७. सत्तकनिपातो
१. उत्तराथेरीगाथा
१७५.
‘‘‘मुसलानि गहेत्वान, धञ्ञं कोट्टेन्ति माणवा।
पुत्तदारानि पोसेन्ता, धनं विन्दन्ति माणवा॥
१७६.
‘‘‘घटेथ बुद्धसासने, यं कत्वा नानुतप्पति।
खिप्पं पादानि धोवित्वा, एकमन्तं निसीदथ॥
१७७.
‘‘‘चित्तं उपट्ठपेत्वान, एकग्गं सुसमाहितम्।
पच्चवेक्खथ सङ्खारे, परतो नो च अत्ततो’॥
१७८.
‘‘तस्साहं वचनं सुत्वा, पटाचारानुसासनिम्।
पादे पक्खालयित्वान, एकमन्ते उपाविसिं॥
१७९.
‘‘रत्तिया पुरिमे यामे, पुब्बजातिमनुस्सरिम्।
रत्तिया मज्झिमे यामे, दिब्बचक्खुं विसोधयिं॥
१८०.
‘‘रत्तिया पच्छिमे यामे, तमोक्खन्धं पदालयिम्।
तेविज्जा अथ वुट्ठासिं, कता ते अनुसासनी॥
१८१.
‘‘सक्कंव देवा तिदसा, सङ्गामे अपराजितम्।
पुरक्खत्वा विहस्सामि, तेविज्जाम्हि अनासवा’’॥
… उत्तरा थेरी…।
२. चालाथेरीगाथा
१८२.
‘‘सतिं उपट्ठपेत्वान, भिक्खुनी भावितिन्द्रिया।
पटिविज्झि पदं सन्तं, सङ्खारूपसमं सुखं’’॥
१८३.
‘‘कं नु उद्दिस्स मुण्डासि, समणी विय दिस्ससि।
न च रोचेसि पासण्डे, किमिदं चरसि मोमुहा’’॥
१८४.
‘‘इतो बहिद्धा पासण्डा, दिट्ठियो उपनिस्सिता।
न ते धम्मं विजानन्ति, न ते धम्मस्स कोविदा॥
१८५.
‘‘अत्थि सक्यकुले जातो, बुद्धो अप्पटिपुग्गलो।
सो मे धम्ममदेसेसि, दिट्ठीनं समतिक्कमं॥
१८६.
‘‘दुक्खं दुक्खसमुप्पादं, दुक्खस्स च अतिक्कमम्।
अरियं चट्ठङ्गिकं मग्गं, दुक्खूपसमगामिनं॥
१८७.
‘‘तस्साहं वचनं सुत्वा, विहरिं सासने रता।
तिस्सो विज्जा अनुप्पत्ता, कतं बुद्धस्स सासनं॥
१८८.
‘‘सब्बत्थ विहता नन्दी, तमोखन्धो पदालितो।
एवं जानाहि पापिम, निहतो त्वमसि अन्तक’’॥
… चाला थेरी…।
३. उपचालाथेरीगाथा
१८९.
‘‘सतिमती चक्खुमती, भिक्खुनी भावितिन्द्रिया।
पटिविज्झिं पदं सन्तं, अकापुरिससेवितं’’॥
१९०.
‘‘किं नु जातिं न रोचेसि, जातो कामानि भुञ्जति।
भुञ्जाहि कामरतियो, माहु पच्छानुतापिनी’’॥
१९१.
‘‘जातस्स मरणं होति, हत्थपादान छेदनम्।
वधबन्धपरिक्लेसं, जातो दुक्खं निगच्छति॥
१९२.
‘‘अत्थि सक्यकुले जातो, सम्बुद्धो अपराजितो।
सो मे धम्ममदेसेसि, जातिया समतिक्कमं॥
१९३.
‘‘दुक्खं दुक्खसमुप्पादं, दुक्खस्स च अतिक्कमम्।
अरियं चट्ठङ्गिकं मग्गं, दुक्खूपसमगामिनं॥
१९४.
‘‘तस्साहं वचनं सुत्वा, विहरिं सासने रता।
तिस्सो विज्जा अनुप्पत्ता, कतं बुद्धस्स सासनं॥
१९५.
‘‘सब्बत्थ विहता नन्दी, तमोखन्धो पदालितो।
एवं जानाहि पापिम, निहतो त्वमसि अन्तक’’॥
… उपचाला थेरी…।
सत्तकनिपातो निट्ठितो।