दुतियगाथासङ्गणिकम्
१. कायिकादिआपत्ति
४७४. कति आपत्तियो कायिका, कति वाचसिका कता।
छादेन्तस्स कति आपत्तियो, कति संसग्गपच्चया॥
छापत्तियो कायिका, छ वाचसिका कता।
छादेन्तस्स तिस्सो आपत्तियो, पञ्च संसग्गपच्चया॥
अरुणुग्गे कति आपत्तियो, कति यावततियका।
कतेत्थ अट्ठ वत्थुका, कतिहि सब्बसङ्गहो॥
अरुणुग्गे तिस्सो आपत्तियो, द्वे यावततियका।
एकेत्थ अट्ठ वत्थुका, एकेन सब्बसङ्गहो॥
विनयस्स कति मूलानि, यानि बुद्धेन पञ्ञत्ता।
विनयगरुका कति वुत्ता, दुट्ठुल्लच्छादना कति॥
विनयस्स द्वे मूलानि, यानि बुद्धेन पञ्ञत्ता।
विनयगरुका द्वे वुत्ता, द्वे दुट्ठुल्लच्छादना॥
गामन्तरे कति आपत्तियो, कति नदिपारपच्चया।
कतिमंसेसु थुल्लच्चयं, कतिमंसेसु दुक्कटं॥
गामन्तरे चतस्सो आपत्तियो, चतस्सो नदिपारपच्चया।
एकमंसे थुल्लच्चयं, नवमंसेसु दुक्कटं॥
कति वाचसिका रत्तिं, कति वाचसिका दिवा।
ददमानस्स कति आपत्तियो, पटिग्गण्हन्तस्स कित्तका॥
द्वे वाचसिका रत्तिं, द्वे वाचसिका दिवा।
ददमानस्स तिस्सो आपत्तियो, चत्तारो च पटिग्गहे॥
२. देसनागामिनियादिआपत्ति
४७५.
कति देसनागामिनियो, कति सप्पटिकम्मा कता।
कतेत्थ अप्पटिकम्मा वुत्ता, बुद्धेनादिच्चबन्धुना॥
पञ्च देसनागामिनियो, छ सप्पटिकम्मा कता।
एकेत्थ अप्पटिकम्मा वुत्ता, बुद्धेनादिच्चबन्धुना॥
विनयगरुका कति वुत्ता, कायवाचसिकानि च।
कति विकाले धञ्ञरसो, कति ञत्तिचतुत्थेन सम्मुति॥
विनयगरुका द्वे वुत्ता, कायवाचसिकानि च।
एको विकाले धञ्ञरसो, एका ञत्तिचतुत्थेन सम्मुति॥
पाराजिका कायिका कति, कति संवासकभूमियो।
कतिनं रत्तिच्छेदो, पञ्ञत्ता द्वङ्गुला कति॥
पाराजिका कायिका द्वे, द्वे संवासकभूमियो।
द्विन्नं रत्तिच्छेदो, पञ्ञत्ता द्वङ्गुला दुवे॥
कतत्तानं वधित्वान, कतिहि सङ्घो भिज्जति।
कतेत्थ पठमापत्तिका, ञत्तिया करणा कति॥
द्वे अत्तानं वधित्वान, द्वीहि सङ्घो भिज्जति।
द्वेत्थ पठमापत्तिका, ञत्तिया करणा दुवे॥
पाणातिपाते कति आपत्तियो, वाचा पाराजिका कति।
ओभासना कति वुत्ता, सञ्चरित्तेन वा कति॥
पाणातिपाते तिस्सो आपत्तियो।
वाचा पाराजिका तयो।
ओभासना तयो वुत्ता।
सञ्चरित्तेन वा तयो॥
कति पुग्गला न उपसम्पादेतब्बा, कति कम्मानं सङ्गहा।
नासितका कति वुत्ता, कतिनं एकवाचिका॥
तयो पुग्गला न उपसम्पादेतब्बा, तयो कम्मानं सङ्गहा।
नासितका तयो वुत्ता, तिण्णन्नं एकवाचिका॥
अदिन्नादाने कति आपत्तियो, कति मेथुनपच्चया।
छिन्दन्तस्स कति आपत्तियो, कति छड्डितपच्चया॥
अदिन्नादाने तिस्सो आपत्तियो, चतस्सो मेथुनपच्चया।
छिन्दन्तस्स तिस्सो आपत्तियो, पञ्च छड्डितपच्चया॥
भिक्खुनोवादकवग्गस्मिं , पाचित्तियेन दुक्कटा।
कतेत्थ नवका वुत्ता, कतिनं चीवरेन च॥
भिक्खुनोवादकवग्गस्मिं , पाचित्तियेन दुक्कटा कता।
चतुरेत्थ नवका वुत्ता, द्विन्नं चीवरेन च॥
भिक्खुनीनञ्च अक्खाता, पाटिदेसनिया कति।
