अध्यायः 157

हास्तिनपुरं त्यक्त्वा वारणावतं गच्छता युधिष्ठिरेण अनुगच्छथां पौराणां निवर्तनम् ॥ 1 ॥ म्लेच्छभाषया युधिष्ठिरं प्रति विदुरस्योपदेशः ॥ 2 ॥ वैशम्पायन उवाच 001
पाण्डवास्तु रथान्युक्तान्सदश्वैरनिलोपमैः । 001a
आरोहमाणा भीष्मस्य पादौ जगृहुरार्तवत् ॥ 001c
राज्ञश्च धृतराष्ट्रस्य द्रोणस्य च महात्मनः । 002a
अन्येषां चैव वृद्धानां कृपस्य विदुरस्य च ॥ 002c
एवं सर्वान्कुरून्वृद्धानभिवाद्य यतव्रताः । 003a
समालिङ्ग्य समानान्वै बालैश्चाप्यभिवादिताः ॥ 003c
सर्वा मातॄस्तथाऽऽपृच्छ्य कृत्वा चैव प्रदक्षिणम् । 004a
प्रकृतीरपि सर्वाश्च प्रययुर्वारणावतम् ॥ 004c
विदुरश्च महाप्राज्ञस्तथाऽन्ये कुरुपुङ्गवाः । 005a
पौराश्च पुरुषव्याघ्रानन्वीयुः शोककर्शिताः ॥ 005c
तत्र केचिद्ब्रुवन्ति स्म ब्राह्मणा निर्भयास्तदा । 006a
दीनान्दृष्ट्वा पाण्डुसुतानतीव भृशदुःखिताः ॥ 006c
विषमं पश्यते राजा सर्वथा स सुमन्दधीः । 007a
कौरव्यो धृतराष्ट्रस्तु न च धर्मं प्रपश्यति ॥ 007c
न हि पापमपापात्मा रोचयिष्यति पाण्डवः । 008a
भीमो वा बलिनां श्रेष्ठः कौन्तेयो वा धनञ्जयः ॥ 008c
कुत एव महात्मानौ माद्रीपुत्रौ करिष्यतः । 009a
तान्राज्यं पितृतः प्राप्तान्धृतराष्ट्रो न मृष्यति ॥ 009c
अधर्म्यमिदमत्यन्तं कथं भीष्मोऽनुमन्यते । 010a
विवास्यमानानस्थाने नगरे योऽभिमन्यते ॥ 010c
पितेव हि नृपोऽस्माकमभूच्छान्तनवः पुरा । 011a
विचित्रवीर्यो राजर्षिः पाण्डुश्च कुरुनन्दनः ॥ 011c
स तस्मिन्पुरुषव्याघ्रे देवभावं गते सति । 012a
राजपुत्रानिमान्बालान्धृतराष्ट्रो न मृष्यति ॥ 012c
वयमेतदनिच्छन्तः सर्व एव पुरोत्तमात् । 013a
गृहान्विहाय गच्छामो यत्र गन्ता युधिष्ठिरः ॥ 013c
वैशम्पायन उवाच 014
तांस्तथा वादिनः पौरान्दुःखितान्दुःखकर्शितः । 014a
उवाच मनसा ध्यात्वा धर्मराजो युधिष्ठिरः ॥ 014c
पिता मान्यो गुरुः श्रेष्ठो यदाह पृथिवीपतिः । 015a
अशङ्कमानैस्तत्कार्यमस्माभिरिति नो व्रतम् ॥ 015c
भवन्तः सुहृदोऽस्माकं यात कृत्वा प्रदक्षिणम् । 016a
प्रतिनन्द्य तथाऽऽशीर्भिर्निवर्तध्वं यथागृहम् ॥ 016c
यदा तु कार्यमस्माकं भवद्भिरुपपत्स्यते । 017a
तदा करिष्यथास्माकं प्रियाणि च हितानि च ॥ 017c
एवमुक्तास्तदा पौराः कृत्वा चापि प्रदक्षिणम् । 018a
आशीर्भिश्चाभिनन्द्यैताञ्जग्मुर्नगरमेव हि ॥ 018c
पौरेषु विनिवृत्तेषु विदुरः सर्वधर्मवित् । 019a
बोधयन्पाण्डवश्रेष्ठमिदंवचनमब्रवीत् ॥ 019c
प्राज्ञः प्राज्ञं प्रलापज्ञः प्रलापज्ञमिदं वचः । 020a
यो जानाति परप्रज्ञां नीतिशास्त्रानुसारिणीम् । 020c
विज्ञायेह तथा कुर्यादापदं निस्तरेद्यथा ॥ 020e
अलोहं निशितं शस्त्रं शरीरपरिकर्तनम् । 021a
यो वेत्ति न तु तं घ्नन्ति प्रतिघातविदं द्विषः ॥ 021c
कक्षघ्नः शिशिरघ्नश्च महाकक्षे बिलौकसः । 022a
न दहेदिति चात्मानं यो रक्षति स जीवति ॥ 022c
नाचक्षुर्वेत्ति पन्थानं नाचक्षुर्विन्दते दिशः । 023a
नाधृतिर्भूतिमाप्नोति बुध्यस्वैवं प्रबोधितः ॥ 023c
अनाप्तैर्दत्तमादत्ते नरः शस्त्रमलोहजम् । 024a
श्वाविच्छरणमासाद्य प्रमुच्येत हुताशनात् ॥ 024c
चरन्मार्गान्विजानाति नक्षत्रैर्विन्दते दिशः । 025a
आत्मना चात्मनः पञ्च पीडयन्नानुपीड्यते ॥ 025c
एवमुक्तः प्रत्युवाच धर्मराजो युधिष्ठिरः । 026a
विदुरं विदुषां श्रेष्ठं ज्ञातमित्येव पाण्डवः ॥ 026c
अनुशिक्ष्यानुगम्यैतान्कृत्वा चैव प्रदक्षिणम् । 027a
पाण्डवानभ्यनुज्ञाय विदुरः प्रययौ गृहान् ॥ 027c
निवृत्ते विदुरे चापि भीष्मे पौरजने तथा । 028a
अजातशत्रुमासाद्य कुन्ती वचनमब्रवीत् ॥ 028c
क्षत्ता यदब्रवीद्वाक्यं जनमध्येऽब्रुवन्निव । 029a
त्वया च स तथेत्युक्तो जानीमो न च तद्वयम् ॥ 029c
यदीदं शक्यमस्माभिर्ज्ञातुं नैव च दोषवत् । 030a
श्रोतुमिच्छामि तत्सर्वं संवादं तव तस्य च ॥ 030c
युधिष्ठिर उवाच 031
विषादग्नेश्च बोद्धव्यमिति मां विदुरोऽब्रवीत् । 031a
पन्थानो वेदितव्याश्च नक्षत्रैश्च तथा दिशः । 031c
'कुड्याश्चविदिताःकार्याःस्याच्छुद्धिरितिचाब्रवीत् ॥ 031e
जितेन्द्रियश्च वसुधां प्राप्स्यतीति च मेऽब्रवीत् । 032a
विज्ञातमिति तत्सर्वं प्रत्युक्तो विदुरो मया ॥ 032c
वैशम्पायन उवाच 033
अष्टमेऽहनि रोहिण्यां प्रयाताः फाल्गुनस्य ते । 033a
वारणावतमासाद्य ददृशुर्नागरं जनम् ॥ ॥ 033c

