अध्यायः 155

दुर्योधनेन स्वसेनानां अग्र्यमध्यमपाश्चात्यभेदेन त्रेधा विभजनम् ॥ 1 ॥ तासां साङ्ग्रामिकोपकरणसमृद्धिवर्णनम् ॥ 2 ॥ दुर्योधनेन कृपादीनामेकादशानां पृथक्पृथगक्षौहिण्यधिपतित्वेऽभिषेचनम् ॥ 3 ॥ वैशम्पायन उवाच । 001
व्युष्टायां वै रजन्यां हि राजा दुर्योधनस्ततः । 001a
व्यभजत्तान्यनीकानि दश चैकं च भारत ॥ 001c
नरहस्तिरथाश्वानां सारं मध्यं च फल्गु च । 002a
सर्वेष्वेतेष्वनीकेषु सन्दिदेश नराधिपः ॥ 002c
सानुकर्षाः सतूणीराः सवरूथाः सतोमराः । 003a
सोपासङ्गाः सशक्तीकाः सनिषङ्गाः सहर्ष्टयः । 003c
सध्वजाः सपताकाश्च सशरासनतोमराः । 004a
रज्जुभिश्च विचित्राभिः सपाशाः सपरिच्छदाः ॥ 004c
सकचग्रहविक्षेपाः सतैलगुडवालुकाः । 005a
साशीविषघटाः सर्वे ससर्जरसपांसवः ॥ 005c
सघण्टफलकाः सर्वे सायोगुडजलोपलाः ॥ 006a
सशालभिन्दिपालाश्च समधूच्छिष्टमुद्गराः ॥ 006c
सकाण्डदण्डकाः सर्वे ससीरविषतोमराः । 007a
सशूर्पपिटकाः सर्वे सदात्राङ्कुशतोमराः ॥ 007c
सकीलकवचाः सर्वे वाशीवृक्षादनान्विताः । 008a
व्याघ्रचर्मपरीवारा द्वीपिचर्मावृताश्च ते ॥ 008c
सहर्ष्टयः सश्रृङ्गाश्च सप्रासविविधायुधाः । 009a
सकुठाराः सकुद्दालाः सतैलक्षौमसर्पिषः ॥ 009c
रुक्मजालप्रतिच्छन्ना नानामणिविभूषिताः । 010a
चित्रानीकाः सुवपुषो ज्वलिता इव पावकाः ॥ 010c
तथा कवचिनः शूराः शस्त्रेषु कृतनिश्चयाः । 011a
कुलीना हययोनिज्ञाः सारथ्ये विनिवेशिताः ॥ 011c
बद्धारिष्टा बद्धकक्षा बद्धध्वजपताकिनः । 012a
बद्धाभरणनिर्यूहा बद्धचर्मासिपट्टिशाः ॥ 012c
चतुर्युजो रथाः सर्वे सर्वे चोत्तमवाजिनः । 013a
सप्रासऋष्टिकाः सर्वे सर्वे शतशरासनाः ॥ 013c
धुर्ययोर्हययोरेकस्तथान्यौ पर्ष्णिसारथी । 014a
तौ चापि रथिनां श्रेष्ठौ रथी च हयवित्तथा ॥ 014c
नगराणीव गुप्तानि दुराधर्षाणि शत्रुभिः । 015a
आसन्रथसहस्राणि हेममालीनि सर्वशः ॥ 015c
यथा रथास्तथा नागा बद्धकक्षाः स्वलङ्कृताः । 016a
बभूवुः सप्तपुरुषा रत्नवन्त इवाद्रयः ॥ 016c
द्वावङ्कुशधरौ तत्र द्वावुत्तमधनुर्धरौ । 017a
द्वौ वरासिधरौ राजन्नेकः शक्तिपिनाकधृत् ॥ 017c
गजैर्मत्तैः समाकीर्णं सर्वमायुधकोशकैः । 018a
तद्बभूव बलं राजन्कौरव्यस्य महात्मनः ॥ 018c
आमुक्तकवचैर्युक्तैः सपताकैः स्वलङ्कृतैः । 019a
सादिभिश्चोपपन्नास्तु तथा चायुतशो हयाः ॥ 019c
