१९. तिस्सबुद्धवंसो
१.
सिद्धत्थस्स अपरेन, असमो अप्पटिपुग्गलो।
अनन्ततेजो अमितयसो, तिस्सो लोकग्गनायको॥
२.
तमन्धकारं विधमित्वा, ओभासेत्वा सदेवकम्।
अनुकम्पको महावीरो, लोके उप्पज्जि चक्खुमा॥
३.
तस्सापि अतुला इद्धि, अतुलं सीलं समाधि च।
सब्बत्थ पारमिं गन्त्वा, धम्मचक्कं पवत्तयि॥
४.
सो बुद्धो दससहस्सिम्हि, विञ्ञापेसि गिरं सुचिम्।
कोटिसतानि अभिसमिंसु, पठमे धम्मदेसने॥
५.
दुतियो नवुतिकोटीनं, ततियो सट्ठिकोटियो।
बन्धनातो पमोचेसि, सत्ते [सम्पत्ते (क॰)] नरमरू तदा॥
६.
सन्निपाता तयो आसुं, तिस्से लोकग्गनायके।
खीणासवानं विमलानं, सन्तचित्तान तादिनं॥
७.
खीणासवसतसहस्सानं, पठमो आसि समागमो।
नवुतिसतसहस्सानं, दुतियो आसि समागमो॥
८.
असीतिसतसहस्सानं , ततियो आसि समागमो।
खीणासवानं विमलानं, पुप्फितानं विमुत्तिया॥
९.
अहं तेन समयेन, सुजातो नाम खत्तियो।
महाभोगं छड्डयित्वा, पब्बजिं इसिपब्बजं॥
१०.
मयि पब्बजिते सन्ते, उप्पज्जि लोकनायको।
बुद्धोति सद्दं सुत्वान, पीति मे उपपज्जथ॥
११.
दिब्बं मन्दारवं पुप्फं, पदुमं पारिछत्तकम्।
उभो हत्थेहि पग्गय्ह, धुनमानो उपागमिं॥
१२.
चतुवण्णपरिवुतं, तिस्सं लोकग्गनायकम्।
तमहं पुप्फं गहेत्वा, मत्थके धारयिं जिनं॥
१३.
सोपि मं बुद्धो ब्याकासि, जनमज्झे निसीदिय।
‘‘द्वेनवुते इतो कप्पे, अयं बुद्धो भविस्सति॥
१४.
‘‘पधानं पदहित्वान…पे॰… हेस्साम सम्मुखा इमं’’॥
१५.
तस्सापि वचनं सुत्वा, भिय्यो चित्तं पसादयिम्।
उत्तरिं वतमधिट्ठासिं, दसपारमिपूरिया॥
१६.
खेमकं नाम नगरं, जनसन्धो नाम खत्तियो।
पदुमा नाम जनिका, तिस्सस्स च महेसिनो॥
१७.
सत्तवस्ससहस्सानि, अगारं अज्झ सो वसि।
गुहासेल नारिसय निसभा [कुमुदो नाळियो पदुमो (क॰)], तयो पासादमुत्तमा॥
१८.
समतिंससहस्सानि, नारियो समलङ्कता।
सुभद्दानामिका नारी, आनन्दो नाम अत्रजो॥
१९.
निमित्ते चतुरो दिस्वा, अस्सयानेन निक्खमि।
अनूनअट्ठमासानि, पधानं पदही जिनो॥
२०.
ब्रह्मुना याचितो सन्तो, तिस्सो लोकग्गनायको।
वत्ति चक्कं महावीरो, यसवतियमुत्तमे॥
२१.
ब्रह्मदेवो उदयो च, अहेसुं अग्गसावका।
समङ्गो नामुपट्ठाको, तिस्सस्स च महेसिनो॥
२२.
फुस्सा चेव सुदत्ता च, अहेसुं अग्गसाविका।
बोधि तस्स भगवतो, असनोति पवुच्चति॥
२३.
सम्बलो च सिरिमा चेव, अहेसुं अग्गुपट्ठका।
किसागोतमी उपसेना, अहेसुं अग्गुपट्ठिका॥
२४.
सो बुद्धो सट्ठिरतनो, अहु उच्चत्तने जिनो।
अनूपमो असदिसो, हिमवा विय दिस्सति॥
२५.
तस्सापि अतुलतेजस्स, आयु आसि अनुत्तरो।
वस्ससतसहस्सानि, लोके अट्ठासि चक्खुमा॥
२६.
उत्तमं पवरं सेट्ठं, अनुभोत्वा महायसम्।
जलित्वा अग्गिक्खन्धोव, निब्बुतो सो ससावको॥
२७.
वलाहकोव अनिलेन, सूरियेन विय उस्सवो।
अन्धकारोव पदीपेन, निब्बुतो सो ससावको॥
२८.
तिस्सो जिनवरो बुद्धो, नन्दारामम्हि निब्बुतो।
तत्थेवस्स जिनथूपो, तीणियोजनमुग्गतोति॥
तिस्सस्स भगवतो वंसो सत्तरसमो।