अञ्जलिस्थानि पुष्पाणि वासयन्ति करद्वयम् ।
अहो सुमनसां वृत्तिर् वामदक्षिणयोः समा ॥२१७१॥
गोभटस्य । (सु।र। १२३२, शा।प। १९९)
अयं निजः परो वेति गणना लघुचेतसाम् ।
उदारचरितानां तु वसुधैव कुटुम्बकम् ॥२१७२॥
केशटस्य । (सु।र। १२४१)
सुजनो न याति वैरं परहितबुद्धिर् विनाशकालेऽपि ।
छेदेऽपि चन्दनतरुः सुरभयति मुखं कुठारस्य ॥२१७३॥
श्रीव्यासपादानाम् । (स्व् २४१, शा।प। २३७, सू।मु। ६।१२)
असन्तो नाभ्यर्थ्याः सुहृद् अपि न याच्यस् तनुधनः
प्रियावृत्तिर् न्याय्या चरितम् असुभङ्गेऽप्य् अमलिनम् ।
विपद्य् उच्चैः स्थेयं पदम् अनुविधेयं च महतां
सतां केनोद्दिष्टं विषममसिधाराव्रतम् इदम् ॥२१७४॥
धर्मकीर्तेः । (सु।र। १२१३, स्व् २८०)
ये दीनेषु दयालवः स्पृशति यान् अल्पोऽपि न श्रीमदो
व्यग्रा ये च परोपकारकरणे हृष्यन्ति ये याचिताः ।
स्वस्थाः सत्य् अपि यौवनोदयमहाव्याधिप्रकोपेऽपि ये
ते भूमण्डनैकतिलकाः सन्तः कियन्तो जनाः ॥२१७५॥
शब्दार्णवस्य ॥ (सु।र। १२३८, शा।प। २२८, सू।मु। ६।३०)