१२. पदुमुत्तरबुद्धवंसो
१.
नारदस्स अपरेन, सम्बुद्धो द्विपदुत्तमो।
पदुमुत्तरो नाम जिनो, अक्खोभो सागरूपमो॥
२.
मण्डकप्पोव सो आसि, यम्हि बुद्धो अजायथ।
उस्सन्नकुसला जनता, तम्हि कप्पे अजायथ॥
३.
पदुमुत्तरस्स भगवतो, पठमे धम्मदेसने।
कोटिसतसहस्सानं, धम्माभिसमयो अहु॥
४.
ततो परम्पि वस्सन्ते, तप्पयन्ते च पाणिने।
सत्ततिंससतसहस्सानं, दुतियाभिसमयो अहु॥
५.
यम्हि काले महावीरो, आनन्दं उपसङ्कमि।
पितुसन्तिकं उपगन्त्वा, आहनी अमतदुन्दुभिं॥
६.
आहते अमतभेरिम्हि, वस्सन्ते धम्मवुट्ठिया।
पञ्ञाससतसहस्सानं, ततियाभिसमयो अहु॥
७.
ओवादको विञ्ञापको, तारको सब्बपाणिनम्।
देसनाकुसलो बुद्धो, तारेसि जनतं बहुं॥
८.
सन्निपाता तयो आसुं, पदुमुत्तरस्स सत्थुनो।
कोटिसतसहस्सानं, पठमो आसि समागमो॥
९.
यदा बुद्धो असमसमो, वसि वेभारपब्बते।
नवुतिकोटिसहस्सानं, दुतियो आसि समागमो॥
१०.
पुन चारिकं पक्कन्ते, गामनिगमरट्ठतो।
असीतिकोटिसहस्सानं, ततियो आसि समागमो॥
११.
अहं तेन समयेन, जटिलो नाम रट्ठिको।
सम्बुद्धप्पमुखं सङ्घं, सभत्तं दुस्समदासहं॥
१२.
सोपि मं बुद्धो ब्याकासि, सङ्घमज्झे निसीदिय।
‘‘सतसहस्सितो कप्पे, अयं बुद्धो भविस्सति॥
१३.
‘‘पधानं पदहित्वान…पे॰… हेस्साम सम्मुखा इमं’’॥
१४.
तस्सापि वचनं सुत्वा, उत्तरिं वतमधिट्ठहिम्।
अकासिं उग्गदळ्हं धितिं, दसपारमिपूरिया॥
१५.
ब्याहता तित्थिया सब्बे, विमना दुम्मना तदा।
न तेसं केचि परिचरन्ति, रट्ठतो निच्छुभन्ति ते॥
१६.
सब्बे तत्थ समागन्त्वा, उपगच्छुं बुद्धसन्तिके।
तुवं नाथो महावीर, सरणं होहि चक्खुम॥
१७.
अनुकम्पको कारुणिको, हितेसी सब्बपाणिनम्।
सम्पत्ते तित्थिये सब्बे, पञ्चसीले पतिट्ठपि॥
१८.
एवं निराकुलं आसि, सुञ्ञतं तित्थियेहि तम्।
विचित्तं अरहन्तेहि, वसीभूतेहि तादिहि॥
१९.
नगरं हंसवती नाम, आनन्दो नाम खत्तियो।
सुजाता नाम जनिका, पदुमुत्तरस्स सत्थुनो॥
२०.
दसवस्ससहस्सानि, अगारं अज्झ सो वसि।
नरवाहनो यसो वसवत्ती [नारिवाहनो यसवती (स्या॰ कं॰)], तयो पासादमुत्तमा॥
२१.
तिचत्तारीससहस्सानि, नारियो समलङ्कता।
वसुदत्ता नाम नारी, उत्तमो नाम अत्रजो॥
२२.
निमित्ते चतुरो दिस्वा, पासादेनाभिनिक्खमि।
सत्ताहं पधानचारं, अचरी पुरिसुत्तमो॥
२३.
ब्रह्मुना याचितो सन्तो, पदुमुत्तरो विनायको।
वत्ति चक्कं महावीरो, मिथिलुय्यानमुत्तमे॥
२४.
देवलो च सुजातो च, अहेसुं अग्गसावका।
सुमनो नामुपट्ठाको, पदुमुत्तरस्स महेसिनो॥
२५.
अमिता च असमा च, अहेसुं अग्गसाविका।
बोधि तस्स भगवतो, सललोति पवुच्चति॥
२६.
वितिण्णो चेव [अमितो चेव (स्या॰)] तिस्सो च, अहेसुं अग्गुपट्ठका।
हट्ठा चेव विचित्ता च, अहेसुं अग्गुपट्ठिका॥
२७.
अट्ठपण्णासरतनं, अच्चुग्गतो महामुनि।
कञ्चनग्घियसङ्कासो, द्वत्तिंसवरलक्खणो॥
२८.
कुट्टा कवाटा भित्ती च, रुक्खा नगसिलुच्चया।
न तस्सावरणं अत्थि, समन्ता द्वादसयोजने॥
२९.
वस्ससतसहस्सानि, आयु विज्जति तावदे।
तावता तिट्ठमानो सो, तारेसि जनतं बहुं॥
३०.
सन्तारेत्वा बहुजनं, छिन्दित्वा सब्बसंसयम्।
जलित्वा अग्गिक्खन्धोव निब्बुतो सो ससावको॥
३१.
पदुमुत्तरो जिनो बुद्धो, नन्दारामम्हि निब्बुतो।
तत्थेवस्स थूपवरो, द्वादसुब्बेधयोजनोति॥
पदुमुत्तरस्स भगवतो वंसो दसमो।