काव्ये विश्वासटिप्पन्यः

जाह्नवी मूर्ध्नि पादे वा कालः कण्ठे वपुष्यथ।
कामारिं कामतातं वा कंचिद्देवं भजामहे॥ 1 ॥
गाङ्गयामुनयोगेन तुल्यं हारिहरं वपुः।
पातु नाभिगतं पद्मं यस्य तन्मध्यगं यथा॥ 2 ॥
¹अबलाढ्यविग्रहश्री²रमर्त्यनति³रक्षमालयोपेतः।
पञ्च⁴क्रमोदितमुखः पायात्परमेश्वरो⁵ मुहुरनादिः⁶॥ 3 ॥

पन्नगधारिकराग्रो गङ्गोमालक्षितोऽङ्गदोऽग्रभुजः।
शशिखण्डशेखर उमापरिग्रहो मुहुरनादिरवतु त्वाम्॥ 4 ॥
⁷गवीशपत्रो ⁸नगजार्तिहारी ⁹कुमारतातः ¹⁰शशिखण्डमौलिः।
¹¹ लङ्केशसंपूजितपादपद्मः पायादनादिः¹² परमेश्वरो¹³ वः॥ 5 ॥

स्फटिकमरकतश्रीहारिणोः प्रीतियोगात्तदवतु वपुरेकं कामकंसद्विषोर्वः।
भवति गिरिसुतायाः सार्धमम्भोधिपुत्र्या सदृशमहसि कण्ठे यत्र सीमाविवादः॥ 6 ॥
संप्राप्तं ¹⁴मकरध्वजेन ¹⁵मथनं त्वत्तो मदर्थे पुरा तद्युक्तं ¹⁶बहुमार्गगां मम पुरो निर्लज्ज वोढुस्तव।
तामेवानुनयस्व-भावकुटिलां हे ¹⁷कृष्ण कण्ठ-ग्रहं मुञ्चेत्याह रुषा यमद्रितनया लक्ष्मीश्च पायात्स वः॥ 7 ॥

यौ तौ शङ्खकपालभूषितकरौ मालास्थिमालाधरौ देवौ द्वारवतीश्मशाननिलयौ नागारिगोवाहनौ।
द्वित्र्यक्षौ बलिदक्षयज्ञमथनौ श्रीशैलजावल्लभौ पापं वो हरतां सदा हरिहरौ श्रीवत्सगङ्गाधरौः॥ 8 ॥
लोले ब्रूहि कपालिकामिति पिता कस्ते पतिः पाथसां कः प्रत्येति जलादपत्यजननं प्रत्येति यः ¹⁸प्रस्तरात्।
इत्थं पर्वतसिन्धुराजसुतयोराकर्ण्य वाक्चातुरीं संस्मेरस्य हरेर्हरस्य च मुदो निघ्नन्तु विघ्नं तु वः॥ 9 ॥

यस्मादासीत्कुमारः कुवलयदलवल्लीलयोवाह गङ्गां वामा¹ यस्याङ्गसङ्गा पिहितजनचयो यो गवीशध्वजोऽपि।
लङ्केशाद्येकनाथो ²हिमकररुचिभृद्भूविशेषाश्रमोऽसौ वर्णस्याद्यस्य लोपादपहरतु हरिः पातकं वः स्मरारिः॥ 10 ॥

पार्वत्यर्धाङ्गीकरणात्; [पक्षे] बलाढ्यो बलिष्ठः. ↩︎ ↩︎
देवसंपूजितः; [पक्षे] मृत्युलोकसंपूजितः. तस्य रक्षणात्. ↩︎ ↩︎
अक्षमाला जपमाला; [पक्षे] क्षमालयं पृथ्वी. ↩︎
पञ्चाननः; [पक्षे] चक्रेण मोदितं मुखं यस्य सः. ↩︎
परमेश्वरः शिवः रमेश्वरो विष्णुः. ↩︎
न विद्यते आदिर्यस्य सः; [पक्षे] आद्यवर्णरहितः. ↩︎
गवीशो वृषो वाहनं यस्य; (पक्षे आद्याक्षरस्य लोपात् वीशो गरुडो वाहनं यस्य.) ↩︎
पार्वतीदुःखनाशकः [पक्षे] गजेन्द्रपीडाहारकः. ↩︎
कार्तिकेयपिता; [पक्षे] मदनपिता. ↩︎
चन्द्रः शिरसि यस्य; [पक्षे] मयूरपिच्छानि शिरसि यस्य. ↩︎
रावणपूजितचरणकमलः; [पक्षे] को ब्रह्मा, ईशः शिवः, एताभ्यां पूजितपादपद्मः. ↩︎
न विद्यत आदिर्यस्य सः; [पक्षे] आद्याक्षरशून्यः. ↩︎
शिवः; [पक्षे] विष्णुः. ↩︎
शिवपक्षे मदनेन; विष्णुपक्षे समुद्रेण. ↩︎
विनाशः; [पक्षे] विलोडनम्. ↩︎
नदीम्. गङ्गामित्यर्थः; [पक्षे] वेश्याम्. कंसस्य कुब्जां दासीमित्यर्थः. ↩︎
कृष्णकण्ठ नीलकण्ठ ग्रहं निर्बन्धं मुञ्च; [पक्षे] कृष्ण कण्ठग्रहं मत्कण्ठग्रहं मुञ्च. ↩︎
पाषाणात्. पार्वत्याः पर्वतगर्भसंजननत्वात्. ↩︎