२७. पदुमुक्खिपवग्गो

२७. पदुमुक्खिपवग्गो

१. आकासुक्खिपियत्थेरअपदानम्

१.
‘‘सुवण्णवण्णं सिद्धत्थं, गच्छन्तं अन्तरापणे।
जलजग्गे दुवे गय्ह, उपागच्छिं नरासभं॥
२.
‘‘एकञ्च पुप्फं पादेसु, बुद्धसेट्ठस्स निक्खिपिम्।
एकञ्च पुप्फं पग्गय्ह, आकासे उक्खिपिं अहं॥
३.
‘‘चतुन्नवुतितो कप्पे, यं पुप्फमभिरोपयिम्।
दुग्गतिं नाभिजानामि, पुप्फदानस्सिदं फलं॥
४.
‘‘इतो छत्तिंसकप्पम्हि, एको आसिं महीपति।
अन्तलिक्खकरो नाम, चक्कवत्ती महब्बलो॥
५.
‘‘पटिसम्भिदा चतस्सो, विमोक्खापि च अट्ठिमे।
छळभिञ्ञा सच्छिकता, कतं बुद्धस्स सासनं’’॥
इत्थं सुदं आयस्मा आकासुक्खिपियो थेरो इमा गाथायो अभासित्थाति।
आकासुक्खिपियत्थेरस्सापदानं पठमम्।

२. तेलमक्खियत्थेरअपदानम्

६.
‘‘सिद्धत्थम्हि भगवति, निब्बुतम्हि नरासभे।
बोधिया वेदिकायाहं, तेलं मक्खेसि तावदे॥
७.
‘‘चतुन्नवुतितो कप्पे, यं तेलं मक्खयिं तदा।
दुग्गतिं नाभिजानामि, मक्खनाय इदं फलं॥
८.
‘‘चतुवीसे इतो कप्पे, सुच्छवि नाम खत्तियो।
सत्तरतनसम्पन्नो, चक्कवत्ती महब्बलो॥
९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा तेलमक्खियो थेरो इमा गाथायो अभासित्थाति।
तेलमक्खियत्थेरस्सापदानं दुतियम्।

३. अड्ढचन्दियत्थेरअपदानम्

१०.
‘‘तिस्सस्स खो भगवतो, बोधिया पादपुत्तमे।
अड्ढचन्दं मया दिन्नं, धरणीरुहपादपे॥
११.
‘‘द्वेनवुते इतो कप्पे, यं चन्द [यं पुप्फ (क॰)] मभिरोपयिम्।
दुग्गतिं नाभिजानामि, बोधिपूजायिदं फलं॥
१२.
‘‘पञ्चवीसे इतो कप्पे, देवलो नाम खत्तियो।
सत्तरतनसम्पन्नो, चक्कवत्ती महब्बलो॥
१३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अड्ढचन्दियो थेरो इमा गाथायो अभासित्थाति।
अड्ढचन्दियत्थेरस्सापदानं ततियम्।

४. पदीपदायकत्थेरअपदानम्

१४.
‘‘देवभूतो अहं सन्तो, ओरुय्ह पथविं तदा।
पदीपे पञ्च पादासिं, पसन्नो सेहि पाणिभि॥
१५.
‘‘चतुन्नवुतितो कप्पे, यं पदीपमदं तदा।
दुग्गतिं नाभिजानामि, दीपदानस्सिदं फलं॥
१६.
‘‘पञ्चपञ्ञासके कप्पे, एको आसिं महीपति।
समन्तचक्खुनामेन, चक्कवत्ती महब्बलो॥
१७.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा पदीपदायको [अपण्णदीपियो (सी॰ क॰)] थेरो इमा गाथायो अभासित्थाति।
पदीपदायकत्थेरस्सापदानं चतुत्थम्।

५. बिळालिदायकत्थेरअपदानम्

१८.
‘‘हिमवन्तस्साविदूरे , रोमसो नाम पब्बतो।
तम्हि पब्बतपादम्हि, समणो भावितिन्द्रियो॥
१९.
‘‘बिळालियो गहेत्वान, समणस्स अदासहम्।
अनुमोदि महावीरो, सयम्भू अपराजितो॥
२०.
‘‘बिळाली ते मम दिन्ना, विप्पसन्नेन चेतसा।
भवे निब्बत्तमानम्हि, फलं निब्बत्ततं तव॥
२१.
‘‘चतुन्नवुतितो कप्पे, यं बिळालिमदासहम्।
दुग्गतिं नाभिजानामि, बिळालिया इदं फलं॥
२२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा बिळालिदायको थेरो इमा गाथायो अभासित्थाति।
बिळालिदायकत्थेरस्सापदानं पञ्चमम्।

