

मूलम् - ५५

विश्वास-प्रस्तुतिः - ५६

शक्तिर्दण्डश्चक्रमित्यायुधानि त्रीणि प्रौढज्वालमालाकुलानि ।
दत्वा तस्मै देवदेवोऽभ्यषिञ्चत् प्रह्वीभूतं पाण्ड्यराज्ये कुमारम् ॥ ५६॥

मूलम् - ५६

विश्वास-प्रस्तुतिः

प्रागासीद्यो देवसेनापतिः स प्रापदानीं पाण्ड्यसेनापतित्वम् ।
दैतेयः प्राक् तारको निर्जितोऽद्य त्वज्ञानाब्धेस्तारकस्तात एव ५७॥

मूलम्

विश्वास-प्रस्तुतिः - ५८

पृथ्वीं सर्वामर्पयित्वा कुमारे पृथ्वीं कीर्तिं केवलं गृह्णतः स्वाम् ।
सार्धं देव्या वत्सराणां सहस्राण्येवं षष्टिः षट् च तम्य व्यतीयुः ॥ ५८॥

मूलम् - ५८

विश्वास-प्रस्तुतिः - ५९

इत्थं पाल्या भूमिरित्थं विजेया दृप्ता इत्थं वर्तितव्यं त्वयेति ।
आदिश्योग्रं दम्पती मूललिङ्गे मीनाक्ष्यां च प्रापतुस्तौ प्रवेशम् ॥ ५९॥

मूलम् - ५९

विश्वास-प्रस्तुतिः - ६०

तौ मीनाक्षीसुन्दरेशात्मनाथच्छन्नौ किञ्चित् प्रत्यहं सेवमानः ।
चक्रे राज्यं नामयन् राजवंश्यानुग्रम्पश्यैः शासनैरुग्रपाण्ड्यः ॥ ६०॥

मूलम् - ६०

विश्वास-प्रस्तुतिः - ६१

ईजे शम्भुं यच्छतेनाश्वमेधैर्यच्चाभुङ्क्त स्वर्गभागान् स भूमौ ।
तेनासूयां तत्र शक्रो बबन्ध प्रायेणायं पामराणां स्वभावः ॥ ६१॥

मूलम् - ६१

विश्वास-प्रस्तुतिः - ६२

आक्रम्याम्भस्सम्प्लवै राजधानीमुन्मर्यादैरुग्रपाण्ड्यम्य राज्ञः ।
राष्ट्रं चास्य स्वीकुरुष्वेति शक्रो नेदीयांसं दक्षिणाब्धिं न्ययुक्त ॥ ६२॥

मूलम् - ६२

विश्वास-प्रस्तुतिः - ६३

अर्धे रात्रेरप्रसक्ते कथञ्चिद् वर्षे वाते दुर्दिने वा क्षणेन ।
सन्नह्यद्भिः सर्वतो वीचिसङ्घैः पारावारः स्वात् पदादुच्चचाल ॥ ६३॥

मूलम् - ६३

विश्वास-प्रस्तुतिः - ६४

एकैकोर्मिस्पन्दमात्रादपि क्ष्मां क्रोशं क्रोशद्वन्द्वमप्यावृणानः ।
भीमैर्घोषैर्भीषयन्नम्बुराशिर्ग्रामं ग्रामं मज्जयन् निर्जगाम ॥ ६४॥

मूलम् - ६४

विश्वास-प्रस्तुतिः - ६५

उच्चैरुच्चैरुत्पतन्तः पतन्तो घ्नन्तो जन्तून् गण्डशैलान् क्षिपन्तः ।
आवृण्वानाः सैकतैरद्रिकूटानभ्यक्रामन्नूर्मयो वारिराशेः ॥ ६५॥

मूलम् - ६५

विश्वास-प्रस्तुतिः - ६६

वल्गन्तोऽग्रे दुर्ग्रहा वीचिकानां जातोत्साहा जन्तवः सागरीयाः ।
व्यादायास्यं व्याघ्रसिंहद्विपादीन् वन्यान् सत्त्वान् लीलयैवाग्रहीषुः ॥ ६६॥

मूलम् - ६६

विश्वास-प्रस्तुतिः - ६७

इत्थं पुर्या योजने योजनार्धे यावत् सिन्धुर्नाजिहीते निशीथे ।
तावत् स्वप्ने बोवितस्तां प्रवृत्तिं सूक्त्या शम्भोर्जागरामास देवः ॥ ६७॥

