पुराणे विश्वासटिप्पन्यः

विश्वास-प्रस्तुतिः - १

अथ चतुर्थः सर्गः ।
निवृत्ते वासवे तस्मिन् निवृत्तं चान्तरे मनोः ।
इन्दाञ्चकार कोऽप्यन्यो वृन्दारकनिकेतने ॥ १॥

मूलम् - १

विश्वास-प्रस्तुतिः - २

अभ्रमातङ्गमारुह्य विभ्रमादमरेश्वरः ।
संवृतः सकलैर्देवैर्निजगाम पुराद् बहिः ॥ २॥

मूलम् - २

विश्वास-प्रस्तुतिः - ३

सर्वासामपि सिद्धीनां दुर्वासा निधिरद्भुतः ।
समगच्छत तेनाभ्रे स हि गच्छन् यदृच्छया ॥ ३॥

मूलम् - ३

विश्वास-प्रस्तुतिः - ४

परिपालयितुं रौद्रीं प्रतिसर्गाधिकारिताम् ।
तस्य न ज्वलति क्रोधो यस्यैका जगदाहुतिः ॥ ४॥

मूलम् - ४

विश्वास-प्रस्तुतिः - ५

अ ग्न्यगारगते तम्मिन्ननाहूतागताः स्वयम् ।
सन्दर्शयन्ति स्वात्मानं देवा आवाहनक्षणे ॥ ५॥

मूलम् - ५

विश्वास-प्रस्तुतिः - ६

नानुगच्छति तम्याग्निर्न विष्यन्दयते हविः ।
नापक्षयति सन्त्रस्तो न निर्मन्थे विळम्बते ॥ ६॥

मूलम् - ६

विश्वास-प्रस्तुतिः - ७

अतपत्तपनाकारमज्वलज्ज्वलनोपमम् ।
दृष्ट्वैव तं मुनिं देवास्तत्रयुस्तत्र सुस्थिताः ॥ ७॥

मूलम् - ७

विश्वास-प्रस्तुतिः - ८

पाणिभ्यामप्रमत्तोऽसौ प्रसादं पद्ममैश्वरम् ।
गजस्कन्धगतायापि ददौ राजेति वज्रिणे ॥ ८॥

मूलम् - ८

विश्वास-प्रस्तुतिः - ९

अनादृत्य स तं मोहान्निदधे मूर्ध्नि दन्तिनः ।
शुण्डया सोऽप्युपादाय निष्पिपेष निसर्गतः ॥ ९॥

मूलम् - ९

विश्वास-प्रस्तुतिः - १०

आभुज्य स भ्रुवौ किञ्चिदावर्त्य कपिले दृशौ ।
प्रजज्वालेव कोपेन मुनिः प्रस्फुरिताधरः ॥ १०॥

मूलम् - १०

विश्वास-प्रस्तुतिः - ११

पस्पन्दे न सहस्रांशुस्तस्तम्भे मारुतस्तदा ।
चकम्पे सार्णवा पृथ्वी विव्यने केवलं नभः ॥ ११॥

मूलम् - ११

विश्वास-प्रस्तुतिः - १२

स हस्तिहस्तिपकयोः शापं घोरमवासृजत् ।
वज्रं वज्रिआण दुर्वारमङ्कुशं च निरङ्कुशे ॥ १२॥

मूलम् - १२

विश्वास-प्रस्तुतिः - १३

मौलिं भेत्स्यति पाण्ड्योऽस्य मदान्धस्य दिवस्पतेः ।
सञ्चरत्ववनावेष कुञ्चरः क्षुद्रदन्तिवत् ॥ १३॥

मूलम् - १३

विश्वास-प्रस्तुतिः - १४

दत्तशापतया किञ्चिद् दग्धेन्धनमिवानलम् ।
प्रशाम्यन्तममुं देवाः प्रणिपातैरसान्त्वयन् ॥ १४॥

मूलम् - १४

विश्वास-प्रस्तुतिः - १५

सम्भ्रमोद्वेगकार्पण्यस्तम्भप्रणतिसान्त्वनैः ।
प्रसादाभिमुखस्तेषां प्राह माहेश्वरो मुनिः ॥ १५॥

मूलम् - १५

विश्वास-प्रस्तुतिः - १६

पाण्ड्यो भिनत्तु तर्ह्यस्य मौलिं मकुटलक्षणम् ।
सुन्दरेशार्चनान्तश्च शापः स्वर्दन्तिनोऽस्त्विति ॥ १६॥