भुञ्जन्तामकधञ्ञेन, पाचित्तियेन दुक्कटा कति॥
भिक्खुनीनञ्च अक्खाता, अट्ठ पाटिदेसनीया कता।
भुञ्जन्तामकधञ्ञेन, पाचित्तियेन दुक्कटा कता॥
गच्छन्तस्स कति आपत्तियो, ठितस्स चापि कित्तका।
निसिन्नस्स कति आपत्तियो, निपन्नस्सापि कित्तका॥
गच्छन्तस्स चतस्सो आपत्तियो, ठितस्स चापि तत्तका।
निसिन्नस्स चतस्सो आपत्तियो, निपन्नस्सापि तत्तका॥
३. पाचित्तियम्
४७६.
कति पाचित्तियानि, सब्बानि नानावत्थुकानि।
अपुब्बं अचरिमं, आपज्जेय्य एकतो॥
पञ्च पाचित्तियानि, सब्बानि नानावत्थुकानि।
अपुब्बं अचरिमं, आपज्जेय्य एकतो॥
कति पाचित्तियानि, सब्बानि नानावत्थुकानि।
अपुब्बं अचरिमं, आपज्जेय्य एकतो॥
न पाचित्तियानि, सब्बानि नानावत्थुकानि।
अपुब्बं अचरिमं, आपज्जेय्य एकतो॥
कति पाचित्तियानि, सब्बानि नानावत्थुकानि।
कति वाचाय देसेय्य, वुत्ता आदिच्चबन्धुना॥
पञ्च पाचित्तियानि, सब्बानि नानावत्थुकानि।
एकवाचाय देसेय्य, वुत्ता आदिच्चबन्धुना॥
कति पाचित्तियानि, सब्बानि नानावत्थुकानि।
कति वाचाय देसेय्य, वुत्ता आदिच्चबन्धुना॥
नव पाचित्तियानि, सब्बानि नानावत्थुकानि।
एकवाचाय देसेय्य, वुत्ता आदिच्चबन्धुना॥
कति पाचित्तियानि, सब्बानि नानावत्थुकानि।
किञ्च कित्तेत्वा देसेय्य, वुत्ता आदिच्चबन्धुना॥
पञ्च पाचित्तियानि, सब्बानि नानावत्थुकानि।
वत्थुं कित्तेत्वा देसेय्य, वुत्ता आदिच्चबन्धुना॥
कति पाचित्तियानि, सब्बानि नानावत्थुकानि।
किञ्च कित्तेत्वा देसेय्य, वुत्ता आदिच्चबन्धुना॥
नव पाचित्तियानि, सब्बानि नानावत्थुकानि।
वत्थुं कित्तेत्वा देसेय्य, वुत्ता आदिच्चबन्धुना॥
यावततियके कति आपत्तियो, कति वोहारपच्चया।
खादन्तस्स कति आपत्तियो, कति भोजनपच्चया॥
यावततियके तिस्सो आपत्तियो, छ वोहारपच्चया।
खादन्तस्स तिस्सो आपत्तियो, पञ्च भोजनपच्चया॥
सब्बा यावततियका, कति ठानानि गच्छन्ति।
कतिनञ्चेव आपत्ति, कतिनं अधिकरणेन च॥
सब्बा यावततियका, पञ्च ठानानि गच्छन्ति।
पञ्चन्नञ्चेव आपत्ति, पञ्चन्नं अधिकरणेन च॥
कतिनं विनिच्छयो होति, कतिनं वूपसमेन च।
कतिनञ्चेव अनापत्ति, कतिहि ठानेहि सोभति॥
पञ्चन्नं विनिच्छयो होति, पञ्चन्नं वूपसमेन च।
पञ्चन्नञ्चेव अनापत्ति, तीहि ठानेहि सोभति॥
कति कायिका रत्तिं, कति कायिका दिवा।
निज्झायन्तस्स कति आपत्ति, कति पिण्डपातपच्चया॥
द्वे कायिका रत्तिं, द्वे कायिका दिवा।
निज्झायन्तस्स एका आपत्ति, एका पिण्डपातपच्चया॥
कतानिसंसे सम्पस्सं, परेसं सद्धाय देसये।
उक्खित्तका कति वुत्ता, कति सम्मावत्तना॥
अट्ठानिसंसे सम्पस्सं, परेसं सद्धाय देसये।
उक्खित्तका तयो वुत्ता, तेचत्तालीस सम्मावत्तना॥
कति ठाने मुसावादो, कति परमन्ति वुच्चति।
कति पाटिदेसनीया, कतिनं देसनाय च॥
पञ्च ठाने मुसावादो, चुद्दस परमन्ति वुच्चति।
द्वादस पाटिदेसनीया, चतुन्नं देसनाय च॥
