॥ नमो तस्स भगवतो अरहतो सम्मासम्बुद्धस्स॥
अभिधम्मपिटके
यमकपाळि (पठमो भागो)
१. मूलयमकम्
(क) उद्देसो
१. मूलवारो
१. कुसला धम्मा
(१) मूलनयो
१. (क) ये केचि कुसला धम्मा, सब्बे ते कुसलमूला?
(ख) ये वा पन कुसलमूला, सब्बे ते धम्मा कुसला?
२. (क) ये केचि कुसला धम्मा, सब्बे ते कुसलमूलेन एकमूला?
(ख) ये वा पन कुसलमूलेन एकमूला, सब्बे ते धम्मा कुसला?
३. (क) ये केचि कुसलमूलेन एकमूला धम्मा, सब्बे ते कुसलमूलेन अञ्ञमञ्ञमूला?
(ख) ये वा पन कुसलमूलेन अञ्ञमञ्ञमूला, सब्बे ते धम्मा कुसला?
(२) मूलमूलनयो
४. (क) ये केचि कुसला धम्मा, सब्बे ते कुसलमूलमूला?
(ख) ये वा पन कुसलमूलमूला, सब्बे ते धम्मा कुसला?
५. (क) ये केचि कुसला धम्मा, सब्बे ते कुसलमूलेन एकमूलमूला?
(ख) ये वा पन कुसलमूलेन एकमूलमूला, सब्बे ते धम्मा कुसला?
६. (क) ये केचि कुसलमूलेन एकमूलमूला धम्मा, सब्बे ते कुसलमूलेन अञ्ञमञ्ञमूलमूला?
(ख) ये वा पन कुसलमूलेन अञ्ञमञ्ञमूलमूला, सब्बे ते धम्मा कुसला?
(३) मूलकनयो
७. (क) ये केचि कुसला धम्मा, सब्बे ते कुसलमूलका?
(ख) ये वा पन कुसलमूलका, सब्बे ते धम्मा कुसला?
८. (क) ये केचि कुसला धम्मा, सब्बे ते कुसलमूलेन एकमूलका?
(ख) ये वा पन कुसलमूलेन एकमूलका, सब्बे ते धम्मा कुसला?
९. (क) ये केचि कुसलमूलेन एकमूलका धम्मा, सब्बे ते कुसलमूलेन अञ्ञमञ्ञमूलका?
(ख) ये वा पन कुसलमूलेन अञ्ञमञ्ञमूलका, सब्बे ते धम्मा कुसला?
(४) मूलमूलकनयो
१०. (क) ये केचि कुसला धम्मा, सब्बे ते कुसलमूलमूलका?
(ख) ये वा पन कुसलमूलमूलका, सब्बे ते धम्मा कुसला?
११. (क) ये केचि कुसला धम्मा, सब्बे ते कुसलमूलेन एकमूलमूलका?
(ख) ये वा पन कुसलमूलेन एकमूलमूलका, सब्बे ते धम्मा कुसला?
१२. (क) ये केचि कुसलमूलेन एकमूलमूलका धम्मा, सब्बे ते कुसलमूलेन अञ्ञमञ्ञमूलमूलका?
(ख) ये वा पन कुसलमूलेन अञ्ञमञ्ञमूलमूलका, सब्बे ते धम्मा कुसला?
२. अकुसला धम्मा (१) मूलनयो
१३. (क) ये केचि अकुसला धम्मा, सब्बे ते अकुसलमूला?
(ख) ये वा पन अकुसलमूला, सब्बे ते धम्मा अकुसला?
१४. (क) ये केचि अकुसला धम्मा, सब्बे ते अकुसलमूलेन एकमूला?
(ख) ये वा पन अकुसलमूलेन एकमूला, सब्बे ते धम्मा अकुसला?
१५. (क) ये केचि अकुसलमूलेन एकमूला धम्मा, सब्बे ते अकुसलमूलेन अञ्ञमञ्ञमूला?
(ख) ये वा पन अकुसलमूलेन अञ्ञमञ्ञमूला, सब्बे ते धम्मा अकुसला?
(२) मूलमूलनयो
१६. (क) ये केचि अकुसला धम्मा, सब्बे ते अकुसलमूलमूला?
(ख) ये वा पन अकुसलमूलमूला, सब्बे ते धम्मा अकुसला?
१७. (क) ये केचि अकुसला धम्मा, सब्बे ते अकुसलमूलेन एकमूलमूला?
(ख) ये वा पन अकुसलमूलेन एकमूलमूला, सब्बे ते धम्मा अकुसला?
१८. (क) ये केचि अकुसलमूलेन एकमूलमूला धम्मा , सब्बे ते अकुसलमूलेन अञ्ञमञ्ञमूलमूला?
(ख) ये वा पन अकुसलमूलेन अञ्ञमञ्ञमूलमूला, सब्बे ते धम्मा अकुसला?
(३) मूलकनयो
१९. (क) ये केचि अकुसला धम्मा, सब्बे ते अकुसलमूलका?
