८. सम्मप्पधानविभङ्गो
१. सुत्तन्तभाजनीयम्
३९०. चत्तारो सम्मप्पधाना – इध भिक्खु अनुप्पन्नानं पापकानं अकुसलानं धम्मानं अनुप्पादाय छन्दं जनेति वायमति वीरियं आरभति चित्तं पग्गण्हाति पदहति, उप्पन्नानं पापकानं अकुसलानं धम्मानं पहानाय छन्दं जनेति वायमति वीरियं आरभति चित्तं पग्गण्हाति पदहति, अनुप्पन्नानं कुसलानं धम्मानं उप्पादाय छन्दं जनेति वायमति वीरियं आरभति चित्तं पग्गण्हाति पदहति, उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया छन्दं जनेति वायमति वीरियं आरभति चित्तं पग्गण्हाति पदहति।
३९१. कथञ्च भिक्खु अनुप्पन्नानं पापकानं अकुसलानं धम्मानं अनुप्पादाय छन्दं जनेति वायमति वीरियं आरभति चित्तं पग्गण्हाति पदहति? तत्थ कतमे अनुप्पन्ना पापका अकुसला धम्मा? तीणि अकुसलमूलानि – लोभो, दोसो, मोहो। तदेकट्ठा च किलेसा। तंसम्पयुत्तो वेदनाक्खन्धो, सञ्ञाक्खन्धो, सङ्खारक्खन्धो, विञ्ञाणक्खन्धो, तंसमुट्ठानं कायकम्मं वचीकम्मं मनोकम्मं – इमे वुच्चन्ति ‘‘अनुप्पन्ना पापका अकुसला धम्मा’’। इति इमेसं अनुप्पन्नानं पापकानं अकुसलानं धम्मानं अनुप्पादाय छन्दं जनेति वायमति वीरियं आरभति चित्तं पग्गण्हाति पदहति।
३९२. छन्दं जनेतीति। तत्थ कतमो छन्दो? यो छन्दो छन्दिकता [छन्दीकता (स्या॰)] कत्तुकम्यता कुसलो धम्मच्छन्दो – अयं वुच्चति ‘‘छन्दो’’। इमं छन्दं जनेति सञ्जनेति उट्ठपेति समुट्ठपेति [उट्ठापेति समुट्ठापेति (स्या॰) एवमुपरिपि] निब्बत्तेति अभिनिब्बत्तेति। तेन वुच्चति ‘‘छन्दं जनेती’’ति।
३९३. वायमतीति। तत्थ कतमो वायामो? यो चेतसिको वीरियारम्भो…पे॰… सम्मावायामो – अयं वुच्चति ‘‘वायामो’’। इमिना वायामेन उपेतो होति समुपेतो उपागतो समुपागतो उपपन्नो सम्पन्नो समन्नागतो। तेन वुच्चति ‘‘वायमती’’ति।
३९४. वीरियं आरभतीति। तत्थ कतमं वीरियं? यो चेतसिको वीरियारम्भो…पे॰… सम्मावायामो – इदं वुच्चति ‘‘वीरियं’’। इमं वीरियं आरभति समारभति आसेवति भावेति बहुलीकरोति। तेन वुच्चति ‘‘वीरियं आरभती’’ति।
३९५. चित्तं पग्गण्हातीति। तत्थ कतमं चित्तं? यं चित्तं मनो मानसं…पे॰… तज्जामनोविञ्ञाणधातु – इदं वुच्चति ‘‘चित्तं’’। इमं चित्तं पग्गण्हाति सम्पग्गण्हाति उपत्थम्भेति पच्चुपत्थम्भेति। तेन वुच्चति ‘‘चित्तं पग्गण्हाती’’ति।
३९६. पदहतीति। तत्थ कतमं पधानं? यो चेतसिको वीरियारम्भो…पे॰… सम्मावायामो – इदं वुच्चति ‘‘पधानं’’। इमिना पधानेन उपेतो होति…पे॰… समन्नागतो। तेन वुच्चति ‘‘पदहती’’ति।
३९७. कथञ्च भिक्खु उप्पन्नानं पापकानं अकुसलानं धम्मानं पहानाय छन्दं जनेति वायमति वीरियं आरभति चित्तं पग्गण्हाति पदहति? तत्थ कतमे उप्पन्ना पापका अकुसला धम्मा? तीणि अकुसलमूलानि – लोभो, दोसो, मोहो। तदेकट्ठा च किलेसा। तंसम्पयुत्तो वेदनाक्खन्धो, सञ्ञाक्खन्धो, सङ्खारक्खन्धो, विञ्ञाणक्खन्धो, तंसमुट्ठानं कायकम्मं वचीकम्मं मनोकम्मं – इमे वुच्चन्ति ‘‘उप्पन्ना पापका अकुसला धम्मा’’। इति इमेसं उप्पन्नानं पापकानं अकुसलानं धम्मानं पहानाय छन्दं जनेति वायमति वीरियं आरभति चित्तं पग्गण्हाति पदहति।
