॥ नमो तस्स भगवतो अरहतो सम्मासम्बुद्धस्स॥
अभिधम्मावतारो
गन्थारम्भकथा
१.
अनन्तकरुणापञ्ञं , तथागतमनुत्तरम्।
वन्दित्वा सिरसा बुद्धं, धम्मं साधुगणम्पि च॥
२.
पण्डुकम्बलनामाय, सिलायातुलविक्कमो।
निसिन्नो देवराजस्स, विमले सीतले तले॥
३.
यं देवदेवो देवानं, देवदेवेहि पूजितो।
देसेसि देवलोकस्मिं, धम्मं देवपुरक्खतो॥
४.
तत्थाहं पाटवत्थाय, भिक्खूनं पिटकुत्तमे।
अभिधम्मावतारन्तु, मधुरं मतिवड्ढनं॥
५.
ताळं मोहकवाटस्स, विघाटनमनुत्तरम्।
भिक्खूनं पविसन्तानं, अभिधम्ममहापुरं॥
६.
सुदुत्तरं तरन्तानं, अभिधम्ममहोदधिम्।
सुदुत्तरं तरन्तानं, तरंव मकराकरं॥
७.
आभिधम्मिकभिक्खूनं, हत्थसारमनुत्तरम्।
पवक्खामि समासेन, तं सुणाथ समाहिता॥