(ख) ये वा पन अकुसलमूलका, सब्बे ते धम्मा अकुसला?
२०. (क) ये केचि अकुसला धम्मा, सब्बे ते अकुसलमूलेन एकमूलका?
(ख) ये वा पन अकुसलमूलेन एकमूलका, सब्बे ते धम्मा अकुसला?
२१. (क) ये केचि अकुसलमूलेन एकमूलका धम्मा, सब्बे ते अकुसलमूलेन अञ्ञमञ्ञमूलका?
(ख) ये वा पन अकुसलमूलेन अञ्ञमञ्ञमूलका, सब्बे ते धम्मा अकुसला?
(४) मूलमूलकनयो
२२. (क) ये केचि अकुसला धम्मा, सब्बे ते अकुसलमूलमूलका?
(ख) ये वा पन अकुसलमूलमूलका, सब्बे ते धम्मा अकुसला?
२३. (क) ये केचि अकुसला धम्मा, सब्बे ते अकुसलमूलेन एकमूलमूलका?
(ख) ये वा पन अकुसलमूलेन एकमूलमूलका, सब्बे ते धम्मा अकुसला?
२४. (क) ये केचि अकुसलमूलेन एकमूलमूलका धम्मा, सब्बे ते अकुसलमूलेन अञ्ञमञ्ञमूलमूलका?
(ख) ये वा पन अकुसलमूलेन अञ्ञमञ्ञमूलमूलका, सब्बे ते धम्मा अकुसला?
३. अब्याकता धम्मा (१) मूलनयो
२५. (क) ये केचि अब्याकता धम्मा, सब्बे ते अब्याकतमूला?
(ख) ये वा पन अब्याकतमूला, सब्बे ते धम्मा अब्याकता?
२६. (क) ये केचि अब्याकता धम्मा, सब्बे ते अब्याकतमूलेन एकमूला?
(ख) ये वा पन अब्याकतमूलेन एकमूला, सब्बे ते धम्मा अब्याकता?
२७. (क) ये केचि अब्याकतमूलेन एकमूला धम्मा, सब्बे ते अब्याकतमूलेन अञ्ञमञ्ञमूला?
(ख) ये वा पन अब्याकतमूलेन अञ्ञमञ्ञमूला, सब्बे ते धम्मा अब्याकता?
(२) मूलमूलनयो
२८. (क) ये केचि अब्याकता धम्मा, सब्बे ते अब्याकतमूलमूला?
(ख) ये वा पन अब्याकतमूलमूला, सब्बे ते धम्मा अब्याकता?
२९. (क) ये केचि अब्याकता धम्मा, सब्बे ते अब्याकतमूलेन एकमूलमूला?
(ख) ये वा पन अब्याकतमूलेन एकमूलमूला, सब्बे ते धम्मा अब्याकता?
३०. (क) ये केचि अब्याकतमूलेन एकमूलमूला धम्मा, सब्बे ते अब्याकतमूलेन अञ्ञमञ्ञमूलमूला?
(ख) ये वा पन अब्याकतमूलेन अञ्ञमञ्ञमूलमूला, सब्बे ते धम्मा अब्याकता?
(३) मूलकनयो
३१. (क) ये केचि अब्याकता धम्मा, सब्बे ते अब्याकतमूलका?
(ख) ये वा पन अब्याकतमूलका, सब्बे ते धम्मा अब्याकता?
३२. (क) ये केचि अब्याकता धम्मा, सब्बे ते अब्याकतमूलेन एकमूलका?
(ख) ये वा पन अब्याकतमूलेन एकमूलका, सब्बे ते धम्मा अब्याकता?
३३. (क) ये केचि अब्याकतमूलेन एकमूलका धम्मा, सब्बे ते अब्याकतमूलेन अञ्ञमञ्ञमूलका?
(ख) ये वा पन अब्याकतमूलेन अञ्ञमञ्ञमूलका, सब्बे ते धम्मा अब्याकता?
(४) मूलमूलकनयो
३४. (क) ये केचि अब्याकता धम्मा, सब्बे ते अब्याकतमूलमूलका?
(ख) ये वा पन अब्याकतमूलमूलका, सब्बे ते धम्मा अब्याकता?
३५. (क) ये केचि अब्याकता धम्मा, सब्बे ते अब्याकतमूलेन एकमूलमूलका?
(ख) ये वा पन अब्याकतमूलेन एकमूलमूलका, सब्बे ते धम्मा अब्याकता?
३६. (क) ये केचि अब्याकतमूलेन एकमूलमूलका धम्मा, सब्बे ते अब्याकतमूलेन अञ्ञमञ्ञमूलमूलका?
(ख) ये वा पन अब्याकतमूलेन अञ्ञमञ्ञमूलमूलका, सब्बे ते धम्मा अब्याकता?
४. नामा धम्मा (१) मूलनयो
३७. (क) ये केचि नामा धम्मा, सब्बे ते नाममूला?
(ख) ये वा पन नाममूला, सब्बे ते धम्मा नामा?
