२१. कणिकारपुप्फियवग्गो

२१. कणिकारपुप्फियवग्गो

१. कणिकारपुप्फियत्थेरअपदानम्

१.
‘‘कणिकारं पुप्फितं दिस्वा, ओचिनित्वानहं तदा।
तिस्सस्स अभिरोपेसिं, ओघतिण्णस्स तादिनो॥
२.
‘‘द्वेनवुते इतो कप्पे, यं पुप्फमभिरोपयिम्।
दुग्गतिं नाभिजानामि, बुद्धपूजायिदं फलं॥
३.
‘‘पञ्चत्तिंसे इतो कप्पे, अरुणपाणीति विस्सुतो।
सत्तरतनसम्पन्नो, चक्कवत्ती महब्बलो॥
४.
‘‘पटिसम्भिदा चतस्सो, विमोक्खापि च अट्ठिमे।
छळभिञ्ञा सच्छिकता, कतं बुद्धस्स सासनं’’॥
इत्थं सुदं आयस्मा कणिकारपुप्फियो थेरो इमा गाथायो अभासित्थाति।
कणिकारपुप्फियत्थेरस्सापदानं पठमम्।

२. मिनेलपुप्फियत्थेरअपदानम्

५.
‘‘सुवण्णवण्णो भगवा, सतरंसी पतापवा।
चङ्कमनं समारूळ्हो, मेत्तचित्तो सिखीसभो॥
६.
‘‘पसन्नचित्तो सुमनो, वन्दित्वा [थोमेत्वा (स्या॰)] ञाणमुत्तमम्।
मिनेलपुप्फं पग्गय्ह, बुद्धस्स अभिरोपयिं॥
७.
‘‘एकत्तिंसे इतो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
८.
‘‘एकूनतिंसकप्पम्हि, सुमेघघननामको।
सत्तरतनसम्पन्नो, चक्कवत्ती महब्बलो॥
९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा मिनेलपुप्फियो थेरो इमा गाथायो अभासित्थाति।
मिनेलपुप्फियत्थेरस्सापदानं दुतियम्।

३. किङ्कणिपुप्फियत्थेरअपदानम्

१०.
‘‘कञ्चनग्घियसङ्कासो, सब्बञ्ञू लोकनायको।
ओदकं दहमोग्गय्ह, सिनायि लोकनायको॥
११.
‘‘पग्गय्ह किङ्कणिं [किङ्किणिं (सी॰)] पुप्फं, विपस्सिस्साभिरोपयिम्।
उदग्गचित्तो सुमनो, द्विपदिन्दस्स तादिनो॥
१२.
‘‘एकनवुतितो कप्पे, यं पुप्फमभिरोपयिम्।
दुग्गतिं नाभिजानामि, बुद्धपूजायिदं फलं॥
१३.
‘‘सत्तवीसतिकप्पम्हि, राजा भीमरथो अहु।
सत्तरतनसम्पन्नो, चक्कवत्ती महब्बलो॥
१४.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा किङ्कणिपुप्फियो [किङ्किणिकपुप्फियो (सी॰)] थेरो इमा गाथायो अभासित्थाति।
किङ्कणिपुप्फियत्थेरस्सापदानं ततियम्।

४. तरणियत्थेरअपदानम्

१५.
‘‘अत्थदस्सी तु भगवा, द्विपदिन्दो नरासभो।
पुरक्खतो सावकेहि, गङ्गातीरमुपागमि॥
१६.
‘‘समतित्ति काकपेय्या, गङ्गा आसि दुरुत्तरा।
उत्तारयिं भिक्खुसङ्घं, बुद्धञ्च द्विपदुत्तमं॥
१७.
‘‘अट्ठारसे कप्पसते, यं कम्ममकरिं तदा।
दुग्गतिं नाभिजानामि, तरणाय इदं फलं॥
१८.
‘‘तेरसेतो कप्पसते, पञ्च सब्बोभवा [सब्भोगवा (सी॰)] अहुम्।
सत्तरतनसम्पन्ना, चक्कवत्ती महब्बला॥
१९.
‘‘पच्छिमे च भवे अस्मिं, जातोहं ब्राह्मणे कुले।
सद्धिं तीहि सहायेहि, पब्बजिं सत्थु सासने॥
२०.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा तरणियो थेरो इमा गाथायो अभासित्थाति।
तरणियत्थेरस्सापदानं चतुत्थम्।

५. निग्गुण्डिपुप्फियत्थेरअपदानम्

२१.
‘‘विपस्सिस्स भगवतो, आसिमारामिको अहम्।
निग्गुण्डिपुप्फं पग्गय्ह, बुद्धस्स अभिरोपयिं॥
२२.
‘‘एकनवुतितो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
२३.
‘‘पञ्चवीसे [पञ्चतिंसे (सी॰ स्या॰)] इतो कप्पे, एको आसिं जनाधिपो।
महापतापनामेन, चक्कवत्ती महब्बलो॥
२४.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा निग्गुण्डिपुप्फियो थेरो इमा गाथायो अभासित्थाति।
निग्गुण्डिपुप्फियत्थेरस्सापदानं पञ्चमम्।

