अथ पालाशं दन्तधावनं नाद्यात् ॥ ६१.१ ॥
नैव श्लेष्मातकारिष्टविभीतकधवधन्वनजम् ॥ ६१.२ ॥
न च बन्धूकनिर्गुण्डीशिग्रुतिल्वतिन्दुकजम् ॥ ६१.३ ॥
न च कोविदारशमीपीलुपिप्पलेङ्गुदगुग्गुलुजम् ॥ ६१.४ ॥
न पारिभद्रकाम्लिकामोचकशाल्मलीशणजम् ॥ ६१.५ ॥
न मधुरम् ॥ ६१.६ ॥
नाम्लम् ॥ ६१.७ ॥
नोर्ध्वशुष्कम् ॥ ६१.८ ॥
न सुषिरम् ॥ ६१.९ ॥
न पूतिगन्धि ॥ ६१.१० ॥
न पिच्छिलम् ॥ ६१.११ ॥
न दक्षिणापराभिमुखः ॥ ६१.१२ ॥
अद्याच्चोदङ्मुखः प्राङ्मुखो वा ॥ ६१.१३ ॥
वटासनार्कखदिरकरञ्जबदरसर्जनिम्बारिमेदापामार्गमालतीककुभबिल्वानामन्यतमम् ॥ ६१.१४ ॥
कषायं तिक्तं कटुकं च ॥ ६१.१५ ॥
कनीन्यग्रसमस्थौल्यं सकूर्चं द्वादशाङ्गुलम् ।
प्रातर्भूत्वा च यतवाग्भक्षयेद्दन्तधावनम् ॥ ६१.१६ ॥
प्रक्षाल्य भङ्क्त्वा तज्जह्याच्छुचौ देशे प्रयत्नतः ।
अमावास्यां न चाश्नीयाद्दन्तकाष्ठं कदाचन ॥ ६१.१७ ॥