५. इन्द्रियविभङ्गो
१. अभिधम्मभाजनीयम्
२१९. बावीसतिन्द्रियानि – चक्खुन्द्रियं, सोतिन्द्रियं, घानिन्द्रियं, जिव्हिन्द्रियं, कायिन्द्रियं, मनिन्द्रियं, इत्थिन्द्रियं, पुरिसिन्द्रियं, जीवितिन्द्रियं, सुखिन्द्रियं, दुक्खिन्द्रियं, सोमनस्सिन्द्रियं, दोमनस्सिन्द्रियं, उपेक्खिन्द्रियं, सद्धिन्द्रियं , वीरियिन्द्रियं [विरियिन्द्रियं (सी॰ स्या॰)], सतिन्द्रियं, समाधिन्द्रियं, पञ्ञिन्द्रियं, अनञ्ञातञ्ञस्सामीतिन्द्रियं, अञ्ञिन्द्रियं, अञ्ञाताविन्द्रियम्।
२२०. तत्थ कतमं चक्खुन्द्रियं? यं चक्खु चतुन्नं महाभूतानं उपादाय पसादो…पे॰… सुञ्ञो गामोपेसो – इदं वुच्चति ‘‘चक्खुन्द्रियं’’।
तत्थ कतमं सोतिन्द्रियं…पे॰… घानिन्द्रियं…पे॰… जिव्हिन्द्रियं…पे॰… कायिन्द्रियं? यो कायो चतुन्नं महाभूतानं उपादाय पसादो…पे॰… सुञ्ञो गामोपेसो – इदं वुच्चति ‘‘कायिन्द्रियं’’।
तत्थ कतमं मनिन्द्रियं? एकविधेन मनिन्द्रियं – फस्ससम्पयुत्तम्। दुविधेन मनिन्द्रियं – अत्थि सहेतुकं, अत्थि अहेतुकम्। तिविधेन मनिन्द्रियं – अत्थि कुसलं, अत्थि अकुसलं, अत्थि अब्याकतम्। चतुब्बिधेन मनिन्द्रियं – अत्थि कामावचरं, अत्थि रूपावचरं, अत्थि अरूपावचरं, अत्थि अपरियापन्नम्। पञ्चविधेन मनिन्द्रियं – अत्थि सुखिन्द्रियसम्पयुत्तं, अत्थि दुक्खिन्द्रियसम्पयुत्तं, अत्थि सोमनस्सिन्द्रियसम्पयुत्तं, अत्थि दोमनस्सिन्द्रियसम्पयुत्तं, अत्थि उपेक्खिन्द्रियसम्पयुत्तम्। छब्बिधेन मनिन्द्रियं – चक्खुविञ्ञाणं…पे॰… मनोविञ्ञाणम्। एवं छब्बिधेन मनिन्द्रियम्।
सत्तविधेन मनिन्द्रियं – चक्खुविञ्ञाणं…पे॰… कायविञ्ञाणं, मनोधातु, मनोविञ्ञाणधातु। एवं सत्तविधेन मनिन्द्रियम्।
अट्ठविधेन मनिन्द्रियं – चक्खुविञ्ञाणं…पे॰… कायविञ्ञाणं अत्थि सुखसहगतं, अत्थि दुक्खसहगतं, मनोधातु, मनोविञ्ञाणधातु। एवं अट्ठविधेन मनिन्द्रियम्।
नवविधेन मनिन्द्रियं – चक्खुविञ्ञाणं…पे॰… कायविञ्ञाणं, मनोधातु, मनोविञ्ञाणधातु अत्थि कुसला, अत्थि अकुसला, अत्थि अब्याकता। एवं नवविधेन मनिन्द्रियम्।
दसविधेन मनिन्द्रियं – चक्खुविञ्ञाणं…पे॰… कायविञ्ञाणं अत्थि सुखसहगतं, अत्थि दुक्खसहगतं, मनोधातु, मनोविञ्ञाणधातु अत्थि कुसला, अत्थि अकुसला, अत्थि अब्याकता। एवं दसविधेन मनिन्द्रियं…पे॰… एवं बहुविधेन मनिन्द्रियम्। इदं वुच्चति ‘‘मनिन्द्रियं’’।
तत्थ कतमं इत्थिन्द्रियं? यं इत्थिया इत्थिलिङ्गं इत्थिनिमित्तं इत्थिकुत्तं इत्थाकप्पो इत्थत्तं इत्थिभावो – इदं वुच्चति ‘‘इत्थिन्द्रियं’’।
तत्थ कतमं पुरिसिन्द्रियं? यं पुरिसस्स पुरिसलिङ्गं पुरिसनिमित्तं पुरिसकुत्तं पुरिसाकप्पो पुरिसत्तं पुरिसभावो – इदं वुच्चति ‘‘पुरिसिन्द्रियं’’।
तत्थ कतमं जीवितिन्द्रियं? जीवितिन्द्रियं दुविधेन – अत्थि रूपजीवितिन्द्रियं, अत्थि अरूपजीवितिन्द्रियम्।
तत्थ कतमं रूपजीवितिन्द्रियं? यो तेसं रूपीनं धम्मानं आयु ठिति यपना यापना इरियना वत्तना पालना जीवितं जीवितिन्द्रियं – इदं वुच्चति ‘‘रूपजीवितिन्द्रियं’’।
तत्थ कतमं अरूपजीवितिन्द्रियं? यो तेसं अरूपीनं धम्मानं आयु ठिति यपना यापना इरियना वत्तना पालना जीवितं जीवितिन्द्रियं – इदं वुच्चति ‘‘अरूपजीवतिन्द्रियं’’। इदं वुच्चति ‘‘जीवितिन्द्रियं’’।
