सत्तमो परिच्छेदो
७. भूमिपुग्गलसम्भवकथा
२७०.
द्विहेतुकाहेतुकानं , न सम्पज्जति अप्पना।
अरहत्तञ्च नत्थीति, नत्थेव जवनक्रिया॥
२७१.
ञाणपाका न वत्तन्ति, जळत्ता मूलसन्धिया।
द्विहेतुकतदालम्बं, सिया सुगतियं न वा॥
२७२.
तिहेतुकानं सत्तानं, समथञ्च विपस्सनम्।
भावेन्तानं पवत्तन्ति, छब्बीसतिपि अप्पना॥
२७३.
अरहन्तान सत्तानं, भवन्ति जवनक्रिया।
यथाभूमिनियामेन, ञाणपाका च लब्भरे॥
२७४.
वज्झा पठममग्गेन, कङ्खादिट्ठियुता पन।
पटिघं ततियेनेव, कम्ममन्तेन सासवं॥
२७५.
तस्मा तेसं न वत्तन्ति, तानि चित्तानि सब्बथा।
मग्गट्ठानं तु मग्गोव, नाञ्ञं सम्भोति किञ्चिपि॥
२७६.
अहेतुकविपाकानि, लब्भमानाय वीथिया।
सब्बथापि च सब्बेसं, सम्भवन्ति यथारहं॥
२७७.
पञ्चद्वारे मनोद्वारे, धुवमावज्जनद्वयम्।
परित्तपुञ्ञापुञ्ञानि, लब्भन्ति लहुवुत्तितो॥
२७८.
क्रियाजवनमप्पना, नत्थापायेसु कारणम्।
नत्थि सहेतुका पाका, दुग्गतत्ता हि सन्धिया॥
२७९.
ब्रह्मानं पटिघं नत्थि, झानविक्खम्भितं तथा।
हेट्ठाझानं विरत्तत्ता, न भावेन्ति अरूपिनो॥
२८०.
पुब्बेव दिट्ठसच्चाव, अरियारूपभूमका।
तस्मादिमग्गो नत्थेत्थ, कायाभावा सितं तथा॥
२८१.
सुद्धावासापि पत्ताव, हेट्ठानुत्तरपञ्चकम्।
सत्तपापपहीना च, तस्मा नत्थेत्थ तानि च॥
२८२.
पञ्चद्वारिकचित्तानि , द्वाराभावे न विज्जरे।
सहेतुकविपाका च, यथाभूमिववत्थिता॥
२८३.
सम्भवासम्भवञ्चेवं, ञत्वा पुग्गलभूमिसु।
लब्भमानवसा तत्थ, चित्तसङ्गहमुद्दिसे॥
२८४.
कुसलादिप्पभेदा च, तथा भूमादिभेदतो।
वत्थुद्वारारम्मणतो, भूमिपुग्गलतोपि च॥
२८५.
विभागो यो समुद्दिट्ठो,
चित्तानञ्च तु सम्भवा।
ञेय्यो चेतसिकानञ्च,
सम्पयोगानुसारतोति॥
इति चित्तविभागे भूमिपुग्गलसम्भवकथा निट्ठिता।
सत्तमो परिच्छेदो।
निट्ठितो च चित्तविभागो।