३९८. छन्दं जनेतीति। तत्थ कतमो छन्दो? यो छन्दो छन्दिकता कत्तुकम्यता कुसलो धम्मच्छन्दो – अयं वुच्चति ‘‘छन्दो’’। इमं छन्दं जनेति सञ्जनेति उट्ठपेति समुट्ठपेति निब्बत्तेति अभिनिब्बत्तेति। तेन वुच्चति ‘‘छन्दं जनेती’’ति।
३९९. वायमतीति। तत्थ कतमो वायामो? यो चेतसिको वीरियारम्भो…पे॰… सम्मावायामो – अयं वुच्चति ‘‘वायामो’’। इमिना वायामेन उपेतो होति…पे॰… समन्नागतो। तेन वुच्चति ‘‘वायमती’’ति।
४००. वीरियं आरभतीति। तत्थ कतमं वीरियं? यो चेतसिको वीरियारम्भो…पे॰… सम्मावायामो – इदं वुच्चति ‘‘वीरियं’’। इमं वीरियं आरभति समारभति आसेवति भावेति बहुलीकरोति। तेन वुच्चति ‘‘वीरियं आरभती’’ति।
४०१. चित्तं पग्गण्हातीति। तत्थ कतमं चित्तं? यं चित्तं मनो मानसं…पे॰… तज्जामनोविञ्ञाणधातु – इदं वुच्चति ‘‘चित्तं’’। इमं चित्तं पग्गण्हाति सम्पग्गण्हाति उपत्थम्भेति पच्चुपत्थम्भेति। तेन वुच्चति ‘‘चित्तं पग्गण्हाती’’ति।
४०२. पदहतीति। तत्थ कतमं पधानं? यो चेतसिको वीरियारम्भो…पे॰… सम्मावायामो – इदं वुच्चति ‘‘पधानं’’। इमिना पधानेन उपेतो होति…पे॰… समन्नागतो। तेन वुच्चति ‘‘पदहती’’ति।
४०३. कथञ्च भिक्खु अनुप्पन्नानं कुसलानं धम्मानं उप्पादाय छन्दं जनेति वायमति वीरियं आरभति चित्तं पग्गण्हाति पदहति? तत्थ कतमे अनुप्पन्ना कुसला धम्मा? तीणि कुसलमूलानि – अलोभो, अदोसो, अमोहो। तंसम्पयुत्तो वेदनाक्खन्धो, सञ्ञाक्खन्धो, सङ्खारक्खन्धो, विञ्ञाणक्खन्धो। तंसमुट्ठानं कायकम्मं, वचीकम्मं, मनोकम्मं – इमे वुच्चन्ति ‘‘अनुप्पन्ना कुसला धम्मा’’। इति इमेसं अनुप्पन्नानं कुसलानं धम्मानं उप्पादाय छन्दं जनेति वायमति वीरियं आरभति चित्तं पग्गण्हाति पदहति।
४०४. छन्दं जनेतीति…पे॰… वायमतीति…पे॰… वीरियं आरभतीति…पे॰… चित्तं पग्गण्हातीति…पे॰… पदहतीति। तत्थ कतमं पधानं? यो चेतसिको वीरियारम्भो …पे॰… सम्मावायामो – इदं वुच्चति ‘‘पधानं’’। इमिना पधानेन उपेतो होति…पे॰… समन्नागतो। तेन वुच्चति ‘‘पदहती’’ति।
४०५. कथञ्च भिक्खु उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया छन्दं जनेति वायमति वीरियं आरभति चित्तं पग्गण्हाति पदहति? तत्थ कतमे उप्पन्ना कुसला धम्मा? तीणि कुसलमूलानि – अलोभो, अदोसो, अमोहो। तंसम्पयुत्तो वेदनाक्खन्धो, सञ्ञाक्खन्धो, सङ्खारक्खन्धो, विञ्ञाणक्खन्धो , तंसमुट्ठानं कायकम्मं वचीकम्मं मनोकम्मं – इमे वुच्चन्ति ‘‘उप्पन्ना कुसला धम्मा’’। इति इमेसं उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया छन्दं जनेति वायमति वीरियं आरभति चित्तं पग्गण्हाति पदहति।
४०६. ठितियाति। या ठिति सो असम्मोसो, यो असम्मोसो सो भिय्योभावो , यो भिय्योभावो तं वेपुल्लं, यं वेपुल्लं सा भावना, या भावना सा पारिपूरी।
४०७. छन्दं जनेतीति…पे॰… वायमतीति…पे॰… वीरियं आरभतीति…पे॰… चित्तं पग्गण्हातीति…पे॰… पदहतीति। तत्थ कतमं पधानं? यो चेतसिको वीरियारम्भो…पे॰… सम्मावायामो – इदं वुच्चति ‘‘पधानं’’। इमिना पधानेन उपेतो होति…पे॰… समन्नागतो। तेन वुच्चति ‘‘पदहती’’ति।
सुत्तन्तभाजनीयम्।
२. अभिधम्मभाजनीयम्