६. मच्छदायकत्थेरअपदानम्

२३.
‘‘चन्दभागानदीतीरे, उक्कुसो आसहं तदा।
महन्तं मच्छं पग्गय्ह, सिद्धत्थमुनिनो अदं॥
२४.
‘‘चतुन्नवुतितो कप्पे, यं मच्छमददिं तदा।
दुग्गतिं नाभिजानामि, मच्छदानस्सिदं फलं॥
२५.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा मच्छदायको थेरो इमा गाथायो अभासित्थाति।
मच्छदायकत्थेरस्सापदानं छट्ठम्।

७. जवहंसकत्थेरअपदानम्

२६.
‘‘चन्दभागानदीतीरे, आसिं वनचरो तदा।
सिद्धत्थं अद्दसं बुद्धं, गच्छन्तं अनिलञ्जसे॥
२७.
‘‘अञ्जलिं पग्गहेत्वान, उल्लोकेन्तो महामुनिम्।
सकं चित्तं पसादेत्वा, अवन्दिं नायकं अहं॥
२८.
‘‘चतुन्नवुतितो कप्पे, यमवन्दिं नरासभम्।
दुग्गतिं नाभिजानामि, वन्दनाय इदं फलं॥
२९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा जवहंसको थेरो इमा गाथायो अभासित्थाति।
जवहंसकत्थेरस्सापदानं सत्तमम्।

८. सळलपुप्फियत्थेरअपदानम्

३०.
‘‘चन्दभागानदीतीरे , अहोसिं किन्नरो तदा।
विपस्सिं अद्दसं बुद्धं, रंसिजालसमाकुलं॥
३१.
‘‘पसन्नचित्तो सुमनो, परमाय च पीतिया।
पग्गय्ह सळलं पुप्फं, विपस्सिं ओकिरिं अहं॥
३२.
‘‘एकनवुतितो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
३३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा सळलपुप्फियो थेरो इमा गाथायो अभासित्थाति।
सळलपुप्फियत्थेरस्सापदानं अट्ठमम्।

९. उपागतासयत्थेरअपदानम्

३४.
‘‘हिमवन्तस्स वेमज्झे, सरो आसि सुनिम्मितो।
तत्थाहं रक्खसो आसिं, हेठसीलो भयानको॥
३५.
‘‘अनुकम्पको कारुणिको, विपस्सी लोकनायको।
ममुद्धरितुकामो सो, आगच्छि मम सन्तिकं॥
३६.
‘‘उपागतं महावीरं, देवदेवं नरासभम्।
आसया अभिनिक्खम्म, अवन्दिं सत्थुनो अहं॥
३७.
‘‘एकनवुतितो कप्पे, यं वन्दिं पुरिसुत्तमम्।
दुग्गतिं नाभिजानामि, वन्दनाय इदं फलं॥
३८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा उपागतासयो [उपागतहासनियो (स्या॰), उपागताहासनियो (क॰)] थेरो इमा गाथायो अभासित्थाति।
उपागतासयत्थेरस्सापदानं नवमम्।

१०. तरणियत्थेरअपदानम्

३९.
‘‘सुवण्णवण्णो सम्बुद्धो, विपस्सी दक्खिणारहो।
नदीतीरे ठितो सत्था, भिक्खुसङ्घपुरक्खतो॥
४०.
‘‘नावा न विज्जते तत्थ, सन्तारणी महण्णवे।
नदिया अभिनिक्खम्म, तारेसिं लोकनायकं॥
४१.
‘‘एकनवुतितो कप्पे, यं तारेसिं नरुत्तमम्।
दुग्गतिं नाभिजानामि, तरणाय इदं फलं॥
४२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा तरणियो थेरो इमा गाथायो अभासित्थाति।
तरणियत्थेरस्सापदानं दसमम्।
पदुमुक्खिपवग्गो सत्तवीसतिमो।
तस्सुद्दानं –
उक्खिपी तेलचन्दी च, दीपदो च बिळालिदो।
मच्छो जवो सळलदो, रक्खसो तरणो दस।
गाथायो चेत्थ सङ्खाता, तालीसं चेकमेव चाति॥