मूलम् - १६

विश्वास-प्रस्तुतिः - १७

महेन्द्रसविधावासवासनारसिकश्चिरात् ।
महेन्द्र एव शैलेन्द्रे जन्म लेभे मुराद्विपः ॥ १७॥

मूलम् - १७

विश्वास-प्रस्तुतिः - १८

आमूलमग्नदन्तः स खेलासु बिभिदे भुवम् ।
धर्तुकाम इव स्कन्धे तामेवोद्धृत्य सार्णवाम् ॥ १८॥

मूलम् - १८

विश्वास-प्रस्तुतिः - १९

मदगन्धेन धावन्ति येषामन्ये मतङ्गजाः ।
कर्णानिलेन ते तस्य कलभस्यापि दुद्रुवुः ॥ १९॥

मूलम् - १९

विश्वास-प्रस्तुतिः - २०

स सिंहान् शुण्डयादाय चिक्षेप तृणपूलवत् ।
पादैरेव महाग्राहान् भेकमर्दं ममर्द च ॥ २०॥

मूलम् - २०

विश्वास-प्रस्तुतिः - २१

ग्राहा ग्नसन्ते हर्यक्षा घ्नन्ति गृह्णन्ति मानवाः ।
इत्युच्यमानं कळभैराश्चर्यमिव सोऽश‍ृणोत् ॥ २१॥

मूलम् - २१

विश्वास-प्रस्तुतिः

सरित्सरांसि पीतानि सकृदाकृष्य शुण्डया ।
मदधारापदेशेन मन्ये तस्य प्रसुस्रुवुः २२॥

मूलम्

विश्वास-प्रस्तुतिः - २३

स मत्तः सञ्चरन् पृथ्वीं चरणैरपचस्करे ।
लघूकरिष्यन्निव तां दिग्गजानुजिघृक्षया ॥ २३॥

मूलम् - २३

विश्वास-प्रस्तुतिः - २४

अजानिव गजानन्यानादायादाय चिक्षिपे ।
स एव पुङ्गजस्तत्र वशास्तस्याभवन् परे ॥ २४॥

मूलम् - २४

विश्वास-प्रस्तुतिः - २५

स खेलन् सागरस्याम्भः क्षिपन् मन्दाकिनीं प्रति ।
दयया चिरविश्लिष्टौ दम्पती तावयोजयत् ॥ २५॥

मूलम् - २५

विश्वास-प्रस्तुतिः - २६

पश्यन् मध्यमलोकस्य रामणीयकमद्भुतम् ।
पांसुभिः स करोद्धूतैश्चकारेव दिवं भुवम् ॥ २६॥

मूलम् - २६

विश्वास-प्रस्तुतिः - २७

विद्रवद्भिर्वने तस्मिन् व्याधव्याघ्रमृगाधिपैः ।
मृगाणां रक्षणादासीन्मृगेन्द्रः सोऽद्भुतः क्षितौ ॥ २७॥

मूलम् - २७

विश्वास-प्रस्तुतिः - २८

महेन्द्रादेष मलयं मलयादपि दर्दरम् ।
सञ्चरन् जातुचित् प्राप कुञ्जरो नीपकाननम् ॥ २८॥

मूलम् - २८

विश्वास-प्रस्तुतिः - २९

मदगन्धाशया प्राप्तैर्मधुपैर्विपिनात् ततः ।
सम्प्रदर्शितवर्त्मेव स ययौ हेमपद्मिनीम् ॥ २९॥

मूलम् - २९

विश्वास-प्रस्तुतिः - ३०

गणेशमदनिष्यन्दगन्धसर्वस्ववेदिनः ।
उपेक्षां भ्रमराश्चक्रुरुन्मदास्तन्मदाम्भसि ॥ ३०॥

मूलम् - ३०

विश्वास-प्रस्तुतिः - ३१

स पतन्नेव सरसि क्षीरोद इव मन्दरः ।
कल्लोलैः प्लावयामास कदम्बविपिनान्तरम् ॥ ३१॥

मूलम् - ३१

विश्वास-प्रस्तुतिः - ३२

मलिनो निर्ममज्जास्मिन्नुन्ममज्जाथ निर्मलः ।
प्रागभूत् केवलो भौमः सार्वभौमोऽथ दन्तिनाम् ॥ ३२॥

