अध्यायः 361

ब्रह्मणा रुद्रम् प्रति भगवन्महिमप्रतिपदानम् ॥ 1 ॥ ब्रह्मोवाच 001
शृणु पुत्र यथाह्येष पुरुषः शाश्वतोऽव्ययः । 001a
अक्षयश्चाप्रमेयश्च सर्वगश्च निरुच्यते ॥ 001c
न स शक्यस्त्वया द्रष्टुं मयाऽन्यैर्वाऽपि सत्तम । 002a
सगुणैर्निर्गुणैर्विश्वो ज्ञानदृश्यो ह्यसौ स्मृतः ॥ 002c
अशरीरः शरीरेषु सर्वेषु निवसत्यसौ । 003a
वसन्नपि शरीरेषु न स लिप्यति कर्मभिः ॥ 003c
ममान्तरात्मा तव च ये चान्ये देहसञ्ज्ञिताः । 004a
सर्वेषां साक्षिभूतोऽसौ न ग्राह्यः केनचित्क्वचित् ॥ 004c
विश्वमूर्धा विश्वभुजो विश्वपादाक्षिनासिकः । 005a
एकश्चरति क्षेत्रेषु स्वैरचारी यथासुखम् ॥ 005c
क्षेत्राणि हि शरीराणि बीजं चापि शुभाशुभम् । 006a
तानि वेत्ति स योगात्मा ततः क्षेत्रज्ञ उच्यते ॥ 006c
नागतिर्न गतिस्तस्य ज्ञेया भूतेषु केनचित् । 007a
साङ्ख्येन विधिना चैव योगेन च यथाक्रमम् ॥ 007c
चिन्तयामि गतिं चास्य न गतिं वेद्मि चोत्तराम् । 008a
यथाज्ञानं तु वक्ष्यामि पुरुषं तु सनातनम् ॥ 008c
तस्यैकत्वं महत्त्वं च स चैकः पुरुषः स्मृतः । 009a
महापुरुषशब्दं स बिभर्त्येकः सनातनः ॥ 009c
एको हुताशो बहुधा समिध्यते एकः सूर्यस्तपसो योनिरेका । 010a
एको वायुर्बहुधा वाति लोके महोदधिश्चाम्भसां योनिरेकः । 010c
पुरुषश्चैको निर्गुणो विश्वरूपस्तं निर्गुणं पुरुषं चाविशन्ति ॥ 010e
हित्वा गुणमयं सर्वं कर्मं हित्वा शुभाशुभम् । 011a
उभे सत्यानृते त्यक्त्वा एवं भवति निर्गुणः ॥ 011c
अचिन्त्यं चापि तं ज्ञात्वा भावसूक्ष्मं चतुष्टयम् । 012a
विचरेद्योऽसमुन्नद्धः स गच्छेत्पुरुषं शुभम् ॥ 012c
एकं हि परमात्मानं केचिदिच्छन्ति पण्डिताः । 013a
एकात्मानं तथाऽऽत्मानमपरेध्यात्मचिन्तकाः ॥ 013c
तत्र यः परमात्मा हि स नित्यो निर्गुणः स्मृतः । 014a
स हि नारायणो ज्ञेयः सर्वात्मा पुरुषो हि सः ॥ 014c
न लिप्यते फलैश्चापि पद्मपत्रमिवाम्भसा । 015a
कर्मात्मा त्वपरो योसौ मोक्षबन्धैः स युज्यते ॥ 015c
ससप्तदशकेनापि राशिना युज्यते च सः । 016a
एवं बहुविधः प्रोक्तः पुरुषस्ते यथाक्रमम् ॥ 016c
यत्तत्कृत्स्नं लोकतन्त्रस्य धाम वेद्यं परं बोधनीयं च वेदैः । 017a
मन्ता मन्तव्यं प्राशिता प्राशनीयं घ्राता घ्रेयं स्पर्शिता स्पर्शनीयम् ॥ 017c
द्रष्टा द्रष्टव्यं श्राविता श्रावणीयं ज्ञाता ज्ञेयं सगुणं निर्गुणं च । 018a
यद्वै प्रोक्तं तात सम्यक्प्रधानं नित्यं चैतच्छाश्वतं चाव्ययं च ॥ 018c
यद्वै सूते धातुराद्यं विधानं तद्वै विप्राः प्रवदन्तेऽनिरुद्धम् । 019a
यद्वै लोके वैदिकं कर्म साधु आशीर्युक्तं तद्धि तस्योपभोग्यम् ॥ 019c
देवाः सर्वे मनुयः साधु दान्तास्तं प्राग्वंशे यज्ञभागं भजन्ते । 020a
अहं ब्रह्मा आद्य ईशः प्रजानां तस्माज्जातस्त्वं च मत्तः प्रसूतः ॥ 020c
मत्तो जगज्जङ्गमं स्थावरं च सर्वे वेदाः सरहस्या हि पुत्र ॥ 021ac
चतुर्विभक्तः पुरुषः स क्रीडति यथेच्छति । 022a
एवं स भगवान्देवः स्वेन ज्ञानेन बोधयत् ॥ 022c
एतत्ते कथितं पुत्र यथावदनुपृच्छतः । 023a
साङ्ख्यज्ञाने तथा योगे यथावदनुवर्णितम् ॥ 023c

इति श्रीमन्महाभारते शान्तिपर्वणि मोक्षधर्मपर्वणि नारायणीयसमाप्तौ एकषष्ट्यधिकत्रिशततमोऽध्यायः ॥ 361 ॥

12-361-2 सगुणो निर्गुणो विश्व इति ट. ध. पाठः ॥