४०८. चत्तारो सम्मप्पधाना – इध भिक्खु अनुप्पन्नानं पापकानं अकुसलानं धम्मानं अनुप्पादाय छन्दं जनेति वायमति वीरियं आरभति चित्तं पग्गण्हाति पदहति, उप्पन्नानं पापकानं अकुसलानं धम्मानं पहानाय छन्दं जनेति वायमति वीरियं आरभति चित्तं पग्गण्हाति पदहति, अनुप्पन्नानं कुसलानं धम्मानं उप्पादाय छन्दं जनेति वायमति वीरियं आरभति चित्तं पग्गण्हाति पदहति, उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया छन्दं जनेति वायमति वीरियं आरभति चित्तं पग्गण्हाति पदहति।
४०९. कथञ्च भिक्खु अनुप्पन्नानं पापकानं अकुसलानं धम्मानं अनुप्पादाय छन्दं जनेति वायमति वीरियं आरभति चित्तं पग्गण्हाति पदहति? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे॰… पठमं झानं उपसम्पज्ज विहरति दुक्खपटिपदं दन्धाभिञ्ञं, तस्मिं समये अनुप्पन्नानं पापकानं अकुसलानं धम्मानं अनुप्पादाय छन्दं जनेति वायमति वीरियं आरभति चित्तं पग्गण्हाति पदहति।
४१०. छन्दं जनेतीति। तत्थ कतमो छन्दो? यो छन्दो छन्दिकता कत्तुकम्यता कुसलो धम्मच्छन्दो – अयं वुच्चति ‘‘छन्दो’’। इमं छन्दं जनेति सञ्जनेति उट्ठपेति समुट्ठपेति निब्बत्तेति अभिनिब्बत्तेति। तेन वुच्चति ‘‘छन्दं जनेती’’ति।
४११. वायमतीति। तत्थ कतमो वायामो? यो चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – अयं वुच्चति ‘‘वायामो’’। इमिना वायामेन उपेतो होति समुपेतो उपागतो समुपागतो उपपन्नो सम्पन्नो समन्नागतो। तेन वुच्चति ‘‘वायमती’’ति।
४१२. वीरियं आरभतीति। तत्थ कतमं वीरियं? यो चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – इदं वुच्चति ‘‘वीरियं’’। इमं वीरियं आरभति समारभति आसेवति भावेति बहुलीकरोति। तेन वुच्चति ‘‘वीरियं आरभती’’ति।
४१३. चित्तं पग्गण्हातीति। तत्थ कतमं चित्तं? यं चित्तं मनो मानसं…पे॰… तज्जामनोविञ्ञाणधातु – इदं वुच्चति ‘‘चित्तं’’। इमं चित्तं पग्गण्हाति सम्पग्गण्हाति उपत्थम्भेति पच्चुपत्थम्भेति। तेन वुच्चति ‘‘चित्तं पग्गण्हाती’’ति।
४१४. पदहतीति। तत्थ कतमं सम्मप्पधानं? यो चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – इदं वुच्चति ‘‘सम्मप्पधानं’’। अवसेसा धम्मा सम्मप्पधानसम्पयुत्ता।
४१५. कथञ्च भिक्खु उप्पन्नानं पापकानं अकुसलानं धम्मानं पहानाय छन्दं जनेति वायमति वीरियं आरभति चित्तं पग्गण्हाति पदहति? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे॰… पठमं झानं उपसम्पज्ज विहरति दुक्खपटिपदं दन्धाभिञ्ञं, तस्मिं समये उप्पन्नानं पापकानं अकुसलानं धम्मानं पहानाय छन्दं जनेति वायमति वीरियं आरभति चित्तं पग्गण्हाति पदहति।
४१६. छन्दं जनेतीति…पे॰… वायमतीति…पे॰… वीरियं आरभतीति…पे॰… चित्तं पग्गण्हातीति…पे॰… पदहतीति। तत्थ कतमं सम्मप्पधानं? यो चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – इदं वुच्चति ‘‘सम्मप्पधानं’’। अवसेसा धम्मा सम्मप्पधानसम्पयुत्ता।
४१७. कथञ्च भिक्खु अनुप्पन्नानं कुसलानं धम्मानं उप्पादाय छन्दं जनेति वायमति वीरियं आरभति चित्तं पग्गण्हाति पदहति? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे॰… पठमं झानं उपसम्पज्ज विहरति दुक्खपटिपदं दन्धाभिञ्ञं, तस्मिं समये अनुप्पन्नानं कुसलानं धम्मानं उप्पादाय छन्दं जनेति वायमति वीरियं आरभति चित्तं पग्गण्हाति पदहति।
