१. ससीसकसुत्तम्
२१२. एवं मे सुतं – एकं समयं राजगहे वेळुवने। ‘‘इधाहं, आवुसो, गिज्झकूटा पब्बता ओरोहन्तो अद्दसं पुरिसं गूथकूपे ससीसकं निमुग्गं…पे॰… एसो, भिक्खवे, सत्तो इमस्मिंयेव राजगहे पारदारिको अहोसि…पे॰…। पठमम्।
२. गूथखादसुत्तम्
२१३. ‘‘इधाहं, आवुसो, गिज्झकूटा पब्बता ओरोहन्तो अद्दसं पुरिसं गूथकूपे निमुग्गं उभोहि हत्थेहि गूथं खादन्तं…पे॰… एसो, भिक्खवे, सत्तो इमस्मिंयेव राजगहे दुट्ठब्राह्मणो अहोसि। सो कस्सपस्स सम्मासम्बुद्धस्स पावचने भिक्खुसङ्घं भत्तेन निमन्तेत्वा दोणियो [दोणिया (स्या॰ कं॰ पी॰ क॰)] गूथस्स पूरापेत्वा एतदवोच – अहो भोन्तो, यावदत्थं भुञ्जन्तु चेव हरन्तु चाति…पे॰…। दुतियम्।
३. निच्छवित्थिसुत्तम्
२१४. ‘‘इधाहं , आवुसो, गिज्झकूटा पब्बता ओरोहन्तो अद्दसं निच्छविं इत्थिं वेहासं गच्छन्तिम्। तमेनं गिज्झापि काकापि कुललापि अनुपतित्वा अनुपतित्वा वितच्छेन्ति विराजेन्ति। सा सुदं अट्टस्सरं करोति…पे॰… एसा, भिक्खवे, इत्थी इमस्मिंयेव राजगहे अतिचारिनी अहोसि…पे॰…। ततियम्।
४. मङ्गुलित्थिसुत्तम्
२१५. ‘‘इधाहं , आवुसो, गिज्झकूटा पब्बता ओरोहन्तो अद्दसं इत्थिं दुग्गन्धं मङ्गुलिं वेहासं गच्छन्तिम्। तमेनं गिज्झापि काकापि कुललापि अनुपतित्वा अनुपतित्वा वितच्छेन्ति विराजेन्ति। सा सुदं अट्टस्सरं करोति…पे॰… एसा, भिक्खवे, इत्थी इमस्मिंयेव राजगहे इक्खणिका अहोसि…पे॰…। चतुत्थम्।
५. ओकिलिनीसुत्तम्
२१६. ‘‘इधाहं , आवुसो, गिज्झकूटा पब्बता ओरोहन्तो अद्दसं इत्थिं उप्पक्कं ओकिलिनिं ओकिरिनिं वेहासं गच्छन्तिम्। सा सुदं अट्टस्सरं करोति…पे॰… एसा, भिक्खवे, इत्थी कलिङ्गस्स रञ्ञो अग्गमहेसी अहोसि। सा इस्सापकता सपत्तिं अङ्गारकटाहेन ओकिरि…पे॰…। पञ्चमम्।
६. असीसकसुत्तम्
२१७. ‘‘इधाहं, आवुसो, गिज्झकूटा पब्बता ओरोहन्तो अद्दसं असीसकं कबन्धं [कवन्धं (सी॰ पी॰)] वेहासं गच्छन्तम्। तस्स उरे अक्खीनि चेव होन्ति मुखञ्च। तमेनं गिज्झापि काकापि कुललापि अनुपतित्वा अनुपतित्वा वितच्छेन्ति विराजेन्ति। सो सुदं अट्टस्सरं करोति…पे॰… एसो, भिक्खवे, सत्तो इमस्मिंयेव राजगहे हारिको नाम चोरघातको अहोसि…पे॰…। छट्ठम्।
७. पापभिक्खुसुत्तम्
