२४. उदकासनवग्गो
१. उदकासनदायकत्थेरअपदानम्
१.
‘‘आरामद्वारा निक्खम्म, फलकं सन्थरिं अहम्।
उदकञ्च उपट्ठासिं, उत्तमत्थस्स पत्तिया॥
२.
‘‘एकत्तिंसे इतो कप्पे, यं कम्ममकरिं तदा।
दुग्गतिं नाभिजानामि, आसने चोदके फलं॥
३.
‘‘इतो पन्नरसे कप्पे, अभिसामसमव्हयो।
सत्तरतनसम्पन्नो, चक्कवत्ती महब्बलो॥
४.
‘‘पटिसम्भिदा चतस्सो, विमोक्खापि च अट्ठिमे।
छळभिञ्ञा सच्छिकता, कतं बुद्धस्स सासनं’’॥
इत्थं सुदं आयस्मा उदकासनदायको थेरो इमा गाथायो अभासित्थाति।
उदकासनदायकत्थेरस्सापदानं पठमम्।
२. भाजनपालकत्थेरअपदानम्
५.
‘‘नगरे बन्धुमतिया, कुम्भकारो अहं तदा।
भाजनं अनुपालेसिं, भिक्खुसङ्घस्स तावदे॥
६.
‘‘एकनवुतितो कप्पे, भाजनं अनुपालयिम्।
दुग्गतिं नाभिजानामि, भाजनस्स इदं फलं॥
७.
‘‘तेपञ्ञासे इतो कप्पे, अनन्तजालिनामको।
सत्तरतनसम्पन्नो, चक्कवत्ती महब्बलो॥
८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा भाजनपालको [भाजनदायको (सी॰ स्या॰)] थेरो इमा गाथायो अभासित्थाति।
भाजनपालकत्थेरस्सापदानं दुतियम्।
३. सालपुप्फियत्थेरअपदानम्
९.
‘‘अरुणवतिया नगरे, अहोसिं पूपिको तदा।
मम द्वारेन गच्छन्तं, सिखिनं अद्दसं जिनं॥
१०.
‘‘बुद्धस्स पत्तं पग्गय्ह, सालपुप्फं अदासहम्।
सम्मग्गतस्स बुद्धस्स, विप्पसन्नेन चेतसा॥
११.
‘‘एकत्तिंसे इतो कप्पे, यं पुप्फमभिदासहं [यं खज्जकमदासहं (सी॰), यं खज्जमभिदासहं (क॰) सालपुप्फनामकं खज्जकं वा भवेय्य]।
दुग्गतिं नाभिजानामि, सालपुप्फस्सिदं फलं॥
१२.
‘‘इतो चुद्दसकप्पम्हि, अहोसिं अमितञ्जलो।
सत्तरतनसम्पन्नो, चक्कवत्ती महब्बलो॥
१३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा सालपुप्फियो थेरो इमा गाथायो अभासित्थाति।
सालपुप्फियत्थेरस्सापदानं ततियम्।
४. किलञ्जदायकत्थेरअपदानम्
१४.
‘‘तिवरायं पुरे रम्मे, नळकारो अहं तदा।
सिद्धत्थे लोकपज्जोते, पसन्ना जनता तहिं॥
१५.
‘‘पूजत्थं लोकनाथस्स, किलञ्जं परियेसति।
बुद्धपूजं करोन्तानं, किलञ्जं अददिं अहं॥
१६.
‘‘चतुन्नवुतितो कप्पे, यं कम्ममकरिं तदा।
दुग्गतिं नाभिजानामि, किलञ्जस्स इदं फलं॥
१७.
‘‘सत्तसत्ततिकप्पम्हि, राजा आसिं जलद्धरो [जुतिन्धरो (सी॰)]।
सत्तरतनसम्पन्नो, चक्कवत्ती महब्बलो॥
१८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा किलञ्जदायको थेरो इमा गाथायो अभासित्थाति।
किलञ्जदायकत्थेरस्सापदानं चतुत्थम्।
५. वेदिकारकत्थेरअपदानम्
१९.
