गङ्गा शम्भुशिरोजलं जलनिधिर् देवस्य लक्ष्मीपतेः
शय्याक्षालनवारि वारि सरसः क्लीबस्य निन्द्यं सताम् ।
नद्यस् ताः शतशोऽन्ययोषित इति त्यक्तोपभोगो युवा
सारङ्गः सततोन्नतेन शिरसा धाराधरं याचते ॥१९६६॥
कस्यचित् ।
किं नैव सन्ति भुवि तामरसावतंसा
हंसावलीवलयिनो जलसन्निवेशाः ।
को दुर्ग्रहो ग्रहवतः खलु चातकस्य
पौरन्दरीं यद् अभिवाञ्छति वारिधाराम् ॥१९६७॥
कस्यचित् । (स्व्। ६८१)
एक एव खगो मानी वने वसति चातकः ।
पिपासितो वा म्रियते याचते वा पुरन्दरम् ॥१९६८॥
कस्यचित् । (स्व् ६७४, शा।प। ८५२)
तृषार्तां शोचन्तीं न गणयति दीनां गृहवतीं
न दीनः पक्षाभ्यां स्थगयति शिशून् आलपति वा ।
कुटुम्बी सारङ्गः प्रसरति निदाघेऽप्य् अविकलः
कुलस्य स्वस्यायं पथि न पदम् अल्पं श्लथयति ॥१९६९॥
गोसोकस्य ।
यद् अस्माद् अस्माभिश् चिरविहितसेवैर् अपि घनाद्
अनाप्ताः सारङ्गैः कतिपयपयःशीकरकणाः ।
द्विषन्तो वेशन्तं भृशम् अपलपन्तः पतिम् अपाम्
अपार्थीकुर्वन्तः सरितम् अनुयामस् तद् अपि तम् ॥१९७०॥
आवन्तिकद्रव्यस्य ।