तत्थ कतमं सुखिन्द्रियं? यं कायिकं सातं कायिकं सुखं कायसम्फस्सजं सातं सुखं वेदयितं कायसम्फस्सजा साता सुखा वेदना – इदं वुच्चति ‘‘सुखिन्द्रियं’’।
तत्थ कतमं दुक्खिन्द्रियं? यं कायिकं असातं कायिकं दुक्खं कायसम्फस्सजं असातं दुक्खं वेदयितं कायसम्फस्सजा असाता दुक्खा वेदना – इदं वुच्चति ‘‘दुक्खिन्द्रियं’’।
तत्थ कतमं सोमनस्सिन्द्रियं? यं चेतसिकं सातं चेतसिकं सुखं चेतोसम्फस्सजं सातं सुखं वेदयितं चेतोसम्फस्सजा साता सुखा वेदना – इदं वुच्चति ‘‘सोमनस्सिन्द्रियं’’।
तत्थ कतमं दोमनस्सिन्द्रियं? यं चेतसिकं असातं चेतसिकं दुक्खं चेतोसम्फस्सजं असातं दुक्खं वेदयितं चेतोसम्फस्सजा असाता दुक्खा वेदना – इदं वुच्चति ‘‘दोमनस्सिन्द्रियं’’।
तत्थ कतमं उपेक्खिन्द्रियं? यं चेतसिकं नेव सातं नासातं चेतोसम्फस्सजं अदुक्खमसुखं वेदयितं चेतोसम्फस्सजा अदुक्खमसुखा वेदना – इदं वुच्चति ‘‘उपेक्खिन्द्रियं’’।
तत्थ कतमं सद्धिन्द्रियं? या सद्धा सद्दहना ओकप्पना अभिप्पसादो सद्धा सद्धिन्द्रियं सद्धाबलं – इदं वुच्चति ‘‘सद्धिन्द्रियं’’।
तत्थ कतमं वीरियिन्द्रियं? यो चेतसिको वीरियारम्भो निक्कमो परक्कमो उय्यामो वायामो उस्साहो उस्सोळ्ही थामो ठिति असिथिलपरक्कमता अनिक्खित्तछन्दता अनिक्खित्तधुरता धुरसम्पग्गाहो वीरियं वीरियिन्द्रियं वीरियबलं – इदं वुच्चति ‘‘वीरियिन्द्रियं’’।
तत्थ कतमं सतिन्द्रियं? या सति अनुस्सति पटिस्सति सति सरणता धारणता अपिलापनता असम्मुस्सनता सति सतिन्द्रियं सतिबलं सम्मासति – इदं वुच्चति ‘‘सतिन्द्रियं’’।
तत्थ कतमं समाधिन्द्रियं? या चित्तस्स ठिति सण्ठिति अवट्ठिति अविसाहारो अविक्खेपो अविसाहटमानसता समथो समाधिन्द्रियं समाधिबलं सम्मासमाधि – इदं वुच्चति ‘‘समाधिन्द्रियं’’।
तत्थ कतमं पञ्ञिन्द्रियं? या पञ्ञा पजानना…पे॰… अमोहो धम्मविचयो सम्मादिट्ठि – इदं वुच्चति ‘‘पञ्ञिन्द्रियं’’।
तत्थ कतमं अनञ्ञातञ्ञस्सामीतिन्द्रियं? या तेसं धम्मानं अनञ्ञातानं अदिट्ठानं अप्पत्तानं अविदितानं असच्छिकतानं सच्छिकिरियाय पञ्ञा पजानना…पे॰… अमोहो धम्मविचयो सम्मादिट्ठि धम्मविचयसम्बोज्झङ्गो मग्गङ्गं मग्गपरियापन्नं – इदं वुच्चति ‘‘अनञ्ञातञ्ञस्सामीतिन्द्रियं’’।
तत्थ कतमं अञ्ञिन्द्रियं? या तेसं धम्मानं ञातानं दिट्ठानं पत्तानं विदितानं सच्छिकतानं सच्छिकिरियाय पञ्ञा पजानना…पे॰… अमोहो धम्मविचयो सम्मादिट्ठि धम्मविचयसम्बोज्झङ्गो मग्गङ्गं मग्गपरियापन्नं – इदं वुच्चति अञ्ञिन्द्रियम्।
तत्थ कतमं अञ्ञाताविन्द्रियं? या तेसं धम्मानं अञ्ञातावीनं दिट्ठानं पत्तानं विदितानं सच्छिकतानं सच्छिकिरियाय पञ्ञा पजानना…पे॰… अमोहो धम्मविचयो सम्मादिट्ठि धम्मविचयसम्बोज्झङ्गो मग्गङ्गं मग्गपरियापन्नं – इदं वुच्चति ‘‘अञ्ञाताविन्द्रियं’’।
अभिधम्मभाजनीयम्।
२. पञ्हापुच्छकम्
२२१. बावीसतिन्द्रियानि – चक्खुन्द्रियं, सोतिन्द्रियं, घानिन्द्रियं, जिव्हिन्द्रियं, कायिन्द्रियं, मनिन्द्रियं, इत्थिन्द्रियं, पुरिसिन्द्रियं, जीवितिन्द्रियं, सुखिन्द्रियं, दुक्खिन्द्रियं, सोमनस्सिन्द्रियं, दोमनस्सिन्द्रियं, उपेक्खिन्द्रियं, सद्धिन्द्रियं, वीरियिन्द्रियं, सतिन्द्रियं, समाधिन्द्रियं, पञ्ञिन्द्रियं , अनञ्ञातञ्ञस्सामीतिन्द्रियं, अञ्ञिन्द्रियं, अञ्ञाताविन्द्रियम्।
२२२. बावीसतीनं इन्द्रियानं कति कुसला, कति अकुसला, कति अब्याकता…पे॰… कति सरणा, कति अरणा?