३८. (क) ये केचि नामा धम्मा, सब्बे ते नाममूलेन एकमूला?
(ख) ये वा पन नाममूलेन एकमूला, सब्बे ते धम्मा नामा?
३९. (क) ये केचि नाममूलेन एकमूला धम्मा, सब्बे ते नाममूलेन अञ्ञमञ्ञमूला?
(ख) ये वा पन नाममूलेन अञ्ञमञ्ञमूला, सब्बे ते धम्मा नामा?
(२) मूलमूलनयो
४०. (क) ये केचि नामा धम्मा, सब्बे ते नाममूलमूला?
(ख) ये वा पन नाममूलमूला, सब्बे ते धम्मा नामा?
४१. (क) ये केचि नामा धम्मा, सब्बे ते नाममूलेन एकमूलमूला?
(ख) ये वा पन नाममूलेन एकमूलमूला, सब्बे ते धम्मा नामा?
४२. (क) ये केचि नाममूलेन एकमूलमूला धम्मा, सब्बे ते नाममूलेन अञ्ञमञ्ञमूलमूला?
(ख) ये वा पन नाममूलेन अञ्ञमञ्ञमूलमूला, सब्बे ते धम्मा नामा?
(३) मूलकनयो
४३. (क) ये केचि नामा धम्मा, सब्बे ते नाममूलका?
(ख) ये वा पन नाममूलका, सब्बे ते धम्मा नामा?
४४. (क) ये केचि नामा धम्मा, सब्बे ते नाममूलेन एकमूलका?
(ख) ये वा पन नाममूलेन एकमूलका, सब्बे ते धम्मा नामा?
४५. (क) ये केचि नाममूलेन एकमूलका धम्मा, सब्बे ते नाममूलेन अञ्ञमञ्ञमूलका?
(ख) ये वा पन नाममूलेन अञ्ञमञ्ञमूलका, सब्बे ते धम्मा नामा?
(४) मूलमूलकनयो
४६. (क) ये केचि नामा धम्मा, सब्बे ते नाममूलमूलका?
(ख) ये वा पन नाममूलमूलका, सब्बे ते धम्मा नामा?
४७. (क) ये केचि नामा धम्मा, सब्बे ते नाममूलेन एकमूलमूलका?
(ख) ये वा पन नाममूलेन एकमूलमूलका, सब्बे ते धम्मा नामा?
४८. (क) ये केचि नाममूलेन एकमूलमूलका धम्मा, सब्बे ते नाममूलेन अञ्ञमञ्ञमूलमूलका?
(ख) ये वा पन नाममूलेन अञ्ञमञ्ञमूलमूलका, सब्बे ते धम्मा नामा?
मूलवारउद्देसो।
२-१०. हेतुवारादि
४९. ये केचि कुसला धम्मा, सब्बे ते कुसलहेतू…पे॰… कुसलनिदाना…पे॰… कुसलसम्भवा…पे॰… कुसलप्पभवा…पे॰… कुसलसमुट्ठाना…पे॰… कुसलाहारा…पे॰… कुसलारम्मणा…पे॰… कुसलपच्चया…पे॰… कुसलसमुदया…पे॰…।
मूलं हेतु निदानञ्च, सम्भवो पभवेन च।
समुट्ठानाहारारम्मणा [समुट्ठानाहारारम्मणं (क॰)], पच्चयो समुदयेन चाति॥
उद्देसवारो निट्ठितो।
(ख) निद्देसो
१. मूलवारो
१. कुसला धम्मा (१) मूलनयो
५०. (क) ये केचि कुसला धम्मा, सब्बे ते कुसलमूलाति? तीणेव कुसलमूलानि। अवसेसा कुसला धम्मा न कुसलमूला।
(ख) ये वा पन कुसलमूला, सब्बे ते धम्मा कुसलाति? आमन्ता।
५१. (क) ये केचि कुसला धम्मा, सब्बे ते कुसलमूलेन एकमूलाति? आमन्ता।
(ख) ये वा पन कुसलमूलेन एकमूला, सब्बे ते धम्मा कुसलाति ?
कुसलसमुट्ठानं रूपं कुसलमूलेन एकमूलं, न कुसलम्। कुसलं कुसलमूलेन एकमूलञ्चेव कुसलञ्च।
५२. (क) ये केचि कुसलमूलेन एकमूला धम्मा, सब्बे ते कुसलमूलेन अञ्ञमञ्ञमूलाति?
मूलानि यानि एकतो उप्पज्जन्ति कुसलमूलानि एकमूलानि चेव अञ्ञमञ्ञमूलानि च। अवसेसा कुसलमूलसहजाता धम्मा कुसलमूलेन एकमूला, न च अञ्ञमञ्ञमूला।
(ख) ये वा पन कुसलमूलेन अञ्ञमञ्ञमूला, सब्बे ते धम्मा कुसलाति? आमन्ता।
(२) मूलमूलनयो
५३. (क) ये केचि कुसला धम्मा, सब्बे ते कुसलमूलमूलाति? तीणेव कुसलमूलमूलानि। अवसेसा कुसला धम्मा न कुसलमूलमूला।
(ख) ये वा पन कुसलमूलमूला, सब्बे ते धम्मा कुसलाति? आमन्ता।
५४. (क) ये केचि कुसला धम्मा, सब्बे ते कुसलमूलेन एकमूलमूलाति? आमन्ता।
(ख) ये वा पन कुसलमूलेन एकमूलमूला, सब्बे ते धम्मा कुसलाति?