२१८. ‘‘इधाहं , आवुसो, गिज्झकूटा पब्बता ओरोहन्तो अद्दसं भिक्खुं वेहासं गच्छन्तम्। तस्स सङ्घाटिपि आदित्ता सम्पज्जलिता सजोतिभूता [सञ्जोतिभूता (स्या॰ कं॰)], पत्तोपि आदित्तो सम्पज्जलितो सजोतिभूतो, कायबन्धनम्पि आदित्तं सम्पज्जलितं सजोतिभूतं, कायोपि आदित्तो सम्पज्जलितो सजोतिभूतो। सो सुदं अट्टस्सरं करोति…पे॰… एसो, भिक्खवे, भिक्खु कस्सपस्स सम्मासम्बुद्धस्स पावचने पापभिक्खु अहोसि…पे॰…। सत्तमम्।
८. पापभिक्खुनीसुत्तम्
२१९. ‘‘अद्दसं भिक्खुनिं वेहासं गच्छन्तिम्। तस्सा सङ्घाटिपि आदित्ता…पे॰… पापभिक्खुनी अहोसि…पे॰…। अट्ठमम्।
९. पापसिक्खमानसुत्तम्
२२०. ‘‘अद्दसं सिक्खमानं वेहासं गच्छन्तिम्। तस्सा सङ्घाटिपि आदित्ता…पे॰… पापसिक्खमाना अहोसि…पे॰…। नवमम्।
१०. पापसामणेरसुत्तम्
२२१. ‘‘अद्दसं सामणेरं वेहासं गच्छन्तम्। तस्स सङ्घाटिपि आदित्ता…पे॰… पापसामणेरो अहोसि…पे॰…। दसमम्।
११. पापसामणेरीसुत्तम्
२२२. ‘‘इधाहं, आवुसो, गिज्झकूटा पब्बता ओरोहन्तो अद्दसं सामणेरिं वेहासं गच्छन्तिम्। तस्सा सङ्घाटिपि आदित्ता सम्पज्जलिता सजोतिभूता, पत्तोपि आदित्तो सम्पज्जलितो सजोतिभूतो, कायबन्धनम्पि आदित्तं सम्पज्जलितं सजोतिभूतं, कायोपि आदित्तो सम्पज्जलितो सजोतिभूतो। सा सुदं अट्टस्सरं करोति। तस्स मय्हं, आवुसो, एतदहोसि – ‘अच्छरियं वत, भो, अब्भुतं वत, भो! एवरूपोपि नाम सत्तो भविस्सति! एवरूपोपि नाम यक्खो भविस्सति! एवरूपोपि नाम अत्तभावपटिलाभो भविस्सती’’’ति!!
अथ खो भगवा भिक्खू आमन्तेसि – ‘‘चक्खुभूता वत, भिक्खवे, सावका विहरन्ति; ञाणभूता वत, भिक्खवे, सावका विहरन्ति, यत्र हि नाम सावको एवरूपं ञस्सति वा दक्खति वा सक्खिं वा करिस्सति। पुब्बेव मे सा, भिक्खवे, सामणेरी दिट्ठा अहोसि। अपि चाहं न ब्याकासिम्। अहञ्चेतं ब्याकरेय्यं, परे च मे न सद्दहेय्युम्। ये मे न सद्दहेय्युं, तेसं तं अस्स दीघरत्तं अहिताय दुक्खाय। एसा, भिक्खवे, सामणेरी कस्सपस्स सम्मासम्बुद्धस्स पावचने पापसामणेरी अहोसि। सा तस्स कम्मस्स विपाकेन बहूनि वस्सानि बहूनि वस्ससतानि बहूनि वस्ससहस्सानि बहूनि वस्ससतसहस्सानि निरये पच्चित्वा तस्सेव कम्मस्स विपाकावसेसेन एवरूपं अत्तभावपटिलाभं पटिसंवेदयती’’ति। एकादसमम्।
दुतियो वग्गो।
तस्सुद्दानं –
कूपे निमुग्गो हि सो पारदारिको।
गूथखादि अहु दुट्ठब्राह्मणो॥
निच्छवित्थि अतिचारिनी अहु।
मङ्गुलित्थि अहु इक्खणित्थिका॥
ओकिलिनि सपत्तङ्गारोकिरि।
सीसच्छिन्नो अहु चोरघातको॥
भिक्खु भिक्खुनी सिक्खमाना।
सामणेरो अथ सामणेरिका॥
कस्सपस्स विनयस्मिं पब्बज्जम्।
पापकम्मं करिंसु तावदेति॥
लक्खणसंयुत्तं समत्तम्।