॥ नमो तस्स भगवतो अरहतो सम्मासम्बुद्धस्स॥
सुत्तवन्दना
१.
धम्मत्थ देसना वेध,
चतुगम्भीर दुद्दसं।
धम्मं लोकस्स देसेन्तं,
धम्मराजं नमामहं।
२.
बुद्धो पच्चेकबुद्धो च,
अरहा चक्कवत्तीति।
थूपाथूपारहं वन्दे,
चतुथूपारहेसु तं।
३.
पेतसेय्यो कामभोगी,
सीहसेय्यो तथागतो।
सयन्तं चतुसेय्येसु,
चतुत्थेन नमे जिनं।
४.
अण्डजा जलाबुजा च।
संसेदजो पपातिका।
चतुयोनि परिच्छेद,
ञाणवन्तं नमे जिनं।
५.
सुतबुद्धोनुबुद्धो च,
पच्चेको जिनबुद्धोति।
चतुत्थं चतुबुद्धेसु,
वन्दामि लोकनायकं।
६.
राहुग्गं अत्तभागीनं,
मन्धाता कामभोगीनं।
मारो अधिपतेय्यानं,
बुद्धो लोके सदेवके।
चतुअग्ग पञ्ञत्तीनं,
अग्गपत्तं नमे जिनं॥
७.
दानं पियकथा अत्थ,
चरिया सदिसत्तता।
चतुसङ्गह वत्थूहि,
असङ्खियेसु जातिसु।
लोकस्स सङ्गहेतारं,
वन्दामि लोकनायकं।
८.
लोभो दोसो च मोहोति,
अन्तो पच्चत्थिके तयो।
दुज्जये सब्बवेरीहि,
सञ्जितंपि सुधिं नमे।
९.
जाति पुञ्ञ महत्तानि,
गुणमहत्तमुत्तमं।
तिमहत्थेहि सम्पन्नं,
वन्दामि लोकनायकं।
१०.
हेतु फल सम्पदायो,
सत्तुपकारसम्पदा।
तिसम्पदाहि सम्पन्नं,
वन्दामि लोकनायकं॥
११.
ञाणप्पहानानुभाव,
सुरूपकारसम्पदा।
चतुफल सम्पदाहि,
तं सम्पन्नं नमे जिनं॥
१२.
आसयो च पयोगोति,
सत्तुपकार सम्पदा।
दुविधा यस्स सम्पन्ना,
सम्मा मं पातु सो जिनो॥
१३.
महोसधे वेस्सन्तरे,
पच्छिमभविके तथा।
तिजातीसु नमे वाचं,
भासेन्तं जायनक्खणे॥
१४.
नेमिम्हि साधिने चेव,
मन्धातरि च गुत्तिले।
चतूसु मनुजत्तेन,
देवलोकं गतं नमे॥
१५.
सङ्खारो रूपविकारो,
लक्खणं वाननिस्सटं।
निब्बानं पञ्ञत्तिचेति,
पञ्च ञेय्यन्तगुं नमे॥
१६.
पुत्त दार परिच्चागा,
रज्जङ्गं जीव चागीति।
पञ्च महापरिच्चागे,
करं सुदुक्करे नमे॥
१७.
रूपञ्च वेदना सञ्ञा,
सङ्खारा विञ्ञाणन्तिमे।
पञ्चक्खन्धे परिजानं,
तिपरिञ्ञाहि तं नमे॥
१८.
मनुस्स देव गतियो,
पेतो च निरयो तथा।
तिरच्छानोति पञ्चेता,
छिन्दन्तं गतियो नमे।
१९.
देवपुत्तो किलेसो च,
अभिसङ्खार मारको।
खन्धो मच्चूति पञ्चेते,
मारे विजितवं नमे॥
२०.
पुरेभत्तं पच्छाभत्तं,
पुरिमञ्चेव मज्झिमं।
पच्छिमन्ति सदा पञ्च,
बुद्धकिच्चं करं नमे॥
२१.
रूपा सद्दा गन्धा रसा,
फोट्ठब्बा च मनोरमा।
पञ्च कामगुणे हित्वा,
खेळंव निग्गतं नमे॥
२२.
रागसल्लं दोससल्लं,
मोहा मानो च दिट्ठीति।
वन्दे वज्जातिवज्जन्तं,
पञ्चसल्लपनूदनं॥
२३.
दीघो मज्झिम संयुत्ता,
अङ्गुत्तरो च खुद्दको।
इति पञ्च निकायेहि,
सुविनेन्तं पजं नमे॥
२४.