१. तिकम्
२२३. दसिन्द्रिया अब्याकता। दोमनस्सिन्द्रियं अकुसलम्। अनञ्ञातञ्ञस्सामीतिन्द्रियं कुसलम्। चत्तारिन्द्रिया सिया कुसला, सिया अब्याकता। छ इन्द्रिया सिया कुसला, सिया अकुसला, सिया अब्याकता।
द्वादसिन्द्रिया न वत्तब्बा – ‘‘सुखाय वेदनाय सम्पयुत्ता’’तिपि, ‘‘दुक्खाय वेदनाय सम्पयुत्ता’’तिपि, ‘‘अदुक्खमसुखाय वेदनाय सम्पयुत्ता’’तिपि। छ इन्द्रिया सिया सुखाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता। तीणिन्द्रिया सिया सुखाय वेदनाय सम्पयुत्ता, सिया दुक्खाय वेदनाय सम्पयुत्ता, सिया अदुक्खमसुखाय वेदनाय सम्पयुत्ता। जीवितिन्द्रियं सिया सुखाय वेदनाय सम्पयुत्तं, सिया दुक्खाय वेदनाय सम्पयुत्तं, सिया अदुक्खमसुखाय वेदनाय सम्पयुत्तं, सिया न वत्तब्बं – ‘‘सुखाय वेदनाय सम्पयुत्त’’न्तिपि , ‘‘दुक्खाय वेदनाय सम्पयुत्त’’न्तिपि, ‘‘अदुक्खमसुखाय वेदनाय सम्पयुत्त’’न्तिपि।
सत्तिन्द्रिया नेवविपाकनविपाकधम्मधम्मा। तीणिन्द्रिया विपाका। द्विन्द्रिया विपाकधम्मधम्मा। अञ्ञिन्द्रियं सिया विपाकं, सिया विपाकधम्मधम्मम्। नविन्द्रिया सिया विपाका, सिया विपाकधम्मधम्मा, सिया नेवविपाकनविपाकधम्मधम्मा। नविन्द्रिया उपादिन्नुपादानिया । दोमनस्सिन्द्रियं अनुपादिन्नुपादानियम्। तीणिन्द्रिया अनुपादिन्नअनुपादानिया। नविन्द्रिया सिया उपादिन्नुपादानिया, सिया अनुपादिन्नुपादानिया, सिया अनुपादिन्नअनुपादानिया।
नविन्द्रिया असंकिलिट्ठसंकिलेसिका। दोमनस्सिन्द्रियं संकिलिट्ठसंकिलेसिकम्। तीणिन्द्रिया असंकिलिट्ठअसंकिलेसिका। तीणिन्द्रिया सिया असंकिलिट्ठसंकिलेसिका, सिया असंकिलिट्ठअसंकिलेसिका। छ इन्द्रिया सिया संकिलिट्ठसंकिलेसिका, सिया असंकिलिट्ठसंकिलेसिका, सिया असंकिलिट्ठअसंकिलेसिका। नविन्द्रिया अवितक्कअविचारा। दोमनस्सिन्द्रियं सवितक्कसविचारम्। उपेक्खिन्द्रियं सिया सवितक्कसविचारं, सिया अवितक्कअविचारम्। एकादसिन्द्रिया सिया सवितक्कसविचारा, सिया अवितक्कविचारमत्ता, सिया अवितक्कअविचारा।
एकादसिन्द्रिया न वत्तब्बा – ‘‘पीतिसहगता’’तिपि, ‘‘सुखसहगता’’तिपि, ‘‘उपेक्खासहगता’’तिपि। सोमनस्सिन्द्रियं सिया पीतिसहगतं न सुखसहगतं न उपेक्खासहगतं, सिया न वत्तब्बं – ‘‘पीतिसहगत’’न्ति। छ इन्द्रिया सिया पीतिसहगता, सिया सुखसहगता, सिया उपेक्खासहगता। चत्तारिन्द्रिया सिया पीतिसहगता, सिया सुखसहगता, सिया उपेक्खासहगता , सिया न वत्तब्बा – ‘‘पीतिसहगता’’तिपि, ‘‘सुखसहगता’’तिपि, ‘‘उपेक्खासहगता’’तिपि।
पन्नरसिन्द्रिया नेव दस्सनेन न भावनाय पहातब्बा। दोमनस्सिन्द्रियं सिया दस्सनेन पहातब्बं, सिया भावनाय पहातब्बम्। छ इन्द्रिया सिया दस्सनेन पहातब्बा, सिया भावनाय पहातब्बा, सिया नेव दस्सनेन न भावनाय पहातब्बा। पन्नरसिन्द्रिया नेव दस्सनेन न भावनाय पहातब्बहेतुका। दोमनस्सिन्द्रियं सिया दस्सनेन पहातब्बहेतुकं, सिया भावनाय पहातब्बहेतुकम्। छ इन्द्रिया सिया दस्सनेन पहातब्बहेतुका, सिया भावनाय पहातब्बहेतुका, सिया नेव दस्सनेन न भावनाय पहातब्बहेतुका।
दसिन्द्रिया नेवाचयगामिनापचयगामिनो। दोमनस्सिन्द्रियं आचयगामि। अनञ्ञातञ्ञस्सामीतिन्द्रियं अपचयगामि। अञ्ञिन्द्रियं सिया अपचयगामि, सिया नेवाचयगामिनापचयगामि । नविन्द्रिया सिया आचयगामिनो, सिया अपचयगामिनो, सिया नेवाचयगामिनापचयगामिनो। दसिन्द्रिया नेवसेक्खनासेक्खा। द्विन्द्रिया सेक्खा। अञ्ञाताविन्द्रियं असेक्खम्। नविन्द्रिया सिया सेक्खा, सिया असेक्खा, सिया नेवसेक्खनासेक्खा।
दसिन्द्रिया परित्ता। तीणिन्द्रिया अप्पमाणा। नविन्द्रिया सिया परित्ता, सिया महग्गता, सिया अप्पमाणा। सत्तिन्द्रिया अनारम्मणा। द्विन्द्रिया परित्तारम्मणा। तीणिन्द्रिया अप्पमाणारम्मणा। दोमनस्सिन्द्रियं सिया परित्तारम्मणं सिया महग्गतारम्मणं, न अप्पमाणारम्मणं, सिया न वत्तब्बं – ‘‘परित्तारम्मण’’न्तिपि , ‘‘महग्गतारम्मण’’न्ति पि। नविन्द्रिया सिया परित्तारम्मणा, सिया महग्गतारम्मणा, सिया अप्पमाणारम्मणा, सिया न वत्तब्बा – ‘‘परित्तारम्मणा’’तिपि, ‘‘महग्गतारम्मणा’’तिपि, ‘‘अप्पमाणारम्मणा’’तिपि।