मूलम् - ३२

विश्वास-प्रस्तुतिः - ३३

उत्तीर्य बहिरन्तश्च नीरजा नरिजाकरात् ।
अतीयाय स तं शापमधीयाय मुनेर्गिरः ॥ ३३॥

मूलम् - ३३

विश्वास-प्रस्तुतिः - ३४

गाङ्गेयैः शैवगाङ्गेयैः कमलैः कमलास्पदैः ।
एकदन्तं चतुर्दन्तः सिन्धुरं सिन्धुरोऽर्चयत् ॥ ३४॥

मूलम् - ३४

विश्वास-प्रस्तुतिः - ३५

पुष्करैरभिषिच्येशौ पुष्करोपहृतैरयम् ।
पुष्करैरेव चानर्च पुष्करं गाहितुं पुनः ॥ ३५॥

मूलम् - ३५

विश्वास-प्रस्तुतिः - ३६

सितं हि काञ्चनं पुष्पं शिवस्यैवाभवन्मुदे ।
पिशङ्गं तु तदानीतं प्रीतये शिवयोरभूत् ॥ ३६॥

मूलम् - ३६

विश्वास-प्रस्तुतिः - ३७

मुक्तशापो गजः पृथ्वीं मुदा यदपचम्करे ।
गजतीर्थमिति ख्यातं तद् बभूव महत् सरः ॥ ३७॥

मूलम् - ३७

विश्वास-प्रस्तुतिः - ३८

ऐरावतेश्वरं लिङ्गमैरावतविनायकम् ।
स तीरे सरसस्तस्य स्थापयित्वाभ्यपूजयत् ॥ ३८॥

मूलम् - ३८

विश्वास-प्रस्तुतिः - ३९

पुरन्दरेश्वरं नाम पूर्वतः सुन्दरेशितुः ।
स्वामिनामाङ्कितं लिङ्गं स्थापयामास चापरम् ॥ ३९॥

मूलम् - ३९

विश्वास-प्रस्तुतिः - ४०

प्रहितः सुन्दरेशेन स हि तत्र चिरं वसन् ।
पुनर्जगाम स्वं धाम पुरुहूतेन चादृतः ॥ ४०॥

मूलम् - ४०

विश्वास-प्रस्तुतिः - ४१

कदम्बविपिनात् प्राचि कल्याणनगरे ततः ।
कालेन महता जज्ञे कश्चिद्वैश्यो धनञ्जयः ॥ ४१॥

मूलम् - ४१

विश्वास-प्रस्तुतिः - ४२

अस्त्राय गत्वा देवेन कृतयुद्धं गतम्पृहः ।
कौरव्यमत्यशेतायमूरव्यस्तु धनञ्जयः ॥ ४२॥

मूलम् - ४२

विश्वास-प्रस्तुतिः - ४३

तस्य भूमिस्पृशो भक्तिं तरुणेन्दुशिखामणौ ।
भक्तिरागन्तुकान्येषां कथं वानुकरिष्यति ॥ ४३॥

मूलम् - ४३

विश्वास-प्रस्तुतिः - ४४

(दशैकादशिकाः! ) प्रायो वणिजश्चतुरा अपि ।
एकं दत्वेह सोऽमुत्र तत्सहस्रमुपार्जयत् ॥ ४४॥

मूलम् - ४४

विश्वास-प्रस्तुतिः - ४५

परक्षेत्रपरामर्शपरिशङ्की धनञ्जयः ।
नोत्ससर्ज बहिर्जातु स गोषङ्गवमात्मनः ॥ ४५॥

मूलम् - ४५

विश्वास-प्रस्तुतिः - ४६

वृत्तिः सा हि विशां यत्तु भुवमुल्लिख्य जीवनम् ।
स तु तत् कर्म तत्याज दिवमुल्लिख्य केवलाम् ॥ ४६॥

मूलम् - ४६

विश्वास-प्रस्तुतिः - ४७

अक्रीणीतैव पुण्यानि व्यक्रीणीत न जात्वपि ।
समयेषूपयोगाय सर्वमेव जुगोप सः ॥ ४७॥

मूलम् - ४७

विश्वास-प्रस्तुतिः - ४८

स बहून् विषयान् गत्वा वाणिज्याय धनञ्जयः ।
निवृत्तो नीपकान्तारसमीपं सायमाययौ ॥ ४८॥

