२९. पण्णदायकवग्गो

२९. पण्णदायकवग्गो

१. पण्णदायकत्थेरअपदानम्

१.
‘‘पण्णसाले निसिन्नोम्हि, पण्णभोजनभोजनो।
उपविट्ठञ्च मं सन्तं, उपागच्छि महाइसि [महामुनि (सी॰)]॥
२.
‘‘सिद्धत्थो लोकपज्जोतो, सब्बलोकतिकिच्छको।
तस्स पण्णं मया दिन्नं, निसिन्नं [निसिन्नस्स (स्या॰ अट्ठ॰)] पण्णसन्थरे॥
३.
‘‘चतुन्नवुतितो कप्पे, यं पण्णमददिं तदा।
दुग्गतिं नाभिजानामि, पण्णदानस्सिदं फलं॥
४.
‘‘पटिसम्भिदा चतस्सो, विमोक्खापि च अट्ठिमे।
छळभिञ्ञा सच्छिकता, कतं बुद्धस्स सासनं’’॥
इत्थं सुदं आयस्मा पण्णदायको थेरो इमा गाथायो अभासित्थाति।
पण्णदायकत्थेरस्सापदानं पठमम्।

२. फलदायकत्थेरअपदानम्

५.
‘‘सिनेरुसमसन्तोसो , धरणीसम [धरणीधर (सी॰ स्या॰)] सादिसो।
वुट्ठहित्वा समाधिम्हा, भिक्खाय ममुपट्ठितो॥
६.
‘‘हरीतकं [हरीतकिं (स्या॰)] आमलकं, अम्बजम्बुविभीतकम्।
कोलं भल्लातकं बिल्लं, फारुसकफलानि च॥
७.
‘‘सिद्धत्थस्स महेसिस्स, सब्बलोकानुकम्पिनो।
तञ्च सब्बं मया दिन्नं, विप्पसन्नेन चेतसा॥
८.
‘‘चतुन्नवुतितो कप्पे, यं फलं अददिं तदा।
दुग्गतिं नाभिजानामि, फलदानस्सिदं फलं॥
९.
‘‘सत्तपञ्ञासितो कप्पे, एकज्झो नाम खत्तियो।
सत्तरतनसम्पन्नो, चक्कवत्ती महब्बलो॥
१०.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा फलदायको थेरो इमा गाथायो अभासित्थाति।
फलदायकत्थेरस्सापदानं दुतियम्।

३. पच्चुग्गमनियत्थेरअपदानम्

११.
‘‘सीहं यथा वनचरं, निसभाजानियं यथा।
ककुधं विलसन्तंव, आगच्छन्तं नरासभं॥
१२.
‘‘सिद्धत्थं लोकपज्जोतं, सब्बलोकतिकिच्छकम्।
अकासिं पच्चुग्गमनं, विप्पसन्नेन चेतसा॥
१३.
‘‘चतुन्नवुतितो कप्पे, पच्चुग्गच्छिं नरासभम्।
दुग्गतिं नाभिजानामि, पच्चुग्गमने इदं फलं॥
१४.
‘‘सत्ततिंसे [सत्तवीसे (सी॰ स्या॰)] इतो कप्पे, एको आसिं जनाधिपो।
सपरिवारोति नामेन, चक्कवत्ती महब्बलो॥
१५.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा पच्चुग्गमनियो थेरो इमा गाथायो अभासित्थाति।
पच्चुग्गमनियत्थेरस्सापदानं ततियम्।

४. एकपुप्फियत्थेरअपदानम्

१६.
‘‘दक्खिणम्हि दुवारम्हि, पिसाचो आसहं तदा।
अद्दसं विरजं बुद्धं, पीतरंसिंव भाणुमं॥
१७.
‘‘विपस्सिस्स नरग्गस्स, सब्बलोकहितेसिनो।
एकपुप्फं मया दिन्नं, द्विपदिन्दस्स तादिनो॥
१८.
‘‘एकनवुतितो कप्पे, यं पुप्फमददिं तदा।
दुग्गतिं नाभिजानामि, बुद्धपूजायिदं फलं॥
१९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा एकपुप्फियो थेरो इमा गाथायो अभासित्थाति।
एकपुप्फियत्थेरस्सापदानं चतुत्थम्।

५. मघवपुप्फियत्थेरअपदानम्

२०.
‘‘नम्मदानदिया तीरे, सयम्भू अपराजितो।
समाधिं सो समापन्नो, विप्पसन्नो अनाविलो॥
२१.
‘‘दिस्वा पसन्नसुमनो, सम्बुद्धं अपराजितम्।
ताहं मघवपुप्फेन, सयम्भुं पूजयिं तदा॥
२२.
‘‘एकनवुतितो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
२३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा मघवपुप्फियो थेरो इमा गाथायो अभासित्थाति।
मघवपुप्फियत्थेरस्सापदानं पञ्चमम्।