नविन्द्रिया मज्झिमा। दोमनस्सिन्द्रियं हीनम्। तीणिन्द्रिया पणीता। तीणिन्द्रिया सिया मज्झिमा, सिया पणीता। छ इन्द्रिया सिया हीना, सिया मज्झिमा, सिया पणीता। दसिन्द्रिया अनियता। अनञ्ञातञ्ञस्सामीतिन्द्रियं सम्मत्तनियतम्। चत्तारिन्द्रिया सिया सम्मत्तनियता, सिया अनियता। दोमनस्सिन्द्रियं सिया मिच्छत्तनियतं, सिया अनियतम्। छ इन्द्रिया सिया मिच्छत्तनियता, सिया सम्मत्तनियता, सिया अनियता। सत्तिन्द्रिया अनारम्मणा। चत्तारिन्द्रिया न वत्तब्बा – ‘‘मग्गारम्मणा’’तिपि, ‘‘मग्गहेतुका’’तिपि, ‘‘मग्गाधिपतिनो’’तिपि। अनञ्ञातञ्ञस्सामीतिन्द्रियं न मग्गारम्मणं, सिया मग्गहेतुकं, सिया मग्गाधिपति, सिया न वत्तब्बं – ‘‘मग्गहेतुक’’न्तिपि, ‘‘मग्गाधिपती’’तिपि। अञ्ञिन्द्रियं न मग्गारम्मणं, सिया मग्गहेतुकं, सिया मग्गाधिपति, सिया न वत्तब्बं – ‘‘मग्गहेतुक’’न्तिपि, ‘‘मग्गाधिपती’’तिपि। नविन्द्रिया सिया मग्गारम्मणा, सिया मग्गहेतुका, सिया मग्गाधिपतिनो, सिया न वत्तब्बा – ‘‘मग्गारम्मणा’’तिपि, ‘‘मग्गहेतुका’’तिपि, ‘‘मग्गाधिपतिनो’’तिपि।
दसिन्द्रिया सिया उप्पन्ना, सिया उप्पादिनो, न वत्तब्बा – ‘‘अनुप्पन्ना’’ति। द्विन्द्रिया सिया उप्पन्ना, सिया अनुप्पन्ना, न वत्तब्बा – ‘‘उप्पादिनो’’ति। दसिन्द्रिया सिया उप्पन्ना, सिया अनुप्पन्ना, सिया उप्पादिनो ; सिया अतीता, सिया अनागता, सिया पच्चुप्पन्ना। सत्तिन्द्रिया अनारम्मणा। द्विन्द्रिया पच्चुप्पन्नारम्मणा। तीणिन्द्रिया न वत्तब्बा – ‘‘अतीतारम्मणा’’तिपि, ‘‘अनागतारम्मणा’’तिपि , ‘‘पच्चुप्पन्नारम्मणा’’तिपि। दसिन्द्रिया सिया अतीतारम्मणा, सिया अनागतारम्मणा, सिया पच्चुप्पन्नारम्मणा, सिया न वत्तब्बा – ‘‘अतीतारम्मणा’’तिपि, ‘‘अनागतारम्मणा’’तिपि, ‘‘पच्चुप्पन्नारम्मणा’’तिपि; सिया अज्झत्ता, सिया बहिद्धा, सिया अज्झत्तबहिद्धा। सत्तिन्द्रिया अनारम्मणा। तीणिन्द्रिया बहिद्धारम्मणा। चत्तारिन्द्रिया सिया अज्झत्तारम्मणा, सिया बहिद्धारम्मणा, सिया अज्झत्तबहिद्धारम्मणा, अट्ठिन्द्रिया सिया अज्झत्तारम्मणा, सिया बहिद्धारम्मणा, सिया अज्झत्तबहिद्धारम्मणा, सिया न वत्तब्बा – ‘‘अज्झत्तारम्मणा’’तिपि, ‘‘बहिद्धारम्मणा’’तिपि, ‘‘अज्झत्तबहिद्धारम्मणा’’तिपि। पञ्चिन्द्रिया अनिदस्सनसप्पटिघा। सत्तरसिन्द्रिया अनिदस्सनअप्पटिघा।
२. दुकम्
२२४. चत्तारिन्द्रिया हेतू। अट्ठारसिन्द्रिया न हेतू। सत्तिन्द्रिया सहेतुका। नविन्द्रिया अहेतुका। छ इन्द्रिया सिया सहेतुका, सिया अहेतुका। सत्तिन्द्रिया हेतुसम्पयुत्ता। नविन्द्रिया हेतुविप्पयुत्ता। छ इन्द्रिया सिया हेतुसम्पयुत्ता, सिया हेतुविप्पयुत्ता। चत्तारिन्द्रिया हेतू चेव सहेतुका च। नविन्द्रिया न वत्तब्बा – ‘‘हेतू चेव सहेतुका चा’’तिपि, ‘‘सहेतुका चेव न च हेतू’’तिपि। तीणिन्द्रिया न वत्तब्बा – ‘‘हेतू चेव सहेतुका चा’’ति। सहेतुका चेव न च हेतू। छ इन्द्रिया न वत्तब्बा – ‘‘हेतू चेव सहेतुका चा’’ति, सिया सहेतुका चेव न च हेतू, सिया न वत्तब्बा – ‘‘सहेतुका चेव न च हेतू’’ति।
चत्तारिन्द्रिया हेतू चेव हेतुसम्पयुत्ता च । नविन्द्रिया न वत्तब्बा – ‘‘हेतू चेव हेतुसम्पयुत्ता चा’’तिपि, ‘‘हेतुसम्पयुत्ता चेव न च हेतू’’तिपि। तीणिन्द्रिया न वत्तब्बा – ‘‘हेतू चेव हेतुसम्पयुत्ता चा’’ति, ‘‘हेतुसम्पयुत्ता चेव न च हेतू’’। छ इन्द्रिया न वत्तब्बा – ‘‘हेतू चेव हेतुसम्पयुत्ता चा’’ति, सिया हेतुसम्पयुत्ता चेव न च हेतू, सिया न वत्तब्बा – ‘‘हेतुसम्पयुत्ता चेव न च हेतू’’ति।
नविन्द्रिया न हेतू अहेतुका। तीणिन्द्रिया न हेतू सहेतुका। चत्तारिन्द्रिया न वत्तब्बा – ‘‘न हेतू सहेतुका’’तिपि, ‘‘न हेतू अहेतुका’’तिपि । छ इन्द्रिया सिया न हेतू सहेतुका, सिया न हेतू अहेतुका।