मूलम् - ४८

विश्वास-प्रस्तुतिः - ४९

अदृश्यत सहस्रांशुरस्तभूधरमस्तके ।
मन्देहयुद्धलब्धासृक्पङ्कदिग्ध इवारुणः ॥ ४९॥

मूलम् - ४९

विश्वास-प्रस्तुतिः - ५०

अर्कमस्तं गमिष्यन्तमुपेत्यानुचराः कराः ।
अन्वगन्वगलम्बन्त दुद्रुवुर्ये पुरः पुरः ॥ ५०॥

मूलम् - ५०

विश्वास-प्रस्तुतिः - ५१

निन्दन्तो रजनीं कोका नन्दन्तस्तां चकोरिकाः ।
चञ्चूचञ्चवि सायाह्ने सर्वतः सम्प्रजह्रिरे ॥ ५१॥

मूलम् - ५१

विश्वास-प्रस्तुतिः - ५२

प्रचुक्रुशुर्द्विजाः केचिदपरे मौनमास्थिताः ।
असङ्घातो द्विजानामित्यासीत् तथ्यं तदा वचः ॥ ५२॥

मूलम् - ५२

विश्वास-प्रस्तुतिः - ५३

प्रतीच्यां ददृशे रागः स स्थास्यति कियच्चिरम् ।
प्राच्यां दृष्टचरो ह्येष भास्वतो भ्राम्यतः सदा ॥ ५३॥

मूलम् - ५३

विश्वास-प्रस्तुतिः - ५४

प्रनष्टे महसां राशौ प्रादुर्भूतं हि तारकैः ।
तमसाभ्यावृते लोके तावद्भिरपि किं कृतम् ॥ ५४॥

मूलम् - ५४

विश्वास-प्रस्तुतिः - ५५

त एव भानवो भानोस्तारकावपुषा स्थिताः ।
तथाप्येकः स नास्तीति तमांसि विजजृम्भिरे ॥ ५५॥

मूलम् - ५५

विश्वास-प्रस्तुतिः - ५६

प्रायो जात्यनुरोधाय पद्ममात्रे निमीलति ।
भानुहस्तगतेनापि पङ्कजेन निमीलितम् ॥ ५६॥

मूलम् - ५६

विश्वास-प्रस्तुतिः - ५७

तथा सान्द्रीभवन्ति स्म तमांसि हरितां मुखे ।
व्याप्नुवन्ति हि तान्येव विहन्यन्ते यथा मिथः ॥ ५७॥

मूलम् - ५७

विश्वास-प्रस्तुतिः - ५८

शैवलोत्पलभृङ्गाणां सरसीषु निशामुखे ।
स्पर्शसौरभकूजाभिः स्वं स्वं रूपमबुध्यत ॥ ५८॥

मूलम् - ५८

विश्वास-प्रस्तुतिः - ५९

निष्पपातेव गगनं निस्ससारेव सागरः ।
आववारेव निश्शेषमविद्या महती तदा ॥ ५९॥

मूलम् - ५९

निष्पपातेव गगनं निस्ससारेव सागरः ।
आववारेव निश्शेषमविद्या महती तदा ॥ ५९॥

विश्वास-प्रस्तुतिः - ६०

अयश्श‍ृङ्खलवत् क्रष्टुमाहर्तुं तृणपूलवत् ।
आश्यानपकवच्छेत्तुमासीच्छक्यं तदा तमः ॥ ६०॥

मूलम् - ६०

विश्वास-प्रस्तुतिः - ६१

अनिम्तार्येण मनसाप्यनाव्येन च रंहसा ।
स्रोतसेवान्धकारस्य स निन्ये नीपकाननम् ॥ ६१॥

मूलम् - ६१

विश्वास-प्रस्तुतिः - ६२

सोमवारोपवासेन सोऽध्वखेदेन तावता ।
विप्रयोगेण सार्थाञ्च विव्यथे केवलं तदा ॥ ६२॥

मूलम् - ६२

विश्वास-प्रस्तुतिः - ६३

नोन्नतानि न निम्नानि न नम्रा न च पादपाः ।
सर्वमेकमभात् तस्य सान्निध्यादिव शाम्भवात् ॥ ६३॥

