२६. थोमकवग्गो

२६. थोमकवग्गो

१. थोमकत्थेरअपदानम्

१.
‘‘देवलोके ठितो सन्तो, विपस्सिस्स महेसिनो।
धम्मं सुणित्वा मुदितो, इमं वाचं अभासहं॥
२.
‘‘‘नमो ते पुरिसाजञ्ञ, नमो ते पुरिसुत्तम।
बहुज्जनं [बहुं जनं (सी॰)] तारयसि, देसेन्तो अमतं पदं’॥
३.
‘‘एकनवुतितो कप्पे, यं वाचमभणिं तदा।
दुग्गतिं नाभिजानामि, थोमनाय इदं फलं॥
४.
‘‘पटिसम्भिदा चतस्सो, विमोक्खापि च अट्ठिमे।
छळभिञ्ञा सच्छिकता, कतं बुद्धस्स सासनं’’॥
इत्थं सुदं आयस्मा थोमको थेरो इमा गाथायो अभासित्थाति।
थोमकत्थेरस्सापदानं पठमम्।

२. एकासनदायकत्थेरअपदानम्

५.
‘‘विजहित्वा देववण्णं, सभरियो इधागमिम्।
अधिकारं कत्तुकामो, बुद्धसेट्ठस्स सासने॥
६.
‘‘देवलो नाम नामेन, पदुमुत्तरसावको।
तस्स भिक्खा मया दिन्ना, विप्पसन्नेन चेतसा॥
७.
‘‘सतसहस्सितो कप्पे, यं कम्ममकरिं तदा।
दुग्गतिं नाभिजानामि, पिण्डपातस्सिदं फलं॥
८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा एकासनदायको थेरो इमा गाथायो अभासित्थाति।
एकासनदायकत्थेरस्सापदानं दुतियम्।

३. चितकपूजकत्थेरअपदानम्

९.
‘‘आनन्दो नाम सम्बुद्धो, सयम्भू अपराजितो।
अरञ्ञे परिनिब्बायि, अमनुस्सम्हि कानने॥
१०.
‘‘देवलोका इधागन्त्वा, चितं कत्वानहं तदा।
सरीरं तत्थ झापेसिं, सक्कारञ्च अकासहं॥
११.
‘‘एकनवुतितो कप्पे, यं कम्ममकरिं तदा।
दुग्गतिं नाभिजानामि, बुद्धपूजायिदं फलं॥
१२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा चितकपूजको थेरो इमा गाथायो अभासित्थाति।
चितकपूजकत्थेरस्सापदानं ततियम्।

४. तिचम्पकपुप्फियत्थेरअपदानम्

१३.
‘‘हिमवन्तस्साविदूरे , विकतो [विकनो (सी॰ स्या॰)] नाम पब्बतो।
तस्स वेमज्झे वसति, समणो भावितिन्द्रियो॥
१४.
‘‘दिस्वान तस्सोपसमं, विप्पसन्नेन चेतसा।
तीणि चम्पकपुप्फानि, गहेत्वान समोकिरिं॥
१५.
‘‘एकनवुतितो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
१६.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा तिचम्पकपुप्फियो थेरो इमा गाथायो अभासित्थाति।
तिचम्पकपुप्फियत्थेरस्सापदानं चतुत्थम्।

५. सत्तपाटलियत्थेरअपदानम्

१७.
‘‘कणिकारंव जोतन्तं, निसिन्नं पब्बतन्तरे।
सत्त पाटलिपुप्फानि, बुद्धस्स अभिरोपयिं॥
१८.
‘‘चतुन्नवुतितो कप्पे, यं पुप्फमभिरोपयिम्।
दुग्गतिं नाभिजानामि, बुद्धपूजायिदं फलं॥
१९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा सत्तपाटलियो थेरो इमा गाथायो अभासित्थाति।
सत्तपाटलियत्थेरस्सापदानं पञ्चमम्।

६. उपाहनदायकत्थेरअपदानम्

२०.
‘‘अहोसिं चन्दनो नाम, सम्बुद्धस्सत्रजो तदा।
एकोपाहनो मया दिन्नो, बोधिं सम्पज्ज मे तुवं॥
२१.
‘‘एकनवुतितो कप्पे, यं पानधिं [यमुपाहनं (सी॰), यं पादुं (स्या॰)] ददिं तदा।
दुग्गतिं नाभिजानामि, उपाहनस्सिदं फलं॥
२२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा उपाहनदायको थेरो इमा गाथायो अभासित्थाति।
उपाहनदायकत्थेरस्सापदानं छट्ठम्।