इति श्रीमन्महाभारते आदिपर्वणि जतुगृहपर्वणि सप्तपञ्चादशदधिकशततमोऽध्यायः ॥ 157 ॥

1-157-10 अस्थाने अयुक्तम् योऽभिमन्यते स भीष्मः कथमनुमन्यत इत्यर्थः ॥ 1-157-20 प्राज्ञः ऊहापोहसमर्थः । प्रलापज्ञः अनर्थवचनाभासाभिज्ञः । युधिष्ठिरमप्येतादृशम् । वचनमेवाह । इदमिति । इदं प्रलापात्मकं मम वचो यो जानाति सः परस्य शत्रोः प्रज्ञां स्वबाधार्थं नीत्या प्रयुक्तां विज्ञाय तथा कुर्यात् । यथा स्वयमापदं निस्तरेदित्यन्वयः ॥ 1-157-21 प्रलापाकारवचनमेवाह । अलोहमिति । अलोहमग्निमयं शस्त्रमिव शस्त्रं घातकं तस्य प्रतिघातविदं द्विषो न घ्नन्ति । प्रतिघातकृतमिति पाठे प्रतिघाताय कृतमित्यर्थः ॥ 1-157-22 अग्निकृते भये ज्ञातेऽपि कथं प्रतीकारस्तत्राह । कक्षघ्न इति । कक्षस्तृणेन्धनं हन्तीति तथा । शिशिरं शीतं हन्तीति तथाविधोऽपि अग्निः महाकक्षे अरण्ये दह्यमानेऽपि बिलौकसो मूषिकादीन्न दहति इत्थमात्मानं यो रक्षति स जीवति । तथा बिलेष्वाविश्यागाराद्रक्षणीय इत्यर्थः ॥ 1-157-23 ततश्च बिलनिर्गमानन्तरमरण्यगमन्प्रकारमुपदिशति । नाचक्षुरिति । अचक्षुः पूर्वं वर्त्मदर्शनविहीनः पन्थानं रात्रौ न वेत्ति । तथा अचक्षुः विज्ञानविहीनः दिशो न विन्दते न प्रत्यभिजानाति । अतः पूर्वमेव वर्त्मदिशौ द्रष्टव्ये इति भावः । कथमस्माकं बिलप्रवेशनिर्गमाविति चेत्तत्राह । नाधृतिरिति । दुःखे धैर्यरहितो भूतिमैश्वर्यं जीवनं वा न विन्दति । विपदि धैर्यमेव कार्यमित्यर्थः ॥ 1-157-24 किञ्च यत्पुरोचनादिभिः कर्तव्यं तत्स्वयमेव कार्यमित्याह । अनाप्तैरिति । अनाप्तैः पुरोचनादिभिर्दत्तं दातुमारब्धं यदलोहजं शस्त्रं तत्स्वयमादत्ते स्वीकरोति तान्हत्वा आत्मानं रक्षति । पुरोचनादिषु जीवत्सु अनुसारादिशङ्का स्यादिति भावः ।#श्वाविदिति गूढदृष्टान्तः | श्वाविद्वत्कर्तव्यमिति भावः | शरणं सुरङ्गाम् ॥ 1-157-25 आत्मना सह पञ्च इन्द्रियाणि । आहाराद्यभावेन पीडयम् अनु पश्चात् न पीड्यते भवानिति शेषः । यद्वा । नाचक्षुरित्युक्तस्यैव विवरणम् । चरन्मार्गानिति । विश्वासार्थं षड्दग्धव्या इत्याह । आत्मनेति । लुप्तोपममेतत् । त्वत्सदृशेन सह आत्मनः तव सदृशान्पञ्च नानुपीड्यते भवानिति शेषः ॥ 1-157-29 अब्रुवन्निव व्यक्तां वाचमकुर्वन्निव ॥सप्तपञ्चाशदधिकशततमोऽध्यायः ॥ 157 ॥