मूलम् - ६३

विश्वास-प्रस्तुतिः - ६४

अश्रौषीदश्रुतचरममृतस्येव निर्झरम् ।
गानमातोद्यसम्भिन्नं गन्धर्वाणामदूरतः ॥ ६४॥

मूलम् - ६४

विश्वास-प्रस्तुतिः - ६५

स तच्छब्दानुसारेण सम्प्रसर्पञ्छनैः शनैः ।
दयया देवदेवस्य दिव्यं चक्षुरधारयत् ॥ ६५॥

मूलम् - ६५

विश्वास-प्रस्तुतिः - ६६

स दिव्यलिङ्गमाभितः सन्ददर्श सुरानृषीन् ।
ध्यायतो गायतः सामान्यर्चतश्चाभिषिञ्चतः ॥ ६६॥

मूलम् - ६६

विश्वास-प्रस्तुतिः - ६७

ननृतुः प्रमथाः क्वापि जगुः सामानि सामगाः ।
ननृतुर्देवसुदृशो जगुरन्यत्र किन्नराः ॥ ६७॥

मूलम् - ६७

विश्वास-प्रस्तुतिः - ६८

कमलैः कनकाब्जिन्या विमलैरुभयैरपि ।
स सुरैः सार्धमानर्च शर्वाणीचन्द्रशेखरौ ॥ ६८॥

मूलम् - ६८

विश्वास-प्रस्तुतिः - ६९

प्रभातायां च शर्वर्यां प्रवृत्ते जनचङ्क्रमे ।
स यत्रैक्षिष्ट देवर्षीस्तत्रैक्षिष्ट तरून् मृगान् ॥ ६९॥

मूलम् - ६९

विश्वास-प्रस्तुतिः - ७०

स तु तेनाद्भुतेनैव निर्वृत्तामृतपारणः ।
व्रताङ्गं पारणां कर्तुं प्राप नेदीयसीं पुरीम् ॥ ७०॥

मूलम् - ७०

विश्वास-प्रस्तुतिः - ७१

द्रमिडान्वयमूर्धन्यो द्वितीय इव वासवः ।
प्रशशास महीं यत्र पार्थिवः कुलशेखरः ॥ ७१॥

मूलम् - ७१

विश्वास-प्रस्तुतिः - ७२

सङ्गम्य बन्धुभिः सार्धं विश्रम्य च यथासुखम् ।
वृत्तं विज्ञापयामास राज्ञे सर्व स्वमद्भुतम् ॥ ७२॥

मूलम् - ७२

विश्वास-प्रस्तुतिः - ७३

स जातु पुरुषं कञ्चिच्चन्द्रचूडजटाधरम् ।
निद्राणोऽन्तर्दृशाद्राक्षीन्नृपतिः कुलशेखरः ॥ ७३॥

मूलम् - ७३

विश्वास-प्रस्तुतिः - ७४

नन्वस्ति नगरादस्मात् पश्चिमं नीपकाननम् ।
वन्यैर्मृगगणैः सार्धं वसामोऽत्र चिरं वयम् ॥ ७४॥

मूलम् - ७४

विश्वास-प्रस्तुतिः - ७५

तद्वनं नगरीकृत्य तदेवाधिवसन् स्वयम् ।
कुलमुद्धृत्य वत्स! त्वं कुरु नामेदमर्थवत् ॥ ७५॥

मूलम् - ७५

विश्वास-प्रस्तुतिः - ७६

इत्युक्त्वान्तर्हिते तस्मिन्निन्दुचूडे दयानिधौ ।
प्रत्यबुध्यत संहृष्टः प्रत्यूषे कुलशेखरः ॥ ७६॥

मूलम् - ७६

विश्वास-प्रस्तुतिः - ७७

अद्भुतं स्वप्नवृत्तान्तमाप्तेषु च महत्सु च ।
आवेदयन् नृपः प्रातरभ्यनन्धत तैरपि ॥ ७७॥

मूलम् - ७७

विश्वास-प्रस्तुतिः - ७८

निश्चित्यानुग्रहं शम्भोर्निर्मित्सुर्विपिनं पुरम् ।
सम्प्रतस्थे महीपालः सावरोधः सबान्धवः ॥ ७८॥

मूलम् - ७८

विश्वास-प्रस्तुतिः - ७९

प्रस्थितस्याग्रतो वामं प्रवृत्तस्तस्य खञ्जनः ।
कटाक्ष इव मीनाक्ष्याः कलयन् भावि मङ्गळम् ॥ ७९॥