असङ्ग्राहाः सुसम्पन्ना हेमभाण्डपरिच्छदाः । 020a
अनेकशतसाहस्राः सर्वे सादिवशे स्थिताः ॥ 020c
नानारूपविकाराश्च नानाकवचशस्त्रिणः । 021a
पदातिनो नरास्तत्र बभूवुर्हेममालिनः ॥ 021c
रथस्यासन्दश गजा गजस्य दश वाजिनः । 022a
नरा दश हयस्यासन्पादरक्षाः समन्ततः ॥ 022c
रथस्य नागाः पञ्चाशन्नागस्यासञ्शतं हयाः । 023a
हयस्य पुरुषाः सप्त भिन्नसन्धानकारिणः ॥ 023c
सेना पञ्चशतं नागा रथास्तावन्त एव च । 024a
दशसेना च पृतना पृतना दश वाहिनी ॥ 024c
सेना च वाहिनी चैव पृतना ध्वजिनी चमूः । 025a
अक्षौहिणीति पर्यायैर्निरुक्ता च वरूथिनी ॥ ||| 025c
एवं व्यूढान्यनीकानि कौरवेयेण धीमता । 026a
अक्षौहिण्यो दशैका च सङ्ख्याताः सप्त चैव ह ॥ 026c
अक्षौहिण्यस्तु सप्तैव पाण्डवानामभूद्बलम् । 027a
अक्षौहिण्यो दशैका च कौरवाणामभूद्बलम् ॥ 027c
नराणां पञ्चपञ्चाशदेषा पत्तिर्विधीयते । 028a
सेनामुखं च तिस्रस्ता गुल्म इत्यभिशब्दितम् ॥ 028c
त्रयो गुल्मा गणस्त्वासीद्गणास्त्वयुतशोऽभवन् । 029a
दुर्योधनस्य सेनासु योत्स्यमानाः प्रहारिणः ॥ 029c
तत्र दुर्योधनो राजा शूरान्बुद्धिमतो नरान् । 030a
प्रसमीक्ष्य महाबाहुश्चक्रे सेनापतींस्तदा । 030c
पृथगक्षौहिणीनां च प्रणेतॄन्नरसत्तमान् । 031a
विधिवत्पूर्वमानीय पार्थिवानभ्यषेचयत् ॥ 031c
कृपं द्रोणं च शल्यं च सैन्धवं च जयद्रथम् । 032a
सुदक्षिणं च काम्भोजं कृतवर्माणमेव च ॥ 032c
द्रोणपुत्रं च कर्णं च भूरिश्रवसमेव च । 033a
शकुनिं सौबलं चैव बाह्लीकं च महाबलम् ॥ 033c
दिवसे दिवसे तेषां प्रतिवेलं च भारत । 034a
चक्रे स विविधाः पूजाः प्रत्यक्षं च पुनः पुनः ॥ 034c
तथा विनियताः सर्वे ये च तेषां पदानुगाः । 035a
बभूवुः सैनिका राज्ञां प्रियं राज्ञश्चिकीर्षवः ॥ ॥ 035c

इति श्रीमन्महाभारते उद्योगपर्वणि सैन्यनिर्याणपर्वणि पञ्चपञ्चाशदधिकशततमोऽध्यायः ॥

5-155-1 व्युष्टायां व्यतीतायाम् ॥ 5-155-2 सारं पुरोगामि । मध्यं मध्यमम् । फल्गु पाश्चात्त्यम् ॥ 5-155-3 अनुकर्षः युद्धविमर्देयस्यकस्यचिद्रथावयवस्य नष्टस्य प्रतिसमाधानार्थं यद्रथस्याधोदारुबध्यते तत् । अनुकर्षो रथाधःस्थदारुणीति मेदिनी । तूणीरो रथबाह्यो बाणकोशः । महान् निषङ्ग इति यावत् । उपासङ्गाः हयगजवाह्यास्तूणाः । निषङ्गः पत्तिवाह्यः स एव ॥ 