४१८. छन्दं जनेतीति…पे॰… वायमतीति…पे॰… वीरियं आरभतीति…पे॰… चित्तं पग्गण्हातीति…पे॰… पदहतीति। तत्थ कतमं सम्मप्पधानं? यो चेतसिको वीरियारम्भो …पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – इदं वुच्चति ‘‘सम्मप्पधानं’’। अवसेसा धम्मा सम्मप्पधानसम्पयुत्ता।
४१९. कथञ्च भिक्खु उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया छन्दं जनेति वायमति वीरियं आरभति चित्तं पग्गण्हाति पदहति? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे॰… पठमं झानं उपसम्पज्ज विहरति दुक्खपटिपदं दन्धाभिञ्ञं, तस्मिं समये उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया छन्दं जनेति वायमति वीरियं आरभति चित्तं पग्गण्हाति पदहति।
४२०. ठितियाति । या ठिति सो असम्मोसो, यो असम्मोसो सो भिय्योभावो, यो भिय्योभावो तं वेपुल्लं, यं वेपुल्लं सा भावना, या भावना सा पारिपूरी।
४२१. छन्दं जनेतीति। तत्थ कतमो छन्दो? यो छन्दो छन्दिकता कत्तुकम्यता कुसलो धम्मच्छन्दो – अयं वुच्चति ‘‘छन्दो’’। इमं छन्दं जनेति सञ्जनेति उट्ठपेति समुट्ठपेति निब्बत्तेति अभिनिब्बत्तेति। तेन वुच्चति ‘‘छन्दं जनेती’’ति।
४२२. वायमतीति। तत्थ कतमो वायामो? यो चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – अयं वुच्चति ‘‘वायामो’’। इमिना वायामेन उपेतो होति…पे॰… समन्नागतो। तेन वुच्चति ‘‘वायमती’’ति।
४२३. वीरियं आरभतीति। तत्थ कतमं वीरियं? यो चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – इदं वुच्चति ‘‘वीरियं’’। इमं वीरियं आरभति समारभति आसेवति भावेति बहुलीकरोति। तेन वुच्चति ‘‘वीरियं आरभती’’ति।
४२४. चित्तं पग्गण्हातीति। तत्थ कतमं चित्तं? यं चित्तं मनो मानसं…पे॰… तज्जामनोविञ्ञाणधातु – इदं वुच्चति ‘‘चित्तं’’। इमं चित्तं पग्गण्हाति सम्पग्गण्हाति उपत्थम्भेति पच्चुपत्थम्भेति। तेन वुच्चति ‘‘चित्तं पग्गण्हाती’’ति।
४२५. पदहतीति। तत्थ कतमं सम्मप्पधानं? यो चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – इदं वुच्चति ‘‘सम्मप्पधानं’’। अवसेसा धम्मा सम्मप्पधानसम्पयुत्ता।
४२६. तत्थ कतमं सम्मप्पधानं? इध भिक्खु यस्मिं समये लोकुत्तरं झानं भावेति निय्यानिकं अपचयगामिं दिट्ठिगतानं पहानाय पठमाय भूमिया पत्तिया विविच्चेव कामेहि…पे॰… पठमं झानं उपसम्पज्ज विहरति दुक्खपटिपदं दन्धाभिञ्ञं, यो तस्मिं समये चेतसिको वीरियारम्भो…पे॰… सम्मावायामो वीरियसम्बोज्झङ्गो मग्गङ्गं मग्गपरियापन्नं – इदं वुच्चति ‘‘सम्मप्पधानं’’। अवसेसा धम्मा सम्मप्पधानसम्पयुत्ता।
अभिधम्मभाजनीयम्।
३. पञ्हापुच्छकम्
४२७. चत्तारो सम्मप्पधाना – इध भिक्खु अनुप्पन्नानं पापकानं अकुसलानं धम्मानं अनुप्पादाय छन्दं जनेति वायमति वीरियं आरभति चित्तं पग्गण्हाति पदहति, उप्पन्नानं पापकानं अकुसलानं धम्मानं पहानाय…पे॰… अनुप्पन्नानं कुसलानं धम्मानं उप्पादाय…पे॰… उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया छन्दं जनेति वायमति वीरियं आरभति चित्तं पग्गण्हाति पदहति।
४२८. चतुन्नं सम्मप्पधानानं कति कुसला, कति अकुसला, कति अब्याकता…पे॰… कति सरणा, कति अरणा?