सप्पच्चया। सङ्खता। अनिदस्सना। पञ्चिन्द्रिया सप्पटिघा। सत्तरसिन्द्रिया अप्पटिघा। सत्तिन्द्रिया रूपा। चुद्दसिन्द्रिया अरूपा। जीवितिन्द्रियं सिया रूपं, सिया अरूपम्। दसिन्द्रिया लोकिया। तीणिन्द्रिया लोकुत्तरा। नविन्द्रिया सिया लोकिया, सिया लोकुत्तरा; केनचि विञ्ञेय्या, केनचि न विञ्ञेय्या।
नो आसवा। दसिन्द्रिया सासवा। तीणिन्द्रिया अनासवा। नविन्द्रिया सिया सासवा, सिया अनासवा। पन्नरसिन्द्रिया आसवविप्पयुत्ता। दोमनस्सिन्द्रियं आसवसम्पयुत्तम्। छ इन्द्रिया सिया आसवसम्पयुत्ता, सिया आसवविप्पयुत्ता। दसिन्द्रिया न वत्तब्बा – ‘‘आसवा चेव सासवा चा’’ति, ‘‘सासवा चेव नो च आसवा’’। तीणिन्द्रिया न वत्तब्बा – ‘‘आसवा चेव सासवा चा’’तिपि, ‘‘सासवा चेव नो च आसवा’’तिपि। नविन्द्रिया न वत्तब्बा – ‘‘आसवा चेव सासवा चा’’ति, सिया सासवा चेव नो च आसवा, सिया न वत्तब्बा – ‘‘सासवा चेव नो च आसवा’’ति।
पन्नरसिन्द्रिया न वत्तब्बा – ‘‘आसवा चेव आसवसम्पयुत्ता चा’’तिपि, ‘‘आसवसम्पयुत्ता चेव नो च आसवा’’तिपि। दोमनस्सिन्द्रियं न वत्तब्बं – ‘‘आसवो चेव आसवसम्पयुत्तञ्चा’’ति, ‘‘आसवसम्पयुत्तञ्चेव नो च आसवो’’। छ इन्द्रिया न वत्तब्बा – ‘‘आसवा चेव आसवसम्पयुत्ता चा’’ति, सिया आसवसम्पयुत्ता चेव नो च आसवा, सिया न वत्तब्बा – ‘‘आसवसम्पयुत्ता चेव नो च आसवा’’ति। नविन्द्रिया आसवविप्पयुत्तसासवा। तीणिन्द्रिया आसवविप्पयुत्तअनासवा। दोमनस्सिन्द्रियं न वत्तब्बं – ‘‘आसवविप्पयुत्तसासव’’न्तिपि, ‘‘आसवविप्पयुत्तअनासव’’न्तिपि। तीणिन्द्रिया सिया आसवविप्पयुत्तसासवा, सिया आसवविप्पयुत्तअनासवा। छ इन्द्रिया सिया आसवविप्पयुत्तसासवा, सिया आसवविप्पयुत्तअनासवा, सिया न वत्तब्बा – ‘‘आसवविप्पयुत्तसासवा’’तिपि, ‘‘आसवविप्पयुत्तअनासवा’’तिपि।
नो संयोजना। दसिन्द्रिया संयोजनिया। तीणिन्द्रिया असंयोजनिया। नविन्द्रिया सिया संयोजनिया, सिया असंयोजनिया। पन्नरसिन्द्रिया संयोजनविप्पयुत्ता। दोमनस्सिन्द्रियं संयोजनसम्पयुत्तम्। छ इन्द्रिया सिया संयोजनसम्पयुत्ता , सिया संयोजनविप्पयुत्ता। दसिन्द्रिया न वत्तब्बा – ‘‘संयोजना चेव संयोजनिया चा’’ति, संयोजनिया चेव नो च संयोजना। तीणिन्द्रिया न वत्तब्बा – ‘‘संयोजना चेव संयोजनिया चा’’तिपि, ‘‘संयोजनिया चेव नो च संयोजना’’तिपि। नविन्द्रिया न वत्तब्बा – ‘‘संयोजना चेव संयोजनिया चा’’ति, सिया संयोजनिया चेव नो च संयोजना, सिया न वत्तब्बा – ‘‘संयोजनिया चेव नो च संयोजना’’ति।
पन्नरसिन्द्रिया न वत्तब्बा – ‘‘संयोजना चेव संयोजनसम्पयुत्ता चा’’तिपि, ‘‘संयोजनसम्पयुत्ता चेव नो च संयोजना’’तिपि। दोमनस्सिन्द्रियं न वत्तब्बं – ‘‘संयोजनञ्चेव संयोजनसम्पयुत्तञ्चा’’ति, संयोजनसम्पयुत्तञ्चेव नो च संयोजनम्। छ इन्द्रिया न वत्तब्बा – ‘‘संयोजना चेव संयोजनसम्पयुत्ता चा’’ति, सिया संयोजनसम्पयुत्ता चेव नो च संयोजना, सिया न वत्तब्बा – ‘‘संयोजनसम्पयुत्ता चेव नो च संयोजना’’ति।
नविन्द्रिया संयोजनविप्पयुत्तसंयोजनिया। तीणिन्द्रिया संयोजनविप्पयुत्तअसंयोजनिया। दोमनस्सिन्द्रियं न वत्तब्बं – ‘‘संयोजनविप्पयुत्तसंयोजनिय’’न्तिपि, ‘‘संयोजनविप्पयुत्तअसंयोजनिय’’न्तिपि। तीणिन्द्रिया सिया संयोजनविप्पयुत्तसंयोजनिया, सिया संयोजनविप्पयुत्तअसंयोजनिया। छ इन्द्रिया सिया संयोजनविप्पयुत्तसंयोजनिया, सिया संयोजनविप्पयुत्तअसंयोजनिया, सिया न वत्तब्बा – ‘‘संयोजनविप्पयुत्तसंयोजनिया’’तिपि, ‘‘संयोजनविप्पयुत्तअसंयोजनिया’’तिपि ।
नो गन्था। दसिन्द्रिया गन्थनिया। तीणिन्द्रिया अगन्थनिया। नविन्द्रिया सिया गन्थनिया, सिया अगन्थनिया। पन्नरसिन्द्रिया गन्थविप्पयुत्ता। दोमनस्सिन्द्रियं गन्थसम्पयुत्तम्। छ इन्द्रिया सिया गन्थसम्पयुत्ता, सिया गन्थविप्पयुत्ता। दसिन्द्रिया न वत्तब्बा – ‘‘गन्था चेव गन्थनिया चा’’ति, गन्थनिया चेव नो च गन्था। तीणिन्द्रिया न वत्तब्बा – ‘‘गन्था चेव गन्थनिया चा’’तिपि, ‘‘गन्थनिया चेव नो च गन्था’’तिपि। नविन्द्रिया न वत्तब्बा – ‘‘गन्था चेव गन्थनिया चा’’ति, सिया गन्थनिया चेव नो च गन्था, सिया न वत्तब्बा – ‘‘गन्थनिया चेव नो च गन्था’’ति।