कुसलसमुट्ठानं रूपं कुसलमूलेन एकमूलमूलं, न कुसलम्। कुसलं कुसलमूलेन एकमूलमूलञ्चेव कुसलञ्च।
५५. (क) ये केचि कुसलमूलेन एकमूलमूला धम्मा, सब्बे ते कुसलमूलेन अञ्ञमञ्ञमूलमूलाति?
मूलानि यानि एकतो उप्पज्जन्ति कुसलमूलानि एकमूलमूलानि चेव अञ्ञमञ्ञमूलमूलानि च। अवसेसा कुसलमूलसहजाता धम्मा कुसलमूलेन एकमूलमूला, न च अञ्ञमञ्ञमूलमूला।
(ख) ये वा पन कुसलमूलेन अञ्ञमञ्ञमूलमूला, सब्बे ते धम्मा कुसलाति? आमन्ता।
(३) मूलकनयो
५६. (क) ये केचि कुसला धम्मा, सब्बे ते कुसलमूलकाति? आमन्ता।
(ख) ये वा पन कुसलमूलका, सब्बे ते धम्मा कुसलाति?
कुसलसमुट्ठानं रूपं कुसलमूलकं न कुसलम्। कुसलं कुसलमूलकञ्चेव कुसलञ्च।
५७. (क) ये केचि कुसला धम्मा, सब्बे ते कुसलमूलेन एकमूलकाति? आमन्ता।
(ख) ये वा पन कुसलमूलेन एकमूलका, सब्बे ते धम्मा कुसलाति?
कुसलसमुट्ठानं रूपं कुसलमूलेन एकमूलकं, न कुसलम्। कुसलं कुसलमूलेन एकमूलकञ्चेव कुसलञ्च।
५८. (क) ये केचि कुसलमूलेन एकमूलका धम्मा, सब्बे ते कुसलमूलेन अञ्ञमञ्ञमूलकाति?
मूलानि यानि एकतो उप्पज्जन्ति कुसलमूलानि एकमूलकानि चेव अञ्ञमञ्ञमूलकानि च। अवसेसा कुसलमूलसहजाता धम्मा कुसलमूलेन एकमूलका, न च अञ्ञमञ्ञमूलका।
(ख) ये वा पन कुसलमूलेन अञ्ञमञ्ञमूलका, सब्बे ते धम्मा कुसलाति? आमन्ता।
(४) मूलमूलकनयो
५९. (क) ये केचि कुसला धम्मा, सब्बे ते कुसलमूलमूलकाति? आमन्ता।
(ख) ये वा पन कुसलमूलमूलका, सब्बे ते धम्मा कुसलाति?
कुसलसमुट्ठानं रूपं कुसलमूलमूलकं न कुसलम्। कुसलं कुसलमूलमूलकञ्चेव कुसलञ्च।
६०. (क) ये केचि कुसला धम्मा, सब्बे ते कुसलमूलेन एकमूलमूलकाति? आमन्ता।
(ख) ये वा पन कुसलमूलेन एकमूलमूलका, सब्बे ते धम्मा कुसलाति?
कुसलसमुट्ठानं रूपं कुसलमूलेन एकमूलमूलकं, न कुसलम्। कुसलं कुसलमूलेन एकमूलमूलकञ्चेव कुसलञ्च।
६१. (क) ये केचि कुसलमूलेन एकमूलमूलका धम्मा, सब्बे ते कुसलमूलेन अञ्ञमञ्ञमूलमूलकाति?
मूलानि यानि एकतो उप्पज्जन्ति कुसलमूलानि एकमूलमूलकानि चेव अञ्ञमञ्ञमूलमूलकानि च। अवसेसा कुसलमूलसहजाता धम्मा कुसलमूलेन एकमूलमूलका, न च अञ्ञमञ्ञमूलमूलका।
(ख) ये वा पन कुसलमूलेन अञ्ञमञ्ञमूलमूलका, सब्बे ते धम्मा कुसलाति? आमन्ता।
२. अकुसला धम्मा (१) मूलनयो
६२. (क) ये केचि अकुसला धम्मा, सब्बे ते अकुसलमूलाति?
तीणेव अकुसलमूलानि। अवसेसा अकुसला धम्मा न अकुसलमूला।
(ख) ये वा पन अकुसलमूला, सब्बे ते धम्मा अकुसलाति? आमन्ता।
६३. (क) ये केचि अकुसला धम्मा, सब्बे ते अकुसलमूलेन एकमूलाति?