इस्सरियं यसो धम्मो,
कामो सिरी पयत्तीति।
भग्येहि छहि सम्पन्नं,
वन्दामि लोकनायकं॥
२५.
पियापियं भूताभूतं,
अत्थानत्थं यथारहं।
मिस्सा छसु सुवाचंव,
भासन्तं अत्थकं नमे॥
२६.
अलसो च पमादो च,
अनुट्ठानं असंयमो।
निद्दा तन्तीति छिद्देहि,
छहि मुत्तं सदा नमे॥
२७.
महाकरुणासमापत्ति ,
यमकप्पाटिहारियं।
आसयानुसये ञाणं,
इन्द्रियान परोपरे।
सब्बञ्ञुता नावरणं,
छा साधारणिकं नमे॥
२८.
कामच्छन्दो च ब्यापादो,
थिनमिद्धञ्च संसयो।
अविज्जुद्धच्च कुक्कुच्चं,
छविनीवरणं नमे॥
२९.
इद्धिविधं दिब्बसोतं,
परचित्त विजानना।
पुब्बेनिवासानुस्सति ,
दिब्बचक्खासवक्खयो।
छळभिञ्ञाहि सम्पन्नं,
वन्दामि पुरिसुत्तमं॥
३०.
नील पीता च ओदाता,
मञ्जिट्ठा च पभस्सरा।
लोहिताति छ रंसीही,
विज्जोतन्तं सदा नमे॥
३१.
अस्सादादीनवो चेव,
निस्सरणफलं तथा।
उपायाणत्तीति छधा,
सद्धम्मदेसकं नमे॥
३२.
रागो दोसो च मोहो च,
वितक्कचरिया तथा।
सद्धा बुद्धीति भाजेन्तं,
ता छळेचरिया नमे॥
३३.
रजतं कनकं मुत्ता,
मणि वेळुरियानि च।
वजिरञ्च पवाळन्ति,
सेट्ठि सत्तधनो विय॥
३४.
सद्धासीलं सुतंचागो,
हिरी ओत्तप्पियं धनं,
पञ्ञाधनन्ति सम्बुद्धं,
वन्दे सत्तमहाधनं॥
३५.
चक्कं हत्थि अस्सो मणि,
गहपतित्थियो तथा।
सुपरिणायकोचाति,
सत्तरतनो चक्कवत्तीव॥
३६.
सति धम्मविचयो च,
तथेव वीरियं पीति।
पस्सद्धि समाधुपेक्खा,
सद्धम्म चक्कवत्तिकं।
सत्त बोज्झङ्गरतनं,
नमामि पुरिसुत्तमं॥
३७.
युगन्धरो ईसधरो,
करवीको सुदस्सनो।
नेमिन्धरो विनतको,
अस्सकण्णो महानगे।
सत्तेते हत्थरूपंव,
सम्पस्सन्तं जिनं नमे॥
३८.
कण्णमुण्डो अनोतत्तो,
कुणालो रथकारको।
सीहप्पपात छद्दन्ता,
मन्दाकिनी महासरे।
सत्तेते सब्बथा पस्सं,
दिट्ठेव पातिकं नमे॥
३९.
मनुस्सत्तं लिङ्गसम्पत्ति,
हेतु सत्थारदस्सनं।
पब्बज्जा गुणसम्पत्ति,
अधिकारो च छन्दता।
अट्ठधम्म समोधाना,
भिनीहारन्तगुं नमे॥
४०.
विसट्ठं मञ्जु विञ्ञेय्यं,
सवनीयाविसारिणा।
गम्भीरो बिन्दुनिन्नादो,
अट्ठङ्गिकसरं नमे॥
४१.
चत्तारि रूपझानानि,
तथेवारूपझानानि।
ता समापत्तियो अट्ठ,
सेवन्तं रुचिया नमे॥
४२.
अणिमा लङ्घिमा कम्मं,
महिमा पत्तिमा तथा।
ईसिता वसिता चेव,
यत्थकामावसायिता।
अट्ठिस्सरिय पुण्णत्ता,
इस्सरातिस्सरं नमे॥
४३.
मनोमयिद्धिञाणञ्च ,
छळभिञ्ञा विपस्सना।
अट्ठविज्जाहि सम्पन्नं,
वन्दे तिलोककेतुकं॥
४४.
जाति जरा रुजा कालो,
चतुरापायदुक्खाति।
अट्ठ संवेगवत्थूनि,
भासन्तं विविधं नमे॥
४५.