पन्नरसिन्द्रिया न वत्तब्बा – ‘‘गन्था चेव गन्थसम्पयुत्ता चा’’तिपि, ‘‘गन्थसम्पयुत्ता चेव नो च गन्था’’तिपि। दोमनस्सिन्द्रियं न वत्तब्बं – ‘‘गन्थो चेव गन्थसम्पयुत्त’’ञ्चाति, गन्थसम्पयुत्तञ्चेव नो च गन्थो। छ इन्द्रिया न वत्तब्बा – ‘‘गन्था चेव गन्थसम्पयुत्ता चा’’ति, सिया गन्थसम्पयुत्ता चेव नो च गन्था, सिया न वत्तब्बा – ‘‘गन्थसम्पयुत्ता चेव नो च गन्था’’ति।
नविन्द्रिया गन्थविप्पयुत्तगन्थनिया। तीणिन्द्रिया गन्थविप्पयुत्तअगन्थनिया । दोमनस्सिन्द्रियं न वत्तब्बं – ‘‘गन्थविप्पयुत्तगन्थनिय’’न्तिपि, ‘‘गन्थविप्पयुत्तअगन्थनिय’’न्तिपि। तीणिन्द्रिया सिया गन्थविप्पयुत्तगन्थनिया, सिया गन्थविप्पयुत्तअगन्थनिया। छ इन्द्रिया सिया गन्थविप्पयुत्तगन्थनिया, सिया गन्थविप्पयुत्तअगन्थनिया, सिया न वत्तब्बा – ‘‘गन्थविप्पयुत्तगन्थनिया’’तिपि, ‘‘गन्थविप्पयुत्तअगन्थनिया’’तिपि।
नो ओघा…पे॰… नो योगा…पे॰… नो नीवरणा। दसिन्द्रिया नीवरणिया। तीणिन्द्रिया अनीवरणिया। नविन्द्रिया सिया नीवरणिया, सिया अनीवरणिया। पन्नरसिन्द्रिया नीवरणविप्पयुत्ता। दोमनस्सिन्द्रियं नीवरणसम्पयुत्तम्। छ इन्द्रिया सिया नीवरणसम्पयुत्ता, सिया नीवरणविप्पयुत्ता। दसिन्द्रिया न वत्तब्बा – ‘‘नीवरणा चेव नीवरणिया चा’’ति, नीवरणिया चेव नो च नीवरणा। तीणिन्द्रिया न वत्तब्बा – ‘‘नीवरणा चेव नीवरणिया चा’’तिपि, ‘‘नीवरणिया चेव नो च नीवरणा’’तिपि। नविन्द्रिया न वत्तब्बा – ‘‘नीवरणा चेव नीवरणिया चा’’ति, सिया नीवरणिया चेव नो च नीवरणा, सिया न वत्तब्बा – ‘‘नीवरणिया चेव नो च नीवरणा’’ति।
पन्नरसिन्द्रिया न वत्तब्बा – ‘‘नीवरणा चेव नीवरणसम्पयुत्ता चा’’तिपि, ‘‘नीवरणसम्पयुत्ता चेव नो च नीवरणा’’तिपि। दोमनस्सिन्द्रियं न वत्तब्बं – ‘‘नीवरणञ्चेव नीवरणसम्पयुत्तञ्चा’’ति, नीवरणसम्पयुत्तञ्चेव नो च नीवरणम्। छ इन्द्रिया न वत्तब्बा – ‘‘नीवरणा चेव नीवरणसम्पयुत्ता चा’’ति, सिया नीवरणसम्पयुत्ता चेव नो च नीवरणा, सिया न वत्तब्बा – ‘‘नीवरणसम्पयुत्ता चेव नो च नीवरणा’’ति।
नविन्द्रिया नीवरणविप्पयुत्तनीवरणिया। तीणिन्द्रिया नीवरणविप्पयुत्तअनीवरणिया। दोमनस्सिन्द्रियं न वत्तब्बं – ‘‘नीवरणविप्पयुत्तनीवरणिय’’न्तिपि, ‘‘नीवरणविप्पयुत्तअनीवरणिय’’न्तिपि। तीणिन्द्रिया सिया नीवरणविप्पयुत्तनीवरणिया, सिया नीवरणविप्पयुत्तअनीवरणिया । छ इन्द्रिया सिया नीवरणविप्पयुत्तनीवरणिया , सिया नीवरणविप्पयुत्तअनीवरणिया, सिया न वत्तब्बा – ‘‘नीवरणविप्पयुत्तनीवरणिया’’तिपि, ‘‘नीवरणविप्पयुत्तअनीवरणिया’’तिपि।
नो परामासा। दसिन्द्रिया परामट्ठा। तीणिन्द्रिया अपरामट्ठा। नविन्द्रिया सिया परामट्ठा, सिया अपरामट्ठा। सोळसिन्द्रिया परामासविप्पयुत्ता। छ इन्द्रिया सिया परामाससम्पयुत्ता, सिया परामासविप्पयुत्ता। दसिन्द्रिया न वत्तब्बा – ‘‘परामासा चेव परामट्ठा चा’’ति, परामट्ठा चेव नो च परामासा। तीणिन्द्रिया न वत्तब्बा – ‘‘परामासा चेव परामट्ठा चा’’तिपि, ‘‘परामट्ठा चेव नो च परामासा’’तिपि। नविन्द्रिया न वत्तब्बा – ‘‘परामासा चेव परामट्ठा चा’’ति, सिया परामट्ठा चेव नो च परामासा, सिया न वत्तब्बा – ‘‘परामट्ठा चेव नो च परामासा’’ति। दसिन्द्रिया परामासविप्पयुत्तपरामट्ठा। तीणिन्द्रिया परामासविप्पयुत्तअपरामट्ठा। तीणिन्द्रिया सिया परामासविप्पयुत्तपरामट्ठा, सिया परामासविप्पयुत्तअपरामट्ठा। छ इन्द्रिया सिया परामासविप्पयुत्तपरामट्ठा, सिया परामासविप्पयुत्तअपरामट्ठा, सिया न वत्तब्बा – ‘‘परामासविप्पयुत्तपरामट्ठा’’तिपि, ‘‘परामासविप्पयुत्तअपरामट्ठा’’तिपि।