अहेतुकं अकुसलं अकुसलमूलेन न एकमूलम्। सहेतुकं अकुसलं अकुसलमूलेन एकमूलम्।
(ख) ये वा पन अकुसलमूलेन एकमूला, सब्बे ते धम्मा अकुसलाति?
अकुसलसमुट्ठानं रूपं अकुसलमूलेन एकमूलं, न अकुसलम्। अकुसलं अकुसलमूलेन एकमूलञ्चेव अकुसलञ्च।
६४. (क) ये केचि अकुसलमूलेन एकमूला धम्मा, सब्बे ते अकुसलमूलेन अञ्ञमञ्ञमूलाति?
मूलानि यानि एकतो उप्पज्जन्ति अकुसलमूलानि एकमूलानि चेव अञ्ञमञ्ञमूलानि च। अवसेसा अकुसलमूलसहजाता धम्मा अकुसलमूलेन एकमूला, न च अञ्ञमञ्ञमूला।
(ख) ये वा पन अकुसलमूलेन अञ्ञमञ्ञमूला, सब्बे ते धम्मा अकुसलाति? आमन्ता।
(२) मूलमूलनयो
६५. (क) ये केचि अकुसला धम्मा, सब्बे ते अकुसलमूलमूलाति?
तीणेव अकुसलमूलमूलानि। अवसेसा अकुसला धम्मा न अकुसलमूलमूला।
(ख) ये वा पन अकुसलमूलमूला, सब्बे ते धम्मा अकुसलाति? आमन्ता।
६६. (क) ये केचि अकुसला धम्मा, सब्बे ते अकुसलमूलेन एकमूलमूलाति?
अहेतुकं अकुसलं अकुसलमूलेन न एकमूलमूलम्। सहेतुकं अकुसलं अकुसलमूलेन एकमूलमूलम्।
(ख) ये वा पन अकुसलमूलेन एकमूलमूला, सब्बे ते धम्मा अकुसलाति?
अकुसलसमुट्ठानं रूपं अकुसलमूलेन एकमूलमूलं, न अकुसलम्। अकुसलं अकुसलमूलेन एकमूलमूलञ्चेव अकुसलञ्च।
६७. (क) ये केचि अकुसलमूलेन एकमूलमूला धम्मा, सब्बे ते अकुसलमूलेन अञ्ञमञ्ञमूलमूलाति?
मूलानि यानि एकतो उप्पज्जन्ति अकुसलमूलानि एकमूलमूलानि चेव अञ्ञमञ्ञमूलमूलानि च। अवसेसा अकुसलमूलसहजाता धम्मा अकुसलमूलेन एकमूलमूला, न च अञ्ञमञ्ञमूलमूला।
(ख) ये वा पन अकुसलमूलेन अञ्ञमञ्ञमूलमूला, सब्बे ते धम्मा अकुसलाति? आमन्ता।
(३) मूलकनयो
६८. (क) ये केचि अकुसला धम्मा, सब्बे ते अकुसलमूलकाति?
अहेतुकं अकुसलं न अकुसलमूलकम्। सहेतुकं अकुसलं अकुसलमूलकम्।
(ख) ये वा पन अकुसलमूलका, सब्बे ते धम्मा अकुसलाति?
अकुसलसमुट्ठानं रूपं अकुसलमूलकं न अकुसलम्। अकुसलं अकुसलमूलकञ्चेव अकुसलञ्च।
६९. (क) ये केचि अकुसला धम्मा, सब्बे ते अकुसलमूलेन एकमूलकाति?
अहेतुकं अकुसलं अकुसलमूलेन न एकमूलकम्। सहेतुकं अकुसलं अकुसलमूलेन एकमूलकम्।
(ख) ये वा पन अकुसलमूलेन एकमूलका, सब्बे ते धम्मा अकुसलाति?
अकुसलसमुट्ठानं रूपं अकुसलमूलेन एकमूलकं, न अकुसलम्। अकुसलं अकुसलमूलेन एकमूलकञ्चेव अकुसलञ्च।
७०. (क) ये केचि अकुसलमूलेन एकमूलका धम्मा, सब्बे ते अकुसलमूलेन अञ्ञमञ्ञमूलकाति?
मूलानि यानि एकतो उप्पज्जन्ति अकुसलमूलानि एकमूलकानि चेव अञ्ञमञ्ञमूलकानि च। अवसेसा अकुसलमूलसहजाता धम्मा अकुसलमूलेन एकमूलका न च अञ्ञमञ्ञमूलका।
(ख) ये वा पन अकुसलमूलेन अञ्ञमञ्ञमूलका, सब्बे ते धम्मा अकुसलाति? आमन्ता।
(४) मूलमूलकनयो
७१. (क) ये केचि अकुसला धम्मा, सब्बे ते अकुसलमूलमूलकाति?
अहेतुकं अकुसलं न अकुसलमूलमूलकम्। सहेतुकं अकुसलं अकुसलमूलमूलकम्।
(ख) ये वा पन अकुसलमूलमूलका, सब्बे ते धम्मा अकुसलाति?
