03 अपह्नुतयः

वदन्ती जारवृत्तान्तं पत्यौ धूर्ता सखीधिया।
पतिं बुद्ध्वा सखि ततः प्रबुद्धास्मीत्यपूरयत्॥ 1 ॥
रुचिरस्वरवर्णपदा रसभाववती जगन्मनो हरति।
तत्किं तरुणी नहि नहि वाणी बाणस्य मधुरशीलस्य॥ 2 ॥
सीत्कारं शिक्षयति व्रणयत्यधरं तनोति रोमाञ्चम्।
नागरिकः किं मिलितो नहि नहि सखि हैमनः¹ पवनः॥ 3 ॥

काले पयोधराणामपतितया⁴ नैव शक्यते स्थातुम्।
उत्कण्ठितासि बाले नहि नहि सखि पिच्छिलः⁵ पन्थाः॥ 4 ॥

प्रहरति न पञ्चबाणः केवलमबले निमेषोऽपि।
वर्षति परं न देवः क्षणदायी विप्रयोगं ते॥ 5 ॥
मधुरस्वना ⁶धृतोर्णा मण्याभरणा सुशोभना ⁷सुदती।
मत्स्कन्धोचितदण्डा भिक्षो दयितास्ति किं न मे वीणा॥ 6 ॥

⁸रागी भिनत्ति निद्रां तल्पं न जहाति निष्ठुरं दशति।
चतुरे किं प्राणेशो नहि नहि सखि मत्कुणव्रातः॥ 7 ॥

आदौ गृहीतपाणिः पश्चादारूढजघनकटिभागा।
नखमुखलालनसुखदा सा किं रामास्ति नैव भोः ⁹पामा॥ 8 ॥

नाथ विलोकय ¹⁰मेघं नहि नहि पापं तवातिपुण्यायाः।
नहि कथयामि ¹¹पयोधरमपसारय कञ्चुकीमुरसः॥ 9 ॥

पञ्चदशीरजनिसमा तारामणिभूषणापि कोकिलवाक्।
चन्द्रसमा गतवसना हस्तगता स्त्री न मे वीणा॥ 10 ॥
नाथ ¹²मयूरो नृत्यति तुरगाननवक्षसः कथं नृत्यम्।
नहि कथयामि कलापिनमिह सुखलापी प्रिये कोऽस्ति॥ 11 ॥

अक्षरमैत्त्रीभाजः सालङ्कारस्य चारुवृत्तस्य।
किं ब्रूमो सखि यूनो नहि नहि सखि पद्यबन्धस्य॥ 12 ॥
इह पुरोऽनिलकम्पितविग्रहा मिलति का न वनस्पतिना लता।
स्मरसि किं सखि कान्तरतोत्सवं न हि घनागमरीतिरुदाहृता॥ 13 ॥
तन्वी चारुपयोधरा सुवदना श्यामा मनोहारिणी नीता निष्करुणेन केनचिदहो देशान्तरादागता।
¹³उत्सङ्गोचितया तया रहितया किं जीवनं प्रेक्षसे भिक्षो ते जयितास्ति किं नहि नहि प्राणप्रिया तुम्बिका॥ 14 ॥