८. सहस्सवग्गो
१००.
सहस्समपि चे वाचा, अनत्थपदसंहिता।
एकं अत्थपदं सेय्यो, यं सुत्वा उपसम्मति॥
१०१.
सहस्समपि चे गाथा, अनत्थपदसंहिता।
एकं गाथापदं सेय्यो, यं सुत्वा उपसम्मति॥
१०२.
यो च गाथा सतं भासे, अनत्थपदसंहिता [अनत्थपदसञ्हितं (क॰) विसेसनं हेतं गाथातिपदस्स]।
एकं धम्मपदं सेय्यो, यं सुत्वा उपसम्मति॥
१०३.
यो सहस्सं सहस्सेन, सङ्गामे मानुसे जिने।
एकञ्च जेय्यमत्तानं [अत्तानं (सी॰ पी॰)], स वे सङ्गामजुत्तमो॥
१०४.
अत्ता हवे जितं सेय्यो, या चायं इतरा पजा।
अत्तदन्तस्स पोसस्स, निच्चं सञ्ञतचारिनो॥
१०५.
नेव देवो न गन्धब्बो, न मारो सह ब्रह्मुना।
जितं अपजितं कयिरा, तथारूपस्स जन्तुनो॥
१०६.
मासे मासे सहस्सेन, यो यजेथ सतं समम्।
एकञ्च भावितत्तानं, मुहुत्तमपि पूजये।
सायेव पूजना सेय्यो, यञ्चे वस्ससतं हुतं॥
१०७.
यो च वस्ससतं जन्तु, अग्गिं परिचरे वने।
एकञ्च भावितत्तानं, मुहुत्तमपि पूजये।
सायेव पूजना सेय्यो, यञ्चे वस्ससतं हुतं॥
१०८.
यं किञ्चि यिट्ठं व हुतं व [यिट्ठञ्च हुतञ्च (क॰)] लोके, संवच्छरं यजेथ पुञ्ञपेक्खो।
सब्बम्पि तं न चतुभागमेति, अभिवादना उज्जुगतेसु सेय्यो॥
१०९.
अभिवादनसीलिस्स, निच्चं वुड्ढापचायिनो [वद्धापचायिनो (सी॰ पी॰)]।
चत्तारो धम्मा वड्ढन्ति, आयु वण्णो सुखं बलं॥
११०.
यो च वस्ससतं जीवे, दुस्सीलो असमाहितो।
एकाहं जीवितं सेय्यो, सीलवन्तस्स झायिनो॥
१११.
यो च वस्ससतं जीवे, दुप्पञ्ञो असमाहितो।
एकाहं जीवितं सेय्यो, पञ्ञवन्तस्स झायिनो॥
११२.
यो च वस्ससतं जीवे, कुसीतो हीनवीरियो।
एकाहं जीवितं सेय्यो, वीरियमारभतो दळ्हं॥
११३.
यो च वस्ससतं जीवे, अपस्सं उदयब्बयम्।
एकाहं जीवितं सेय्यो, पस्सतो उदयब्बयं॥
११४.
यो च वस्ससतं जीवे, अपस्सं अमतं पदम्।
एकाहं जीवितं सेय्यो, पस्सतो अमतं पदं॥
११५.
यो च वस्ससतं जीवे, अपस्सं धम्ममुत्तमम्।
एकाहं जीवितं सेय्यो, पस्सतो धम्ममुत्तमं॥
सहस्सवग्गो अट्ठमो निट्ठितो।