मूलम् - ६७

विश्वास-प्रस्तुतिः - ६८

आरुह्य द्रागभ्रमातङ्गकल्पं क्रुद्धो देवः कुञ्जरं किञ्चिदुच्चैः ।
पाणौ कुर्वन् शक्तिमीशेन दत्तां पाण्ड्यः पारावारमभ्युज्जगाम ॥ ६८॥

मूलम् - ६८

विश्वास-प्रस्तुतिः - ६९

शैलेनेवोत्सर्पता कज्जलानां व्योम्नेवाधो धावता सन्निपत्य ।
सोऽभूत् तेन स्रोतसा वारिराशेर्हृष्टो देवः सद्य एवाथ रुष्टः ॥ ६९॥

मूलम् - ६९

विश्वास-प्रस्तुतिः - ७०

नायं कालः कौतुकं कर्त्तुमस्मिन् नश्यत्स्वेवं प्राणिपूच्चावचेषु ।
इत्यालोच्य प्रज्वलन् प्रज्वलन्तीं पाण्ड्यः शक्तिं पातयामास सिन्धौ ॥ ७०॥

मूलम् - ७०

विश्वास-प्रस्तुतिः - ७१

शीत्कुर्वाणा सा विशन्ती समुद्रे सर्वं पाथः सम्भ्रमत्कूर्मनक्रम् ।
उच्छासेनैकेन यान्ती पिबन्ती जह्रे भूमेः प्राक्तनं चार्द्रभावम् ॥ ७१॥

मूलम् - ७१

विश्वास-प्रस्तुतिः - ७२

मर्यादाब्धेर्मा विलोपीति शक्तिं प्रत्याहृत्य प्रज्वलन्तीं स।भूयः ।
तत्संसिद्धां तावतीमप्यदत्त क्षोणीं देवः सुन्दरेशाय सद्यः ॥ ७२॥

मूलम् - ७२

विश्वास-प्रस्तुतिः - ७३

आकैलासादा च लङ्कोपकण्ठाज्जाते दैवाज्जात्वनावृष्टियोगे ।
राज्ञः सर्वान् मेलयन् पर्यपृच्छद् राजा पाण्ड्यः कुम्भयोनिं विधेयम् ॥ ७३॥

मूलम् - ७३

विश्वास-प्रस्तुतिः - ७४

तस्यादेशादर्चनाभिः प्रणामैस्ते ते वृष्टिं देवराजं ययाचुः ।
दैन्यं त्वेतन्मीननेत्रात्मजस्य स्वान्ते जातु स्वादुतां नाबभार ॥ ७४॥

मूलम् - ७४

विश्वास-प्रस्तुतिः - ७५

अभ्यर्णेऽसौ जातुचिच्चन्दनाद्रेराखेटार्थं पर्यटन् पाण्ड्यदेवः ।
स्वच्छासीनान् पुष्कलावर्तकादीन् श‍ृङ्गोत्सङ्गे तस्य मेघानपश्यत् ॥ ७५॥

मूलम् - ७५

विश्वास-प्रस्तुतिः - ७६

कः सुत्रामा कात्र याच्ज्ञा वराके वृष्टिर्लभ्या विक्रमेणेति देवः ।
मत्वा भृत्यैर्ग्राहयन्नम्बुवाहान् कारागारे वासयामास बद्धान् ॥ ७६॥

मूलम् - ७६

विश्वास-प्रस्तुतिः - ७७

केचिन्मेघास्तत्र चोद्यानपालैः केचिच्छेकान् पालयद्भिर्मयूरान् ।
आकृष्यन्त स्वैरमारक्षकाणां सौहार्देन द्विस्सकृद् गूढमह्नाम् ॥ ७७॥

मूलम् - ७७

विश्वास-प्रस्तुतिः - ७८

नश्यद्गर्जा लुप्तबिधुद्विलासाः संशुप्यन्तः साध्वसेनाम्बुवाहाः ।
धूलीजालैर्घूसरा धूमशेषास्तत्रावात्सुः शासनात् तस्य राज्ञः ॥ ७८॥

