भीष्मः-
प्राप्य श्वेतं महाद्वीपं नारदो भगवानृषिः
ददर्श तानेव नराञ्श्वेतांश्चन्द्रप्रभाञ्शुभान्
पूजयामास शिरसा मनसा तैश्च पूजितः
दिदृक्षुर्जपपरस्सर्वं श्वेताम्बरधरं हरिम्
भूत्वैकाग्रमना विप्र ऊर्ध्वबाहुर्महामुनिः
स्तोत्रं जगौ समाश्वास्य निर्गुणाय गुणात्मने
नारदः-
ओं नमस्ते देवदेवेश निष्क्रिय निर्गुण लोकसाक्षिन् क्षेत्रज्ञ अनन्तपुरुष त्रिगुणप्रधान अमृताख्य अमृत व्योमन् सनातन सदसद्व्यक्ताव्यक्त त्रिधामपूर्व आदिदेव वसुप्रद प्रजापते वाक्पते वनस्पते दिवस्पते पृथिवीपते दिक्पते दिक्पते दीक्षापते वयस्पते पूर्वनिवास ब्रह्मपते पुरोहित ब्रह्मरुद्रकायिक महाराजिक चातुर्महाराजिक भास्वर भास्वरसत्तम महाभास्वरधाम महाधाम तुषित महातुषित सञ्ज्ञासञ्ज्ञ व्रतदानपरिवृत्तावशवर्तिन् अपरिनिर्मित वशवर्तिन् यज्ञ महायज्ञ असंयज्ञ यज्ञसम्भव यज्ञयोने यज्ञगर्भ यज्ञसूदन यज्ञसाधन यज्ञसाङ्ख्ययोग अमृतेशय हिरण्येशय देवेशय त्रिदशेशय पृष्ठेशय पद्मेशय विश्वेश्वर हिरण्यगर्भस्त्वं जगत्प्रकृतिस्तवाग्निरास्यं वडवामुखोऽग्निस्त्वमाहुतिः सारथिस्त्वं वषट्कारस्त्वमोङ्कारस्त्वं मनस्त्वं चन्द्रमास्त्वं चक्षुराद्यस्त्वं सूर्यस्त्वं दिशाङ्गजस्त्वं दिग्भानो विदिग्भानो हयशिरः प्रथमत्रिसौपर्णोरयण पञ्चाग्ने त्रिणाचिकेत षडङ्गनिधान प्राग्जोतिष्क ज्येष्ठसामग मच्चर अथर्वशिर पञ्चमहाकल्प फेनपाचार्य वालखिल्य वैखानस विखानसाचार्य अभग्नयोग अभग्नपरिसङ्ख्यान युगादे युगमध्य युगल युगनिधनाखण्डल प्राचीनगर्भ कौशिक पुरुहूत पुरुष्टुत विश्वहुत विश्वस्तुत विश्वरूप विश्वस्मृत अनन्तगतेऽनन्तभोग अनन्तदान अनन्तमाय अनन्त अनादि मध्याव्यक्तनिधन व्रतावास समुद्राधिवास तपोवास यशोवास विद्यावास लक्ष्म्यावास कान्त्यावास श्रीनिवास श्रीवास सर्वावास वासुदेव सर्वच्छन्दोगत हरिहय हरिजीव हरिमेध महायज्ञ भागभव रतिप्रद दमनीय यम नियम महानियम कृच्छ्रातिकृच्छ्र सर्वकृच्छ्र नियमनिवृत्तिधर्मप्रवचनगौरववृत्ते देवक्रिय सर्वगत सर्वदर्शिन् अग्राह्याचलमहाविभूते माहात्म्यशरीर पवित्र महापवित्र हिरण्यमय ब्रह्मव्रताकर्तृ अविज्ञेय पृश्निगर्भ ब्रह्माग्र्य प्रजासर्गप्रजानिधनकर महामायाधर चित्रशिखण्डिन् वरप्रद पुरोडाश पुरोडाशभाग चिरगताध्वन् छिन्नतृष्ण छिन्नसंशय सर्वभूतानुवृत्तब्रह्मरूप ब्राह्मणप्रिय विश्वमूर्ते महामूर्ते बान्धव भक्तवत्सल ब्रह्मण्यदेवेशदेव भक्त्येह त्वां दिदृक्षुरेकान्तदर्शनायत्यों नमः