द्वादसम परिच्छेद
नानादेसपसादो
१.
थेरो मोग्गलिपुत्तो सो, जिनसासन जोतको।
निट्ठापेत्वान संगीतिं, पेक्खमानो अनागतं॥
२.
सासनस्स पतिट्ठानं, पच्चन्तेसु अवेक्खिय।
पेसेसि कत्तिके मासे, तेते थेरे तहिं तहिं॥
३.
थेरं कस्मीरगन्धारं, मज्झन्तिकमपेसयि।
अपेसयी महादेव-त्थेरं महिसमण्डलं॥
४.
वनवासिं अपेसयि, थेरं रक्खितनामकं।
तथा’परन्तकं योन-धम्मरक्खितनामकं॥
५.
महारट्ठं महाधम्म-रक्खितत्थेर नामकं।
महारक्खित थेरं तं, योन लोकमपेसयि॥
६.
पेसेसि मज्झिमं थेरं, हिमवन्तपदेसकं।
सुवण्णभूमिं थेरे द्वे, सोणमुत्तर मेव च॥
७.
महामहिन्दत्थेरं तं, थेर इट्टियमुत्तियं।
सम्बलं भद्दसालञ्च, सके सद्धिविहारिके॥
८.
लंकादीपे मनुञ्ञम्हि, मनुञ्ञं जिनसासनं।
पतिट्ठापेथ तुम्हे’ति, पञ्च थेरे अपेसयि॥
९.
तदा कस्मीरगन्धारे, पक्कं सस्सं महिद्धिको।
अरवालो नागराजा, वस्सं करकसञ्ञितं॥
१०.
वस्सा पेत्वा समुद्दस्मिं, सब्बं खिपतिदारुणो।
तत्र मज्झन्तिकत्थेरो, खिप्पं गन्त्वा विहायसा॥
११.
अरवालदहेवारि-पिट्ठे चङ्कमनादिके।
अकासि दिस्वा तंनागा, रुट्ठारञ्ञो निवेदयुं॥
१२.
नागराजा’थरुट्ठो सो, विविधा भिसिका’करि।
वाता महन्ता वायन्ति, मेघो गज्जति वस्सति॥
१३.
फलन्त्य’सनियो विज्जु, निच्छरन्ति ततो ततो।
महिरुहा पब्बतानं, कूटानि पपतन्ति च॥
१४.
विरूपरूपा नागा च, भिंसापेन्ति समन्ततो।
सयं धुपायति जलति, अक्कोसन्तो अनेकधा॥
१५.
सब्बं तं इद्धिया थेरो, पटिबाहिय भिंसनं।
अवोच नागराजं तं, दस्सेन्तो बलमुत्तमं॥
१६.
सदेव कोपि चे लोको, आगन्त्वा तासयेय्य मं।
न मे पटिबलो अस्स, जनेतुं भयभेरवं॥
१७.
सचे’पि त्वं महिं सब्बं, ससमुद्दं सपब्बतं।
उक्खिपित्वा महानाग, खिपेय्यासि ममो’परि॥
१८.
नेव मे सक्कुणेय्यासि, जनेतुं भयभेरवं।
अञ्ञदत्थु तवे‘व’स्स, विघातो उरगाधिप॥
१९.
तंसुत्वा निम्मदस्स’स्स, थेरो धम्ममदेसयि।
ततो सरणसीलेसु, नागराजा पतिट्ठहि॥
२०.
तथेव चतुरासीति-सहस्सानि भुजङ्गमा।
हिमवन्तेव गन्धब्बा, यक्खा कुम्भण्डका बहू॥
२१.
पण्डको नाम यक्खो तु, सद्धिंहारित यक्खिया।
पञ्चसतेहि पुत्तेहि, फलं पापुणि आदिकं॥
२२.
‘‘मा’’दानि कोधं जनियित्थ, इतो उद्धं यथापुरे।
ससघातञ्च मा’कत्थ, सुखकामाहि पाणिनो॥
२३.
करोथ मेत्तं सत्तेसु, वसन्तु मनुजा सुखं।
इति तेना’नुसिट्ठा ते, तथेव पटिपज्जिसुं॥
२४.
ततो रतनपल्लङ्के, थेरं सो उरगाधिपो।
निसीदापिय अट्ठासि, बीजमानो तदन्तिके॥
२५.
तदा कस्मीरगन्धार-वासिनो मनुजा’गता।
नागराजस्स पूजत्थं, मन्त्वा थेरं महिद्धिकं॥
२६.
थेरमेवा’भि वादेत्वा, एकमन्तं निसीदिसुं।
तेसं धम्ममदेसेसि, थेरो आसिविसोपमं॥
२७.
असीतिया सहस्सानं, धम्माभिसमयो अहु।
सतसहस्स पुरिसा, पब्बजुं थेरसन्तिके॥
२८.
ततोप्पभुपति कस्मिर-गन्धारं ते इदानिपि।
आसुं कासाव पज्जोता, वत्थुत्तयपरायना॥
२९.
