२८. सुवण्णबिब्बोहनवग्गो

२८. सुवण्णबिब्बोहनवग्गो

१. सुवण्णबिब्बोहनियत्थेरअपदानम्

१.
‘‘एकासनं अहमदं, पसन्नो सेहि पाणिभि।
बिब्बोहनञ्च [बिम्बोहनञ्च (सी॰ पी॰)] पादासिं, उत्तमत्थस्स पत्तिया॥
२.
‘‘एकनवुतितो कप्पे, बिब्बोहनमदासहम्।
दुग्गतिं नाभिजानामि, बिब्बोहनस्सिदं फलं॥
३.
‘‘इतो तेसट्ठिमे कप्पे, असमो नाम खत्तियो।
सत्तरतनसम्पन्नो, चक्कवत्ती महब्बलो॥
४.
‘‘पटिसम्भिदा चतस्सो, विमोक्खापि च अट्ठिमे।
छळभिञ्ञा सच्छिकता, कतं बुद्धस्स सासनं’’॥
इत्थं सुदं आयस्मा सुवण्णबिब्बोहनियो थेरो इमा गाथायो अभासित्थाति।
सुवण्णबिब्बोहनियत्थेरस्सापदानं पठमम्।

२. तिलमुट्ठिदायकत्थेरअपदानम्

५.
‘‘मम सङ्कप्पमञ्ञाय, सत्था लोकग्गनायको।
मनोमयेन कायेन, इद्धिया उपसङ्कमि॥
६.
‘‘सत्थारं उपसङ्कन्तं, वन्दित्वा पुरिसुत्तमम्।
पसन्नचित्तो सुमनो, तिलमुट्ठिमदासहं॥
७.
‘‘एकनवुतितो कप्पे, यं दानमददिं तदा।
दुग्गतिं नाभिजानामि, तिलमुट्ठियिदं फलं॥
८.
‘‘इतो सोळसकप्पम्हि, तन्तिसो [खन्तियो (स्या॰)] नाम खत्तियो।
सत्तरतनसम्पन्नो, चक्कवत्ती महब्बलो॥
९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा तिलमुट्ठिदायको थेरो इमा गाथायो अभासित्थाति।
तिलमुट्ठिदायकत्थेरस्सापदानं दुतियम्।

३. चङ्कोटकियत्थेरअपदानम्

१०.
‘‘महासमुद्दं निस्साय, वसती पब्बतन्तरे।
पच्चुग्गन्त्वान कत्वान [पच्चुग्गन्त्वान’कासहं (अट्ठ॰), पच्चुग्गमनं कत्वान (?)], चङ्कोटक [चङ्गोटक (सी॰)] मदासहं॥
११.
‘‘सिद्धत्थस्स महेसिनो, सब्बसत्तानुकम्पिनो [सयम्भुस्सानुकम्पिनो (स्या॰)]।
पुप्फचङ्कोटकं दत्वा, कप्पं सग्गम्हि मोदहं॥
१२.
‘‘चतुन्नवुतितो कप्पे, चङ्कोटकमदं तदा।
दुग्गतिं नाभिजानामि, चङ्कोटकस्सिदं फलं॥
१३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा चङ्कोटकियो थेरो इमा गाथायो अभासित्थाति।
चङ्कोटकियत्थेरस्सापदानं ततियम्।

४. अब्भञ्जनदायकत्थेरअपदानम्

१४.
‘‘कोण्डञ्ञस्स भगवतो, वीतरागस्स तादिनो।
आकाससमचित्तस्स [अकक्कसचित्तस्साथ (अट्ठ॰)], निप्पपञ्चस्स झायिनो॥
१५.
‘‘सब्बमोहातिवत्तस्स, सब्बलोकहितेसिनो।
अब्भञ्जनं मया दिन्नं, द्विपदिन्दस्स तादिनो॥
१६.
‘‘अपरिमेय्ये इतो कप्पे, अब्भञ्जनमदं तदा [अम्भञ्जनमदासहं (स्या॰)]।
दुग्गतिं नाभिजानामि, अब्भञ्जनस्सिदं फलं॥
१७.
‘‘इतो पन्नरसे कप्पे, चिरप्पो नाम खत्तियो।
सत्तरतनसम्पन्नो, चक्कवत्ती महब्बलो॥
१८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अब्भञ्जनदायको थेरो इमा गाथायो अभासित्थाति।
अब्भञ्जनदायकत्थेरस्सापदानं चतुत्थम्।

