२३. आलम्बणदायकवग्गो
१. आलम्बणदायकत्थेरअपदानम्
१.
‘‘अत्थदस्सिस्स भगवतो, लोकजेट्ठस्स तादिनो।
आलम्बणं मया दिन्नं, द्विपदिन्दस्स तादिनो॥
२.
‘‘धरणिं पटिपज्जामि, विपुलं सागरप्परम्।
पाणेसु च इस्सरियं, वत्तेमि वसुधाय च॥
३.
‘‘किलेसा झापिता मय्हं, भवा सब्बे समूहता।
तिस्सो विज्जा अनुप्पत्ता, कतं बुद्धस्स सासनं॥
४.
‘‘इतो द्वेसट्ठिकप्पम्हि, तयो आसिंसु खत्तिया।
एकापस्सितनामा ते, चक्कवत्ती महब्बला॥
५.
‘‘पटिसम्भिदा चतस्सो, विमोक्खापि च अट्ठिमे।
छळभिञ्ञा सच्छिकता, कतं बुद्धस्स सासनं’’॥
इत्थं सुदं आयस्मा आलम्बणदायको थेरो इमा गाथायो अभासित्थाति।
आलम्बणदायकत्थेरस्सापदानं पठमम्।
२. अजिनदायकत्थेरअपदानम्
६.
‘‘एकत्तिंसे इतो कप्पे, गणसत्थारको अहम्।
अद्दसं विरजं बुद्धं, आहुतीनं पटिग्गहं॥
७.
‘‘चम्मखण्डं मया दिन्नं, सिखिनो लोकबन्धुनो।
तेन कम्मेन द्विपदिन्द, लोकजेट्ठ नरासभ॥
८.
‘‘सम्पत्तिं अनुभोत्वान, किलेसे झापयिं अहम्।
धारेमि अन्तिमं देहं, सम्मासम्बुद्धसासने॥
९.
‘‘एकत्तिंसे इतो कप्पे, अजिनं यं अदासहम्।
दुग्गतिं नाभिजानामि, अजिनस्स इदं फलं॥
१०.
‘‘इतो पञ्चमके कप्पे, राजा आसिं सुदायको।
सत्तरतनसम्पन्नो, चक्कवत्ती महब्बलो॥
११.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अजिनदायको थेरो इमा गाथायो अभासित्थाति।
अजिनदायकत्थेरस्सापदानं दुतियम्।
३. द्वेरतनियत्थेरअपदानम्
१२.
‘‘मिगलुद्दो पुरे आसिं, अरञ्ञे कानने अहम्।
अद्दसं विरजं बुद्धं, आहुतीनं पटिग्गहं॥
१३.
‘‘मंसपेसि मया दिन्ना, विपस्सिस्स महेसिनो।
सदेवकस्मिं लोकस्मिं, इस्सरं कारयामहं॥
१४.
‘‘इमिना मंसदानेन, रतनं निब्बत्तते मम।
दुवेमे रतना लोके, दिट्ठधम्मस्स पत्तिया॥
१५.
‘‘तेहं सब्बे अनुभोमि, मंसदानस्स सत्तिया।
गत्तञ्च मुदुकं मय्हं, पञ्ञा निपुणवेदनी॥
१६.
‘‘एकनवुतितो कप्पे, यं मंसमददिं तदा।
दुग्गतिं नाभिजानामि, मंसदानस्सिदं फलं॥
१७.
‘‘इतो चतुत्थके कप्पे, एको आसिं जनाधिपो।
महारोहितनामो सो, चक्कवत्ती महब्बलो॥
१८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा द्वेरतनियो [द्विरतनियो (सी॰)] थेरो इमा गाथायो अभासित्थाति।
द्वेरतनियत्थेरस्सापदानं ततियम्।
दसमं भाणवारम्।
४. आरक्खदायकत्थेरअपदानम्
१९.
‘‘सिद्धत्थस्स भगवतो, वेदि कारापिता [वेदिका कारिता (स्या॰)] मया।
आरक्खो च मया दिन्नो, सुगतस्स महेसिनो॥
२०.
‘‘तेन कम्मविसेसेन, न पस्सिं भयभेरवम्।
कुहिञ्चि उपपन्नस्स, तासो मय्हं न विज्जति॥
२१.
‘‘चतुन्नवुतितो कप्पे, यं वेदिं कारयिं पुरे।
दुग्गतिं नाभिजानामि, वेदिकाय इदं फलं॥
२२.
‘‘इतो छट्ठम्हि कप्पम्हि, अपस्सेनसनामको।
सत्तरतनसम्पन्नो, चक्कवत्ती महब्बलो॥
२३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा आरक्खदायको थेरो इमा गाथायो अभासित्थाति।
आरक्खदायकत्थेरस्सापदानं चतुत्थम्।
५. अब्याधिकत्थेरअपदानम्
२४.
‘‘विपस्सिस्स भगवतो, अग्गिसालं अदासहम्।
ब्याधिकानञ्च आवासं, उण्होदकपटिग्गहं॥
२५.
‘‘तेन कम्मेनयं मय्हं, अत्तभावो सुनिम्मितो।
ब्याधाहं नाभिजानामि, पुञ्ञकम्मस्सिदं फलं॥
२६.
‘‘एकनवुतितो कप्पे, यं सालमददिं तदा।
दुग्गतिं नाभिजानामि, अग्गिसालायिदं फलं॥
२७.
