द्विपादब्यासयमकगाथा
८७.
यसोधरं पीणपयोधराधरं,
अनङ्गरङ्गद्धजभूतमङ्गं।
देवच्छरावुज्जलितं पतिब्बतं,
हित्वा गतो सो सुगतो व नून॥
८८.
सभावनिच्छन्दमतिं पभावतिं,
भत्तो कुसो संहरि भत्तकाजं।
तायाभिरूपं पि यसोधरं वरं,
हित्वा गतो सो सुगतो व नून॥
८९.
पुरे पुरे सण्चरि खग्गहत्थो,
वरं परित्थीनं अनित्थिगन्धो।
सिरिञ्च रिञ्चापि न रिञ्चि नारिं,
हित्वानिमन्दानि गतो तथागतो॥
९०.
हरित्तचो रागबलेन देविया,
अवत्थलिङ्गेन न लिङ्गनुस्सरि।
असेवि कामं तमिदानि कामं,
हित्वा गतो सो सुगतो व नून॥
९१.
अपमेय्यकप्पेसु विवेकसेवी,
हित्वा गतो रज्जसिरिं वरित्थिं।
अणुं कलिं वण्णयि तं पुराणं,
वत्थम्हि छिद्दं विय तुन्नकारो॥
९२.
तथाति मन्त्वान इदानिनङ्गो,
यसोधरं पग्गहितो धजं व।
मत्तो जितोम्ही ति पमत्तबन्धु,
न पस्सि ञाणासनिपातमन्तरं॥
९३.
दिस्वान दुक्खानलसम्भवंभवं,
कत्वा तदुप्पादकनङ्गभङ्गं।
यसोधरं पीणपयोधराधरं,
हित्वा गतो बुद्धबलप्पदं पदं॥
९४.
अनन्तसत्तानमनन्तकाले,
मनङ्गहेत्वान जितो अनङ्गो।
पराजितो नून हि एककस्स,
तथागतो सो न पुनागतो व॥
९५.
दिस्वान ञाणासनिपातमन्तरं,
तथागतो सो न पुनागतो व।
तथागतो सो न पुनागतो व,
दिस्वानञाणासनिपातमन्तरं॥