सुत्तङ्गं वेय्याकरणं,
गेय्यं गाथा च जातकं।
अब्भूतधम्म वेदल्ला,
उदानमिति वुत्तकं।
नवङ्गं सब्बलोकस्स,
ददन्तं सासनं नमे॥
४६.
या समापत्तियो अट्ठ,
निरोधो चाति ते नव,
अनुपुब्बविहारे तं,
सेवन्तं रुचिया नमे॥
४७.
एकत्तञ्चेव नानत्तं,
कायसञ्ञीहि योगतो,
चत्तारो तथारुप्पा च,
असञ्ञीचाति ते नव,
सत्तवासे विभजित्वा,
पकासेन्तं नमे जिनं॥
४८.
सेय्यस्स सदिसो सेय्यो,
हीनोति तिविधो विधो,
तथा सदिसहीनानं,
नवविधे नुदं नमे॥
४९.
अनत्थं मे चरति च,
तथा चरि चरिस्सति,
मित्तस्स अरिनोत्वत्थं,
नवाघाते जहं नमे॥
५०.
दानं सीलञ्च निक्खमं,
पञ्ञा वीरियपञ्चमं,
खन्ती सच्चमधिट्ठानं,
मेत्तुपेक्खाति तादस,
पूरेत्वा पारमी वन्दे,
सम्मासम्बोधिमज्झवं।
५१.
काळावकञ्च गङ्गेय्यं,
पण्डरं तम्ब पिङ्गलं,
गन्ध मङ्गल हेमञ्च,
उपोसथ छद्दन्तिमे॥
५२.
धारेति दसपोसानं,
नागो काळावको बलं।
सहस्सकोटिपोसानं ।
छद्दन्तोवारनुत्तमो॥
५३.
दस सहस्सकोटीनं,
पोसानं बलधारणं।
छद्दन्तानं दसन्नञ्च,
दसकायबलं नमे॥
५४.
ठानाठाने विपाके च,
मग्गे सब्बत्थगामिनं।
नानाधातूसु लोकेसु,
अधिमुत्तिम्हि पाणिनं।
५५.
परोपरियत्ते ञाणं,
इन्द्रियानञ्च पाणिनं।
झानादीसु ञाणं पुब्बे,
निवासे दिब्बचक्खु च।
आसवक्खयञाणन्ति,
दसबलञाणं नमे॥
५६.
मूलगन्धो सारो फेग्गु,
तचो पपटिको रसो।
पत्तं पुप्फं फलञ्चेव,
गन्धगन्धोति संवरं।
सुगन्धं दसगन्धेहि,
विलिम्पन्तं सदा नमे॥
५७.
समाधि ञाणविप्फारा,
अधिट्ठानं विकुब्बना।
मनोमयारिया इद्धि,
तथा कम्मविपाकजा॥
५८.
विज्जामया पुञ्ञवतो।
पयोग पच्चयिद्धिति।
अग्गपत्त दसिद्धीनं,
पाटिहेरं करं नमे॥
५९.
मुत्ता मणि वेळुरियं,
सङ्खो सल्लो पवाळकं।
सुवण्णं रजतं लोहि,
तङ्को मसारगल्लन्ति।
दसधा रतनेहिग्गं,
भोगिं पञ्ञामणिं नमे॥
६०.
सिथिलं धनितं दीघं,
रस्सञ्च गरुकं लहु।
निग्गहितं विमुत्तञ्च,
सम्बन्धञ्च ववत्थितं।
विवरन्तं नमे धम्मं,
दसब्यञ्जनभेदितं॥
६१.
पसादोजो मधुरता,
समता सुखुमालता।
सिलेसोदारता कन्ति,
अत्थब्यत्ति समाधयो।
दस सद्दगुणोपेतं,
धम्मं पातु करं नमे॥
६२.
लोभो दोसो मोहो मानो,
उद्धच्चं दिट्ठि संसयो।
अहिरिकमनोत्तप्पं,
थिनन्ति सब्ब दाहके।
किलेसे दस ते सद्धिं,
वासनाय जहं नमे॥
६३.
सतेरा दण्डमणिका,
मच्छविलोलगग्गरा।
सुक्खासनि कपिसिसा,
विचक्का सञ्ञ कुक्कुटा।
नवासनीहि फालेन्तं,
तिब्बं पञ्ञासनिं नमे॥
६४.