अकुसलसमुट्ठानं रूपं अकुसलमूलमूलकं न अकुसलम्। अकुसलं अकुसलमूलमूलकञ्चेव अकुसलञ्च।
७२. (क) ये केचि अकुसला धम्मा, सब्बे ते अकुसलमूलेन एकमूलमूलकाति?
अहेतुकं अकुसलं अकुसलमूलेन न एकमूलमूलकम्। सहेतुकं अकुसलं अकुसलमूलेन एकमूलमूलकम्।
(ख) ये वा पन अकुसलमूलेन एकमूलमूलका, सब्बे ते धम्मा अकुसलाति?
अकुसलसमुट्ठानं रूपं अकुसलमूलेन एकमूलमूलकं, न अकुसलम्। अकुसलं अकुसलमूलेन एकमूलमूलकञ्चेव अकुसलञ्च।
७३. (क) ये केचि अकुसलमूलेन एकमूलमूलका धम्मा, सब्बे ते अकुसलमूलेन अञ्ञमञ्ञमूलमूलकाति?
मूलानि यानि एकतो उप्पज्जन्ति अकुसलमूलानि एकमूलमूलकानि चेव अञ्ञमञ्ञमूलमूलकानि च। अवसेसा अकुसलमूलसहजाता धम्मा अकुसलमूलेन एकमूलमूलका, न च अञ्ञमञ्ञमूलमूलका।
(ख) ये वा पन अकुसलमूलेन अञ्ञमञ्ञमूलमूलका, सब्बे ते धम्मा अकुसलाति? आमन्ता।
३. अब्याकता धम्मा (१) मूलनयो
७४. (क) ये केचि अब्याकता धम्मा, सब्बे ते अब्याकतमूलाति?
तीणेव अब्याकतमूलानि। अवसेसा अब्याकता धम्मा न अब्याकतमूला।
(ख) ये वा पन अब्याकतमूला, सब्बे ते धम्मा अब्याकताति? आमन्ता।
७५. (क) ये केचि अब्याकता धम्मा, सब्बे ते अब्याकतमूलेन एकमूलाति?
अहेतुकं अब्याकतं अब्याकतमूलेन न एकमूलम्। सहेतुकं अब्याकतं अब्याकतमूलेन एकमूलम्।
(ख) ये वा पन अब्याकतमूलेन एकमूला, सब्बे ते धम्मा अब्याकताति? आमन्ता।
७६. (क) ये केचि अब्याकतमूलेन एकमूला धम्मा, सब्बे ते अब्याकतमूलेन अञ्ञमञ्ञमूलाति?
मूलानि यानि एकतो उप्पज्जन्ति अब्याकतमूलानि एकमूलानि चेव अञ्ञमञ्ञमूलानि च। अवसेसा अब्याकतमूलसहजाता धम्मा अब्याकतमूलेन एकमूला, न च अञ्ञमञ्ञमूला।
(ख) ये वा पन अब्याकतमूलेन अञ्ञमञ्ञमूला, सब्बे ते धम्मा अब्याकताति? आमन्ता।
(२) मूलमूलनयो
७७. (क) ये केचि अब्याकता धम्मा, सब्बे ते अब्याकतमूलमूलाति?
तीणेव अब्याकतमूलमूलानि। अवसेसा अब्याकता धम्मा न अब्याकतमूलमूला।
(ख) ये वा पन अब्याकतमूलमूला, सब्बे ते धम्मा अब्याकताति? आमन्ता।
७८. (क) ये केचि अब्याकता धम्मा, सब्बे ते अब्याकतमूलेन एकमूलमूलाति?
अहेतुकं अब्याकतं अब्याकतमूलेन न एकमूलमूलम्। सहेतुकं अब्याकतं अब्याकतमूलेन एकमूलमूलम्।
(ख) ये वा पन अब्याकतमूलेन एकमूलमूला, सब्बे ते धम्मा अब्याकताति? आमन्ता।
७९. (क) ये केचि अब्याकतमूलेन एकमूलमूला धम्मा, सब्बे ते अब्याकतमूलेन अञ्ञमञ्ञमूलमूलाति?
मूलानि यानि एकतो उप्पज्जन्ति अब्याकतमूलानि एकमूलमूलानि चेव अञ्ञमञ्ञमूलमूलानि च। अवसेसा अब्याकतमूलसहजाता धम्मा अब्याकतमूलेन एकमूलमूला, न च अञ्ञमञ्ञमूलमूला ।
(ख) ये वा पन अब्याकतमूलेन अञ्ञमञ्ञमूलमूला, सब्बे ते धम्मा अब्याकताति? आमन्ता।
(३) मूलकनयो
८०. (क) ये केचि अब्याकता धम्मा, सब्बे ते अब्याकतमूलकाति?
अहेतुकं अब्याकतं न अब्याकतमूलकम्। सहेतुकं अब्याकतं अब्याकतमूलकम्।
(ख) ये वा पन अब्याकतमूलका, सब्बे ते धम्मा अब्याकताति? आमन्ता।
८१. (क) ये केचि अब्याकता धम्मा, सब्बे ते अब्याकतमूलेन एकमूलकाति?