६. उपट्ठाकदायकत्थेरअपदानम्

२४.
‘‘रथियं पटिपज्जन्तं, आहुतीनं पटिग्गहम्।
द्विपदिन्दं महानागं, लोकजेट्ठं नरासभं॥
२५.
‘‘पक्कोसापिय तस्साहं, सब्बलोकहितेसिनो।
उपट्ठाको मया दिन्नो, सिद्धत्थस्स महेसिनो॥
२६.
‘‘पटिग्गहेत्वा [पटिग्गहेसि (क॰)] सम्बुद्धो, निय्यादेसि महामुनि [महाइसि (क॰)]।
उट्ठाय आसना तम्हा, पक्कामि पाचिनामुखो॥
२७.
‘‘चतुन्नवुतितो कप्पे, उपट्ठाकमदं तदा।
दुग्गतिं नाभिजानामि, उपट्ठानस्सिदं फलं॥
२८.
‘‘सत्तपञ्ञासितो कप्पे, बलसेनसनामको।
सत्तरतनसम्पन्नो, चक्कवत्ती महब्बलो॥
२९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा उपट्ठाकदायको थेरो इमा गाथायो अभासित्थाति।
उपट्ठाकदायकत्थेरस्सापदानं छट्ठम्।

७. अपदानियत्थेरअपदानम्

३०.
‘‘अपदानं सुगतानं, कित्तयिंहं महेसिनम्।
पादे च सिरसा वन्दिं, पसन्नो सेहि पाणिभि॥
३१.
‘‘द्वेनवुते इतो कप्पे, अपदानं पकित्तयिम्।
दुग्गतिं नाभिजानामि, कित्तनाय इदं फलं॥
३२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अपदानियो थेरो इमा गाथायो अभासित्थाति।
अपदानियत्थेरस्सापदानं सत्तमम्।

८. सत्ताहपब्बजितत्थेरअपदानम्

३३.
‘‘विपस्सिस्स भगवतो, सङ्घो सक्कतमानितो।
ब्यसनं मे अनुप्पत्तं, ञातिभेदो पुरे अहु॥
३४.
‘‘पब्बज्जं उपगन्त्वान, ब्यसनुपसमायहम्।
सत्ताहाभिरतो तत्थ, सत्थुसासनकम्यता॥
३५.
‘‘एकनवुतितो कप्पे, यमहं पब्बजिं तदा।
दुग्गतिं नाभिजानामि, पब्बज्जाय इदं फलं॥
३६.
‘‘सत्तसट्ठिम्हितो कप्पे, सत्त आसुं महीपती।
सुनिक्खमाति ञायन्ति, चक्कवत्ती महब्बला॥
३७.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा सत्ताहपब्बजितो थेरो इमा गाथायो अभासित्थाति।
सत्ताहपब्बजितत्थेरस्सापदानं अट्ठमम्।

९. बुद्धुपट्ठायिकत्थेरअपदानम्

३८.
‘‘वेटम्भिनीति [वेटम्बरीति (सी॰), वेधम्भिनीति (स्या॰)] मे नामं, पितुसन्तं [पिता’सन्तं (?)] ममं तदा।
मम हत्थं गहेत्वान, उपानयि महामुनिं॥
३९.
‘‘इमेमं उद्दिसिस्सन्ति, बुद्धा लोकग्गनायका।
तेहं उपट्ठिं सक्कच्चं, पसन्नो सेहि पाणिभि॥
४०.
‘‘एकत्तिंसे इतो कप्पे, बुद्धे उपट्ठहिं [परिचरिं (सी॰ स्या॰)] तदा।
दुग्गतिं नाभिजानामि, उपट्ठानस्सिदं फलं॥
४१.
‘‘तेवीसम्हि इतो कप्पे, चतुरो आसु खत्तिया।
समणुपट्ठाका नाम, चक्कवत्ती महब्बला॥
४२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा बुद्धुपट्ठायिको थेरो इमा गाथायो अभासित्थाति।
बुद्धुपट्ठायिकत्थेरस्सापदानं नवमम्।

१०. पुब्बङ्गमियत्थेरअपदानम्

४३.
‘‘चुल्लासीतिसहस्सानि , पब्बजिम्ह अकिञ्चना।
तेसं पुब्बङ्गमो आसिं, उत्तमत्थस्स पत्तिया॥
४४.
‘‘सरागा सभवा [समोहा (स्या॰)] चेते, विप्पसन्नमनाविला।
उपट्ठहिंसु सक्कच्चं, पसन्ना सेहि पाणिभि॥
४५.
‘‘खीणासवा वन्तदोसा, कतकिच्चा अनासवा।
फरिंसु मेत्तचित्तेन, सयम्भू अपराजिता॥
४६.
‘‘तेसं उपट्ठहित्वान, सम्बुद्धानं पतिस्सतो।
मरणञ्च अनुप्पत्तो, देवत्तञ्च अगम्हसे॥
४७.
‘‘चतुन्नवुतितो कप्पे, यं सीलमनुपालयिम्।
दुग्गतिं नाभिजानामि, सञ्ञमस्स इदं फलं॥
४८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा पुब्बङ्गमियो थेरो इमा गाथायो अभासित्थाति।
पुब्बङ्गमियत्थेरस्सापदानं दसमम्।
पण्णदायकवग्गो एकूनतिंसतिमो।
तस्सुद्दानं –
पण्णं फलं पच्चुग्गमं, एकपुप्फि च मघवा।
उपट्ठाकापदानञ्च , पब्बज्जा बुद्धुपट्ठाको।
पुब्बङ्गमो च गाथायो, अट्ठतालीस कित्तिता॥