काव्ये विश्वासटिप्पन्यः

धातुश्चतुर्मुखीकण्ठशृङ्गाटकविहारिणीम्¹।
नित्यं प्रगल्भवाचालामुपतिष्ठे सरस्वतीम्॥ 1 ॥

सूक्ष्माय शुचये तस्मै नमो वाक्तत्त्वतन्तवे।
विचित्रो यस्य विन्यासो विदधाति जगत्पटम्॥ 2 ॥
तद्दिव्यमव्ययं धाम सारस्वतमुपास्महे।
यत्प्रसादात्प्रलीयन्ते मोहान्धतमसश्छटाः²॥ 3 ॥

पातु वो निकषग्रावा³ मतिहेम्नः सरस्वती।
प्राज्ञेतरपरिच्छेदं⁴ वचसैव करोति या॥ 4 ॥

शारदा शारदाम्भोजवदना वदनाम्बुजे।
सर्वदा⁵ सर्वदास्माकं सन्निधिं सन्निधिं⁶ क्रियात्॥ 5 ॥

करबदरसदृशमखिलं भुवनतलं यत्प्रसादतः कवयः।
पश्यन्ति सूक्ष्मतयः⁷ सा जयति सरस्वती देवी॥ 6 ॥

शरणं करवाणि शर्मदं ते चरणं वाणि चराचरोपजीव्यम्।
करुणामसृणैः⁸ कटाक्षपातैः कुरु मामम्ब कृतार्थसार्थवाहम्॥ 7 ॥

आशासु राशीभवदङ्गवल्लीभासैव दासीकृतदुग्धसिन्धुम्।
मन्दस्मितैर्निन्दितशारदेन्दुं वन्देऽरविन्दासनसुन्दरि त्वाम्॥ 8 ॥
वचांसि वाचस्पतिमत्सरेण साराणि लब्धुं ग्रहमण्डलीव।
मुक्ताक्षसूत्रत्वमुपैति यस्याः सा सप्रसादास्तु सरस्वती वः॥ 9 ॥
ज्योतिस्तमोहरमलोचनगोचरं तज्जिह्वादुरासदरसं मधुनः प्रवाहम्।
दूरे त्वचः पुलकबन्धि परं प्रपद्ये सारस्वतं किमपि कामदुघं रहस्यम्॥ 10 ॥
तव करकमलस्थां ⁹स्फाटिकीम¹⁰क्षमालां नखकिरणविभिर्न्नां¹¹ दाडिमीबीजबुद्ध्या।
¹²प्रतिकलमनुकर्षन्येन ¹³कीरो निषिद्धः स भवतु मम भूत्यै¹⁴ वाणि ते मन्दहासः॥ 11 ॥

¹⁵तमोगणविनाशिनी सकलकालमुद्द्योतिनी धरातलविहारिणी ¹⁶जडसमाजविद्वेषिणी।
¹⁷कलानिधिसहायिनी लसदलोलसौदामिनी मदन्तरवलम्बिनी भवतु कापि ¹⁸कादम्बिनी॥ 12 ॥

या कुन्देन्दुतुषारहारधवला या शुभ्रवस्त्रावृता या वीणावरदण्डमण्डितकरा या श्वेतपद्मासना।
या ब्रह्माच्युतशङ्करप्रभृतिभिर्देवैः सदा वन्दिता सा मां पातु सरस्वती भगवती निःशेषजाड्यापहा॥ 13 ॥

चतुष्पथम्. ↩︎
समूहः. ↩︎
स्वर्णादिपरीक्षणशिला. ↩︎
पण्डितमूर्खयोर्भेदम्. ↩︎
सर्वदात्री. ↩︎
उत्तमनिधिम्. ↩︎
कुशाग्रबुद्धयः. ↩︎
स्निग्धैः. ↩︎
स्फटिकमयीम्. ↩︎
जपमालाम्. ↩︎
मिश्राम्. ↩︎
प्रतिक्षणम्. ↩︎
शुकः. ↩︎
समृद्ध्यै. ↩︎
अज्ञानम्; [पक्षे] अन्धकारः. ↩︎
मन्दबुद्धिः; (पक्षे डलयोः सावर्ण्यात् जलम्.) ↩︎
विद्वज्जनः, [पक्षे] चन्द्रः. ↩︎
सरस्वती; [पक्षे] मेघमाला. ↩︎