कतङ्गिको मुसावादो, कति उपोसथङ्गानि।
कति दूतेय्यङ्गानि, कति तित्थियवत्तना॥
अट्ठङ्गिको मुसावादो, अट्ठ उपोसथङ्गानि।
अट्ठ दूतेय्यङ्गानि, अट्ठ तित्थियवत्तना॥
कतिवाचिका उपसम्पदा, कतिनं पच्चुट्ठातब्बम्।
कतिनं आसनं दातब्बं, भिक्खुनोवादको कतिहि॥
अट्ठवाचिका उपसम्पदा, अट्ठन्नं पच्चुट्ठातब्बम्।
अट्ठन्नं आसनं दातब्बं, भिक्खुनोवादको अट्ठहि॥
कतिनं छेज्जं होति, कतिनं थुल्लच्चयम्।
कतिनञ्चेव अनापत्ति, सब्बेसं एकवत्थुका॥
एकस्स छेज्जं होति, चतुन्नं थुल्लच्चयम्।
चतुन्नञ्चेव अनापत्ति, सब्बेसं एकवत्थुका॥
कति आघातवत्थूनि, कतिहि सङ्घो भिज्जति।
कतेत्थ पठमापत्तिका, ञत्तिया करणा कति॥
नव आघातवत्थूनि, नवहि सङ्घो भिज्जति।
नवेत्थ पठमापत्तिका, ञत्तिया करणा नव॥
४. अवन्दनीयपुग्गलादि
४७७.
कति पुग्गला नाभिवादेतब्बा, अञ्जलिसामिचेन च।
कतिनं दुक्कटं होति, कति चीवरधारणा॥
दस पुग्गला नाभिवादेतब्बा, अञ्जलिसामिचेन च।
दसन्नं दुक्कटं होति, दस चीवरधारणा॥
कतिनं वस्संवुट्ठानं, दातब्बं इध चीवरम्।
कतिनं भन्ते दातब्बं, कतिनञ्चेव न दातब्बं॥
पञ्चन्नं वस्संवुट्ठानं, दातब्बं इध चीवरम्।
सत्तन्नं सन्ते दातब्बं, सोळसन्नं न दातब्बं॥
कतिसतं रत्तिसतं, आपत्तियो छादयित्वान।
कति रत्तियो वसित्वान, मुच्चेय्य पारिवासिको॥
दससतं रत्तिसतं, आपत्तियो छादयित्वान।
दस रत्तियो वसित्वान, मुच्चेय्य पारिवासिको॥
कति कम्मदोसा वुत्ता, बुद्धेनादिच्चबन्धुना।
चम्पायं विनयवत्थुस्मिं, सब्बेव अधम्मिका [सब्बे अधम्मिका (सी॰ स्या॰)] कति॥
द्वादस कम्मदोसा वुत्ता, बुद्धेनादिच्चबन्धुना।
चम्पायं विनयवत्थुस्मिं, सब्बेव अधम्मिका [सब्बेवाधम्मिका (सी॰), सब्बे अधम्मिका (स्या॰)] कता॥
कति कम्मसम्पत्तियो वुत्ता, बुद्धेनादिच्चबन्धुना।
चम्पायं विनयवत्थुस्मिं, सब्बेव धम्मिका कति॥
चतस्सो कम्मसम्पत्तियो वुत्ता, बुद्धेनादिच्चबन्धुना।
चम्पायं विनयवत्थुस्मिं, सब्बेव धम्मिका कता॥
कति कम्मानि वुत्तानि, बुद्धेनादिच्चबन्धुना।
चम्पायं विनयवत्थुस्मिं, धम्मिका अधम्मिका कति॥
छ कम्मानि वुत्तानि, बुद्धेनादिच्चबन्धुना।
चम्पायं विनयवत्थुस्मिं, एकेत्थ धम्मिका कता।
पञ्च अधम्मिका वुत्ता, बुद्धेनादिच्चबन्धुना॥
कति कम्मानि वुत्तानि, बुद्धेनादिच्चबन्धुना।
चम्पायं विनयवत्थुस्मिं, धम्मिका अधम्मिका कति॥
चत्तारि कम्मानि वुत्तानि, बुद्धेनादिच्चबन्धुना।
चम्पायं विनयवत्थुस्मिं, एकेत्थ धम्मिका कता।
तयो अधम्मिका वुत्ता, बुद्धेनादिच्चबन्धुना॥
यं देसितंनन्तजिनेन तादिना।
आपत्तिक्खन्धानि विवेकदस्सिना।
कतेत्थ सम्मन्ति विना समथेहि।
पुच्छामि तं ब्रूहि विभङ्गकोविद॥
यं देसितंनन्तजिनेन तादिना।
आपत्तिक्खन्धानि विवेकदस्सिना।
एकेत्थ सम्मति विना समथेहि।
एतं ते अक्खामि विभङ्गकोविद॥
कति आपायिका वुत्ता, बुद्धेनादिच्चबन्धुना।