‘‘विपस्सिनो भगवतो, बोधिया पादपुत्तमे।
पसन्नचित्तो सुमनो, कारेसिं वेदिकं अहं॥
२०.
‘‘एकनवुतितो कप्पे, कारेसिं वेदिकं अहम्।
दुग्गतिं नाभिजानामि, वेदिकाय इदं फलं॥
२१.
‘‘इतो एकादसे कप्पे, अहोसिं सूरियस्समो।
सत्तरत्तनसम्पन्नो, चक्कवत्ती महब्बलो॥
२२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा वेदिकारको थेरो इमा गाथायो अभासित्थाति।
वेदिकारकत्थेरस्सापदानं पञ्चमम्।
६. वण्णकारत्थेरअपदानम्
२३.
‘‘नगरे अरुणवतिया, वण्णकारो अहं तदा।
चेतिये दुस्सभण्डानि, नानावण्णं रजेसहं [रजिं अहं (क॰), रजेमहं (स्या॰)]॥
२४.
‘‘एकत्तिंसे इतो कप्पे, यं वण्णं रजयिं तदा।
दुग्गतिं नाभिजानामि, वण्णदानस्सिदं फलं॥
२५.
‘‘इतो तेवीसतिकप्पे, वण्णसम [चन्दुपम (सी॰), चन्दसम (स्या॰)] सनामको।
सत्तरतनसम्पन्नो, चक्कवत्ती महब्बलो॥
२६.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा वण्णकारो थेरो इमा गाथायो अभासित्थाति।
वण्णकारत्थेरस्सापदानं छट्ठम्।
७. पियालपुप्फियत्थेरअपदानम्
२७.
‘‘मिगलुद्दो पुरे आसिं, अरञ्ञे कानने अहम्।
पियालं पुप्फितं दिस्वा, गतमग्गे खिपिं अहं॥
२८.
‘‘एकनवुतितो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
२९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा पियालपुप्फियो थेरो इमा गाथायो अभासित्थाति।
पियालपुप्फियत्थेरस्सापदानं सत्तमम्।
८. अम्बयागदायकत्थेरअपदानम्
३०.
‘‘सके सिप्पे अपत्थद्धो, अगमं काननं अहम्।
सम्बुद्धं यन्तं दिस्वान, अम्बयागं अदासहं॥
३१.
‘‘एकनवुतितो कप्पे, यं दानमददिं तदा।
दुग्गतिं नाभिजानामि, अम्बयागस्सिदं फलं॥
३२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अम्बयागदायको थेरो इमा गाथायो अभासित्थाति।
अम्बयागदायकत्थेरस्सापदानं अट्ठमम्।
९. जगतिकारकत्थेरअपदानम्
३३.
‘‘निब्बुते लोकनाथम्हि, अत्थदस्सि नरुत्तमे।
जगती कारिता मय्हं, बुद्धस्स थूपमुत्तमे॥
३४.
‘‘अट्ठारसे कप्पसते, यं कम्ममकरिं तदा।
दुग्गतिं नाभिजानामि, जगतिया इदं फलं॥
३५.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा जगतिकारको थेरो इमा गाथायो अभासित्थाति।
जगतिकारकत्थेरस्सापदानं नवमम्।
१०. वासिदायकत्थेरअपदानम्
३६.
‘‘कम्मारोहं पुरे आसिं, तिवरायं पुरुत्तमे।
एका वासि मया दिन्ना, सयम्भुं अपराजितं [सयम्भुम्हिपराजिते (?)]॥
३७.
‘‘चतुन्नवुतितो कप्पे, यं वासिमददिं तदा।
दुग्गतिं नाभिजानामि, वासिदानस्सिदं फलं॥
३८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा वासिदायको थेरो इमा गाथायो अभासित्थाति।
वासिदायकत्थेरस्सापदानं दसमम्।
उदकासनवग्गो चतुवीसतिमो।
तस्सुद्दानं –
उदकासनभाजनं, सालपुप्फी किलञ्जको।
वेदिका वण्णकारो च, पियालअम्बयागदो।
जगती वासिदाता च, गाथा तिंस च अट्ठ च॥