मूलम् - ७९

विश्वास-प्रस्तुतिः - ८०

स कदम्बवनं प्राप्य सन्ददर्श महाद्भुतम् ।
हैमप्राकारसम्बाधमैन्द्रं धाम महेशितुः ॥ ८०॥

मूलम् - ८०

विश्वास-प्रस्तुतिः - ८१

स दृष्ट्वा साम्बमीशानं सम्प्रार्थ्य च गणाधिपम् ।
न्ययुङ्क्त शिल्पिनो दक्षान्निर्मित्सुर्नगरं नृपः ॥ ८१॥

मूलम् - ८१

विश्वास-प्रस्तुतिः - ८२

सर्वे ते विश्वकर्माणः सर्वे कुशलतामयाः ।
समेत्य मन्त्रयाञ्चक्रुः शिल्पिनः पुरकर्मणि ॥ ८२॥

मूलम् - ८२

विश्वास-प्रस्तुतिः - ८३

स्वस्तिकं सर्वतोभद्रं मण्डलं दीर्घवृत्तकम् ।
निर्मित्समाना नगरं ते विप्रावादिषुर्मिथः ॥ ८३॥

मूलम् - ८३

विश्वास-प्रस्तुतिः - ८४

शिल्पिष्वेक इवागत्य सिद्धः स्वप्नेक्षितः पुरः ।
इतिकर्तव्यतां तेषामुपादिक्षत् प्रभोः पुरः ॥ ८४॥

मूलम् - ८४

विश्वास-प्रस्तुतिः - ८५

स्वप्नदर्शनसंवादिः तद्रूपं तस्य चिन्तयन् ।
यावद् ददर्श नृपतिस्तावदन्तरधत्त सः ॥ ८५॥

मूलम् - ८५

विश्वास-प्रस्तुतिः - ८६

पश्यन्ननुग्रहं शम्भोः स्वप्नजागरयोः समम् ।
उत्सेहे स तु भूयोऽपि पार्थिवः पुरकर्मणि ॥ ८६॥

मूलम् - ८६

विश्वास-प्रस्तुतिः - ८७

अपि तद्विपिनं सान्द्रमज्ञातालोकसङ्कथम् ।
शासनात् पाण्ड्यनृपतेर्जातं जाङ्गलवत् क्षणात् ॥ ८७॥

मूलम् - ८७

विश्वास-प्रस्तुतिः - ८८

तपनेन्दुकरालीढे तस्मिन् दिष्ट्या वनोदरे ।
ब्रह्मचर्यं जहुश्चक्रा दुर्भिक्षं च चकोरिकाः ॥ ८८॥

मूलम् - ८८

विश्वास-प्रस्तुतिः - ८९

चरन्तो जन्तवो यत्र जाता वनचराः पुरा ।
तदेवासीद् वनचरं तत्क्षणं तस्य शासनात् ॥ ८९॥

मूलम् - ८९

विश्वास-प्रस्तुतिः - ९०

षण्णामप्यध्वनामन्ते शाश्वतं पदमैश्वरम् ।
इति श्रुत्वैव सिद्धान्तमध्वान्तं तदयं व्यधात् ॥ ९०॥

मूलम् - ९०

विश्वास-प्रस्तुतिः - ९१

अप्यान्तरतमो हिर्तुर्बाह्ये तमसि का क्षमा ।
लाभोऽयं यच्छिवादारादियन्तं कालमास्त तत् ॥ ९१॥

मूलम् - ९१

विश्वास-प्रस्तुतिः - ९२

घातङ्घातमिह व्याघ्रान् ग्राहङ्ग्राहं शुभास्त्वचः ।
अहरन् वस्त्रदुर्भिक्षं किङ्करास्तस्य शाङ्करम् ॥ ९२॥

मूलम् - ९२

विश्वास-प्रस्तुतिः - ९३

संवर्ते तत्र सत्त्वानां समगृह्यन्त कुञ्जराः ।
सर्व एव शुभः कालः स्वरूपं यदि सुन्दरम् ॥ ९३॥

मूलम् - ९३

विश्वास-प्रस्तुतिः - ९४

सालमभ्रङ्कषं चक्रुः सालं छित्वा सहस्रशः ।
किं साध्यं बहुभिः क्षुद्रैर्वरमेको महोच्छ्रितः ॥ ९४॥