अहेतुकं अब्याकतं अब्याकतमूलेन न एकमूलकम्। सहेतुकं अब्याकतं अब्याकतमूलेन एकमूलकम्।
(ख) ये वा पन अब्याकतमूलेन एकमूलका, सब्बे ते धम्मा अब्याकताति? आमन्ता।
८२. (क) ये केचि अब्याकतमूलेन एकमूलका धम्मा, सब्बे ते अब्याकतमूलेन अञ्ञमञ्ञमूलकाति?
मूलानि यानि एकतो उप्पज्जन्ति अब्याकतमूलानि एकमूलकानि चेव अञ्ञमञ्ञमूलकानि च। अवसेसा अब्याकतमूलसहजाता धम्मा अब्याकतमूलेन एकमूलका, न च अञ्ञमञ्ञमूलका।
(ख) ये वा पन अब्याकतमूलेन अञ्ञमञ्ञमूलका, सब्बे ते धम्मा अब्याकताति? आमन्ता।
(४) मूलमूलकनयो
८३. (क) ये केचि अब्याकता धम्मा, सब्बे ते अब्याकतमूलमूलकाति?
अहेतुकं अब्याकतं न अब्याकतमूलमूलकम्। सहेतुकं अब्याकतं अब्याकतमूलमूलकम्।
(ख) ये वा पन अब्याकतमूलमूलका, सब्बे ते धम्मा अब्याकताति? आमन्ता।
८४. (क) ये केचि अब्याकता धम्मा, सब्बे ते अब्याकतमूलेन एकमूलमूलकाति?
अहेतुकं अब्याकतं अब्याकतमूलेन न एकमूलमूलकम्। सहेतुकं अब्याकतं अब्याकतमूलेन एकमूलमूलकम्।
(ख) ये वा पन अब्याकतमूलेन एकमूलमूलका, सब्बे ते धम्मा अब्याकताति ? आमन्ता।
८५. (क) ये केचि अब्याकतमूलेन एकमूलमूलका धम्मा, सब्बे ते अब्याकतमूलेन अञ्ञमञ्ञमूलमूलकाति?
मूलानि यानि एकतो उप्पज्जन्ति अब्याकतमूलानि एकमूलमूलकानि चेव अञ्ञमञ्ञमूलमूलकानि च। अवसेसा अब्याकतमूलसहजाता धम्मा अब्याकतमूलेन एकमूलमूलका, न च अञ्ञमञ्ञमूलमूलका।
(ख) ये वा पन अब्याकतमूलेन अञ्ञमञ्ञमूलमूलका, सब्बे ते धम्मा अब्याकताति? आमन्ता।
४. नामा धम्मा (१) मूलनयो
८६. (क) ये केचि नामा धम्मा, सब्बे ते नाममूलाति?
नवेव नाममूलानि। अवसेसा नामा धम्मा न नाममूला।
(ख) ये वा पन नाममूला, सब्बे ते धम्मा नामाति? आमन्ता।
८७. (क) ये केचि नामा धम्मा, सब्बे ते नाममूलेन एकमूलाति?
अहेतुकं नामं नाममूलेन न एकमूलम्। सहेतुकं नामं नाममूलेन एकमूलम्।
(ख) ये वा पन नाममूलेन एकमूला, सब्बे ते धम्मा नामाति?
नामसमुट्ठानं रूपं नाममूलेन एकमूलं, न नामम्। नामं नाममूलेन एकमूलञ्चेव नामञ्च।
८८. (क) ये केचि नाममूलेन एकमूला धम्मा, सब्बे ते नाममूलेन अञ्ञमञ्ञमूलाति?
मूलानि यानि एकतो उप्पज्जन्ति नाममूलानि एकमूलानि चेव अञ्ञमञ्ञमूलानि च। अवसेसा नाममूलसहजाता धम्मा नाममूलेन एकमूला, न च अञ्ञमञ्ञमूला।
(ख) ये वा पन नाममूलेन अञ्ञमञ्ञमूला, सब्बे ते धम्मा नामाति? आमन्ता।
(२) मूलमूलनयो
८९. (क) ये केचि नामा धम्मा, सब्बे ते नाममूलमूलाति?
नवेव नाममूलमूलानि। अवसेसा नामा धम्मा न नाममूलमूला।
(ख) ये वा पन नाममूलमूला, सब्बे ते धम्मा नामाति? आमन्ता।
९०. (क) ये केचि नामा धम्मा, सब्बे ते नाममूलेन एकमूलमूलाति?
अहेतुकं नामं नाममूलेन न एकमूलमूलम्। सहेतुकं नामं नाममूलेन एकमूलमूलम्।
(ख) ये वा पन नाममूलेन एकमूलमूला, सब्बे ते धम्मा नामाति?
नामसमुट्ठानं रूपं नाममूलेन एकमूलमूलं, न नामम्। नामं नाममूलेन एकमूलमूलञ्चेव नामञ्च।
९१. (क) ये केचि नाममूलेन एकमूलमूला धम्मा, सब्बे ते नाममूलेन अञ्ञमञ्ञमूलमूलाति?