१. तिकम्
४२९. कुसलायेव । सिया सुखाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता। विपाकधम्मधम्मा । अनुपादिन्नअनुपादानिया। असंकिलिट्ठअसंकिलेसिका। सिया सवितक्कसविचारा, सिया अवितक्कविचारमत्ता, सिया अवितक्कअविचारा। सिया पीतिसहगता, सिया सुखसहगता, सिया उपेक्खासहगता। नेव दस्सनेन न भावनाय पहातब्बा। नेव दस्सनेन न भावनाय पहातब्बहेतुका। अपचयगामिनो। सेक्खा। अप्पमाणा। अप्पमाणारम्मणा। पणीता। सम्मत्तनियता। न मग्गारम्मणा। मग्गहेतुका। सिया मग्गाधिपतिनो, सिया न वत्तब्बा मग्गाधिपतिनोति। सिया उप्पन्ना, सिया अनुप्पन्ना, न वत्तब्बा उप्पादिनोति। सिया अतीता, सिया अनागता, सिया पच्चुप्पन्ना। न वत्तब्बा अतीतारम्मणातिपि, अनागतारम्मणातिपि, पच्चुप्पन्नारम्मणातिपि। सिया अज्झत्ता, सिया बहिद्धा, सिया अज्झत्तबहिद्धा। बहिद्धारम्मणा। अनिदस्सनअप्पटिघा।
२. दुकम्
४३०. न हेतू। सहेतुका। हेतुसम्पयुत्ता। न वत्तब्बा हेतू चेव सहेतुका चाति, सहेतुका चेव न च हेतू। न वत्तब्बा हेतू चेव हेतुसम्पयुत्ता चाति, हेतुसम्पयुत्ता चेव न च हेतू। न हेतू सहेतुका। सप्पच्चया। सङ्खता। अनिदस्सना। अप्पटिघा। अरूपा । लोकुत्तरा। केनचि विञ्ञेय्या, केनचि न विञ्ञेय्या। नो आसवा। अनासवा। आसवविप्पयुत्ता। न वत्तब्बा आसवा चेव सासवा चातिपि, सासवा चेव नो च आसवातिपि। न वत्तब्बा आसवा चेव आसवसम्पयुत्ता चातिपि, आसवसम्पयुत्ता चेव नो च आसवातिपि। आसवविप्पयुत्ता। अनासवा। नो संयोजना…पे॰… नो गन्था…पे॰… नो ओघा…पे॰… नो योगा…पे॰… नो नीवरणा…पे॰… नो परामासा…पे॰… सारम्मणा। नो चित्ता। चेतसिका। चित्तसम्पयुत्ता। चित्तसंसट्ठा। चित्तसमुट्ठाना। चित्तसहभुनो। चित्तानुपरिवत्तिनो। चित्तसंसट्ठसमुट्ठाना। चित्तसंसट्ठसमुट्ठानसहभुनो। चित्तसंसट्ठसमुट्ठानानुपरिवत्तिनो। बाहिरा। नो उपादा। अनुपादिन्ना। नो उपादाना…पे॰… नो किलेसा…पे॰… न दस्सनेन पहातब्बा। न भावनाय पहातब्बा। न दस्सनेन पहातब्बहेतुका। न भावनाय पहातब्बहेतुका। सिया सवितक्का, सिया अवितक्का । सिया सविचारा, सिया अविचारा। सिया सप्पीतिका, सिया अप्पीतिका। सिया पीतिसहगता, सिया न पीतिसहगता। सिया सुखसहगता, सिया न सुखसहगता। सिया उपेक्खासहगता, सिया न उपेक्खासहगता। न कामावचरा। न रूपावचरा। न अरूपावचरा। अपरियापन्ना। निय्यानिका। नियता। अनुत्तरा। अरणाति।
पञ्हापुच्छकम्।
सम्मप्पधानविभङ्गो निट्ठितो।