मूलम् - ९४

विश्वास-प्रस्तुतिः - ९५

वप्रक्रियासु निर्मग्नैर्दन्तैरमरदन्तिनाम् ।
श‍ृङ्गेषु तस्य सालस्य गवाक्षा विप्रतेनिरे ॥ ९५॥

मूलम् - ९५

विश्वास-प्रस्तुतिः - ९६

परिखां खनतस्तत्र प्रविष्टानारसातलम् ।
के यूयं सगराणामित्यन्वयुञ्जत पन्नगाः ॥ ९६॥

मूलम् - ९६

विश्वास-प्रस्तुतिः - ९७

परिखारन्ध्रतस्तत्र पाताळाज्जाह्नवीजलम् ।
जलयन्त्रादिवोत्तस्थैः भूम्यन्तं भूतलाच्युतम् ॥ ९७॥

मूलम् - ९७

विश्वास-प्रस्तुतिः - ९८

भगिनीं भागनीशं च द्रष्टुं प्राकारकैतवात् ।
उन्ममज्जेव मैनाकः परिखासागरात् ततः ॥ ९८॥

मूलम् - ९८

विश्वास-प्रस्तुतिः - ९९

राजसिंहैर्नरव्याघ्रैः पूरितं भटकुञ्जरैः ।
पुरं यथापुरं जज्ञे का तस्यान्योपमा भवेत् ॥ ९९॥

मूलम् - ९९

विश्वास-प्रस्तुतिः - १००

छिन्दद्भिस्तद्वनं तत्र शेषितं यत् क्वचित् क्वचित् ।
तान्येव तस्योद्यानानि सर्वतः प्रचकाशिरे ॥ १००॥

मूलम् - १००

विश्वास-प्रस्तुतिः - १०१

वीथिका उत्सवार्था या विहिता विश्वकर्मणा ।
चतुर्णामपि वर्णानां ता एवासन् पृथक्पृथक् ॥ १०१॥

मूलम् - १०१

विश्वास-प्रस्तुतिः - १०२

पाण्डरैर्भवनैः पूर्णे प्राकारे धाम शाम्भवम् ।
मध्येमौक्तिकताटङ्कं रेजे रत्नमिवार्पिताम् ॥ १०२॥

मूलम् - १०२

विश्वास-प्रस्तुतिः - १०३

दिशि चोत्तरपूर्वस्यां देवदेवस्य मन्दिरात् ।
निर्मलं भवनं राज्ञो निर्ममुस्तस्य शिल्पिनः ॥ १०३॥

मूलम् - १०३

विश्वास-प्रस्तुतिः - १०४

प्रासादः शुशुभे तत्र भवने धरणीपतेः ।
भक्त्या महशितुर्वृद्धः प्रसाद इव निर्मलः ॥ १०४॥

मूलम् - १०४

विश्वास-प्रस्तुतिः - १०५

दिव्यैः सुधामयैर्मेधैर्देवो जीमूतवाहनः ।
नगरं सेचयामास नवीनं त्रीण्यहानि सः ॥ १०५॥

मूलम् - १०५

विश्वास-प्रस्तुतिः - १०६

मधुरोदकसंसिक्ती मधुरेयं महापुरी ।
इत्यश्रूयत तत्रत्यैर्दिव्या वागशरीरिणी ॥ १०६॥

मूलम् - १०६

विश्वास-प्रस्तुतिः - १०७

दुर्गागणेशवटुकेश्वरमातृवर्गै-
रध्यासितां सुविहितेषु निजास्पदेषु ।
सद्यः प्रवर्तितमहेशमहोत्सयान्ते
पाण्ड्यो विवेश नगरी मधुरां प्रहृष्टः ॥ १०७॥

मूलम् - १०७

विश्वास-प्रस्तुतिः - १०८

अर्थैरर्थिजनाञ्छ्रुतैः श्रुतवतः सम्माननैर्बान्धवान्
सेवाभिर्महतो निसर्गकरुणावत्या स भृत्यान् दृशा ।
आत्मानात्मविवेकतो गिरिशमप्याराधयन् मेदिनीं
भूपालः कुलशेखरोऽत्र बुभुजे सप्तार्णवीवेष्टिताम् ॥ १०८॥

मूलम् - १०८

इति महाकविश्रीनीलकण्ठदीक्षितप्रणीते शिवलीलार्णवे चतुर्थः सर्गः ।