विनयं पटिजानन्तस्स, विनयानि [विसयानि (सी॰ स्या॰ एवमुपरिपि)] सुणोम ते॥
छऊनदियड्ढसता वुत्ता, बुद्धेनादिच्चबन्धुना।
आपायिका नेरयिका, कप्पट्ठा सङ्घभेदका।
विनयं पटिजानन्तस्स, विनयानि सुणोहि मे॥
कति नापायिका वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
अट्ठारस नापायिका वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति अट्ठका वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
अट्ठारस अट्ठका वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
५. सोळसकम्मादि
४७८.
कति कम्मानि वुत्तानि, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
सोळस कम्मानि वुत्तानि, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति कम्मदोसा वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
द्वादस कम्मदोसा वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति कम्मसम्पत्तियो वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
चतस्सो कम्मसम्पत्तियो वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति कम्मानि वुत्तानि, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
छ कम्मानि वुत्तानि, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति कम्मानि वुत्तानि, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
चत्तारि कम्मानि वुत्तानि, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति पाराजिका वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
अट्ठ पाराजिका वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति सङ्घादिसेसा वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
तेवीस सङ्घादिसेसा वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति अनियता वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
द्वे अनियता वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति निस्सग्गिया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
द्वेचत्तालीस निस्सग्गिया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति पाचित्तिया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
अट्ठासीतिसतं पाचित्तिया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति पाटिदेसनीया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
द्वादस पाटिदेसनीया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
कति सेखिया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोम ते॥
पञ्चसत्तति सेखिया वुत्ता, बुद्धेनादिच्चबन्धुना।
विनयं पटिजानन्तस्स, विनयानि सुणोहि मे॥
याव सुपुच्छितं तया, याव सुविस्सज्जितं मया।
पुच्छाविस्सज्जनाय वा, नत्थि किञ्चि असुत्तकन्ति॥
दुतियगाथासङ्गणिकं निट्ठितम्।