६. उदकदायकत्थेरअपदानम्

२५.
‘‘भुञ्जन्तं समणं दिस्वा, विप्पसन्नमनाविलम्।
घटेनोदकमादाय, सिद्धत्थस्स अदासहं॥
२६.
‘‘निम्मलो होमहं अज्ज, विमलो खीणसंसयो।
भवे निब्बत्तमानम्हि, फलं निब्बत्तते मम [सुभं (सी॰)]॥
२७.
‘‘चतुन्नवुतितो कप्पे, उदकं यमदासहं [यं तदा अदं (सी॰), अददिं तदा (स्या॰)]।
दुग्गतिं नाभिजानामि, दकदानस्सिदं फलं॥
२८.
‘‘एकसट्ठिम्हितो कप्पे, एकोव विमलो अहु।
सत्तरतनसम्पन्नो, चक्कवत्ती महब्बलो॥
२९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा उदकदायको थेरो इमा गाथायो अभासित्थाति।
उदकदायकत्थेरस्सापदानं छट्ठम्।

७. सललमालियत्थेरअपदानम्

३०.
‘‘कणिकारंव जोतन्तं, निसिन्नं पब्बतन्तरे।
ओभासेन्तं दिसा सब्बा, सिद्धत्थं नरसारथिं॥
३१.
‘‘धनुं अद्वेज्झं कत्वान, उसुं सन्नय्हहं तदा।
पुप्फं सवण्टं छेत्वान, बुद्धस्स अभिरोपयिं॥
३२.
‘‘चतुन्नवुतितो कप्पे, यं पुप्फमभिरोपयिम्।
दुग्गतिं नाभिजानामि, बुद्धपूजायिदं फलं॥
३३.
‘‘एकपञ्ञासितो कप्पे, एको आसिं जुतिन्धरो।
सत्तरतनसम्पन्नो, चक्कवत्ती महब्बलो॥
३४.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा सललमालियो थेरो इमा गाथायो अभासित्थाति।
सललमालियत्थेरस्सापदानं सत्तमम्।

८. कोरण्डपुप्फियत्थेरअपदानम्

३५.
‘‘अक्कन्तञ्च पदं दिस्वा, चक्कालङ्कारभूसितम्।
पदेनानुपदं यन्तो, विपस्सिस्स महेसिनो॥
३६.
‘‘कोरण्डं पुप्फितं दिस्वा, समूलं पूजितं मया।
हट्ठो हट्ठेन चित्तेन, अवन्दिं पदमुत्तमं॥
३७.
‘‘एकनवुतितो कप्पे, यं पुप्फमभिपूजयिम्।
दुग्गतिं नाभिजानामि, बुद्धपूजायिदं फलं॥
३८.
‘‘सत्तपञ्ञासकप्पम्हि, एको वीतमलो अहुम्।
सत्तरतनसम्पन्नो, चक्कवत्ती महब्बलो॥
३९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा कोरण्डपुप्फियो थेरो इमा गाथायो अभासित्थाति।
कोरण्डपुप्फियत्थेरस्सापदानं अट्ठमम्।

९. आधारदायकत्थेरअपदानम्

४०.
‘‘आधारकं मया दिन्नं, सिखिनो लोकबन्धुनो।
धारेमि पथविं सब्बं, केवलं वसुधं इमं॥
४१.
‘‘किलेसा झापिता मय्हं, भवा सब्बे समूहता।
धारेमि अन्तिमं देहं, सम्मासम्बुद्धसासने॥
४२.
‘‘सत्तवीसे इतो कप्पे, अहेसुं चतुरो जना।
समन्तवरणा नाम, चक्कवत्ती महब्बला॥
४३.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा आधारदायको [परियादानियो (क॰)] थेरो इमा गाथायो अभासित्थाति।
आधारदायकत्थेरस्सापदानं नवमम्।

१०. पापनिवारियत्थेरअपदानम्

४४.
‘‘तिस्सस्स तु भगवतो, देवदेवस्स तादिनो।
एकच्छत्तं मया दिन्नं, विप्पसन्नेन चेतसा॥
४५.
‘‘निवुतं होति मे पापं, कुसलस्सुपसम्पदा।
आकासे छत्तं धारेन्ति, पुब्बकम्मस्सिदं फलं॥
४६.
‘‘चरिमं वत्तते मय्हं, भवा सब्बे समूहता।
धारेमि अन्तिमं देहं, सम्मासम्बुद्धसासने॥
४७.
‘‘द्वेनवुते इतो कप्पे, यं छत्तमददिं तदा।
दुग्गतिं नाभिजानामि, छत्तदानस्सिदं फलं॥
४८.
‘‘द्वेसत्ततिम्हितो कप्पे, अट्ठासिंसु जनाधिपा।
महानिदाननामेन, राजानो चक्कवत्तिनो॥
४९.
‘‘पटिसम्भिदा चतस्सो…पे॰… कतं बुद्धस्स सासनं’’॥
इत्थं सुदं आयस्मा पापनिवारियो [वातातपनिवारियो (सी॰)] थेरो इमा गाथायो अभासित्थाति।
पापनिवारियत्थेरस्सापदानं दसमम्।
कणिकारपुप्फियवग्गो एकवीसतिमो।
तस्सुद्दानं –
कणिकारो मिनेलञ्च, किङ्कणि तरणेन च।
निग्गुण्डिपुप्फी दकदो, सललो च कुरण्डको।
आधारको पापवारी, अट्ठतालीस गाथकाति॥