ಬಭ್ರುವಾಹನ :
ಯಾರು ತಿಳಿಯರು ನಿನ್ನ ಭುಜಬಲದ ಪರಾಕ್ರಮ
ಸಮರದೋಳ್ ಆರ್ಜಿಸಿದ ಆ ನಿನ್ನ ವಿಜಯಗಳ ಮರ್ಮ
ಎಲ್ಲದಕು ಕಾರಣನು ಶ್ರೀಕೃಷ್ಣ ಪರಮಾತ್ಮ
ಹಗಲಿರುಳು ನೆರಳಂತೆ ತಲೆ ಕಾಯ್ದು ಕಾಪಾಡಿ
ಜಯವ ತಂದಿತ್ತ ಆ ಯದುನಂದನ
ಅವನಿಲ್ಲದೆ ಬಂದ ನೀನು ತೃಣಕ್ಕೆ ಸಮಾನ
ಅರ್ಜುನ :
ಅಸಾಹಾಯ ಶೂರ ನಾ ಅಕ್ಷೀಣ-ಬಲನೋ
ಹರನೊಡನೆ ಹೋರಾಡಿ ಪಾಶುಪತವಂ ಪಡೆದವನೋ
ಆಗ್ರಹದೊಳ್ ಎದುರಾಗೊ ಅರಿಗಳಂ ನಿಗ್ರಹಿಸೋ ವ್ಯಾಘ್ರನಿವನೋ
ಉಗ್ರಪ್ರತಾಪೀ
ಬಭ್ರುವಾಹನ :
ಓ೩ ಹೊ ಹೊ ಹೊ ಹೊ! ಉಗ್ರಪ್ರತಾಪಿ ಆ! ಹಹಹಹ!
ಸಭೆಯೊಳಗೆ ದ್ರೌಪತಿಯ ಸೀರೆಯನು ಸೆಳೆವಾಗ
ಎಲ್ಲಿ ಅಡಗಿತ್ತೋ ಈ ನಿನ್ನ ಶೌರ್ಯ?
ನೂಪುರಂಗಳ ಕಟ್ಟಿ ನಟಿಸಿ ತಕಥೈಯ್ ಅಂದು ನಾಟ್ಯ ಕಲಿಸಿದ ನಪುಂಸಕ ನೀನು!
ಚಕ್ರವ್ಯೂಹದೆ+++(=ದಲ್ಲಿ)+++ ನುಗ್ಗಿ ಛಲದಿಂದ ಛೇದಿಸದೆ,
ಮಗನನ್ನು ಬಲಿ ಕೊಟ್ಟ ಭ್ರಷ್ಟ ನೀನು!
ಗಂಡುಗಲಿಗಳ ಗೆಲ್ಲೊ ಗುಂಡಿಗೆಯು ನಿನಗ್ ಎಲ್ಲೋ?
ಖಂಡಿಸದೆ ಉಳಿಸುವೆ ಹೋಗೊ ಹೋಗೆಲೋ ಶಿಖಂಡಿ
ಅರ್ಜುನ :
ಫಡ ಫಡ ಶಿಖಂಡಿಯಂದ್ ಅಡಿಗ್ ಅಡಿಗೆ ನುಡಿಯ ಬೇಡೆಲೋ ಮೂಢ!
ಭಂಡರ್ ಎದೆ ಗುಂಡಿಗೆಯ ಖಂಡಿಸುತಾ ರಣಚಂಡಿಗ್ ಔತಣವೀವ ಈ ಗಾಂಡೀವೀ!
ಗಂಡುಗಲಿಗಳ ಗಂಡ ಉದ್ದಂಡ ಭೂ-ಮಂಡಲದೊಳ್ ಅಖಂಡ-ಕೀರ್ತಿ ಪ್ರಚಂಡ
ಬಭ್ರುವಾಹನ :
ಚಂಡನೋ ಪ್ರಚಂಡನೋ ಪುಂಡನೋ ನಿರ್ಧರಿಸುವುದು ರಣ-ರಂಗ
ಊಡು ಬಾಣಗಳ! ಮಾಡುವೆ ಮಾನಭಂಗ
ಅರ್ಜುನ :
ಕದನದೋಳ್ ಕಲಿ-ಪಾರ್ಥನಂ ಕೆಣಕಿ ಉಳಿದವರಿಲ್ಲ
ಬಭ್ರುವಾಹನ :
ಅಬ್ಬರಿಸಿ ಭೊಬ್ಭಿರಿದರ್ ಇಲ್ಲಾರಿಗೂ ಭಯವ್ ಇಲ್ಲ
ಅರ್ಜುನ :
ಆರ್ಭಟಿಸಿ ಬರುತಿದೆ ನೋಡು ಅಂತಕನ ಆಹ್ವಾನ
ಬಭ್ರುವಾಹನ : ಅಂತಕನಿಗೆ ಅಂತಕನು ಈ ಬಭ್ರುವಾಹನ