२२. सिखीबुद्धवंसो

२२. सिखीबुद्धवंसो
१.
विपस्सिस्स अपरेन, सम्बुद्धो द्विपदुत्तमो।
सिखिव्हयो आसि जिनो, असमो अप्पटिपुग्गलो॥
२.
मारसेनं पमद्दित्वा, पत्तो सम्बोधिमुत्तमम्।
धम्मचक्कं पवत्तेसि, अनुकम्पाय पाणिनं॥
३.
धम्मचक्कं पवत्तेन्ते, सिखिम्हि जिनपुङ्गवे [मुनिपुङ्गवे (सी॰)]।
कोटिसतसहस्सानं, पठमाभिसमयो अहु॥
४.
अपरम्पि धम्मं देसेन्ते, गणसेट्ठे नरुत्तमे।
नवुतिकोटिसहस्सानं, दुतियाभिसमयो अहु॥
५.
यमकपाटिहारियञ्च [यमकं पाटिहीरञ्च (सी॰)], दस्सयन्ते सदेवके।
असीतिकोटिसहस्सानं, ततियाभिसमयो अहु॥
६.
सन्निपाता तयो आसुं, सिखिस्सापि महेसिनो।
खीणासवानं विमलानं, सन्तचित्तान तादिनं॥
७.
भिक्खुसतसहस्सानं, पठमो आसि समागमो।
असीतिभिक्खुसहस्सानं, दुतियो आसि समागमो॥
८.
सत्ततिभिक्खुसहस्सानं, ततियो आसि समागमो।
अनुपलित्तो पदुमंव, तोयम्हि सम्पवड्ढितं॥
९.
अहं तेन समयेन, अरिन्दमो नाम खत्तियो।
सम्बुद्धप्पमुखं सङ्घं, अन्नपानेन तप्पयिं॥
१०.
बहुं दुस्सवरं दत्वा, दुस्सकोटिं अनप्पकम्।
अलङ्कतं हत्थियानं, सम्बुद्धस्स अदासहं॥
११.
हत्थियानं निम्मिनित्वा, कप्पियं उपनामयिम्।
पूरयिं मानसं मय्हं, निच्चं दळ्हमुपट्ठितं॥
१२.
सोपि मं बुद्धो ब्याकासि, सिखी लोकग्गनायको।
‘‘एकतिंसे इतो कप्पे, अयं बुद्धो भविस्सति॥
१३.
‘‘अहु कपिलव्हया रम्मा…पे॰… हेस्साम सम्मुखा इमं’’॥
१४.
तस्साहं वचनं सुत्वा, भिय्यो चित्तं पसादयिम्।
उत्तरिं वतमधिट्ठासिं, दसपारमिपूरिया॥
१५.
नगरं अरुणवती नाम, अरुणो नाम खत्तियो।
पभावती नाम जनिका, सिखिस्सापि महेसिनो॥
१६.
सत्तवस्ससहस्सानि , अगारं अज्झ सो वसि।
सुचन्दको गिरि वसभो [सुचन्दो गिरिवहनो (सी॰)], तयो पासादमुत्तमा॥
१७.
चतुवीससहस्सानि, नारियो समलङ्कता।
सब्बकामा नाम नारी, अतुलो नाम अत्रजो॥
१८.
निमित्ते चतुरो दिस्वा, हत्थियानेन निक्खमि।
अट्ठमासं पधानचारं, अचरी पुरिसुत्तमो॥
१९.
ब्रह्मुना याचितो सन्तो, सिखी लोकग्गनायको।
वत्ति चक्कं महावीरो, मिगदाये नरुत्तमो॥
२०.
अभिभू सम्भवो चेव, अहेसुं अग्गसावका।
खेमङ्करो नामुपट्ठाको, सिखिस्सापि महेसिनो॥
२१.
सखिला च पदुमा च, अहेसुं अग्गसाविका।
बोधि तस्स भगवतो, पुण्डरीकोति वुच्चति॥
२२.
सिरिवड्ढो च नन्दो च, अहेसुं अग्गुपट्ठका।
चित्ता चेव सुगुत्ता च, अहेसुं अग्गुपट्ठिका॥
२३.
उच्चत्तनेन सो बुद्धो, सत्ततिहत्थमुग्गतो।
कञ्चनग्घियसङ्कासो, द्वत्तिंसवरलक्खणो॥
२४.
तस्सापि ब्यामप्पभा काया, दिवारत्तिं निरन्तरम्।
दिसोदिसं निच्छरन्ति, तीणियोजनसो पभा॥
२५.
सत्ततिवस्ससहस्सानि, आयु तस्स महेसिनो।
तावता तिट्ठमानो सो, तारेसि जनतं बहुं॥
२६.
धम्ममेघं पवस्सेत्वा, तेमयित्वा सदेवके।
खेमन्तं पापयित्वान, निब्बुतो सो ससावको॥
२७.
अनुब्यञ्जनसम्पन्नं, द्वत्तिंसवरलक्खणम्।
सब्बं तमन्तरहितं, ननु रित्ता सब्बसङ्खारा॥
२८.
सिखी मुनिवरो बुद्धो, अस्सारामम्हि निब्बुतो।
तत्थेवस्स थूपवरो, तीणियोजनमुग्गतोति॥
सिखिस्स भगवतो वंसो वीसतिमो।