मूलानि यानि एकतो उप्पज्जन्ति नाममूलानि एकमूलमूलानि चेव अञ्ञमञ्ञमूलमूलानि च। अवसेसा नाममूलसहजाता धम्मा नाममूलेन एकमूलमूला, न च अञ्ञमञ्ञमूलमूला।
(ख) ये वा पन नाममूलेन अञ्ञमञ्ञमूलमूला, सब्बे ते धम्मा नामाति? आमन्ता।
(३) मूलकनयो
९२. (क) ये केचि नामा धम्मा, सब्बे ते नाममूलकाति?
अहेतुकं नामं न नाममूलकम्। सहेतुकं नामं नाममूलकम्।
(ख) ये वा पन नाममूलका, सब्बे ते धम्मा नामाति?
नामसमुट्ठानं रूपं नाममूलकं, न नामम्। नामं नाममूलकञ्चेव नामञ्च।
९३. (क) ये केचि नामा धम्मा, सब्बे ते नाममूलेन एकमूलकाति?
अहेतुकं नामं नाममूलेन न एकमूलकम्। सहेतुकं नामं नाममूलेन एकमूलकम्।
(ख) ये वा पन नाममूलेन एकमूलका, सब्बे ते धम्मा नामाति?
नामसमुट्ठानं रूपं नाममूलेन एकमूलकं, न नामम्। नामं नाममूलेन एकमूलकञ्चेव नामञ्च।
९४. (क) ये केचि नाममूलेन एकमूलका धम्मा, सब्बे ते नाममूलेन अञ्ञमञ्ञमूलकाति?
मूलानि यानि एकतो उप्पज्जन्ति नाममूलानि एकमूलकानि चेव अञ्ञमञ्ञमूलकानि च। अवसेसा नाममूलसहजाता धम्मा नाममूलेन एकमूलका, न च अञ्ञमञ्ञमूलका।
(ख) ये वा पन नाममूलेन अञ्ञमञ्ञमूलका, सब्बे ते धम्मा नामाति? आमन्ता।
(४) मूलमूलकनयो
९५. (क) ये केचि नामा धम्मा, सब्बे ते नाममूलमूलकाति?
अहेतुकं नामं न नाममूलमूलकम्। सहेतुकं नामं नाममूलमूलकम्।
(ख) ये वा पन नाममूलमूलका, सब्बे ते धम्मा नामाति?
नामसमुट्ठानं रूपं नाममूलमूलकं, न नामम्। नामं नाममूलमूलकञ्चेव नामञ्च।
९६. (क) ये केचि नामा धम्मा, सब्बे ते नाममूलेन एकमूलमूलकाति?
अहेतुकं नामं नाममूलेन न एकमूलमूलकम्। सहेतुकं नामं नाममूलेन एकमूलमूलकम्।
(ख) ये वा पन नाममूलेन एकमूलमूलका, सब्बे ते धम्मा नामाति?
नामसमुट्ठानं रूपं नाममूलेन एकमूलमूलकं, न नामम्। नामं नाममूलेन एकमूलमूलकञ्चेव नामञ्च।
९७. (क) ये केचि नाममूलेन एकमूलमूलका धम्मा, सब्बे ते नाममूलेन अञ्ञमञ्ञमूलमूलकाति?
मूलानि यानि एकतो उप्पज्जन्ति नाममूलानि एकमूलमूलकानि चेव अञ्ञमञ्ञमूलमूलकानि च। अवसेसा नाममूलसहजाता धम्मा नाममूलेन एकमूलमूलका, न च अञ्ञमञ्ञमूलमूलका।
(ख) ये वा पन नाममूलेन अञ्ञमञ्ञमूलमूलका, सब्बे ते धम्मा नामाति?
आमन्ता।
मूलवारनिद्देसो।
२-१०. हेतुवारादि
९८. ये केचि कुसला धम्मा, सब्बे ते कुसलहेतूति…?
तयो एव कुसलहेतू, अवसेसा कुसला धम्मा न कुसलहेतू…पे॰… कुसलनिदाना… कुसलसम्भवा… कुसलप्पभवा… कुसलसमुट्ठाना… कुसलाहारा… कुसलारम्मणा… कुसलपच्चया… कुसलसमुदया…।
९९. ये केचि अकुसला धम्मा… ये केचि अब्याकता धम्मा… ये केचि नामा धम्मा, सब्बे ते नामहेतू ति… नामनिदाना… नामसम्भवा… नामप्पभवा… नामसमुट्ठाना… नामाहारा… नामारम्मणा… नामपच्चया… नामसमुदया…।
मूलं हेतु निदानञ्च, सम्भवो पभवेन च।
समुट्ठानाहारारम्मणा, पच्चयो समुदयेन चाति॥
निद्देसवारो निट्ठितो।
मूलयमकपाळि निट्ठिता।
॥ नमो तस्स भगवतो अरहतो सम्मासम्बुद्धस्स॥