५. एकञ्जलिकत्थेरअपदानम्

१९.
‘‘उदुम्बरे वसन्तस्स, नियते पण्णसन्थरे।
वुत्थोकासो मया दिन्नो, समणस्स महेसिनो॥
२०.
‘‘तिस्सस्स द्विपदिन्दस्स, लोकनाथस्स तादिनो।
अञ्जलिं पग्गहेत्वान, सन्थरिं पुप्फसन्थरं॥
२१.
‘‘द्वेनवुते इतो कप्पे, यं करिं पुप्फसन्थरम्।
दुग्गतिं नाभिजानामि, सन्थरस्स इदं फलं॥
२२.
‘‘इतो चुद्दसकप्पम्हि, अहोसिं मनुजाधिपो।
एकअञ्जलिको नाम, चक्कवत्ती महब्बलो॥
२३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा एकञ्जलिको थेरो इमा गाथायो अभासित्थाति।
एकञ्जलिकत्थेरस्सापदानं पञ्चमम्।

६. पोत्थकदायकत्थेरअपदानम्

२४.
‘‘सत्थारं धम्ममारब्भ, सङ्घञ्चापि महेसिनम्।
पोत्थदानं मया दिन्नं, दक्खिणेय्ये अनुत्तरे॥
२५.
‘‘एकनवुतितो कप्पे, यं कम्ममकरिं तदा।
दुग्गतिं नाभिजानामि, पोत्थदानस्सिदं फलं॥
२६.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा पोत्थकदायको थेरो इमा गाथायो अभासित्थाति।
पोत्थकदायकत्थेरस्सापदानं छट्ठम्।

७. चितकपूजकत्थेरअपदानम्

२७.
‘‘चन्दभागानदीतीरे, अनुसोतं वजामहम्।
सत्त मालुवपुप्फानि, चितमारोपयिं अहं॥
२८.
‘‘चतुन्नवुतितो कप्पे, चितकं यमपूजयिम्।
दुग्गतिं नाभिजानामि, चितपूजायिदं फलं॥
२९.
‘‘सत्तसट्ठिम्हितो कप्पे, पटिजग्गसनामका।
सत्तरतनसम्पन्ना, सत्तासुं चक्कवत्तिनो [पटिजग्गसनामको। सत्तरतनसम्पन्नो, चक्कवत्ती महब्बलो (स्या॰)]॥
३०.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा चितकपूजको थेरो इमा गाथायो अभासित्थाति।
चितकपूजकत्थेरस्सापदानं सत्तमम्।

८. आलुवदायकत्थेरअपदानम्

३१.
‘‘पब्बते हिमवन्तम्हि, महासिन्धु सुदस्सना।
तत्थद्दसं वीतरागं, सुप्पभासं सुदस्सनं॥
३२.
‘‘परमोपसमे युत्तं, दिस्वा विम्हितमानसो।
आलुवं तस्स पादासिं, पसन्नो सेहि पाणिभि॥
३३.
‘‘एकत्तिंसे इतो कप्पे, यं फलमददिं तदा।
दुग्गतिं नाभिजानामि, आलुवस्स इदं फलं॥
३४.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा आलुवदायको थेरो इमा गाथायो अभासित्थाति।
आलुवदायकत्थेरस्सापदानं अट्ठमम्।

९. एकपुण्डरीकत्थेरअपदानम्

३५.
‘‘रोमसो नाम नामेन, सयम्भू सुब्बतो [सप्पभो (स्या॰)] तदा।
पुण्डरीकं मया दिन्नं, विप्पसन्नेन चेतसा॥
३६.
‘‘चतुन्नवुतितो कप्पे, पुण्डरीकमदं तदा।
दुग्गतिं नाभिजानामि, पुण्डरीकस्सिदं फलं॥
३७.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा एकपुण्डरीको थेरो इमा गाथायो अभासित्थाति।
एकपुण्डरीकत्थेरस्सापदानं नवमम्।

१०. तरणीयत्थेरअपदानम्

३८.
‘‘महापथम्हि विसमे, सेतु कारापितो मया।
तरणत्थाय लोकस्स, पसन्नो सेहि पाणिभि॥
३९.
‘‘एकनवुतितो कप्पे, यो सेतु कारितो मया।
दुग्गतिं नाभिजानामि, सेतुदानस्सिदं फलं॥
४०.
‘‘पञ्चपञ्ञासितो कप्पे, एको आसिं समोगधो।
सत्तरतनसम्पन्नो, चक्कवत्ती महब्बलो॥
४१.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा तरणीयो थेरो इमा गाथायो अभासित्थाति।
तरणीयत्थेरस्सापदानं दसमम्।
सुवण्णबिब्बोहनवग्गो अट्ठवीसतिमो।
तस्सुद्दानं –
सुवण्णं तिलमुट्ठि च, चङ्कोटब्भञ्जनञ्जली।
पोत्थको चितमालुवा, एकपुण्डरी सेतुना।
द्वेचत्तालीस गाथायो, गणितायो विभाविभीति॥
एकादसमं भाणवारम्।