भिक्खुनिविभङ्गो
१९६४. एवं भिक्खुविभङ्गपाळिया, अट्ठकथाय च आगतं विनिच्छयसारं नातिसङ्खेपवित्थारनयेन दस्सेत्वा इदानि तदनन्तराय भिक्खुनिविभङ्गपाळिया, तदट्ठकथाय च आगतविनिच्छयसारं दस्सेतुमारभन्तो आह ‘‘भिक्खुनीन’’न्तिआदि। तस्मिं अपीति एत्थ अपि-सद्दो वुत्तापेक्खायम्। ‘‘समासेना’’ति इदं गन्थवसेन सङ्खिपनं सन्धाय वुत्तम्। ‘‘किञ्चिमत्त’’न्ति इदं अत्थवसेनाति वेदितब्बम्।