रोदना कोधावुधो च,
उज्झन्तिस्सरियं तथा।
पटिसङ्खानं,
खन्ति अट्ठबलेसु तं।
पथवीसदिसं वन्दे,
अट्ठमेन विनायकं॥
६५.
कामरोगो च पटिघो,
मानो दिट्ठि च संसयो।
भवरागो अविज्जाति,
सत्तानुसयिनं नमे॥
६६.
तित्थियापकतिमहासावका,
अग्गसावका पच्चेकबुद्धसम्बुद्धा।
विसिट्ठं सब्बथा छसु,
पुब्बे निवास विञ्ञूसु।
तिलोकमकुटं नमे॥
६७.
बुद्धचक्खु समन्ता च,
ञाणं यं दिब्बचक्खु च।
धम्मोति पञ्च चक्खूहि,
दस्साविं मारजिं नमे॥
६८.
खुद्दका खणिका ओक्कन्तिका च,
फरणा तथा उब्बेगा।
पञ्च पीतीहि पिनेन्तं,
रुचिया च नमामहं॥
६९.
दुक्खं समुदयसच्चं,
निरोधो मग्गसच्चकं।
चतुसच्चमभिजानं ,
चतुकिच्चेहि तं नमे॥
७०.
पीळना सङ्खतत्थो च,
तपो विपरिणामना।
दुक्खसच्चं चतुक्केहि,
विभत्ताविं मुनिं नमे॥
७१.
आयूहनं निदानञ्च,
संयोगो पलिबोधनं।
चतुक्केहि समुदयं,
विभत्ताविं मुनिं नमे॥
७२.
निस्सरणञ्च विवेको,
असङ्खतामतं तथा।
निरोधञ्च चतुक्केहि,
विभत्ताविं मुनिं नमे॥
७३.
निय्यानिको च हेत्वत्थो,
दस्सनाधिपतेय्यकं।
मग्गसच्चं चतुक्केहि,
विभत्ताविं मुनिं नमे॥
७४.
सत्थको च असम्मोहो,
सप्पायो चेव गोचरो।
चतुसम्पजञ्ञा विना,
भाविं नमे तथागतं॥
७५.
पहिनाखिल दुक्खाहं,
भवसागर पारगुं।
वन्दे सारगुणोपेतं,
तेनम्हि भवपारगो॥
७६.
रूपारूपविलासग्ग ,
रूपाचिन्तेय्य संयुत्तं।
वन्दे सारगुणोपेतं,
तेनम्हातुलरूपवा॥
७७.
इद्धि इद्धि विलासग्ग,
इद्धि चिन्तेय्य संयुत्तं।
वन्दे सारगुणेपेतं,
तेनम्हा तुलइद्धिमा॥
७८.
वाचा वाचा विलासग्ग,
वाचा चिन्तेय्य संयुत्तं।
वन्दे सारगुणोपेतं,
तेनम्हा तुलवाचको॥
७९.
ञाण ञाण विलासग्ग,
ञाणाचिन्तेय्य संयुत्तं।
वन्दे सारगुणोपेतं,
तेनम्हा तुलञाणवा॥
८०.
सज्झं हेमञ्च रतनं,
गेहं वत्थञ्च भोजनं।
तदञ्ञेपि यथाचित्तं,
मापेय्याहं नमे जिनं॥
८१.
सज्झं हेमञ्च रतनं,
गेहं वत्थञ्च भोजनं।
तदञ्ञेपि यथाचित्तं,
मापेय्यं कम्मजिद्धिया॥
८२.
सत्तबोज्झङ्ग रतनो,
सद्धादिरतनो मुनि।
सतिप्पभुतिरतनो,
वन्दे तं पुरिसुत्तमं॥
८३.
चक्कादिसत्तरतनं,
मुत्तादिरतनं सुभं।
वत्थप्पभुतिरतनं,
छन्दक्खणे लभामहं॥
८४.
सम्पुण्णचित्तसङ्कप्पो ,
यथाकङ्खितमापको,
केनचिनभिभूतो यो,
सब्बाभिभू नमे जिनं॥
८५.
सम्पुण्णचित्तसङ्कप्पो ,
यथाकङ्खितमापको,
केनचिनभिभूतम्हि,
सब्बाभिभू भवे भवे॥
८६.
दस छद्दन्तराजाव,
दस कायबलो मुनि।
दस ञाणब्बलोतुल्यो,
वन्दे तं समणुत्तमं॥
८७.
अतिकायजवो बुद्धो,
रञ्ञाजवनहंसतो।
का कथा ञाणवेगस्स,
वन्दे तं समणुत्तमं॥
८८.