मूलम् - ७८

विश्वास-प्रस्तुतिः - ७९

आपातालादा च सप्तर्षिलोकादम्भोभिर्ये विश्वमाप्लावयन्ते ।
तानम्भोदांस्तत्र रुद्धान् निशम्य क्रुध्यन्निन्द्रस्तेन योद्धं प्रतस्थे ॥ ७९॥

मूलम् - ७९

विश्वास-प्रस्तुतिः - ८०

ज्यानिर्घोषच्छादिताशावकाशं बाणासारध्वस्तहस्त्यश्वयोधम् ।
रक्तस्रोतःपातरक्तं समन्ताज्जज्ञ युद्धं तस्य चाखण्डलस्य ॥ ८०॥

मूलम् - ८०

विश्वास-प्रस्तुतिः - ८१

चापोन्मुक्तैः सायकौघैर्मोघैर्वेधं वेधं व्योमयानादमर्त्त्यान् ।
यूथंयूथं पातयन् कौतुकेन श्यैनम्पातामाचचारेव वीरः ॥ ८१॥

मूलम् - ८१

विश्वास-प्रस्तुतिः - ८२

येऽवागृह्णन् खेचरा वृष्टिमुर्व्यां तेषामेवोज्जासयन्नङ्गमङ्गम् ।
मर्माविद्भिर्मार्गणैरुग्रपाण्ड्यश्चक्रे वृष्टिं मज्जमांसास्रविस्राम् ॥ ८२॥

मूलम् - ८२

विश्वास-प्रस्तुतिः - ८३

उन्मर्यादैरुत्पतद्भिस्तदस्त्रः कीर्णे विष्वक् कण्टकौघैरिवाभ्रे ।
स्थातुं यातुं स्पन्दितुं चाप्यशक्ता तम्तम्भेऽसौ वाहिनी जम्भहन्तुः ॥ ८३॥

मूलम् - ८३

विश्वास-प्रस्तुतिः - ८४

तत्कोदण्डोन्मुक्तनाराचधारासद्यःकृत्तभ्रश्यदश्वेभयोधम् ।
हाहाकुर्वत्सिद्धगन्धर्ववर्गं शौनासीरं तत्र नासीरमासीत् ॥ ८४॥

मूलम् - ८४

विश्वास-प्रस्तुतिः - ८५

मर्त्त्या युद्धे पातिता देवभावं लब्ध्वा देवीर्घावमाना वरीतुम् ।
धावद्देवस्त्रैणमुद्भान्तपालं चक्रुः स्वर्गं सम्प्रवृत्तापवर्गम् ॥ ८५॥

मूलम् - ८५

विश्वास-प्रस्तुतिः - ८६

अस्त्रैरस्त्रं वारयन्नुग्रपाण्ड्यः शस्त्रैः शस्त्रं शस्त्रिणश्चावभिन्दन् ।
जातस्तातस्याक्षिकोणात् तृतीयाज्जज्वालोच्चैर्जातवेदा इवान्ते ॥ ८६॥

मूलम् - ८६

विश्वास-प्रस्तुतिः - ८७

पश्यन् पाण्ड्यो वज्रमिन्द्रेण दत्तं प्रायुङ्क्तोग्रं चक्रमीशादवाप्तम् ।
तद् दम्भोलिं स्तम्भयत् तस्य मौलिं भित्त्वा भूयः पाणिमस्याजगाम ॥ ८७॥

मूलम् - ८७

विश्वास-प्रस्तुतिः - ८८

भग्ने शक्रे भग्नकोटीरकोटौ धावत्यग्रे मुक्तकेशं सुधाशाः ।
चेलुर्विष्वक् चण्डवातावधूता दूरे दूरे तूलपिण्डा इवाभ्रे ॥ ८८॥

मूलम् - ८८

विश्वास-प्रस्तुतिः - ८९

क्रन्दद्गन्धद्विपमपसरत्सैन्धवोधूतयोध-
प्रत्युद्धारव्यसनविमुखापेतपादातजातम् ।
धावद्देवप्रवरसमरोदन्तयाथार्थ्यबोध-
भ्राम्यत्पौरं नगरमभवज्जर्जरं निर्जराणाम् ॥ ८९॥

मूलम् - ८९

इति महाकविश्रीनीलकण्ठदीक्षितप्रणीते शिवलीलार्णवे त्रयोदशः सर्गः ।