‘‘इतो च सत्तमे कप्पे, एकोसिं अपराजितो [एको आसिं नराधिपो (स्या॰)]।
सत्तरतनसम्पन्नो, चक्कवत्ती महब्बलो॥
२८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अब्याधिको थेरो इमा गाथायो अभासित्थाति।
अब्याधिकत्थेरस्सापदानं पञ्चमम्।
६. अङ्कोलपुप्फियत्थेरअपदानम्
२९.
‘‘नारदो [वरदो (क॰)] इति मे नामं, कस्सपो इति मं विदू।
अद्दसं समणानग्गं, विपस्सिं देवसक्कतं॥
३०.
‘‘अनुब्यञ्जनधरं बुद्धं, आहुतीनं पटिग्गहम्।
अङ्कोलपुप्फं [वकुलपुप्फं (स्या॰), बकोलपुप्फं (क॰)] पग्गय्ह, बुद्धस्स अभिरोपयिं॥
३१.
‘‘एकनवुतितो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
३२.
‘‘चतुसत्ततितो कप्पे, रोमसो नाम खत्तियो।
आमुक्कमालाभरणो, सयोग्गबलवाहनो॥
३३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा अङ्कोलपुप्फियो [वकुलपुप्फियो (स्या॰), बकोलपुप्फियो (क॰)] थेरो इमा गाथायो अभासित्थाति।
अङ्कोलपुप्फियत्थेरस्सापदानं छट्ठम्।
७. सोवण्णवटंसकियत्थेरअपदानम्
३४.
‘‘उय्यानभूमिं निय्यन्तो, अद्दसं लोकनायकम्।
वटंसकं गहेत्वान, सोवण्णं साधुनिम्मितं॥
३५.
‘‘सीघं ततो समारुय्ह, हत्थिक्खन्धगतो अहम्।
बुद्धस्स अभिरोपेसिं, सिखिनो लोकबन्धुनो॥
३६.
‘‘एकत्तिंसे इतो कप्पे, यं पुप्फमभिरोपयिम्।
दुग्गतिं नाभिजानामि, पुप्फपूजायिदं फलं॥
३७.
‘‘सत्तवीसे इतो कप्पे, एको आसिं जनाधिपो।
महापतापनामेन, चक्कवत्ती महब्बलो॥
३८.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा सोवण्णवटंसकियो थेरो इमा गाथायो अभासित्थाति।
सोवण्णवटंसकियत्थेरस्सापदानं सत्तमम्।
८. मिञ्जवटंसकियत्थेरअपदानम्
३९.
‘‘निब्बुते लोकनाथम्हि, सिखिम्हि वदतं वरे।
वटंसकेहि आकिण्णं, बोधिपूजं अकासहं॥
४०.
‘‘एकत्तिंसे इतो कप्पे, यं पूजमकरिं तदा।
दुग्गतिं नाभिजानामि, बोधिपूजायिदं फलं॥
४१.
‘‘इतो छब्बीसतिकप्पे, अहुं मेघब्भनामको।
सत्तरतनसम्पन्नो, चक्कवत्ती महब्बलो॥
४२.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा मिञ्जवटंसकियो थेरो इमा गाथायो अभासित्थाति।
मिञ्जवटंसकियत्थेरस्सापदानं अट्ठमम्।
९. सुकतावेळियत्थेरअपदानम्
४३.
‘‘असितो नाम नामेन, मालाकारो अहं [अहुं (?)] तदा।
आवेळं पग्गहेत्वान, रञ्ञो दातुं वजामहं॥
४४.
‘‘असम्पत्तोम्हि [असम्पत्तम्हि (सी॰), असम्पत्तोव (?)] राजानं, अद्दसं सिखिनायकम्।
हट्ठो हट्ठेन चित्तेन, बुद्धस्स अभिरोपयिं॥
४५.
‘‘एकत्तिंसे इतो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
४६.
‘‘पञ्चवीसे इतो कप्पे, राजाहोसिं महब्बलो।
वेभारो नाम नामेन, चक्कवत्ती महब्बलो॥
४७.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा सुकतावेळियो थेरो इमा गाथायो अभासित्थाति।
सुकतावेळियत्थेरस्सापदानं नवमम्।
१०. एकवन्दनियत्थेरअपदानम्
४८.
‘‘उसभं पवरं वीरं, वेस्सभुं विजिताविनम्।
पसन्नचित्तो सुमनो, बुद्धसेट्ठमवन्दहं॥
४९.
‘‘एकत्तिंसे इतो कप्पे, यं कम्ममकरिं तदा।
दुग्गतिं नाभिजानामि, वन्दनाय इदं फलं॥
५०.
‘‘चतुवीसतिकप्पम्हि, विकतानन्दनामको।
सत्तरतनसम्पन्नो, चक्कवत्ती महब्बलो॥
५१.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा एकवन्दनियो थेरो इमा गाथायो अभासित्थाति।
एकवन्दनियत्थेरस्सापदानं दसमम्।
आलम्बणदायकवग्गो तेवीसतिमो।
तस्सुद्दानं –
आलम्बणञ्च अजिनं, मंसदारक्खदायको।
अब्याधि अङ्कोलं [वकुलं (स्या॰), बकुळं (क॰)] सोण्णं, मिञ्जआवेळवन्दनम्।
पञ्चपञ्ञास गाथायो, गणिता अत्थदस्सिभि॥