छद्दन्तनागराजाव,
भवे भवे महब्बलो।
राजाजवनहंसोव,
परमग्गजवो भवे॥
८९.
उदका कासचारी च,
महिनिमुज्जको जिनो।
मापको च यथा चित्तं,
वन्दे तं ञेय्यपारगुं॥
९०.
उदका कासचारी च,
महिनिमुज्जको भवे।
मापको च यथाचित्तं,
भवसो कम्मजिद्धिया॥
९१.
गामे वने च सब्बत्थ,
देवेहि मनुस्सेहि च।
आभतानन्तलाभस्स,
सदा यस्स महेसिनो।
पत्तलाभग्गतं लोकं,
तं वन्दे मुनिपुङ्गवं॥
९२.
गामे वने च सब्बत्थ,
देवेहि मनुस्सेहि च।
आभता नन्तलाभो मे,
सदा होतु भवाभवे॥
९३.
पुञ्ञस्सिमस्स तेजेन,
यथा चित्तं समिज्झतु।
सब्बिच्छा सब्बचिन्ता च,
खिप्पं मे जातिजातियं॥
९४.
नत्थीति वचनं दुक्खं,
देहीति वचनं तथा।
तस्मा नत्थीति देहीति,
मा मे होतु भवाभवे॥
९५.
सब्बं परवसं दुक्खं,
सब्बमिस्सरियं सुखं।
सब्बं परवसमत्थु,
सब्बमिस्सरियं भवे॥
९६.
वितक्केन्तो भज्जकायो,
सब्बावुध वारणो च।
छद्दन्त वारणबलो,
भवेय्यं जातिजा तियं॥
९७.
सुभलक्खणसम्पन्नो ,
सुवण्णवण्णवा भवे।
ब्रह्मस्सरो करविक,
भाणी च जातिजातियं॥
९८.
भूरिमपञ्ञो सिप्पानं,
सब्बेसं कुसलो भवे।
विसज्जेतुं समत्थोव,
सब्बपुच्छानं ठानसो॥
९९.
वेराधंसीय भोगा च,
अनन्ताखीण भोगवा।
अनन्ताभज्ज परिसो,
भवसो पापुणे सिवं॥
१००.
मा नस्सेय्यं पसय्हेय्यं,
उस्सुक्केहि प्यहं सह।
पञ्चवेरेहि कोटीहि,
भण्डं वा अकातुकामितं॥
१०१.
मेघं वातञ्च रतनं,
धञ्ञं वत्थञ्च भोजनं।
सब्बिच्छितं तदञ्ञम्पि,
मापेय्यं कम्मजिद्धिया॥
१०२.
पुञ्ञेनेतेन निब्बानं,
सन्तं पप्पोमि तावता।
भवेय्यं सब्बजातीसु,
चतुसम्पत्तिया सदा।
चतुचक्केन सम्पन्नो,
सद्धम्मेहि च सत्तहि॥
१०३.
सम्मादिट्ठि वसुपेते,
कुलम्हि सेट्ठसम्मते,
सब्बसक्कत संसुद्धे।
भवे तिहेतुसन्धिको॥
१०४.
घासच्छादनं भोगञ्च,
नेव हत्थेन कातुन,
भुञ्जेय्यमिद्धियात्वेव,
मापेत्वा यावदत्थकं॥
१०५.
मनुस्सानं अतिक्कम्म,
देवानं विय भोजनं,
वत्थं भोगो च मे होन्तु,
परिवारातिसुन्दरा॥
१०६.
दसासुत्तंपि मे भोगं,
पञ्चवेरा भवे भवे।
मागण्हेय्युञ्च नस्सेय्युं,
असोको भोगहेतुमे॥
१०७.
सब्बङ्गसुभ सम्पन्नो,
सिङ्गीनिक्ख सवण्ण वा।
बात्तिंस लक्खणूपेतो,
अतप्पन रूप वा भवे॥
१०८.
कायो चन्दनगन्धो च,
मुखं उप्पलगन्धिकं।
अट्ठङ्गिको करविक,
मञ्जूघोसो च मे होतु॥
१०९.
तिक्ख गम्भीर पञ्ञो च,
हासातिजवपञ्ञवा,
भूरि निब्बेध पञ्ञो च।
सब्बपञ्हविसज्जनो॥
१११.
अन्तो सोळसवस्सस्स,
तिपेटकधरो भवे।
सब्बकम्मेसु सिप्पेसु,
विज्जाठानेसु पारगू॥