७. मञ्जरिपूजकत्थेरअपदानम्

२३.
‘‘मञ्जरिकं करित्वान, रथियं पटिपज्जहम्।
अद्दसं समणानग्गं, भिक्खुसङ्घपुरक्खतं॥
२४.
‘‘पसन्नचित्तो सुमनो, परमाय च पीतिया।
उभो हत्थेहि पग्गय्ह, बुद्धस्स अभिरोपयिं॥
२५.
‘‘द्वेनवुते इतो कप्पे, यं पुप्फमभिपूजयिम्।
दुग्गतिं नाभिजानामि, पुप्फपूजायिदं फलं॥
२६.
‘‘इतो तेसत्ततिकप्पे, एको आसिं महीपति।
जोतियो नाम नामेन, चक्कवत्ती महब्बलो॥
२७.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा मञ्जरिपूजको थेरो इमा गाथायो अभासित्थाति।
मञ्जरिपूजकत्थेरस्सापदानं सत्तमम्।

८. पण्णदायकत्थेरअपदानम्

२८.
‘‘पब्बते हिमवन्तम्हि, वाकचीरधरो अहम्।
अलोणपण्णभक्खोम्हि, नियमेसु च संवुतो॥
२९.
‘‘पातरासे अनुप्पत्ते, सिद्धत्थो उपगच्छि मम्।
ताहं बुद्धस्स पादासिं, पसन्नो सेहि पाणिभि॥
३०.
‘‘चतुन्नवुतितो कप्पे, यं पण्णमददिं तदा।
दुग्गतिं नाभिजानामि, पण्णदानस्सिदं फलं॥
३१.
‘‘सत्तवीसतिकप्पम्हि , राजा आसिं सदत्थियो [यदत्थियो (सी॰ स्या॰)]।
सत्तरतनसम्पन्नो, चक्कवत्ती महब्बलो॥
३२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा पण्णदायको थेरो इमा गाथायो अभासित्थाति।
पण्णदायकत्थेरस्सापदानं अट्ठमम्।

९. कुटिदायकत्थेरअपदानम्

३३.
‘‘विपिनचारी सम्बुद्धो, रुक्खमूले वसी तदा।
पण्णसालं करित्वान, अदासिं अपराजिते॥
३४.
‘‘एकनवुतितो कप्पे, यं पण्णकुटिकं अदम्।
दुग्गतिं नाभिजानामि, कुटिदानस्सिदं फलं॥
३५.
‘‘अट्ठवीसे [अट्ठतिंसे (स्या॰)] इतो कप्पे, सोळसासिंसु राजानो।
सब्बत्थ अभिवस्सीति, वुच्चरे चक्कवत्तिनो॥
३६.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा कुटिदायको थेरो इमा गाथायो अभासित्थाति।
कुटिदायकत्थेरस्सापदानं नवमम्।

१०. अग्गपुप्फियत्थेरअपदानम्

३७.
‘‘सुवण्णवण्णं सम्बुद्धं, निसिन्नं पब्बतन्तरे।
ओभासयन्तं रंसेन [रंसिया (स्या॰)], सिखिनं सिखिनं यथा॥
३८.
‘‘अग्गजं पुप्फमादाय, उपागच्छिं नरुत्तमम्।
पसन्नचित्तो सुमनो, बुद्धस्स अभिरोपयिं॥
३९.
‘‘एकत्तिंसे इतो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
४०.
‘‘पञ्चवीसतिकप्पम्हि, अहोसि अमितोगतो [अमितव्हयो (सी॰)]।
सत्तरतनसम्पन्नो, चक्कवत्ती महब्बलो॥
४१.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अग्गपुप्फियो थेरो इमा गाथायो अभासित्थाति।
अग्गपुप्फियत्थेरस्सापदानं दसमम्।
थोमकवग्गो छब्बीसतिमो।
तस्सुद्दानं –
थोमकेकासनचितकं, चम्पको सत्तपाटलि।
पानधि [पाहनो (सी॰), पादु (स्या॰)] मञ्जरी पण्णं, कुटिदो अग्गपुप्फियो।
गाथायो गणिता चेत्थ, एकतालीसमेव चाति॥