सत्तिन्द्रिया अनारम्मणा। चुद्दसिन्द्रिया सारम्मणा। जीवितिन्द्रियं सिया सारम्मणं, सिया अनारम्मणम्। एकवीसतिन्द्रिया नो चित्ता। मनिन्द्रियं चित्तम्। तेरसिन्द्रिया चेतसिका। अट्ठिन्द्रिया अचेतसिका। जीवितिन्द्रियं सिया चेतसिकं, सिया अचेतसिकम्। तेरसिन्द्रिया चित्तसम्पयुत्ता। सत्तिन्द्रिया चित्तविप्पयुत्ता। जीवितिन्द्रियं सिया चित्तसम्पयुत्तं, सिया चित्तविप्पयुत्तम्। मनिन्द्रियं न वत्तब्बं – ‘‘चित्तेन सम्पयुत्त’’न्तिपि, ‘‘चित्तेन विप्पयुत्त’’न्तिपि।
तेरसिन्द्रिया चित्तसंसट्ठा। सत्तिन्द्रिया चित्तविसंसट्ठा। जीवितिन्द्रियं सिया चित्तसंसट्ठं, सिया चित्तविसंसट्ठम्। मनिन्द्रियं न वत्तब्बं – ‘‘चित्तेन संसट्ठ’’न्तिपि, ‘‘चित्तेन विसंसट्ठ’’न्तिपि। तेरसिन्द्रिया चित्तसमुट्ठाना। अट्ठिन्द्रिया नो चित्तसमुट्ठाना। जीवितिन्द्रियं सिया चित्तसमुट्ठानं, सिया नो चित्तसमुट्ठानम्।
तेरसिन्द्रिया चित्तसहभुनो। अट्ठिन्द्रिया नो चित्तसहभुनो। जीवितिन्द्रियं सिया चित्तसहभू, सिया नो चित्तसहभू। तेरसिन्द्रिया चित्तानुपरिवत्तिनो। अट्ठिन्द्रिया नो चित्तानुपरिवत्तिनो। जीवितिन्द्रियं सिया चित्तानुपरिवत्ति, सिया नो चित्तानुपरिवत्ति।
तेरसिन्द्रिया चित्तसंसट्ठसमुट्ठाना। अट्ठिन्द्रिया नो चित्तसंसट्ठसमुट्ठाना। जीवितिन्द्रियं सिया चित्तसंसट्ठसमुट्ठानं, सिया नो चित्तसंसट्ठसमुट्ठानम्। तेरसिन्द्रिया चित्तसंसट्ठसमुट्ठानसहभुनो। अट्ठिन्द्रिया नो चित्तसंसट्ठसमुट्ठानसहभुनो। जीवितिन्द्रियं सिया चित्तसंसट्ठसमुट्ठानसहभू, सिया नो चित्तसंसट्ठसमुट्ठानसहभू। तेरसिन्द्रिया चित्तसंसट्ठसमुट्ठानानुपरिवत्तिनो। अट्ठिन्द्रिया नो चित्तसंसट्ठसमुट्ठानानुपरिवत्तिनो। जीवितिन्द्रियं सिया चित्तसंसट्ठसमुट्ठानानुपरिवत्ति , सिया नो चित्तसंसट्ठसमुट्ठानानुपरिवत्ति। छ इन्द्रिया अज्झत्तिका। सोळसिन्द्रिया बाहिरा।
सत्तिन्द्रिया उपादा। चुद्दसिन्द्रिया नो उपादा। जीवितिन्द्रियं सिया उपादा, सिया नो उपादा। नविन्द्रिया उपादिन्ना। चत्तारिन्द्रिया अनुपादिन्ना। नविन्द्रिया सिया उपादिन्ना, सिया अनुपादिन्ना। नो उपादाना। दसिन्द्रिया उपादानिया। तीणिन्द्रिया अनुपादानिया। नविन्द्रिया सिया उपादानिया, सिया अनुपादानिया। सोळसिन्द्रिया उपादानविप्पयुत्ता। छ इन्द्रिया सिया उपादानसम्पयुत्ता, सिया उपादानविप्पयुत्ता। दसिन्द्रिया न वत्तब्बा – ‘‘उपादाना चेव उपादानिया चा’’ति, उपादानिया चेव नो च उपादाना। तीणिन्द्रिया न वत्तब्बा – ‘‘उपादाना चेव उपादानिया चा’’तिपि, ‘‘उपादानिया चेव नो च उपादाना’’तिपि। नविन्द्रिया न वत्तब्बा – ‘‘उपादाना चेव उपादानिया चा’’ति, सिया उपादानिया चेव नो च उपादाना। दसिन्द्रिया सिया उपादानिया चेव नो च उपादाना, सिया न वत्तब्बा – ‘‘उपादानिया चेव नो च उपादाना’’ति।
सोळसिन्द्रिया न वत्तब्बा – ‘‘उपादाना चेव उपादानसम्पयुत्ता चा’’तिपि, ‘‘उपादानसम्पयुत्ता चेव नो च उपादाना’’तिपि। छ इन्द्रिया न वत्तब्बा – ‘‘उपादाना चेव उपादानसम्पयुत्ता चा’’ति, सिया उपादानसम्पयुत्ता चेव नो च उपादाना, सिया न वत्तब्बा – ‘‘उपादानसम्पयुत्ता चेव नो च उपादाना’’ति। दसिन्द्रिया उपादानविप्पयुत्तउपादानिया। तीणिन्द्रिया उपादानविप्पयुत्तअनुपादानिया। तीणिन्द्रिया सिया उपादानविप्पयुत्तउपादानिया, सिया उपादानविप्पयुत्तअनुपादानिया। छ इन्द्रिया सिया उपादानविप्पयुत्तउपादानिया, सिया उपादानविप्पयुत्तअनुपादानिया, सिया न वत्तब्बा – ‘‘उपादानविप्पयुत्तउपादानिया’’तिपि, ‘‘उपादानविप्पयुत्तअनुपादानिया’’तिपि।