5-155-5 कचग्रहविक्षेपः कचेषु गृहीत्वा येन शत्रुर्विक्षिप्यते तादृशः । तैलादयः प्रतप्ताः शत्रूणामुपरि क्षिप्यन्ते । साशीविषघटाः ससर्पाः कुम्भाः । सर्जरसो रालद्रव्यमग्न्युद्दीपकम् ॥ 5-155-6 सघण्टानि फलकानि शस्त्राग्राणि येषां ते सघण्टफलकाः । अयांसि खड्गपट्टिशच्चुरिकादीनि । गुडजलं तप्तम् । उपला यन्त्रक्षेप्या गोलाः । शालते कत्थते शब्दं करोतीति शालः स चासौ भिन्दिपालो गोफलकः । मधूच्छिष्टं मयनं तदपि द्रवीकृत्य गुडजलवत्प्रक्षेप्यम् । मुद्गरः मुशलतुल्यो दण्डः ॥ 5-155-7 काण्डं बाणफलकं तद्युक्तो दण्डः काण्डदण्डः कण्टकदण्ड इतियावत् । सीरं लाङ्गलम् । विषं प्रसिद्धं तेन युक्तास्तोमरा विषतोमराः । शूर्पाणि तप्तगुडादिप्रक्षेपार्थानि । पिटकास्तदाश्रया मञ्जूषाः अस्त्ररोधनार्था वा । दात्रं परशुप्रभृति । अङ्कुशतोमराः बदरीकण्टकतुल्यलोहकण्टकोपेतास्तोमराः ॥ 5-155-8 कीलकवचवान् हि परेण मुष्टियुद्धे जेतुमशक्यः । वाशी काष्ठप्रच्छन्नं शस्त्रम् । वृक्षादनाः लोहकण्टककीलादीन्युपकरणानि । व्याघ्रचर्मणा द्वीपी चित्रव्याघ्रस्तच्चर्मणा च परिवृता रथा एव ॥ 5-155-9 तैलक्षौमानि तैलाक्तवस्त्रविशेषा येषां भस्म प्रहारस्थले दीयते । सर्पिश्च पुरातनं तदर्थमेव ॥ 5-155-10 चित्रानीकाः चित्राणि सैन्यानि ॥ 5-155-11 विनिवेशेता येषु रथेष्विति शेषः ॥ 5-155-12 बद्धानि अरिष्टानि अशुभहराणि यन्त्रौषधादीनि येषु ते बद्धारिष्टाः । बद्धकक्षाः बद्धाः कक्षाः स्पर्धापदानि तुरगादिशिरसि घण्टामालामौक्तिकगुच्छादीनि । बद्धानि बिरुदानि येषु । बद्धानि आभरणानि क्षुद्रघण्टिकादीनि निर्यूहाः शिखराणि च येषु ॥ 5-155-14 चतुर्युज इत्येतद्व्याचष्टे धुर्ययोरिति । धुर्ययोः धूःसन्निहितयोः । पार्ष्णिसारथी चक्ररक्षौ ॥ 5-155-17 पिनाकः त्रिशूलम् ॥ 5-155-20 सङ्ग्राहः हेषणपूर्वकमग्रपादाभ्यामुत्प्लवनं तद्रहिताः । यतः सुसम्पन्नाः सम्यकशिक्षिताः ॥ 5-155-22 एकस्य रथस्य यथोक्तविभागेन दश गजाः शतं अश्वाः सहस्रं पदातयश्च परिवार इत्यर्थः ॥ 5-155-23 पक्षान्तरमाह रथस्येति । एकस्य रथस्य पञ्चाशद्गजा पञ्चसहस्रं अश्वाः पञ्चत्रिंशत्सहस्रं पदातयः परिवार इत्यर्थः ॥ 5-155-24 पृतनायां तु पञ्चसहस्रं नागास्तावन्तो रथाः पञ्चविंशतिसहस्रं नराः पञ्चदशसहस्रं अश्वाः । वाहिन्यां पञ्चाशत्सहस्रं नागास्तावन्तो रथाः सार्धलक्षद्वयं नराः । सार्धलक्षं अश्वा इति ज्ञेयम् ॥