गन्त्वा महादेवत्थेरो, देसं महिसमण्डलं।
सुत्तन्तं देवदूतं सो, कथेसि जनमज्झगो॥
३०.
चत्तालीस सहस्सानि, धम्मचक्खुं विसोधयुं।
चत्तालीस सहस्सानि, पब्बजिंसु तदन्तिके॥
३१.
गन्त्वा’थ रक्खितत्थेरो, वनवासिं नभे ठितो।
संयुत्तमनमतग्गं, कथेसि जनमज्झगो॥
३२.
सट्ठि नरसहस्सानं, धम्माभिसमयो अहु।
सत्ततिंस सहस्सानि, पब्बजिंसु तदन्तिके॥
३३.
विहारानं पञ्चसतं, तस्मिंदेसे पतिट्ठहि।
पतिट्ठापेसि तत्थेवं, थेरो सो जिनसासनं॥
३४.
गन्त्वा’परन्तकं थेरो, योनको धम्मरक्खितो।
अग्गिक्खन्धोपमं सुत्तं, कथेत्वा जनमज्झगो॥
३५.
सत्ततिंस सहस्सानि, पाणे तत्थ समागते।
धम्मामतमपायेसि, धम्मा धम्मेसु कोविदो॥
३६.
पुरिसानञ्च सहस्सञ्च, इत्थियो च ततो’धिका।
खत्तियानं कुलायेव, निक्खमित्वान पब्बजुं॥
३७.
महारट्ठमिसी गन्त्वा, सो महाधम्मरक्खितो।
महानारदकस्सपव्हं, जातकं कथयी तहिं॥
३८.
मग्गफलं पापुणिंसु, चतुरासीति सहस्सका।
तेरसन्तु सहस्सानि, पब्बजिंसु तदन्तिके॥
३९.
गन्त्वान योनविसयं, सो महाधम्मरक्खितो इसि।
काळकाराम सुत्तन्तं, कथेसि जनमज्झगो॥
४०.
पाणसत सहस्सानि, सहस्सानि च सत्तति।
मग्गफलं पापुणिंसु, दस सहस्सानि पब्बजुं॥
४१.
गन्त्वा चतूहि थेरेहि, देसेसि मज्झिमो इसि।
हिमवन्तपदेसस्मिं, धम्मचक्कपवत्तनं॥
४२.
मग्गफलपापुणिंसु, असीतिपाण कोटियो।
विसुं ते पञ्चरट्ठानि, पञ्चथेरा पसादयुं॥
४३.
पुरिससतसहस्सानि, एकेकस्सेव सन्तिके।
पब्बजिंसु पसादेन, सम्मासम्बुद्ध सासने॥
४४.
सद्धिं उत्तरथेरेन, सोणत्थेरो महिद्धिको।
सुवण्णभूमिं अगमा, तस्मिं तु समये पन॥
४५.
जाते जाते राजगेहे, दारके रुद्दरक्खसी।
समुद्दतो निक्खमित्वा, भक्खित्वा पन गच्छति॥
४६.
तस्मिं खणे राजगेहे,
जातो होति कुमारको।
थेरे मनुस्सा पस्सित्वा,
रक्खसानं सहायका॥
४७.
इति चिन्तिय मारेतुं, सा युवा उपसङ्कमुं।
‘‘किमेतन्ति’’च पुच्छित्वा, थेरं ते एव माहुते॥
४८.
समणा मयं हिमवन्ता, न रक्खसि सहायका।
रक्खसी सा सपरिसा, निक्खन्ता होति सागरा॥
४९.
तं दिस्वान महारावं, विरविंसु महाजना।
दिगुणे रक्खसे थेरो, मापयित्वा भयानके॥
५०.
तं रक्खसिं सपरिसं, परिक्खिपि समन्ततो।
इदं इमेहि उद्धन्ति, मन्त्वा भीता पलायिसा॥
५१.
तस्स देसस्स आरक्खं, ठपेत्वान समन्ततो।
तस्मिं समागमे थेरो, ब्रह्मजालमदेसयि॥
५२.
सरणेसु च सीलेसु, अट्ठंसु बहवो जना।
सट्ठिया तु सहस्सानं, धम्माभिसमयो अहु॥
५३.
अड्ढुड्ढानि सहस्सानि, पब्बजुं कुलदारका।
पब्बजिंसु दियड्ढन्तु, सहस्सं कुलधीतरो॥
५४.
ततोप्पभुति सञ्जाते, राजगेहे कुमारके।
नामं करिंसु राजानो, सोणुत्तर सनामके॥
५५.
महाजनस्सापि जिनस्स कड्ढनं।
विहाय पत्तं अमतं सुखम्पिते।
करिंसु लोकस्स हितं तहिं तहिं।
भवेय्य यो लोकहिते पमादवाति॥
सुजनप्पसाद संवेगत्थाय कते महावंसे
नानादेसपसादो नाम द्वादसमो परिच्छेदो।