नो किलेसा। दसिन्द्रिया संकिलेसिका। तीणिन्द्रिया असंकिलेसिका। नविन्द्रिया सिया संकिलेसिका, सिया असंकिलेसिका। पन्नरसिन्द्रिया असंकिलिट्ठा। दोमनस्सिन्द्रियं संकिलिट्ठम्। छ इन्द्रिया सिया संकिलिट्ठा, सिया असंकिलिट्ठा। पन्नरसिन्द्रिया किलेसविप्पयुत्ता। दोमनस्सिन्द्रियं किलेससम्पयुत्तम्। छ इन्द्रिया सिया किलेससम्पयुत्ता, सिया किलेसविप्पयुत्ता। दसिन्द्रिया न वत्तब्बा – ‘‘किलेसा चेव संकिलेसिका चा’’ति, संकिलेसिका चेव नो च किलेसा। तीणिन्द्रिया न वत्तब्बा – ‘‘किलेसा चेव संकिलेसिका चा’’तिपि, ‘‘संकिलेसिका चेव नो च किलेसा’’तिपि। नविन्द्रिया न वत्तब्बा – ‘‘किलेसा चेव संकिलेसिका चा’’ति, सिया संकिलेसिका चेव नो च किलेसा, सिया न वत्तब्बा – ‘‘संकिलेसिका चेव नो च किलेसा’’ति।
पन्नरसिन्द्रिया न वत्तब्बा – ‘‘किलेसा चेव संकिलिट्ठा चा’’तिपि, ‘‘संकिलिट्ठा चेव नो च किलेसा’’तिपि। दोमनस्सिन्द्रियं न वत्तब्बं – ‘‘किलेसो चेव संकिलिट्ठञ्चा’’ति, संकिलिट्ठञ्चेव नो च किलेसो। छ इन्द्रिया न वत्तब्बा – ‘‘किलेसा चेव संकिलिट्ठा चा’’ति, सिया संकिलिट्ठा चेव नो च किलेसा, सिया न वत्तब्बा – ‘‘संकिलिट्ठा चेव नो च किलेसा’’ति।
पन्नरसिन्द्रिया न वत्तब्बा – ‘‘किलेसा चेव किलेससम्पयुत्ता चा’’तिपि, ‘‘किलेससम्पयुत्ता चेव नो च किलेसा’’तिपि। दोमनस्सिन्द्रियं न वत्तब्बं – ‘‘किलेसो चेव किलेससम्पयुत्तञ्चा’’ति, किलेससम्पयुत्तञ्चेव नो च किलेसो। छ इन्द्रिया न वत्तब्बा – ‘‘किलेसा चेव किलेससम्पयुत्ता चा’’ति, सिया किलेससम्पयुत्ता चेव नो च किलेसा, सिया न वत्तब्बा – ‘‘किलेससम्पयुत्ता चेव नो च किलेसा’’ति। नविन्द्रिया किलेसविप्पयुत्तसंकिलेसिका। तीणिन्द्रिया किलेसविप्पयुत्तअसंकिलेसिका। दोमनस्सिन्द्रियं न वत्तब्बं – ‘‘किलेसविप्पयुत्तसंकिलेसिक’’न्तिपि, ‘‘किलेसविप्पयुत्तअसंकिलेसिक’’न्तिपि। तीणिन्द्रिया सिया किलेसविप्पयुत्तसंकिलेसिका, सिया किलेसविप्पयुत्तअसंकिलेसिका। छ इन्द्रिया सिया किलेसविप्पयुत्तसंकिलेसिका, सिया किलेसविप्पयुत्तअसंकिलेसिका, सिया न वत्तब्बा – ‘‘किलेसविप्पयुत्तसंकिलेसिका’’तिपि, ‘‘किलेसविप्पयुत्तअसंकिलेसिका’’तिपि।
पन्नरसिन्द्रिया न दस्सनेन पहातब्बा। सत्तिन्द्रिया सिया दस्सनेन पहातब्बा, सिया न दस्सनेन पहातब्बा। पन्नरसिन्द्रिया न भावनाय पहातब्बा। सत्तिन्द्रिया सिया भावनाय पहातब्बा, सिया न भावनाय पहातब्बा। पन्नरसिन्द्रिया न दस्सनेन पहातब्बहेतुका। सत्तिन्द्रिया सिया दस्सनेन पहातब्बहेतुका, सिया न दस्सनेन पहातब्बहेतुका। पन्नरसिन्द्रिया न भावनाय पहातब्बहेतुका। सत्तिन्द्रिया सिया भावनाय पहातब्बहेतुका , सिया न भावनाय पहातब्बहेतुका।
नविन्द्रिया अवितक्का। दोमनस्सिन्द्रियं सवितक्कम्। द्वादसिन्द्रिया सिया सवितक्का, सिया अवितक्का। नविन्द्रिया अविचारा। दोमनस्सिन्द्रियं सविचारम्। द्वादसिन्द्रिया सिया सविचारा, सिया अविचारा। एकादसिन्द्रिया अप्पीतिका। एकादसिन्द्रिया सिया सप्पीतिका, सिया अप्पीतिका। एकादसिन्द्रिया न पीतिसहगता। एकादसिन्द्रिया सिया पीतिसहगता, सिया न पीतिसहगता। द्वादसिन्द्रिया न सुखसहगता। दसिन्द्रिया सिया सुखसहगता, सिया न सुखसहगता। द्वादसिन्द्रिया न उपेक्खासहगता। दसिन्द्रिया सिया उपेक्खासहगता, सिया न उपेक्खासहगता।
दसिन्द्रिया कामावचरा। तीणिन्द्रिया न कामावचरा। नविन्द्रिया सिया कामावचरा, सिया न कामावचरा। तेरसिन्द्रिया न रूपावचरा। नविन्द्रिया सिया रूपावचरा, सिया न रूपावचरा। चुद्दसिन्द्रिया न अरूपावचरा। अट्ठिन्द्रिया सिया अरूपावचरा, सिया न अरूपावचरा। दसिन्द्रिया परियापन्ना। तीणिन्द्रिया अपरियापन्ना। नविन्द्रिया सिया परियापन्ना, सिया अपरियापन्ना। एकादसिन्द्रिया अनिय्यानिका। अनञ्ञातञ्ञस्सामीतिन्द्रियं निय्यानिकम्। दसिन्द्रिया सिया निय्यानिका, सिया अनिय्यानिका। दसिन्द्रिया अनियता। अनञ्ञातञ्ञस्सामीतिन्द्रियं नियतम्। एकादसिन्द्रिया सिया नियता, सिया अनियता। दसिन्द्रिया सउत्तरा। तीणिन्द्रिया अनुत्तरा। नविन्द्रिया सिया सउत्तरा, सिया अनुत्तरा। पन्नरसिन्द्रिया अरणा। दोमनस्सिन्द्रियं सरणम्। छ इन्द्रिया सिया सरणा, सिया अरणाति।
पञ्हापुच्छकम्।
इन्द्रियविभङ्गो निट्ठितो।